Журналист Дододжон Атовуллоев

Ҳушдори “Ватандор”: Тоҷикистон ҳам дар гирдоби балои охирзамон коронавирус афтод

10147
(Таҷдидшуда 11:02 24.04.2020)
Ҷунбиши мухолифи "Ватандор" бо пахши як баёния аз оғози паҳншавии коронавирус дар Тоҷикистон хабар дод

ДУШАНБЕ, 24 апр – Sputnik. Дар ин баёния, ки рӯзи 23 апрел  дар "Facebook" мунташир шуд, ҷунбиши мухолифи "Ватандор", бо тамоми масъулият ва бо назардошти вазъият огоҳ кардааст, ки Тоҷикистон ҳам дар гирдоби балои охирзамон – коронавируси СOVID-19 афтода аст.

“Марг ҳар рӯз дари моро мекӯбад. Имрӯз ин душмани ноаёну нонамоён якеро паси дигар фурӯ мебарад. Кас намедонад фардо навбати кист? Вазорати тандурустии Тоҷикистон ошкоро мардумро гӯл мезанад, ки фавтидагон гирифтори пневмония буданд. Пас чаро чандин одамонро ҷаноза накарданд? Ҳатто чаро махфиёна гӯрониданд?!”, - таъкид доштааст ҷунбиши "Ватандор".

Дар баёнияи ҷунбиш зикр гардидааст, ки дар ин соатҳо, дар ин лаҳзаҳо фурсате барои кӣ гунаҳгору кӣ бегуноҳ аст, нест. Ҳар соат не, ҳар лаҳза ғанимат аст.

“Вазъ махсусан дар Хуҷанд ва ноҳияҳои атрофи он, шаҳри Душанбе ваҳмангез аст. Сафар ба пойтахт ва Хуҷанд бояд тамоман манъ карда шавад. Бояд шитобон дар мактабу донишгоҳҳо таътил эълон кард. Бозорҳою фурӯшгоҳҳои калонро бояд баст. Ҳар амале, ки ҳаракат ва ба кӯчаю хиёбонҳо баромадани одамонро кам мекунад, равост”, - омадааст дар баёния.

Ҳамзамон “Ватандор”, таъкид кардааст, ки дар саросари Тоҷикистон таъҷилан бояд қарантина эълон кард.

“Ягона роҳ пешгирӣ аз сироят кардан ва ё гузаштани ин беморӣ аз каси дигар бар каси дигар аст”, - гуфта шудааст дар баёния.

Инчунин, ҷунбиши “Ватандор” аз мақомот хоҳиш кардааст, ки дар ин рӯзҳои мушкил набояд аз муҳоҷирони тоҷикистонӣ, ки дар кишварҳои дигар ҳастанд, махсусан Русия фаромӯш кард.

“Ба ҳар роҳу васила онҳоро бояд ба Ватан баргардонид, ё дар кишвари будубошашон кӯмак кард. Фаромӯш кардани онҳо мисли он аст, ки падару модаре фарзанди худро дар миёни оташ бигзоранду худ тамошогар бошанд.То ҳанӯз бори ҳукумат ва давлати Тоҷикистон дар дӯши муҳоҷир буд. Имрӯз бори нахуст бояд ҳукумат дар паҳлӯи ин ноноварон бошад!”, - гуфта шудааст дар баёния.

Дар баёнияи ҷунбиши  “Ватандор” ҳамчунин гуфта шудааст, ки имрӯзҳо барои ҳамаи тоҷикон давраи як имтиҳони бузург фаро расидааст, ки ҳамаи тоҷикон бо ҳам биёянд ва барои наҷоти ҳар як гирифтору мустаманд кӯмак расонанд.

“Як кас барои ҳама, ҳама барои як кас!
Ин бояд шиори мо дар ин набард бошад”, - омадааст дар баёния.

