Генерал Абдулло Ҳабибов

“Аскарони ғолиб”: муаррифии онлайнии китоби охирини генерал Ҳабибов

881
(Таҷдидшуда 03:11 08.05.2020)
Дирӯз, 7 май, китоби охирини генерал – майор Абдуллоҳ Ҳабибов тариқи онлайн ва бо ширкати сафири Русия дар Тоҷикистон дар Душанбе муаррифӣ шуд. Марҳум ин китобро ду рӯз қабл аз марги худ ба дасти чоп дода буд

ДУШАНБЕ, 7 май – Sputnik. Давлат Ҳабибов, иҷрокунандаи вазифаи раиси "Дӯстони Русия", анҷумане, ки Абдуллоҳ Ҳабибов то рӯзҳои охирини зиндагӣ раҳбарӣ мекард, ба Sputnik Тоҷикистон гуфт, падари марҳумаш ду рӯз қабл аз маргаш ин китобро барои чоп дар ихтиёри интишороти “Шарқи озод” гузошта буд.

“Орзу мекард, ки дар расми муаррифии китоб ширкат кунад ва бигӯяд, ин китобро ба он хотир таҳия кардааст, то ояндагон бидонанд, падарони онҳо кӣ буданд ва дар Ҷанги Бузурги Ватанӣ ва Ҷанги дуюми ҷаҳонӣ чӣ нақшро ифо карданд. Ӯ аз ин ки пеши насли нав корномаҳои падаронашон дар он ҷанги бузург камранг мешавад, ранҷ мебурд ва мегуфт: ин як чизе нест, ки фаромӯш шавад”, - гуфт Давлат Ҳабибов.

 

Китоби охирини Абдулло Ҳабибибов Аскарони Ғолиб
© Sputnik (sputniktj_photo)
Китоби охирини Абдулло Ҳабибибов "Аскарони Ғолиб"

 “Аскарони ғолиб” аввалин китобест, ки дар Тоҷикистон тариқи онлайн бо ширкати намояндагони сафоратҳои Русия, Ӯзбекистон, Қазоқистон, “Россотрудничество”, Академияи вазорати умури дохилӣ, олимон, рӯзноманигорон ва дигар қишрҳои ҷомиаи Тоҷикистон муаррифӣ шуд.

Игор Лякин – Фролов, сафири Русия дар Тоҷикистон низ тариқи онлайн нашри ин китобро бар мардуми Тоҷикистон муборакбод гуфта, Абдулло Ҳабибовро яке аз “дӯстони самимии Русия” унвон кард.

Вай гуфт, густариши “вируси корона” ин имконро аз ҳама гирифт, ки мустақим дар як толор ҷамъ оянд ва радду бадали андешаҳои худ кунанд.

 “Абдулло Ҳабибов, ин марди пурэнержӣ ва хориқулодда барои беҳбуди равобити Русияву Тоҷикистон кори зиёде анҷом дод. Ӯ аз Русия гарм сӯҳбат мекард ва дӯсти ҳақиқии мардуми рус буд. Хеле рамзист, ки имрӯзҳо бояд ӯ 80 – сола мешуд. Китоб ҳам як туҳфаи рамзии ӯ ба рӯзи мавлуди дӯсти мӯътабари мо ва 75 – солагии Ғалабаи Бузург аст. Умедворам, ки ба ҳамин қарибӣ мо ба хонаводаи генерал нишони “75 – солагии Ғалаби бузург дар Ҷанги Бузурги ватанӣ” – ро тақдим кунем”, - гуфт Игор Лякин – Фролов.

 

Генерал Абдулло Ҳабибов
© Sputnik
Генерал Абдулло Ҳабибов

“Аскарони ғолиб” қиссаи 153 иштирокчии Ҷанги Бузурги Ватанӣ аз Тоҷикистон аст, ки аз сӯи Абдулло Ҳабибов бо иттифоқи рӯзноманигорон Раҷаби Мирзо ва Муҳибуллоҳи Қурбон дар 350 саҳифа ҷамъоварӣ шудааст.

Қиссаҳо аз сӯи ҳар як сарбози Ҷанги Бузурги Ватанӣ нақли қавл шуда, тайи як сол аз сӯи муаллифон гирдоварӣ ва китобат шудаанд.

Ба ҳамин минвол, ҳунармандони Театри ҷавонони ба номи Маҳмудҷон Воҳидов низ тариқи онлайн он қиссаҳоро иҷро карданд ва ин ҳавои маҳфили онлайнии муаррифии китоби “Аскарони ғолиб” – ро рангубори дигар дод.

