Пиджак на кресле

Таъйиноти кадрӣ бо сабаби фавт: Зокиров, комиссари ҳарбии шаҳри Гулистон шуд

1531
(Таҷдидшуда 12:58 18.06.2020)
Бо фармони вазири мудофия Илҳом Зокиров, комиссари ҳарбии шаҳри Гулистон таъйин шудааст. Дар ин мақоми вазифавӣ, ӯ ба ҷойи марҳум Манучеҳр Шокиров корро оғоз кардааст

 ДУШАНБЕ, 18 июн – Sputnik. Хабари таъиноти кадрӣ дар сатҳи комиссарияти ҳарбии шаҳри Гулистонро манобеъ аз ҳукумат ва комиссарияти ҳарбии ин шаҳр тасдиқ карданд.

Ҷамшед Бобоев, сардори шуъбаи кор бо шаҳрвандони эҳтиётӣ дар комиссарияти ҳарбии шаҳри Гулистон дар суҳбат ба Sputnik Тоҷикистон гуфт, Зокиров минҳайси комиссари ҳарбии шаҳр аз рӯзи 12 уми июн ба кор шурӯъ намудааст.

 “Бар асоси фармони вазири мудофияи кишвар муҳтарам Шералӣ Мирзо аз санаи 12-уми июн Зокиров Илҳом Халилбоевич комиссари ҳарбии шаҳри Гулистон таъин карда шуд”, - зикр кард Бобоев.

Мақоми нави Илҳом Зокировро, дирӯз дар зимни баргузории як ҷаласа дар ҳукумати шаҳри Гулистон муаррифӣ кардаанд. Таъйини Зокиров ба мақоми комиссари ҳарбии шаҳри Гулистони вилояти Суғд дар ҳоле сурат мегирад, ки рӯзи 25 уми апрел, комиссарияти ҳарбии ин шаҳр майор Манучеҳр Шокиров бар асари садамаи нақлиётӣ дар километри 145 уми шоҳроҳи Душанбе – Чаноқ воқеъ дар ҳудуди даромадгоҳи шаҳри Истаравшан ба ҳалокат расид.

Рухдоди ин садамаи нақлиётиро мақомти БДА (ГАИ) и вилояти Суғд шарҳ дода, иттилоъ дода буд, ки Шокиров Манучеҳр, бо мошини тамғаи “Mersedes – Benz” ҳангоми ҳаракат аз самти шаҳри Истаравшан ба шаҳри Хуҷанд, аз уҳдаи идора намудани воситаи нақлиёт набаромада, ба самти муқобили роҳ гузашта ба автомашинаи тамғаи “Opel -Vectra”, таҳти идораи Хоҷамуродов Бахтиёр, сокини ноҳияи Зафаробод, бархӯрдааст.

Бар асари ин ҳодисаи мудҳиш 8 нафар ба ҳисоби худи комиссари ҳарбии шаҳри Гулистон ҳалок шудаанд.

Илҳом Зокиров соли 1990 дар шаҳри Конибодом таваллуд шуда, пас аз хатми Донишкадаи ҳарбии Федератсияи Русия дар шуъбаи 2-юми комиссарияти ҳарбии Конибодом корро сар карда, баъдан сардори шуъбаи даъват ва тайёрии ҷавонон ба хизмати ҳарбӣ дар шаҳри Панҷакент қабул шудааст.

Ӯ майори Вазорати мудофия буда, бо фармони вазир комиссари ҳарбии шаҳри Гулистон таъйин шудааст. Рӯзи 11 уми июн, бо фармонҳои Шералӣ Мирзо, майор Аҳадҷон Додоҷонов комиссари ҳарбии ноҳияи Мастчоҳ ва подполковник Алиҷон Сангинзода, ки то ин вақт комиссари ноҳияи Мастчоҳ буд, комиссари ҳарбии шаҳри Исфара таъйин шудаанд.

1531
Барчаспҳо:
ҳарбӣ, фавт, сабаб, таъйинот, таъйиноти кадрӣ, Гулистон, Тоҷикистон
Рогунская ГЭС

Ҳодисаҳои нохуш дар саноат: ҳалокати 1 ва ҷароҳати 9 кас ҳангоми сохтмони "Роғун"

11
Дар умум, дар кори ширкату сохтмонҳои Тоҷикистон 3 нафар ба ҳалокат расида, 13 тани дигар ҷароҳатҳои гуногун гирифтаанд

ДУШАНБЕ, 14 июл — Sputnik. Санъат Раҳим, раиси Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Тоҷикистон зимни нишасти матбуотии ин ниҳод бо эълони ин омор гуфт, аксари ин мурдану ҷароҳатбардориҳо дар пайи беэҳтиётӣ ва риоя накардани қоидаву техникаи бехатарии кор рух додааст.