Дар ин баёния қайд карда шудааст, ки агар боз ба бозии марговари "ҳасту нест" идома бидиҳем, на Худо ва на Халқ моро намебахшад. !

“Ин сахлангорӣ не, бемасъулиятӣ не, одамкушист! Ҳар касе ки худро эҳтиёт кунад, ӯ ҳатман ҳаёти каси дигарро низ эҳтиёт менамояд. Мушкиле надорад дар хона нишастан, ниқоб (маска) пӯшидан, ба қоидаҳои оддии санитарӣ риоя кардан”, - таъкид доштааст ҷунбиши “Ватандор”.

Ҷубиши “Ватандор”, мегӯяд аз гуфтан, ки ба кишвари мо вирус наомад, ифтихор нест.

 “Ватандор” орзумандаст, ки тоҷикон бар ин вирус пирӯз меоянд.

Ёдрас мешавем, ки Додоҷон Атовуллоҳ дар соли 2007 дар Маскав эълом карда буд, ки ҷунбишеро бо номи "Ватандор" таъсис додааст ва шумори зиёде аз мухолифони давлати кунунӣ аъзои ин созмон ҳастанд.

10147
Барчаспҳо:
пахш, Тоҷикистон, вирус, баёния, Ватандор, Додоҷон Атовуллоев
Президент Таджикистана Эмомали Рахмон

Хотироти Раҳмон аз Раббонӣ, додани ҳукумат, музокироти Давҳа ва ибрат аз тоҷикон-видео

77
(Таҷдидшуда 00:59 21.09.2020)
Эмомалӣ Раҳмон, раисиҷумҳури Тоҷикистон, дар ҳамоиши онлайнӣ ба хотири бузургдошти Бурҳониддин Раббонӣ, собиқ раисиҷумҳури Афғонистон, ки 9 сол қабл дар Кобул кушта шуд, хотироти худ ва нақши Раббонӣ дар сулҳи тоҷиконро баён дошт

ДУШАНБЕ, 21 сен — Sputnik. Раисиҷумҳури Тоҷикистон зикр намуд, ки Бурҳониддин Раббонӣ 50 сол дар меҳвари равандҳои сиёсӣ, иҷтимоӣ ва фикрии Афғонистон қарор дошт ва замони нишасти баргузоршуда барои сухан дар бораи ҳамаи паҳлӯҳои ҳаёту фаъолият ва симои поки ӯ кифоят намекунад.

Тавсифи Раҳмон аз 1 амали таърихии Раббонӣ: ҳукуматдориро ба Карзай дод-видео

Эмомалӣ Раҳмон, гуфт,  мехоҳад, фақат яке аз амалҳои аз нигоҳи таърих тақдирсози Рабониро таъкид намояд.  

“Бурҳониддин Раббонӣ охири соли 2001 зимоми ҳукуматдориро ба таври мусолиатомез ба идораи муваққатӣ таҳти сарварии Ҳомид Карзай таҳвил дода, номи худро дар саҳифаҳои таърихи муосири Афғонистон барои ҳамеша сабт кард. Баъдан аз ҷониби ӯ пазируфтани раёсати Шӯрои олии сулҳ, далели дигари чеҳраи меҳварию сулҳпарвар ва хирадгаро будани ин сиёсатмадори варзида дар саҳнаи сиёсати Афғонистон мебошад”,-изҳор дошт раисиҷумҳури Тоҷикистон.

Мулоқот дар Кобул, буҳрон дар музокирот ва даъвати Раббонӣ ба дидори дигар

Эмомалӣ Раҳмон дар идома афзуд, ки профессор Раббонӣ тамоми фаъолият ва ҳаёти худро ба истиқлол ва озодии кишвараш бахшида, ҳамзамон кӯшиш ба қаробати  миллатҳою тамаддунҳо дошта, муваффақ ҳам гардид. Раҳмон аз ҷумла саҳми арзандаи хотирмони ин абармарди сиёсат ва илмро дар мусолиҳаи байни тоҷикон хотиррасон намуд.