 Мирзо Бекматови 96 – сола, сокини шаҳри Кӯлоб, танҳо иштирокчии Ҷанги Бузурги Ватанӣ буд, ки ба маҳфил пайваст. Ӯ хотираҳои худро аз айёми ҷанг бо ширкатдорон ба миён гузошт ва аз ҳамяроқони худ бо оби дида ёд кард.

 “Ҳар як ҷавонмардро он ҷанг ба коми худ кашид, ки то ба ҳол чеҳраҳояшон аз пеши назарам гум намешаванд. Аз ҳар миллату давлат буданд. Аммо ҳама як ният ва як мақсад доштанд – озодии ватан аз таҷовузгарон. Мо ба ин мақсади худ расидем. Ҳоло насли нави ҷавони мо ҳам бояд мисли мо муттаҳид бошанд ва имрӯзҳо ин ваборо, ки ба сари мардуми ҷаҳон омадааст, мисли фашизм нобуд кунанд”, - гуфт Мирзо Бекматов.

Бақия ширкатдорон, ба шумули намояндагони сафоратҳову кормандони мақомоти қудратӣ ва олимону рӯзноманигорон низ дар сӯҳбатҳои худ аз иди Ғалабаи бузург суҳбатҳое анҷом доданд. Аммо ҳамоно дар интиҳои гуфтори онҳо сухан ба сӯи генерали марҳум Абдулло Ҳабибов, мубтакир, муаллиф ва сармоягузори китоби “Аскарони ғолиб” тоб мехӯрд.

 

Китоби охирини Абдулло Ҳабибибов Аскарони Ғолиб
© Sputnik
Китоби охирини Абдулло Ҳабибибов "Аскарони Ғолиб"

Марҳум 24 апрели соли равон шаш қабл аз 80 – солагиаш даъвати Ҳақро лаббайк гуфт. Ҳамкорони дигари ӯ дар нашри ин китоб бар он ҳама, ки навишта шуда буд, фақат як ҷумла афзуданд: “Ёдгоре аз заҳматҳои охирини Абдулло Ҳабибов, ки чанд рӯз пеш аз нашри китоб реҳлат намуд”.

 

881
Барчаспҳо:
марг, муаррифӣ, Русия, сафир, Абдулло Ҳабибов, китоб, Тоҷикистон
Женщина в защитной маске на улице города Душанбе

Бидуни фавт: вазорат омори нави гирифторони коронавирус дар Тоҷикистонро эълон кард

50
(Таҷдидшуда 19:23 04.06.2020)
Вазорати тандурустии Тоҷикистон омори нави мубталоёни коронавирус дар кишварро барои имрӯз  4 июн нашр кард

ДУШАНБЕ, 4  июн — Sputnik. Тибқи иттилои дафтари матбуотии Вазорати тандурустии кишвар давоми шабонарӯзи ахир 98 ҳолати нави коронавирус ба қайд гирифта шудааст.

Тибқи маълумот  то имрӯз 4 июн, шумораи умумии беморони коронавирус дар ҷумҳурӣ ба 4289 нафар расид.

Ҳамзамон, дар давоми як рӯзи охир, табибон тавонистанд 54 беморро табобат кунанд.

Сар аз оғози эълони ин бемори дар кишвар то кунун  2 401 нафар шаҳрвандон шифо ёфтанд.

Инчунин то имрӯз, 1418 сокин дар беморхона таҳти назорати кормандони тиббӣ қарор доранд.

Вазорати тандурустӣ гуфтааст,  давоми шабонарӯзи охир аз коронавирус ҳеҷ кас нафавтидааст. Теъдоди қурбониён то имрӯз аз  ин беморӣ дар кишвар ба  48 нафар мерасад.

Ин ниҳод афзудааст, ки ҷиҳати пешгирӣ ва табобати коронавируси нави CОVID-19 тамоми тадбир ва чораҳои заруриро амалӣ мешаванд ва дар ин лаҳзаҳои ҳассос аз тамоми сокинони кишвар даъват ба амал оварда мешавад, ки ҷиҳати пешгирии сирояти мазкур пеш аз ҳама, қоидаҳои беҳдошти шахсиро қатъиян риоя намоянд, зеро, дар урфият беҳуда нагуфтаанд, ки табиби ҳар шахс худи ӯст.

Вазорати тандурустӣ ва ҳифзи иҷтимоии аҳолии Тоҷикистон, рӯзи 30-уми апрел нахустин бор аз гирифтории 15 сокини кишвар ба бемории коронавирус хабар дода буд.

