Надпись в центре города Худжанд Я люблю Худжанд, архивное фото

Бӯи ғализ дар Хуҷанд: мушкиле, ки 2 ҳоким Муҳаммадзода ва Назирӣ дар ҳаллаш оҷиз мондаанд?

708
(Таҷдидшуда 18:00 28.08.2020)
Бо вуҷуди огоҳ кардани масъулони ҳукумати шаҳри Хуҷанд ва ҳукумати ноҳияи Бобоҷон Ғафуров, мушкили паҳншавии бӯи ғализ дар Хуҷанд, маркази маъмурии вилояти Суғд то ба ҳол бартараф нашудааст

ДУШАНБЕ, 28 авг – Sputnik. Беш аз ним сол аст, ки бӯи ғализ ҳавои Хуҷандро олуда мекунад ва сокинони аксар маҳаллаҳои шаҳр мегӯянд, ки дар чунин вазъ гирифтани ҳавои тоза мушкил шудааст.

"Дару тирезаҳоро намекушоем, ки бӯи ғализ меояд"

Сокинони маҳаллаҳои 3, 8, 13, 14 – 15, 18, 19 ва 20-и Хуҷанд, чанд вақт аст, ки шому саҳар дару тирезаи хонаҳояшонро бо сабаби паҳншавии бӯи тафти ғализ кушода наметавонанд.

“Субҳ барои тоза шудани ҳавои дохили хона тирезаҳоро боз мекунем, аммо ба ҷои ҳавои тоза бӯи ғализ ҳама ҷойро олуда мекунад. Аз ин сабаб мо дару тирезаҳоро кушода наметавонем, ки бӯй ба хонаҳо расида ба сару либос нашинад”,- гуфт як сокини маҳаллаи 20-уми Хуҷанд ба Sputnik Тоҷикистон.

Ин мушкили Хуҷанд ахиран рӯзи 15-уми июли соли ҷорӣ дар нишасти матбуотӣ ба Маъруф Муҳаммад, раиси шаҳри Хуҷанд дар миён гузошта шуд ва шаҳрдор манбаъи паҳншавии бӯи ғализро аз порӯи мурғхонаҳое шарҳ дод, ки дар ҳудуди ҷамоати ноҳияи Бобоҷон Ғафуров, ҳаммарз бо маҳаллаҳои Хуҷанд мавҷуд мебошанд.

Муҳаммадзода: манбаъи бӯй мурғхонаҳои ноҳияи Б.Ғафурованд

“Паҳншавии бӯи бад дар шаҳр мо ҳама маъмурони шаҳрро нигарон кардааст. Мо оиди ин масъала 10-12 рӯз ба ин тараф машғул ҳастем. Гурӯҳҳои корӣ иборат аз кормандони санитарию эпидемологии шаҳр, Раёсати экология вилоят маълум намуданд, ки дар мавзеъҳои доманакӯҳи шаҳр, воқеъ дар ҳудуди ноҳияи Бобоҷон Ғафуров аз ҷониби баъзе ашхос фермаҳои мурғпарварӣ ташкил карда шуда ва порӯи чунин фермаҳо дар фазои кушод нигоҳ дошта мешудааст, ки ба ҳангоми вазидани шамол ба микроноҳияҳои шаҳр паҳн мегардад", - гуфта буд раиси шаҳри Хуҷанд.

Маъруф Муҳаммадзода дар нишасти матбуотӣ ҳамчунон зикр намуд, ки оиди ҷойдошти ин мушкил  ба унвонии Зариф Назирӣ, раиси ноҳияи Бобоҷон Ғафуров ва Ҳакимзода Абдуаҳад Қурбон, сардори Раёсати ҳифзи муҳисти зисти вилояти Суғд мактуб ирсол намудаанд, то масъалаи бартараф шудани бӯи ғализ аз фаъолияти мурғхонаҳоро бозбинӣ кунанд.

Бо супориши Зариф Назирӣ, раиси ноҳияи Бобоҷон Ғафуров, гурӯҳи корӣ иборат аз  сардори идораи ҳифзи муҳисти зисти ноҳия Ғаффоров Ҷ., сармутахассиси ин идораи ҳифзи муҳити зист Раҷабов М., сармутахассиси маркази назорати давлатии санитарию эпидемиологӣ  Аҳроров И. Қ. ва сардори маркази таъминоти бехатарии озуқаворӣ дар ноҳия Искандаров Ф. Н. ба санҷиши фаъолияти мурғхонаҳо сафарбар шудаанд.

