Город Душанбе, архивное фото

Портали савдои Тоҷикистон-WWW. TAJTRАDE.TJ ифтитоҳ ёфт

268
(Таҷдидшуда 19:53 26.04.2019)
Он ба соҳибкорони  ватанӣ ва хориҷӣ  имкони гирифтани маълумот  оид ба ҳуҷҷатгузории  содирот ва воридоти молро муҳайё месозад

ДУШАНБЕ, 26 апр - Sputnik. Имрӯз дар шаҳри Душанбе дар маросими расмӣ  бо пахши тугмача “Портали савдои Тоҷикистон –WWW. TAJTRАDE.TJ” кушода шуд, ки дар маросими ифтитоҳи он намояндагони вазорату идораҳои марбутаи мамлакат, ташкилотҳои тиҷоратӣ, иттиҳодияҳои ҷамъиятӣ, созмонҳои  байналмилалии молиявӣ ва шарикони рушд, инчунин намояндагони Корпуси дипломатии муқими Тоҷикистон иштирок намуданд, иттилоъ додааст агентии “Ховар”.

Портали  савдои Тоҷикистон  аз ҷониби  Вазорати рушди иқтисод ва савдои Тоҷикистон дар ҳамкорӣ бо вазорату идораҳои марбутаи мамлакат  ва бо кумаки шарикони рушд — Ҳукумати Конфедератсияи Швейтсария, Барномаи Рушди Созмони Милали Муттаҳид  ва Созмони Амният ва Ҳамкорӣ дар Аврупо таҳия гардидааст.

Он ба соҳибкорони  ватанӣ ва хориҷӣ  имкони гирифтани маълумот  оид ба ҳуҷҷатгузории  содирот ва воридоти молро дода, инчунин ба онҳо  дар мавриди сарфаи вақт ва хароҷот сабукӣ   меорад.

Портали савдои Тоҷикистон, ки бори нахуст созмон дода шуд, дар таҷрибаи кишварҳои ҷаҳон мавриди истифода қарор дода шуда, он  аз ҷониби коршиносони миллӣ таҳия  гардидааст.

Зикр гардид, ки Портали савдои Тоҷикистон таҷрибаи нахустин дар фаъолияти савдои хориҷии мамлакат  буда, ба соҳибкорони ватанию хориҷӣ ва дигар ҷонибҳои ҳавасманд имконияти гирифтани маълумотро вобаста ба расмиёти воридотӣ, содиротӣ ва транзитии 39 гурӯҳи молӣ баробар ба тахминан 1500 молу маҳсулот фароҳам меоварад.

268
Барчаспҳо:
душанбе, савдо, портали интернетӣ, Тоҷикистон