Абдулло Раҳмонзода, раиси Кумитаи ҷавонон ва варзиши назди ҳукумати Тоҷикистон

“Духтарҳоро ҳам барем ба аскарӣ?” Баҳси “облава” бо раиси Кумитаи ҷавонон

3559
(Таҷдидшуда 22:15 10.02.2020)
Баҳси ҷалби иҷбории ҷавонон ба хизмати аскарӣ, ки дар миёни мардум дар вожаи нохушоянди “облава” ё “сарбозшикор” хулоса мешавад, имрӯз, 10 феврал, дар нишасти хабарии Кумитаи ҷавонон ва варзиши Тоҷикистон бо ширкати раиси нав Абдулло Раҳмонзода низ ба миён омад

ДУШАНБЕ, 10 фев — Sputnik. Дар оғоз суол аз ин буд, ки чаро як ҷавон, шаҳрванди комилҳуқуқи як ҷомеаи пойбанд ба арзишҳои демократӣ маҳз ба ин шева ҷалби хизмати аскарӣ мешавад ва наметавонад аз ҳуқуқҳои худ дифоъ кунад?

Раиси Кумитаи ҷавонон ва варзиш гуфт, тибқи Конститутсияи Тоҷикистон хизмати ҳарбӣ уҳдадории ҳар як шаҳрванд аст ва давлат барои таъмини ин меъёр ҳақ дорад аз ҳама гуна механизмҳо, аз ҷумла роҳи иҷборӣ истифода кунад.

"Вақте супоридани андоз вазифаи ҳар кас аст ва андоз ихтиёрӣ супорида намешавад, давлат ҳатман механизми маҷбуриро истифода мекунад. Як кишвари демокративу ҳуқуқбунёд ҳам бошад, ба хотири таъмини меъёри Конститутсия, ки ба амнияти давлат, миллат ва ҷомеа рабт дорад, бояд иқдом кунад", - гуфт Абдулло Раҳмонзода.

Ин замон суоли дигаре ба сӯи ӯ партоб шуд, ки оё имкон надорад, ки ҳамин маҷбуран ба артиш бурдан аз роҳи қонун сурат гираду кор ба як падидаи номатлубе монанд ба “одамрабоӣ” накашад?

“Шояд пас аз 5 сол мафкураи мардуми мо ба ин дараҷа расад, ки ба худ гӯем, чун Конститутсия фармудааст, ман бояд онро бечунучаро иҷро кунам. Фармудаи қонун ин аст, ки вақте даъватнома омад, ҳар кас ҳатман бояд роҳи хизматро пеш гирад. Ман намедонам, ки аз ин қонунитар боз чӣ қонун бошад, ки мо онро пешниҳод кунем”, – гуфт раиси Кумитаи ҷавонон ва варзиш.

Суҳбати ӯ ба анҷом нарасида, луқмаи дигаре аз толор партофта шуд, ки дар ҳамон ҳол, шояд беҳтар аз ин намешуд суолро матраҳ кард: Шояд манзури ҳамкасбон он афродеанд, ки маъюбу ғайри қобили хизмат ҳастанду бо зӯрӣ бурда мешаванд.

Раиси Кумита лаб во накарда, ҳамон соҳиби суоли аввал исрор кард, ки на, маҳз ҷавонони сиҳатмандро дар назар дорад, чун мешавад на бо зӯрӣ, балки тариқи суд, ҷарима ё роҳҳои дигар онҳоро ба хизмат ҷалб намуд. Ин лаҳза каси дигаре ҳам луқма партофт, ки шояд ҳамон “облава” аз суду ҷарима роҳи беҳтар бошад.

Ба ин далел низ наметавон чашм пӯшид, зеро тибқи моддаи 344 – и Кодекси ҷиноии Тоҷикистон, саркашӣ аз даъвати сафарбарӣ ба сафи Қувваҳои мусаллаҳ аз ду то панҷ соли зиндонро пешбинӣ кардааст.

Русия ва донишгоҳ - роҳҳои гурез аз хизмати ҳарбӣ

Ҳамин мавқеъ буд, ки Маҳдӣ Собиров, полковники мустафъӣ, рӯзноманигори мустақил ва коршиноси масоили амниятӣ вориди баҳс шуд. Вай гуфт, дар кишварҳои демократӣ, назири Амрико, Олмон ва дигар ҷоҳо қонуни даъват ва ҳатто “военкомат” вуҷуд надорад.  Ба қавли ӯ, як ғурфа ҳаст, кас меравад, шартнома мебандад ва ба хизмати артиш меравад.

