Представители Таджикистана и Кыргызстана проводят переговоры по ситуации на границе

114 аз 467 км: Тоҷикистону Қирғизистон қадами аввалро бардоштанд

1266
(Таҷдидшуда 12:56 15.01.2020)
Ҳайатҳои Тоҷикистону Қирғизистон ба ин тавофуқ расиданд, ки дар навбати аввал аз 467 километри марзи баҳсӣ дар навбати аввал 114 километри онро таъйин ва аломатгузорӣ кунанд

ДУШАНБЕ, 15 янв — Sputnik. Ин аввалин ҷаҳиши амалӣ дар ин баҳсест, ки ҳудуди 40 сол ба ин сӯ идома дорад. Ҷаласаи кории ҳайатҳои Тоҷикистону Қирғизистон таҳти раҳбарии муовинони сарвазирони ду кишвар - Азим Иброҳим ва Ҷаниш Раззоқов рӯзи гузашта, 14 январ, бо имзои як протокол ё ёддошти ҳусни тафоҳум ба анҷом расид.

Музокирот дар минтақаи миёни посгоҳҳои “Қизил Бел” – и Қирғизистон ва “Гулистон” – и Тоҷикистон ва бо ширкати раҳбарони мақомоти амниятии ду кишвар баргузор шуд.

Мавзӯи аслии нишаст баррасии масоили марзӣ ва ҳаводиси рухдода дар марзи Тоҷикистону Қирғизистон буд, ки тайи ним моҳи соли равон иттифоқ афтода, вазъи, ба қавли мақомот, ташвишовареро ба миён оварда буданд.

Аз ҷумла нигаронии мақомоти амниятии ду кишвар аз ин буд, ки дар низоъи марзӣ силоҳи шикорӣ аз сӯи аҳолӣ мавриди истифода қарор гирифт ва эҳтимоли таҳаввули чунин вазъ ба як даргирии мусаллаҳона миёни мардуми марзнишин ва кашонидани пойи нерӯҳои амниятӣ ба ин низоъ ба миён омад.

Ҷаласаи корӣ ё музокироти мақомоти қудратӣ ва мулкии Тоҷикистон қариб 12 соат давом кард ва пас аз баҳсу баррасиҳо проткол ба имзо расид, ки бино ба он, гуруҳҳои корӣ муваззаф шуданд лоиҳаи хатти марзи Тоҷикистону Қирғизистонро дар қисматҳои боқимондаи баҳсӣ омода кунанд.

Бино ба протокол:

- Гуруҳҳои кории ҳуқуқӣ муваззаф шуданд то 15 феврали 2020 мавқеи мувофиқашудаи худро дар бораи тасвири гузариши хати лоиҳавӣ дар қисмати 114 километри марз ироа диҳанд; - Гуруҳҳои кории топографӣ муваззаф шуданд, ки то аввали марти 2020 гузинаҳои тавофуқшудаи мубодилаи замини мусовӣ ба тӯлу арз дар ноҳияи Бодканд ва шаҳри Исфараро дар бахшҳои Самарқандак ва Кӯктош анҷом диҳанд;

- Тарафайн тавофуқ карданд, ки ҳамчунон гаштҳои муштаракро дар роҳҳои Чоркӯҳ-Оқсой-Ворух, Кӯктош-Ӯртабуз идома диҳанд ва ҳамчунин ба насби чароғакҳо, камераҳои назоратӣ дар тақоту (буриш)-ҳои бузургроҳҳои Исфара-Ворух ва Бодканд-Исфана иқдом кунанд.

- Ба мақомоти маҳаллии манотиқи марзӣ дастур дода шуд, то иқдомоти ҷилавгирӣ аз бурузи ҳодисаҳо, ҳамчунин ҳалли мушкилоти аҳолии манотиқи марзиро тақвият диҳанд;

- Ҳамкории ҳамаҷонибаи мақомоти маҳаллии вилоятҳои Бодканд ва Суғд ба ҳадафи рушди муносиботи иқтисодӣ – иҷтимоӣ, фарҳангӣ – башардӯстона, ҳамчунин ҷилавгирӣ аз даргириҳо шиддат бахшида шавад;

 - Тарафайн ба як назари муштарак расиданд, ки қатъан тавофуқномаҳои марбут ба пӯшиши кори Комиссияи таъйин ва аломатгузории марзҳои Тоҷикистону Қирғизистон, гуруҳҳои корӣ, ҷаласаҳои марбут ба масоили марзӣ дар расонаҳоро риоят кунанд.

Тоҷикистону Қирғизистон 987 километр марзи муштарак доранд. Комиссияи муштараки таъйин ва аломатгузории марзҳо, ки соли 2001 ду кишвар эҷод карданд, танҳо соли 2013 тавонист 520 километри марзро дар қисматҳои баландкӯҳ тасбит кунад. Бақия 467 километри он ба вилоятҳои Суғди Тоҷикистон ва Бодканди Қирғизистон рост меояд, ки то ба ҳол тасбит нашудааст.

Ҳайатҳои ду кишвар дар Исфара ҳоло тасмим гирифтаанд дар қадами аввал 114 километри онро дар қисматҳои Самарқандак ва Кӯктош (ҳамсоя бо Сомониёни Исфара) таъйин ва аломатгузорӣ кунанд ва ин ба ба он маъност, ки кори 353 километри дигар, бахусус минтақаи Ворух ба баъд афтодааст.

 Бино ба иттилои расмӣ, соли 2019 дар минтақаҳои марзии Тоҷикистону Қирғизистон 14 муноқишаю тирандозӣ иттифоқ афтодааст, ки 6 шаҳрванди Тоҷикистон ва 1 шаҳрванди Қирғизистонро кушта ва зиёда аз 60 нафарро захмӣ ба ҷой гузоштааст.

