ДУШАНБЕ, 16 дек — Sputnik. Бонки миллии Тоҷикистон кормандони саррофиҳоро ҷарима намекунад, навиштааст Хадамоти матбуотии БМТ.
Ин изҳороти БМТ баъд аз нашри хабари расонаҳо дар бораи худкушии Алихон Азимов, корманди яке аз саррофиҳо дар бозори "Фаровон" пахш мешавад. Яке аз сабабҳои марги Азимовро хабарнигорон дар ҷарима шудани ӯ рабт додаанд.
"Барои вайрон намудани талаботи санадҳои меъёрии ҳуқуқӣ Бонки миллии Тоҷикистон кормандони саррофиҳоро ҷарима намекунад. Дар сурати ошкор шудани чунин ҳолатҳо дар фаъолияти саррофиҳо БМТ моликони ҳуқуқии онҳо, яъне бонкҳо ва ташкилотҳои қарзии хурдро ҷарима мекунад",- омадааст дар изҳорот.
Роҳбарияти Бонки миллии Тоҷикистон аз марги бармаҳали Алихон Азимов мутаассиф буда, ба наздикону азизони марҳум изҳори тассалият намудааст.
Манбаъ таъкид кардааст, ки дар робита ба ин ҳодиса мақомоти тафтишотии дахлдор баъд аз санҷиши сабабҳои даст ба худкушӣ задани ин сарроф хулосаи ҳуқуқии худро пешниҳод менамояд.