“Қонуни даъват хоси ҷомиаи Шӯравӣ аст. Азбаски воситаҳои истеҳсолот умумимиллӣ буданд, ҳама яксон муваззаф буданд, ки хизмати артиш раванд. Ҳоло ҳама шахсӣ шудааст ва артиш ҳам бояд ба шеваи нав кор кунад”, - гуфт Собиров.  

Полковники мустафъӣ чун дид, ҳама гӯш ба ӯ додаанду ӯро бо шавқ мешунаванд, дуртару фаротар рафт.

"Беш аз 500 ҳазор ҷавони мо дар Русия кор мекунанд. Баъзеро мепурсам, ки чаро намеоӣ, мегӯяд, ки то 28 - сола нашавам, намеоям (синни даъвати ҳарбӣ дар Тоҷикистон то 28 – солагӣ аст). Аз артиш мегурезад. Бинед, ки мераванд ба кадом як созмони ифротӣ мепайванданд, аммо аз хизмати Ватану Модар фирор мекунанд! Набояд чунин бошад", - гуфт Маҳдӣ Собиров.

Раиси Кумита: хизмати созмони ифротиро мепазиранду аз хизмати Ватан мегурезанд

Ин ҷо сӯҳбати ӯро Абдуллоҳ Раҳмонзода қатъ кард ва гуфт, мо худ чунин фазоеро ба вуҷуд овардем, ки ҷавони мо хизмати як созмони ифротиро мепазирад, аммо аз хизмати ватан мегурезад.   Ҷомиаи шаҳрвандӣ ҳамин гуна мафкураро ба вуҷуд овард, - гуфт ӯ.

Полковники мустафъӣ Маҳди Собиров боз ҷилави суханро ба даст гирифт ва гуфт, ин вазифаи Кумитаи ҷавонон аст, ки бо чунин чолишҳо мубориза барад.

“Ҷавонони мо дар Русия мемонанд, ин ҷо духтарони мо бешавҳар мешаванд. Ҷавонони бесаводро ба мактаби олӣ дохил мекунанд, ки артиш нараванд. Ман 25 сол афсари артиш будам, дидаам, ки аксарияти кулли сарбозон фарзандони коргару деҳқонанд. Чаро фарзандони тоҷирону мансабдорон артиш намераванд? Адолати иҷтимоиро бояд таъмин кард, ки пеши қонун ҳама баробар бошанд”, - таъкид намуд полковники мустаъфӣ.

Дуруст, дуруст, - таъйид кард раиси Кумита. Аммо коршиноси умури амниятӣ ба ҳарфҳои худ идома дод.

"Агар адолат бошад, мо дар ҳоле ки як миллион ҷавони шоистаи хизмат дорем, ду моҳ барои ҷалби 10 ҳазор сарбоз саргардон мешавем. Ҳам вазир саргардон асту ҳам корманди комиссариату милисаву ҷамоат. Вазорати дифоъ 10 сол аст, ки пешниҳод мекунад, то мӯҳлати хизмати ҳарбӣ коҳиш дода шавад, аммо Маҷлиси намояндагону дигар ниҳодҳо ҳеҷ ба истиқболаш намераванд", - илова намуд Маҳдӣ Собиров.

Донишгоҳ агар 4 дар кушояд, хизмати ҳарбӣ камаш 5 дар мекушояд

Маҳдӣ Собиров шояд дарёфт, ки дар нишасти матбуотӣ аст ва дигарон ҳам мехоҳанд суолҳои худро матраҳ кунанд, ба суханронии худ хотима бахшид ва Абдулло Раҳмонзода ба тафсир пардохт. Вай гуфт, ҳалли ин масоил дар салоҳияти Кумитаи ҷавонон нест, зеро кори ин ниҳод кори идеологӣ аст.

