ДУШАНБЕ, 8 ноя — Sputnik. Имрӯз дар Қасри миллат Эмомалӣ Раҳмон вазири умури хориҷаи Ҷумҳурии Исломии Эрон Муҳаммаҷавод Зарифро, ки бо сафари корӣ дар Тоҷикистон қарор дорад, ба ҳузур пазируфт.
Ба иттилоъи дафтари матбуотии раисҷумҳури Тоҷикистон, дар ҷараёни мулоқот масоили ҳамкориҳои дуҷонибаи Тоҷикистон ва Эрон баррасӣ карда шуд.
"Ҷонибҳо зимни мулоқот масъалаҳои муҳим, аз ҷумла татбиқи тавофуқоти қаблан ба даст омада, рушди ҳамкории иқтисодиву тиҷорӣ, сармоягузорӣ, энергетика, нақлиёт, кишоварзӣ ва санъатро мавриди баррасӣ қарор доданд", — омадааст дар иттилоъия.
Гуфта мешавад, дар ин замина ҷонибҳо аҳамияти Ҷаласаи навбатии Кумисюни муштараки байниҳукуматии ҳамкориҳои тиҷорӣ — иқтисодӣ ва фарҳангиро, ки рӯзҳои наздик дар шаҳри Душанбе баргузор мегардад, махсус таъкид карданд.
Дар мулоқот ҳамчунин дар масоили амнияти минтақаӣ, мубориза бо теруризму ифротгароӣ ва ҳамкорӣ дар доираи созмонҳои минтақаиву ҷаҳонӣ мубодилаи афкор сурат гирифт.