“Бештарин маворид ба кори ширкатҳое, ки дар сохтмони нерӯгоҳи барқи обии Роғун рост меояд. Худи коргарон ё раҳбарони онҳо аз ин ки ғайриҳирфаӣ будаанд, аз қоидаву техникаи бехатарии кор хабар надоштаанд ё беэҳтиётӣ кардаанд. Коргарон ва омилони дигари ин ҳодисаҳои нохуш муҷозот шуда, ба ниҳодҳои ҳифзи ҳуқуқ пешниҳод шуд, ки афроди ғайриҳирфаӣ аз вазифа барканор шаванд”, - гуфт Санъат Раҳим.

Тибқи иттилои Хадамоти назорати давлатии бехатарии корҳо дар саноат ва соҳаи кӯҳкорӣ, дар сохтмони нерӯгоҳи Роғун ҳангоми кор як нафар ба ҳалокат расида, 9 нафари дигар захмӣ шудаанд. Бино ба ин манбаъ, дуввумин ширкате, ки ҳамчунин маворидро таҷриба кардааст, ширкати кӯҳии Тоҷикистону Хитой аст. Ҳангоми кор дар ин ширкат ду нафар ба ҳалокат расида, ду нафари дигар ҳам ҷароҳат гирифтаанд.

Ба ҳамин минвол, тайи ним соли равон аз ҳодисаҳои нохуш ҳангоми кор якнафарӣ коргарони ширкатҳои “Талко”, Маркази илмӣ – техникии Ҳуавей дар Зарнисор ва “Анзоб” низ захмӣ шудаанд.

 

11
Юсуф Рахмонов на пресс-конференции Генеральной прокуратуры РТ

Юсуф Раҳмон: “Тафтиши парвандаи “Хӯҷа - Командир” ҳанӯз ниҳоӣ нашудааст”

42
(Таҷдидшуда 13:38 14.07.2020)
Парвандаи Хӯҷа Каримов, мулаққаб ба “Хӯҷа - Командир”, ки ҳанӯз моҳи феврал аз Дубай ба Душанбе интиқол ёфта буд, ҳамоно дар дасти тафтишот аст ва ниҳоӣ нашудааст

ДУШАНБЕ, 14 июл — Sputnik. Юсуф Раҳмон, прокурори генералии Тоҷикистон зимни нишасти матбуотии ниҳодаш гуфт, парвандаи ҷиноӣ нисбати Хӯҷа Каримов дар ҳоли баррасӣ қарор дорад.

“Парванда ҳанӯз такмил нашудааст. Пас аз анҷоми тафтишот ба суд ирсол хоҳад шуд”, - кӯтоҳ посух дод Юсуф Раҳмон.

 Парванда алайҳи Хӯҷа Каримов ё “Хӯҷа-Командир” ҳанӯз соли 2008 оғоз шудааст. Ӯ бар асоси 7 банди Кодекси ҷиноии Тоҷикистон, аз ҷумла бандитизм, одамкушӣ, азобу уқубат, шиканҷа, гаравгонгирӣ ва ғайриқонунӣ нигоҳ доштани силоҳи оташфишон муттаҳам мешуд ва дар кофтукови расмӣ қарор дошт.

Хӯҷа Каримов яке аз фармондеҳони Фронти халқӣ буд, ки дар замони ҷанги дохилӣ ноҳияи Ғозималики собиқ (ҳоло Хуросон) ва навоҳии атрофи онро таҳти назорат дошт.

 Маҳз дар ин айём гурӯҳи мусуллаҳи ӯ даст ба ҷиноятҳои зиёд, аз қабили куштор, сирқати амвол, одамрабоӣ ва ғайра мезанад, ки ҳукумати марказиро ба ташвиш меорад ва соли 1998 ӯро дар толори Шӯрои Олии Тоҷикистон, ки Каримов узваш буд, боздошт мекунанд. Аммо дере нагузашта ӯ раҳо шуд ва соли 2001 бо истифода аз нуфузи пуштибонҳои қавии худ аз пайгарди қонун ба хориҷ аз Тоҷикистон фирор кард.

Бино ба хабарҳои мухталиф, ӯ дар Малайзия сукунат ихтиёр карда буд. 30 июли соли гузашта Хӯҷа ва муҳофизу мураббии русашро мақомоти Имороти Муттаҳидаи Араб дар шаҳри Дубай бо талаби мақомоти Тоҷикистон боздошт карданд, аммо ба шарти берун нарафтан аз манзил раҳо карданд.

Бино ба иттилои ғайрирасмӣ, Хӯҷа Командир дар Дубай чандин хона дорад ва ӯро борҳо дар Дубайу Шарҷа ва шаҳрҳои дигари Имороти Муттаҳидаи Араб дида буданд.

Хӯҷа Каримовро дар оғози моҳи феврал аз Дубай ба Душанбе истирдод ва тафтиши парвандаашро оғоз карданд. Аз рӯи иттиҳомҳое, ки мақомот нисбат ба Хӯҷа Каримов эълон кардаанд, ба ӯ солҳои тӯлонии зиндон таҳдид мекунад.

42
Барчаспҳо:
марҳилаи ниҳоӣ, тафтиши парванда, Юсуф Раҳмон, додситони кулл, Прокурори генералӣ, Тоҷикистон