“Ман ба кормандони кумита гуфтам, мо бояд ба ҷавон хизмати ҳарбиро ҳамчун алтернатива ба донишгоҳ пешниҳод кунем. Ӯ бояд фаҳмад, ки вақте синфи 11 – ро хатм мекунад, ду роҳ дорад: ё тариқи Маркази миллии тестӣ вориди донишгоҳ шавад, ё хизмати ҳарбӣ равад. Мо ба онҳо бояд фаҳмонем, ки агар донишгоҳ барои ту чор дарро кушояд, хизмати ҳарбӣ ҳадди ақал панҷ дарро мекушояд. Ҳуҷҷати ҳарбӣ барои ту имкон медиҳад, ки софу содда тавонӣ дар баъзе сохторҳои қудративу низомӣ соҳиби ҷои кор шавӣ. Он дипломи донишгоҳро барои ту иваз мекунад. Бар замми ин, дар хизмати ҳарбӣ кас чӣ будани ифтихори миллӣ, чӣ будани Ватан - Модарро меомӯзонад. Ба қадри падар, модар, зан, фарзанд ва зиндагӣ расиданро меомӯзад. Агар ба муҳоҷират ҳам равад, ҳушёрии сиёсиро аз артиш омӯхтааст, ки аз афтодани ӯ ба доми гурӯҳҳои табаҳкор ҷилавгирӣ мекунад ва ифротӣ намешавад. Кори мо ҳамин аст – фаҳмонида додан. Вазорати соҳавӣ ҳар тасмимеро, ки гирад, мо онро дастгирӣ мекунем”, - гуфт раиси Кумита.

Духтаронро баранд, бачаҳо бе “облава” мераванд

Ба назар мерасид, ки баҳси хизмати аскариву “облава”, ба истилоҳ, пир шуд, аммо рӯзноманигори дигар вориди баҳс мешавад.

“Масъалаи хеле муҳиме баррасӣ мешавад. Ин ҷо иддае аз хонумҳои хабарнигор ҳам дуруст фармуданд, ки ҷавонон маҷбурӣ ва бо роҳи “облава” ба хизмат ҷалб нашаванд. Фикри хуб аст. Аммо мо, ки ин тараф нишастаем, як пешниҳод дорем. Мегӯянд, Кумитаи ҷавонон як ниҳоди бонуфуз аст ва метавонад ҳамин пешниҳодро дар сатҳи ҳукумат матраҳу амалӣ кунад. Чӣ мешавад, ки агар мехоҳем “облава” нашаваду ҷавононро маҷбуран набаранд, биёед, духтарҳоро ҳам барем ба хизмати аскарӣ?!”, - изҳор дошт рӯзноманигор Хуршеди Ховар дар хитоб ба раиси Кумита.

Раиси Кумитаи ҷавонон ва варзиш, ки худ ҳуқуқшинос аст, шояд хуб донад, ки тибқи Қонуни ӯҳдадории умумии ҳарбӣ ва хизмати ҳарбӣ, занони аз 18 то 50 – сола низ метавонанд ба хизмати ҳарбӣ ҷалб шаванд. Абдуллоҳ Раҳмонзода гуфт, тибқи меъёри Конститутсияи Тоҷикистон, хизмати ҳарбӣ вазифаи ҳар шахс аст ва гуфта нашудааст, ки ҳар мард аст.

“Агар инро ба асос гирем, чунин ҳам ҳаст. Аммо бубинед. Дар бархе кишварҳо духтарон ҳатто то шаш сол хизмат мекунанд. Ҳоло номи он кишварро намегирам, зеро он барои мо ҳеҷ гоҳ намуна набуд ва буда ҳам наметавонад. Мо ҳеҷ гоҳ ин корро намекунем”, - афзуд вай.

Гурез аз артиш – айби шабакаҳои иҷтимоӣ ва бархе расонаҳо

Раиси Кумитаи ҷавонон ва варзиш гуфт, нерӯи марди Тоҷикистон барои дифоъ аз кишвар кифоят мекунад, аммо роҳи ҳалли ин ки як ҷавон на бо “облава” ё зӯрӣ, балки худ ба хизмати ҳарбӣ равад, дигар аст.

Кормандони мақомот, акс аз бойгонӣ
© Sputnik / Табылды Кадырбеков

“Мо дар ин масъала болои мафкураи ҷавон бениҳоят тохтутоз мекунем. Давлат тарғиб мекунад, хафа нашавед, лекин шабакаҳои иҷтимоӣ, бархе расонаҳо дар як шакле мавзӯъро нишон медиҳанд, ки ҳамин ҷавон бояд аслан хизмат наравад.  Гӯё ки артиш ҷои фарзанди камбағал аст, латукӯб асту куштор, бовар кунед, ин тохтутоз болои мафкураи як ҷавон аст. Чандин мақомоти давлатӣ имрӯз мераванд ва қисмҳои низомиро тафтиш мекунанд, ки сарбоз чӣ тур мехобаду мехӯраду хизмат мекунад. Ҳатто дар дастшӯиҳову ҷойҳои дигар видеокамера насб карданд, ки тартиботро назорат кунанд”, - гуфт раиси Кумитаи ҷавонон ва варзиш.