 Кор ба ин ҷо кашид, ки дар ҳаводиси ним моҳи ахири соли равон мавориди сангандозӣ ва тирпаронӣ дар ин марз афзоиш ёфт. Аммо то куҷо музокироти ахири ҳайатҳои Тоҷикистону Қирғизистон барои ҳалли муноқишаҳои марзӣ муассир хоҳад афтод, суоли вақт аст.

1266
Барчаспҳо:
аломатгузорӣ, таъйин, баҳси марзӣ, марз, тавофуқ, Қирғизистон, Тоҷикистон
Девушка в наручниках, архивное фото

Ҳашт ҳазор доллар деҳ ба Донишгоҳи тиббӣ дохил мекунам: боздошти устоди Донишгоҳи Хуҷанд

30
(Таҷдидшуда 12:28 10.08.2020)
Агентии назорати давлатии молиявӣ ва мубориза бо коррупсия дар Тоҷикистон Негматова Мунира омӯзгори Донишгоҳи давлатии Хуҷандро бо иттиҳоми гирифтани пора боздошт кардааст

ДУШАНБЕ, 10 авг — Sputnik.  Бино ба иттилои дафтари матбуотии Агентӣ,  Негматова Мунира Мухамедовна ба чунин амал ҳангоми дар вазифаи омӯзгори Донишгоҳи давлатии Хуҷанд кор карда истоданаш даст задааст.

Манбаъ мегӯяд, боздоштшуда аз шаҳрванд “А” барои ба Донишгоҳи тиббии Тоҷикистон дохил намудани хешаш-шаҳрванд “Б”  бо роҳи фиреб ва суиистифодаи боварӣ маблағи 8000 доллари ИМА талаб намуд.

“Санаи 27 апрели соли 2020 дар натиҷаи гузаронидани чорабиниҳои оперативӣ-тафтишотӣ Негматова М.М. баъди аз шаҳрванд “А” гирифтани маблағи 8000 доллари ИМА дастгир карда шуда, маблағи мазкур аз ӯ ҳамчун далели шайъӣ дарёфт ва гирифта шуд”,- афзудааст манбаъ.

Боздошти мансабдор барои миёнаравӣ ва тамаъи пора

Агентӣ мегӯяд, дар ин асос нисбати Негматова М.М. бо моддаи 247 қисми 4 банди “б” Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, тафтиши пешакии он идома дорад.

30
На улице в городе Душанбе, архивное фото

Гармии тоқатфарсо: пешгӯии дақиқи ҳавошиноcон барои имрӯз

54
(Таҷдидшуда 12:16 10.08.2020)
Имрӯз дар Тоҷикистон ҳаво камабр ва тағйирёбанда  шуда, ҳарорат дар шахри Душанбе рӯзона ба 35+37 дараҷа мерасад

ДУШАНБЕ, 10 авг – Sputnik. Бино ба гузориши Ожонси ҳавошиносӣ, имрӯз дар Вилояти Мухтори Кӯҳистони Бадахшон ҳаво камабр ва дар баъзе ноҳияҳо тағйирёбанда шуда, эҳтимоли бориши нисбатан сусти марҳилавӣ (0-0,5мм) дар назар аст.

Шамол аз самти шарқ бо суръати 3-8  метр дар як сония мевазад. Ҳаво дар ғарби вилоят шабона 12+17 ва рӯзона 28+33 дараҷа гарм  мешавад. Дар  шарқи вилоят  ҳаво шабона 3+8 ва рӯзона 18+23 дараҷа гарм мешавад, хабар медиҳад АМИТ "Ховар" бо такя ба Ожонси ҳавошиносӣ.

Ҳаво дар вилояти Суғд  камабр ва дар баъзе ҳолатҳо тағйирёбандаи бебориш мешавад. Шамол аз самти шарқ бо суръати 3-8 метр дар як сония мевазад. Ҳаво  дар водиҳо шабона 20+25 ва рӯзона 33+38 дараҷа гарм  мешавад. Дар ноҳияҳои кӯҳӣ ҳаво шабона 8+13  ва рӯзона 21+26 дараҷа гарм мешавад.

Дар вилояти Хатлон  ҳаво камабри бебориш мешавад. Шамол аз самти шарқ бо суръати  3-8 ва дар ноҳияҳои алоҳида бо шиддатнокии то 13-18 метр дар як сония вазида, чангу ғубор боқӣ мемонад. Ҳаво дар водиҳо шабона 20+25 ва рӯзона 35+40 дараҷа гарм мешавад. Дар  доманакӯҳҳо ҳаво шабона 16+21 ва рӯзона 29+34  дараҷа гарм мешавад.

Дар шаҳру ноҳияҳои тобеи марказ ҳаво камабр  ва тағйирёбанда шуда, бориши нисбатан сусти марҳилавӣ (0-0,5мм) дар назара аст. Шамол аз самти шарқ бо суръати 4-9  метр дар як сония  мевазад.  Ҳаво  дар водиҳо  шабона 16+21 ва рӯзона 33+38 дараҷа гарм мешавад.  Дар ноҳияҳои кӯҳӣ ҳаво шабона 12+17 ва рӯзона 29 +34 дараҷа  гарм мешавад.

Дар  шаҳри Душанбе ҳавои камабр ва  тағйирёбандаи бебориш пешбинӣ шудааст. Шамол аз самти шарқ бо суръати 3-8  метр дар як сония   мевазад. Ҳаво шабона 17+19 ва  рӯзона 35+37 дараҷа гарм мешавад.

54
Барчаспҳо:
обу ҳаво, гармӣ, Тоҷикистон