50
Открытие нового здания хирургии в районе Шахристан, архивное фото

Хушхабар: Пажӯҳишгоҳи гастроэнтерология дар Душанбе аз маризони COVID - 19 орӣ шуд

352
Тамоми маризони COVID -19, ки дар Пажӯҳишгоҳи гастроэнтерология дар шаҳри Душанбе бистарӣ буданд, шифо ёфта мураххас шуданд

ДУШАНБЕ, 4 июн — Sputnik. Вазорати тандурустии Тоҷикистон аз орӣ шудани Пажӯҳишгоҳи гастроэнтерология дар шаҳри Душанбе аз маризони коронавирус хабар дод.

Ба иттилои манбаъ, ҳамаи маризони коронавирус, ки дар ин беморхона бистарӣ буданд, шифо ёфта ба хонаҳои худ баргаштанд.  

Ду донишҷӯи тоҷик мубталои коронавирус шуда, ба бемористон бистарӣ шуданд

Зимнан, вазорат таъйид намудаст, ки дар чанд рӯзи ахир қисме аз муассисаҳои тандурустӣ, ки  муддати муайян дар онҳо беморони гирифтори коронавирус табобат мегирифтанд, ба фаъолияти муқаррарӣ баргаштанд.

"Муассисаи давлатии "Маркази ҷумҳуриявии клиникии бемориҳои дил" ва Маркази бемориҳои урологӣ, воқеъ дар Муассисаи давлатии Маркази миллии тиббии Тоҷикистон "Шифобахш" ва бахши таваллудхонаи Муассисаи давлатии Маҷмааи тандурустии "Истиқлол", ки ба муоинаву муолиҷаи гирифторони бемории коронавирус машғул буданд,  ба фаъолияти муқаррарии корӣ баргардонида шуданд", - таъкид мешавад дар хабар.

Манбаъ меафзояд, ҳоло  дар аксар минтақаҳои мамлакат, бахусус дар шаҳри Душанбе ҳолатҳои сироятёбии сокинон аз бемории  COVID-19 то андозае поён рафта, ҳамзамон муроҷиати шаҳрвандони мамлакат низ ба муассисаҳои тиббӣ бо нишонаҳои сироятёбӣ аз коронавирус кам шудааст.

Мутахассисони соҳаи тандурустӣ бар он назаранд, ки дар Ҷумҳурии Тоҷикистон давраи авҷи сироятёбии сокинон ба бемории COVID-19 паси сар шудааст.

352
Барчаспҳо:
маризон, бемористон, Тоҷикистон
Мавзуҳо:
Пайомадҳои COVID-19 дар Тоҷикистон ва ҷаҳон

Путин аз беҳбуд шудани вазъи коронавирус дар Русия хабар дод

0
Раисҷумҳури Русия Владимир Путин мегӯяд, вазъияти феълӣ дар роибта ба авҷи маризии коронавирус, рӯ ба беҳбудӣ дорад

ДУШАНБЕ, 4  июн — Sputnik. Кишвардори Русия Владимир Путин мегӯяд, вазъият дар робита ба маризии коронавирус рӯ ба беҳбудӣ ниҳодааст.

Сомонаи Кремл хабар медиҳад, ки Владимир Путин бо аъзои Шӯрои Амнияти Федератсияи Русия дар бораи вазъи феълӣ мулоқот баргузор намудаст.

Ба гуфтаи Путин, бо вуҷуди беҳтар шудани вазъ, назорат дар ҳар минтақа бояд пурзӯр карда шавад "ва дар сурати мушоҳида кардани тағйироти кӯчак дар робита ба авҷи коронавирус фавран бояд чораҷӯӣ кард".

232 бемор: фавти рекордӣ аз коронавирус дар Русия давоми як рӯз

Зимнан, раисҷумҳури Русия аз афзоиши шумораи гирифторони коронавирус дар манотиқи Забайкал шадидан изҳори нигаронӣ кард.

Дар робита ба ин, Владимир Путин барои назорати вазъ дар ин манотиқ ба масъулини дахлдор дастуру супоришҳои нав дод.

Бар  тибқи тозатарин маълумотҳо, дар Федератсияи Русия ба ҳолати 4 - уми июн 441 ҳазор дардмандони маризии сироятии коронавирус ба қайд гирифта шудааст.

Аз ин маризӣ дар Русия 204 ҳазор бемор шифо ёфта, ҳамзамон 5384 нафар ҷон бохтанд.

0
Барчаспҳо:
маризон, вазъият, Владимир Путин, Русия
Мавзуҳо:
Пайомадҳои COVID-19 дар Тоҷикистон ва ҷаҳон