Раиси Кумитаи ҷавонон: бародарам айни замон хизмат мекунад

Абдуллоҳ Раҳмонзода ҳамчунин ин иддаоро, ки фақат фарзандони камбағалҳо хизмат мекунанду фарзандони мансабдорону сарватмандон на, ботил шумурд.

“Бародари худам айни замон хизмат мекунад. Се-чор моҳ мегузарад, аммо боре шикоят накардааст. Се вақт ба серӣ хӯрок мехӯраду шароитҳои дигар. Агар касе хоҳад, ман ҷои хизматашро мегӯям, равад, ҳамсӯҳбат шавад. Аммо набояд мавзӯъро ба бою камбағал бурд. Ин як тафриқаангезии хатарнок аст. Шояд огоҳона ба ин таблиғ даст мезананд? Намефаҳмам”, - гуфт раиси Кумита.

Раҳмонзода изҳори боварӣ намуд, ки агар ҳамаи мо як мавқеи умумимиллӣ дошта бошему инро расонда тавонем, ки ҷавон барои ҳифзи сулҳу субот, тартиботи ҷамъиятӣ, якпорчагӣ ва истиқлолияти давлатӣ ба хизмат меравад, ӯ моро, мардуми худро, хонаводаи худро ҳимоят мекунад, вазъ тағйир мехӯрад.

3559
Барчаспҳо:
артиш, Кумитаи ҷавонону варзиш, "облава", Тоҷикистон
Президент Республики Таджикистан Эмомали Рахмон

“Ҳама ба ҳоли худ саргардон. Соли вазнин хоҳад буд”: нигарониҳои Раҳмон аз соли 2021

64
(Таҷдидшуда 23:31 26.01.2021)
Дар суханрониҳои Эмомалӣ Раҳмон маъмулан нуктаҳои ҷолиб аз матни сомонааш ва ё пахши такрории телевизионҳои расмӣ ҳазф мешаванд. Ҳол он ки маҳз дар ҳошияравиҳои ӯ аз матн гуфтаниҳо, балки ногуфтаниҳои ӯ садо медиҳанд

ДУШАНБЕ, 26 янв — Sputnik. Президенти Тоҷикистон дар ин ҳошияравиҳо эҳсоси шодиву ғам ва хашму нигарониҳояшро баён медорад, аммо ба назар мерасид, ки дар Паёми имсолаи ӯ бештар аз ҳама изтироби худро аз ояндаи кишвараш бештар ба намоиш гузошт. Sputnik Тоҷикистон ба бархе аз муҳимтарини нуктаҳои ҷолиби Паёми ӯ пардохт. 

Раҳмон нахуст як “нуктаи нозук ва муҳим” – ро дар бораи муҳоҷирати меҳнатии шаҳрвандони Тоҷикистон баён кард. Вай гуфт, соли 2020 дар пайи пандемияи “вируси корона” 80% - и муҳоҷирин натавонистанд аз Тоҷикистон хориҷ шаванд.

“Ман ба шумо нуктаи нозук ва муҳимро расониданӣ ҳастам. Аз 460 ҳазор нафаре, ки мерафтанд, фақат 111 ҳазор муваффақ шуданд. Он чӣ ишора карда истодаам, ин аст, ки мо дар дохили кишвар захираву имконотеро дорем, ки дар оянда боз ҳам беҳтар кор карда, корхонаҳои истеҳсолӣ ва кишоварзӣ эҷод намоем ва шароити корӣ фароҳам оварда, мардуми худро бо кори доимӣ таъмин кунем", - гуфт президент.

“Қарз намедиҳанд!”

Раҳмон як роҳи ҷалби сармояи мустақими хориҷиро гузариш ба стандартҳои байналмилалии ҳисоботи молиявӣ ва аудити молиявӣ унвон карда, афзуд, тамоми ширкат, муассисаҳо, корхонаҳо, ташкилотҳо фақат ҳамин роҳро доранд, агар на, ягон институти байнулмилалии молиявӣ, ягон сармоягузор ба ягон кас қарз ҳам намедиҳад ва сармоягузорӣ ҳам намекунад.

