ДУШАНБЕ, 11 апр — Sputnik. Ҳукумати Тоҷикистон ҳафтаи гузашта Хадамоти алоқаро муваззаф кард, ки барои амалӣ намудани тартиби сабти дастгоҳҳои мобилӣ, то 1 июни соли равон бо ҷалби сармояи хусусӣ Оператори ин низомро муайян кунад.
Муқаррар шудааст, ки Оператори низом барои таъмини амнияти давлат ва ҳангоми чорабиниҳои муҳими ҷамъиятӣ-сиёсӣ метавонад, бо дархости мақомоти ҳифзи ҳуқуқ кори дастгоҳҳои мобилии алоқаи барқиро қатъ ва барқарор намояд.
Бар асоси қарори Ҳукумат, ки ҳафтаи гузашта имзо шуд, низоми бақайдгирии дастгоҳҳои мобилӣ, тибқи нишондиҳандаҳои байналмилалии муайянкунандаи ин дастгоҳҳо амалӣ мешавад.
Дар қарор таъкид шудааст, ки аз лаҳзаи роҳандозии ин низом дар Тоҷикистон, тайи се моҳ сабти дастгоҳҳо автоматӣ ва ройгон тариқи хадамоти операторони мобилӣ амалӣ мешавад.
Баъди анҷоми се моҳи бақайдгирии автоматӣ, дар давоми 6 моҳ сабти дастгоҳҳои мобилии алоқаи барқӣ тариқи пойгоҳи ягона ва дигар воситаҳои муайяншуда ройгон сурат мегирад.
Фаврӣ: дар Тоҷикистон нархи гуфтугӯи телефонӣ ва интернет гарон мешавад
Бар асоси қарори Ҳукумат, бо анҷоми се моҳи сабти автоматию 6 моҳи пилотии баъдӣ, сабти дастгоҳҳои алоқаи барқӣ тариқи пардохти маблағ амалӣ мегардад.
Дар қарори имзокардаи Эмомалӣ Раҳмон таъкид шудааст, ки Хадамоти алоқа, Кумитаи телевизиону радио якҷоя ба ширкатҳои мобилӣ миёни аҳолӣ ба таври васеъ корҳои фаҳмондадиҳиро роҳандозӣ кунанд.