“Маҳз ба воситаи раисиҷумҳури онвақта соли 1995 дар шаҳри Кобул нахустин мулоқоти ҳайати сатҳи олии ҳукумати Тоҷикистон бо роҳбарияти Иттиҳоди мухолифини тоҷик баргузор гардид. Он роҳи гуфтушунид ва тафоҳумро миёни тарафҳо боз намуд. Мо пешниҳод намудем, ки дар Тоҷикистон сулҳи пойдор барқарор шавад, вале мутаассифона дере нагузашта музокироти сулҳи тоҷикон ба буҳрон рӯбарӯ шуд”, -  нақл кард кард Раҳмон.

Раҳмон: масъулияти роҳбарӣ маро водор мекард, ки қадами аввал гузорам-видео

Ӯ илова намуд, ки дар он рӯзҳо ба халқи Тоҷикистон ваъда дода буд, ки ба онҳо сулҳ меоварад.

“Аз ин рӯ масъулияти роҳбарии кишвар маро водор мекард, ки қадами нахустинро гузорам. Бо пешниҳоди профессор Раббонӣ, тасмим гирифта шуд, ки мулоқоти дигари ҷонибҳо доир гардад”, - изҳор дошт Раҳмон.

Ӯ тавзеҳ дод, ки бо мусоидати шахсии Раббонӣ, як сол пас дар Хусдеҳи Афғонистон даври дигари мулоқоти сатҳи олии ҷонибҳои раванди сулҳи тоҷикон доир шуд, ки дар музокироти сулҳ гардиши куллиро ба вуҷуд овард.

“Дар натиҷаи музокироти Хусдеҳ, самтҳои калидии пешбурди раванди сулҳ муайян гардида, заминаи воқеии хотима бахшидан ба ҷанги таҳмилии шаҳрвандӣ дар Тоҷикистон гузошта шуд. Агар дар таъмини ҳифзи якпорчагии Тоҷикистон иҷлосияи 16-уми Шӯрои олӣ заминаи ҳуқуқӣ гузошта бошад, дар имзои Созишномаи умумии истиқрори сулҳ ва ризоияти миллӣ, ки 27 июни 1997 дар Маскав сурат гирифт, музокироти Хосдеҳ нақши калидӣ дошт”, - изҳори боварӣ кард Раҳмон.

Музокироти Давҳа ва пешниҳоди Раҳмон барои истифодаи таҷрибаи сулҳи Тоҷикистон

Раҳмон гуфт, моҳи сентябри соли 2003 профессор Раббонӣ дар маросими солгарди ба шаҳодат расидани қаҳрамони миллии Афғонистон, Аҳмадшоҳи Масъуд, дар баёнияи хеш иброз намуд, ки истиқрори сулҳ ва ризоияти миллии Тоҷикистон барои Афғонистон намунаи ибрат мебошад.

Ин суханони Раббонӣ имрӯз низ моҳияти худро гум накардаанд, афзуд Раҳмон.

“Рӯзи 12 сентябри соли 2020, ҳамагӣ чанд рӯз қабл мо шоҳид будем, ки дар Давҳа, пойтахти давлати Қатар, маросими оғози музокироти байни афғонҳо пас аз даҳҳо соли ҷанги бародаркуш баргузор гардид. Ҷомеаи байналмилалӣ умедвор аст, ки музокироти Давҳа оғози иқстиқрори сулҳу суботи пойдор дар Афғонистон хоҳад шуд”, - изҳор дошт Раҳмон.

Ӯ афзуд,  табиист, ки ҳар ихтилофу низоъ мушахассоти худро дорад, аммо бо вуҷуди ин салоҳ ба назар мерасад, ки таҷрибаи сулҳи тоҷикон дар раванди сулҳи байниафғонӣ мавриди истифода қарор гирад.