“Ҳатман бояд муайян кунем, ки аз чанд миллион боло (аз аудит гузаранд). Қарорро бояд қабл кард. Сарфи назар аз он ки кадом мақомоти давлатӣ ё ширкати хусусӣ, ҳар чӣ набошад, (гардиши корхона ё муассиса) як миллион аст, ду ё се миллион аст, бояд ҳатмӣ аз аудит гузарад. Инро бояд ҳукумат муайян кунад. На ҳама ба ин розӣ аст, ҳатто сохторҳои мақомоти давлатӣ. Ин шаффофияти иқтисодиро муайян мекунад. Ҳам дар соҳибкорӣ ва ҳам сохторҳои мақомоти давлатӣ”, гуфт Эмомалӣ Раҳмон.

Авфи дуюм

Тоҷикистон дар таърихи 30 соли истиқлолаш фақат як бор авфи маболиғ ва дороиҳоро соли 2007 гузаронда буд. Имсол низ Эмомалӣ Раҳмон аз мақомоти зидахл хост, ки заминаи баргузории як авфи дигарро фароҳам созад. Вай гуфт, мо мебинем, ки ҳатто кишварҳои абарқудрат дар ин 30 сол қариб 10 – 15 маротиба гузарониданд.

“Такрор мекунам, ҳатто кишварҳои абарқудрат. Чанд сол пайиҳам. Шароитро мо мебинем, ки дар ҷомиаи ҷаҳонӣ чӣ гап аст”, - гуфт ӯ.

“Страховка”

Президенти Тоҷикистон аз мақомоти зидахл хост, ки ҳар чӣ зуд як санад барои маҳдуд намудани санҷиши ғайриқонунӣ ё дахолат ба фаъолияти сармоягузорону соҳибкоронро то моҳи март таҳия кунанд. Вай гуфт, бахши хусусӣ ҳоло дар маҷмӯи маҳсулоти дохилӣ (ММД) беш аз 70, таъмини аҳолӣ бо ҷойи корӣ - 68 ва даромадҳои андозӣ ба буҷет - 80 фоиз саҳм дорад.

Раҳмон аз хоинону нақшаҳояшон гуфт: мехоҳанд фарҳангу мазҳаби бегонаро таҳмил кунанд

“Ба пешвози 30 – солагии Истиқлолият 18 ҳазору 300, дар маҷмуъ 25 ҳазор иншоотро имсол бояд сохта, ба истифода диҳем. Ин аз ҳисоби кӣ аст? Аз буҷети давлат? Не. Ана ҳамин ҳисса ё саҳми соҳибкорон аст. Аксарияташ. Аммо дар вақти қабул кардани қонуну қарорҳо дар бисёр ҳолатҳо манфиатҳои назоративу хатарнокиву эҳтимолияти иҷро нашудани нақшаро пеш оварда, кӯшиш мекунем, ки монеаи сунъӣ эҷод кунем. Худамонро “страховка” мекунем дар назди ҳукумат, роҳбари давлат. Аммо дар назди мардум чӣ? Вақте рӯи дастурхони мардум нон пайдо нест, кӣ ҷавоб медиҳад?”, - гуфт президенти Тоҷикистон.

Ҳис мекунед?

Президенти Тоҷикистон аз аҳли толор пурсид, ки дар ин сардиву барф ҳис мекунанд, ки чаро роҳҳои асосии байни вилоятҳои бузург ин зимистон баста нашуд? Вай дар посухи суоли худ гуфт, роҳҳо бунёд ва таъмиру нигаҳдории онҳо сол ба сол хубтару беҳтар шудаанд, мардум баҳору зимистон рафтуомад ва тиҷорати дохилӣ густариш пайдо мекунад.

“Ҳис мекунед? Талафоти одамон ҳам кам. Акнун вақте расидааст, ки роҳҳои дохилии байни ноҳияҳо, ҷамоатҳо, байни шаҳрҳо, худи деҳаҳо, шаҳраку маҳалҳои зист бояд хубтару беҳтар шавад. Як сол аст, ду сол аст, бояд кунем. Ман боварии комил дорам, ки агар ташаббус дар дасти вакилони муҳтарам, аъзои ҳукумат ва хизматчиёни давлатӣ, умуман ташкилотчӣ бошад, мардуми мо хуб дастгирӣ мекунад. Барои хубтару беҳтар кардани шароити зисти худаш. Ҳамаро набояд ба буҷет ҳавола кард”, - гуфт Эмомалӣ Раҳмон.

Мешудааст – ку!

