ДУШАНБЕ, 12 мар – Sputnik. Тибқи иттилои ВУД Тоҷикистон, ба идораи милиса дар ноҳияи Сино, сокини 49-солаи пойтахт муроҷиат карда, аз қаллобии марди 51-сола, сокини кӯчаи Алишер Навоии Душанбе шикоят кардааст.
Ба иттилои ВУД, муроҷиаткунанда арз доштааст, ки марди 51-сола моҳи декабри соли 2018, ба бовариаш даромада, аз ӯ 1 тангаи тиллоии қадима бо арзиши 50 000 доллари амрикоиро гирифта, то ҳол маблағро надодааст.
Манбаъ афзудааст, ки инчунин ба идораи милиса сокини 38-солаи пойтахт муроҷиат карда, шикоят кардааст, ки марди 38-солаи сокини ҷамоати деҳоти Ғалабаи ноҳияи Фархор, бо роҳи фиреб ба бовариаш даромада, аз ӯ 270 ҳазор сомониро гирифта, то ҳол маблағашро барнагардонидааст.
ВУД таъкид кардааст, ки айни замон нафарони муттаҳам дар ҳабси пешакӣ қарор дошта, тафтишот дар ин самт идома дорад.