Эмомалӣ Раҳмон: музокироти сулҳи тоҷикон натиҷаи хуб дод

Ба гуфтаи Раҳмон, музокироти сулҳи тоҷикон натиҷаи хуб дод ва сулҳ дар Тоҷикистон истиқрор ёфт. Ҷомеаи ҷаҳонӣ сулҳи тоҷиконро ҳамчун намунаи барҷастаи ҳалли ихтилофу низоъҳои дохилӣ эътироф кард. Тоҷикистон омода аст, бо такя ба таҷрибаи сулҳофаринии худ ба бародарони афғонистонӣ дар раванди музокироти сулҳ дар доираи имкон ёрмандӣ расонад, изҳор дошт раисиҷумҳур.

Эмомалӣ Раҳмон иттилоъ дод, ки профессор Раббонӣ, раисиҷумҳури вақти Афғонистон дар роҳандозии муносиботи муосири Тоҷикистону Афғонистон саҳми бузург дорад. Ӯ аввалин шахси олимақоми кишвари хориҷӣ буд, ки соли 1992 аз Тоҷикистони соҳибистиқлол боздиди расмӣ ба амал баровард. Зимни сафари ӯ созишнома дар бораи барқарории муносибатҳои дипломатии ду давлат ба имзо расид.

“Ҳукумати Тоҷикистон ҳамеша дар паҳлӯи низоми сиёсии ҶИА қарор дошт ва минбаъд низ аз сиёсати сулҳҷӯёнаи ин кишвари дӯсту бародар пуштибонӣ хоҳад кард. Тоҷикистон ҷонибдори истиқрори сулҳ ва зербиноии Афғонистон мебошад, то тамоми мардуми ин кишвар дар фазои сулҳу субот умр ба сар барад”, - изҳор дошт Раҳмон.

Эмомалӣ Раҳмон изҳори боварӣ кард, мардуми Афғонистон, ки дорои шахсиятҳои барҷаста аз қабили профессор Раббонӣ мебошад, метавонад, тақдиру ояндаи сарзамини куҳантаърихи худро ба даст гирифта, барои ободии кишвараш пайгирона талош кунад.

77
Люди в защитных масках в Душанбе, архивное фото

Омори нави гирифторӣ, шифо ва фавт аз COVID-19 дар Тоҷикистон

439
То санаи 20 сентябр дар мамлакат 8108 (86,7%) нафар аз бемории COVID-19 шифо ёфта, бар асари он 73 нафар фавтидаанд.

ДУШАНБЕ, 20 сен — Sputnik. Тибқи иттилои Вазорати тандурустӣ ва ҳифзи иҷтимоии аҳолӣ, то шоми имрӯз дар маҷмӯъ шумораи гирифторони ин беморӣ ба  9346  нафар баробар гардид.

Бино бар иттилои манбаъ, дар як шабонарӯзи охир 115 нафар гумонбарон зери назорати табибон қарор дошта, 42 нафар баъд аз муолиҷа ба хонаҳояшон рухсат дода шуданд.

Ҳамзамон, то санаи  20 сентябр дар кишвар  8108  (86,7%) нафар аз бемории COVID-19 шифо ёфта,  бар асари он 73  нафар фавтидаанд.

Маврид ба зикр аст, ки Ҳукумати Ҷумҳурии Тоҷикистон ва Вазорати тандурустӣ ва ҳифзи иҷтимоии аҳолӣ айни замон ҷиҳати пешгирӣ ва табобати коронавируси нави CОVID-19 тамоми тадбир ва чораҳои заруриро амалӣ намуда истодаанд.

Зарари бесобиқаи коронавирус ба иқтисоди ҷаҳон: 5 сол барои барқароршавӣ лозим

Дар ин лаҳзаҳои ҳассос аз тамоми сокинони кишвар даъват ба амал оварда мешавад, ки ҷиҳати пешгирии сирояти мазкур пеш аз ҳама  қоидаҳои беҳдошти шахсиро қатъиян риоя намоянд, зеро, дар урфият беҳуда нагуфтаанд, ки табиби ҳар шахс худи ӯст.