Раҳмон аз онҳое, ки ҳамоно банди иқтисоди нақшаӣ ҳастанд, ёдовар шуда, гуфт, роҳи аз ҳама хуби кӯмак ба кишоварзӣ фароҳам кардани имтиёз ва шароит ба соҳибкорон, тоҷирон, хоҷагиҳои деҳқонӣ аст.

“Дар Тоҷикистон 2 сол пеш 60 ҳазор тонна гӯшти мурғ ворид мешуд. Қариб 50 миллион доллар – валюта (арз) -и мо ба берун мерафт. Соли 2017 мо дар дохил ҳамагӣ 2 -3 ҳазор тон истеҳсол мекардем, вақте имтиёзҳо додем, зарфи ду сол истеҳсоли гӯшти парранда ба 30 ҳазор тон расид. Боварӣ дорам, ду сол баъд воридоти он аз байн меравад”, - гуфт ӯ.

Президенти Тоҷикистон гуфт, дар замони Шӯравӣ ба Тоҷикистон аз берун дар як сол то 180 ҳазор тона картошка ва 140 ҳазор тон маҳсулоти гӯштӣ ворид мешуд, аммо соли 2020 ҳамагӣ 180 тон картошка ворид шудааст.

“Пурсида мешавад, аз ҳисоби чӣ таъмин шуд? Проблема дар Тоҷикистон дар боби истеъмоли гӯшт ҳаст? Раҳмат бар падару модари мардуми Тоҷикистон, ки ташаббуси моро дар бораи амалӣ намудани Қонун дар бораи танзими расму оинҳо дастгирӣ карданд. Ду баробар саршумори чорво сарфа шуда, зиёд гардид. Ҳам маҳсулоти ширӣ, ҳам маҳсулоти гӯштӣ сол ба сол зиёд шуда истодааст”, - гуфт ӯ.

Раҳмон ба амнияти саломатии мардум ишора карда, гуфт, гӯшти мурғу гӯштҳои дигар гуфта, баъзан маҳсулоти бесифати мӯҳлаташон гузаштаро бо ҳар роҳ меоварданд. Вай афзуд, имтиёзҳо моҳипарвариро низ такон доданд.

“Ё тухм аз дигар ҷо меоварданд, хандаовар аст, бародарон! Ман ҳатто гуфта будам дар маҷлисҳои ҳукумат ба мову шумо. Мешудааст-ку. Кори намешудагӣ дар дунё нест. Фақат завқ, масъулияти баланд доштанамон даркор. Мо зиёда аз 1 миллион тонна картошка истеҳсол кардем. Ду – се маротиба зиёд деҳқони тоҷик картошка истеҳсол мекунад. Дар як сол!”, - гуфт президент.

Вай афзуд, барномаи боғу токпарварӣ дар талу теппаҳоро, ки ҳукумати Тоҷикистон рӯи даст гирифт, ҳатто дар хориҷа масхара шуд.

“Ҳатто баъзе сиёсатмадорон дар Иттиҳоди давлатҳои муштаракулманофеъ дар паси ман гап мезаданд, ки “Раҳмон кори дигар надорад, ки дар талу теппаву кӯҳ боғдорӣ мекунад, хандаовар аст”. Хандаовар нест. Натиҷаашро мо дида истодаем. Аз Душанбе то Кӯлоб равед, ҳамин рӯз дар ҳамин сардиву хунукӣ, бинед, дар ду тарафи роҳ ғайри бозорҳо чӣ қадар ҳазорҳо тон меваву сабзавоти бениҳоят сифати баланд ва аз лиҳози экологӣ тозаро деҳқонон ба мардум пешкаш карда истодаанд. Натиҷаи чӣ аст? Мо ҳам давраи Шӯравӣ рафта, меомадем. Ягон бало набуд. Бисёриҳо шоҳид ҳастед. Ин ҳама натиҷаи ҳамин қарорҳо ва заҳмати деҳқонони мамлакат аст. Агар шикамамон сер намебуд, дар ин толор омада, паёми роҳбари давлатро гӯш намекардем”, - гуфт Эмомалӣ Раҳмон.

“Ҳоло айни вақт аст...”

Президенти Тоҷикистон гуфт, хабар аз хатару пешгӯиҳое, ки коршиносони сатҳи байнулмилалӣ мекунанд, ба ҳозирини толор ва мардуми Тоҷикистон мерасонад. Ӯ ҳамзамон ин суолро матраҳ кард: соли 2021 чӣ моро интизор аст?

“Агар дар ёд дошта бошед, моҳи апрели соли 2020 дар муроҷиате, ки ман ба шаҳрвандони мамлакат кардам, дар бораи таҳдиду хатарҳое, ки дар фасли тирамоҳу зимистони имсолу соли оянда дар камин нишастаанд ва ҳатто хатари гуруснагӣ, болоравии нархҳо дар дунё, ки ба камчинии маҳсулоти ғизоӣ оварда мерасонад, гуфта будам. Ана ҳамонҳо омада расид. Тибқи таҳлили коршиносони созмонҳои бонуфузи байнулмилалӣ, аз ҷумла муовини дабири кулли СММ, соли равон дар масъалаи озуқаворӣ яке аз солҳои вазнин ва ҳалокатбор тайи 100 соли ахир мегардад. Ин сухани ман нест, аз муовини дабири кулли СММ дар умури озуқаворӣ аст”, - гуфт Раҳмон.

Вай аз бесобиқагии гармшавии иқлим дар соли 2020 дар таърихи инсоният гуфта, афзуд, гармову хушксолӣ ва камобии соли гузашта дар кишвари мо аз оғози собҳибистиқлолӣ бори якум ба қайд гирифта шуд.

Эмомалӣ Раҳмон аз барқароршавии парвозҳо гуфт

“Чӣ моро интизор аст дар ин сол? Ман бори дигар ин фурсатро истифода бурда, ба мардуми Тоҷикистон, шумо – аъзои ҳукумат, вакилони мардумӣ изҳор мекунам, ки корро ҷиддӣ гирем. Ҳоло вақт аст. Ҳоло айни вақт аст”, - гуфт ӯ.

“Ҳама ба ҳоли худ саргардон”

Эмомалӣ Раҳмон гуфт, дар замони соҳибистиқлолӣ барои 1 миллиону 350 ҳазор хонавода 135 ҳазор гектар заминро тақсим карда дод, то хона ё мавзеъи истиқоматӣ созанд, дар ҳоле ки дар 75 соли шӯравӣ ба аҳолии Тоҷикистон ҳамагӣ 73 ҳазор гектар замин ҷудо шуда буд.

“Ана акнун ҳисоб кунед, ки чӣ қадар замин дар дасти мардум аст. Мо ҳисоб кардем, ки ҳудуди 230 – 40 ҳазор гектар замин. Агар 50% - и он барои хонаву дигар сохтмон бошад, 50% - и дигар, ҳудуди 115 ҳазор гектар барои замини кишт. Мардум аз замини наздиҳавлигӣ метавонад садҳо сентнер ҳосил гирад”, - гуфт президент.

Ӯ аз сафарҳояш ба шаҳру навоҳӣ ва дидораш бо деҳқонон мисол овард, ки бархе меҳнат мекунанд, роҳаташро мебинанд ва аз оне гуфт, ки аз 17 – 18 сотих дар як сол 36 тон маҳсулот гирифта, зиндагиашро пеш мебарад ва бо ҳама чӣ таъмин асту муҳтоҷ ба касе нест.

“Барои ҳамин ҳам, деҳқонони арҷманди мо, ман шуморо дастгирӣ мекунам, шумо муроҷиатҳои маро ҷиддӣ гирифта, меҳнат кунед, ба умеди ҳеҷ кас нашавед. Худои таоло гуфтааст, ки аз ту ҳаракат, аз ман баракат. Агар ба пушт зада, дастурхонро партоӣ, аммо дар замин дона напартоӣ, каланд назанӣ, дар он дастурхон чизе пайдо намешавад. Ҳамин сол кардед, натиҷаашро дидед. Оне, ки заҳмат мекашад, муҳтоҷи касе нест. Дар сардиву гармӣ дар дастурхони фарзандонаш фаровонист”, - гуфт президент.

Эмомалӣ Раҳмон гуфт, соли 2021 бисёр соли вазнин мешавад, махсусан, дар самти таъмини маводи ғизоӣ ва ҳукумату мақомоти зидахл бояд ба ҳама кӯмак кунанд.

“Аввали пайдоиши пандемияи COVID 19 воҳима (паника) ҳатто дар байни давлатҳои абарқудрат буд. Чӣ кор карданд? Сарҳадҳои худро бастанд. Содироту воридотро манъ карданд. Баъзеаш транзитро манъ кард. Баъд чӣ мешавад? Мо бештари маҳсулот – 60%-ро аз берун меорем. Агар (марзҳо) маҳкам бошад чӣ? Чӣ кор мекунем? Куҷо меравем?”, - гуфт ӯ.