439
Эмомалӣ Раҳмон, раисиҷумҳури Тоҷикистон ва профессор Лутфулло Солиев

Даргузашти профессор Солиев, чанд ҳафта баъд аз гирифтани ҷоизаи махсус

0
Профессор, олими маъруфи кимиё, Лутфулло Солиев, ки чанд ҳафта қабл бо ҷоизаи махсуси Президент дар соҳаи маориф қадрдонӣ шуда буд, даргузашт

ДУШАНБЕ, 21 сен — Sputnik.  Дар бораи даргузашти Солиев, ки тайи солҳои охир мудири кафедраи кимиёи Донишгоҳи омӯзгории Тоҷикистон буд, шогирдонаш дар шабакаҳои иҷтимоӣ хабар дода, фавташро фоҷиа ва талафоти бузург барои илм хондаанд.

Президент Таджикистана Эмомали Рахмон
© Официальная страница пресс-службы президента РТ в Facebook.

Солиев 79 сол дошт. Феълан дар бораи сабаби даргузашташ чизе маълум нест. Ӯ чанд ҳафта қабл аз ҷониби Эмомалӣ Раҳмон, раисиҷумҳури Тоҷикистон бо мукофоти давлатӣ қадрдонӣ шуда буд.

Котиботи раисиҷумҳури Тоҷикистон хабар дода буд, ки “бори аввал дар таърихи соҳибистиқлолии кишвар бо Амри Президенти мамлакат ба хотири қадршиносии омӯзгорони беҳтарин мукофоти махсуси давлатӣ таъсис дода шуда, 5 нафар бо Ҷоизаи Президенти Ҷумҳурии Тоҷикистон дар соҳаи маориф сарфароз гардид”.

Бар асоси донишномаи озод, Лутфулло Солиев, кимиёшиноси маъруфи тоҷик, доктори илмҳои химия (1989), профессор (1991), Арбоби илм ва техникаи Тоҷикистон (2002), академики шӯъбаи тоҷикистонии Академияи илмҳои байналмилалии мактабҳои олӣ буд. Ӯ соли 1941 дар ноҳияи Рӯдакӣ,  собиқ ноҳияи Ленин таваллуд шуда, солҳои 1959–1964 дар факултети табиатшиносӣ ва географияи Донишкадаи давлатии омӯзгории шаҳри Душанбе ба номи Т. Г. Шевченко таҳсил кардааст.

“Солҳои 1964–1965 дар сафҳои Артиши Шӯравӣ хизмат намудааст. Солҳои 1966–1969 аспиранти Институти химияи умумӣ ва ғайриорганикии АИ ҶШС Украина (ш. Киев), 1970–1989 ходими хурди илмӣ, ходими калон илмӣ ва ходими пешбари институти мазкур, 1989–1997 дотсент ва профессори кафедраи химияи умумӣ ва ғайриорганикии Донишгоҳи давлатии омӯзгории Тоҷикистон ба номи Қ. Ҷӯраев, 1997–1998 декани факултети химия, 1998–2007 муовини ректори донишгоҳи номбурда оид ба корҳои илмӣ буд”, - омадааст дар ҳолномаи Солиев дар донишномаи озод.

Ӯ аз соли 2007 то дами марг ба ҳайси мудири кафедраи химияи умумӣ ва ғайриорганикии Донишгоҳи давлатии омӯзгории Тоҷикистон ба номи Садриддин Айнӣ фаъолият кардааст. Шогирдону ҳамкорон ӯро ҳамчун омӯзгори ҳалим, олими пуркор пухтакор ва хоксор ёд мекунанд.

0
Барчаспҳо:
профессори фахрӣ, даргузашт, Тоҷикистон