Вай пешниҳод кард, ки тамоми кишоварзони кишвар соли 2021 аз пардохти андози ягонаи замин озод карда шаванд, ки бино ба иттилои ӯ, ҳудуди 200 миллион сомониро ташкил медиҳад ва ҳукумати кишвар барои пӯшонидани ин манбаи андоз чораҷӯӣ менамояд.

“Агар дар ёд дошта бошед, ман як андешаро 12 сол пеш баён карда будам, ки бисёриҳо онро шояд ҳазл қабул карданд. Баъзе сиёсатмадорон ҳатто аз ман пурсиданд, чаро Эмомалӣ Шарипович, Шумо ин чиро гуфтед? Ман мардуми Тоҷикистонро даъват карда будем, ки кӯшиш кунед, ҳар як хонавода захираи дусола дошта бошад. Ба ёд доред? Ба ҳамон рӯз омадем. Ин бадбахтиро бинед! Шукрона, ки он бадбахтие, ки бархе кишварҳои Аврупо расидаанд, мо ба он нарасидем. Парвардигоро, ба мардуми тоҷик илоҳо нарасад. Аммо кӣ кафолат дода метавонад? Кӣ? Кӣ киро кӯмак мекунад? Ҳама ба ҳоли худ саргардон. Як ваксинаро бинед, сиёсӣ карданд дар дунё”, - гуфт Эмомалӣ Раҳмон.

Дар охири суханронии худ президенти Тоҷикистон мардумро ба ваҳдату бародарӣ хонд ва гуфт, барои ҳамин ҳам ман гаштаю баргашта таъкид мекунад, ки мо бояд бунёд кунем, созем, руҳафтода нашавем.

Стипендияи донишҷӯёну магистрон ва аспирантону доктарантҳо зиёд мешавад

“Ман ишора кардам, ки бобову бобокалони мо, аждодони мо кӣ буданд, чӣ мерос гузоштанд, тамаддунсоз буданд, тамаддунофар буданд. Чӣ мову шумо карда наметавонем? Мову Шумо идома дода наметавонем?”, - гуфт Эмомалӣ Раҳмон.

64
Барчаспҳо:
озуқаворӣ, хатар, сармоя, буҳрон, рушд, иқтисод, парлумон, паёми раисҷумҳур, Эмомалӣ Раҳмон

Вазорати тандурустӣ суханони Эмомалӣ Раҳмонро дар бораи COVID - 19 тасдиқ кард

109
Вазорати тандурустии Тоҷикистон суханони президенти кишвар аз пирӯзӣ бар вируси коронаро тасдиқ карда, аз сабт нашудани ягон ҳолати гирифторӣ дар давоми 24 соати гузашта хабар дод

ДУШАНБЕ, 26 янв — Sputnik. Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иттилоъ медиҳад, ки дар шабонарӯзи охир ягон ҳодисаи нави гирифторшавии шаҳрвандон ба бемории коронавируси нави COVID-19 ба қайд гирифта нашудааст.

Бино ба гузориши ин ниҳод, дар маҷмӯъ то имрӯз дар кишвар 13308 нафар гирифторони сирояти коронавируси нави COVID-19 ба қайд гирифта шудааст.

Раҳмон аз пандемияву буҳрон гуфт: ҷаҳон чунинро тайи сад сол ёд надошт

Аз ин теъдод то санаи зикргардида 13218 нафар ё 99,3% шифо ёфта, 90 нафар бар асари ин беморӣ фавтидаанд.

Ёдрас мешавем, ки имрӯз кишвардор зимни ироаи паёми солона ба парлумони кишвар аз пирӯзии Тоҷикистон бар вируси корона хабар дод.

"Мо имрӯз шукрона мекунем, ки аз оғози моҳи январ дар кишварамон бемории сироятии КОВИД – 19 аз байн рафтааст", - гуфт президент.

Раисиҷумҳур таъкид кард, лекин ин чунин маънӣ надорад, ки мо ба саломатии худ ва атрофиёнамон бепарвоӣ зоҳир намоем, балки чун пештара бояд ҳушёр бошем, ба қоидаҳои беҳдошти шахсиву ҷамъиятӣ эътибори ҷиддӣ диҳем ва ҳамдигарро эҳтиёт кунем.

109
Барчаспҳо:
нобудшавӣ, вируси корона, Вазорати тандурустӣ ва ҳифзи иҷтимоии аҳолии ҶТ, нав, омор, Тоҷикистон