Мақомоти ноҳияи Б. Ғафуров: бӯй аз мурғхона не, аз Хуҷандобуканал аст

Бино бар санади тартибдодаи масъулони чунин идораҳои ноҳияи Бобоҷон Ғафуров, паҳншавии бӯи ғализ дар Хуҷанд аз ҳисоби фермаҳои мурғпарварӣ инкор шуда, манбаъи паҳншавии бӯй аз фаъолияти ҳавзҳои иншооти партовобтозакунии КВДК “Хуҷандобуканал” таъкид мешавад.

“Азназаргузаронии мавзеъи мазкур (минтақаи ҳаммарз бо маҳаллаи 3 -уми Хуҷанд) нишон дод, ки дар ин мавзеъ иншооти обтозакунии КВД обтаъминкунии шаҳри Хуҷанд ҷой гирифта шудааст. Дар бораи бӯи ғализ қайд кардан ба маврид аст, ки солҳои пеш аз 18 адад ҳавзҳои пасобтакшинкунӣ 2 ададаш фаъолият мебурд. Баъд аз таъмир ва таҷдиди обпартоватозакунии шаҳри Хуҷанд аз моҳи феврали соли 2020, 18 адад ҳавзҳо фаъолият бурда истодаанд, ки аз сабаби гармшавии ҳаво протсесҳои биологӣ (брожение) ба амал омада, бӯи ғализ пайдо шуда дар ҳолати вазидани шамол ба ҳар тараф паҳн мешавад”,- гуфтаанд  дар Санад.

Аммо масъулони КВДК “Хуҷандобуканал” иддаои масъулони идораҳои ноҳияи Бобоҷон Ғафуров дар бораи паҳншавии бӯи ғализ аз фаъолияти иншооти партовобтозакуниро бе асос мешуморанд ва мегӯянд, иншооти идораи онҳо дар ҷое бунёд шудааст, ки боиси олудагии ҳаво дар маҳалли аҳолинишин намегардад.

“Иншоот дар 343 метр аз сатҳи баҳр ҷойгир аст ва нисбат ба маҳаллаи 3-юми шаҳр дар сатҳи 27 метр пасттар воқеъ буда, аз маҳаллаҳои навбунёд дар масофаи 10-15 километр дур аст ва сабаби паҳн шудани бӯйи ғализ дар шаҳр буда наметавонад. Зеро иншооти мазкур тибқи талаботи беҳдоштӣ бояд аз марзи шаҳри Хуҷанд 5 км дур бошад, имрўз ин талабот риоя гардида, дар масофаи беш аз 8 км аз ҳудуди маҳаллаи 3-юми шаҳр, воқеъ дар маҳаллаи Мараҷаби ҷамоати Ёваи ноҳияи Бобоҷон Ғафуров ҷойгир аст. Дар иншооти мазкур корҳои таҷдиду азнавсозӣ гузаронида шуда, ҳанўз санаи 13 сентябри соли 2019 он бо пуррагӣ ба истифода дода шудааст.  Ҳол он, ки бўйи ғализ танҳо аввали соли ҷорӣ пайдо шуда, дар як рўз 2-3 маротиба ба фазои шаҳр паҳн шуда истодааст, бахусус шабонгоҳ”, - таъкид шудааст дар гузориши “Хуҷандобуканал”.

Чанде қабл ҳам масъулони Раёсати ҳифзи муҳити зист дар Суғд дар суҳбат таъкид намуданд, ки паҳншавии бӯи ғализ аз ҳисоби корхонаи коркарди партов аз ташноб (канализатсия) муайян нашудааст.

Бӯи ғализ -мушкиле, ки чаро ним сол боз ҳал намешавад?

Дар ҳамин ҳол сокинони Хуҷанд мегӯянд  бӯе, ки умдатан ҳар субҳу ҳар шом шаҳрро фаро мегирад ба фаъолияти фермаҳое шабоҳат дорад.

Дар маҳаллаҳои Сартуқай, Себоғ (Учбоғ) ва Ваҳдати ноҳияи Бобоҷон Ғафуров, ки ҳаммарз бо шаҳри Хуҷанд мебошанд, ҳоло чандин фермаи мурғпарӣ ташкил карда шудааст.

Масъулони ҳукумати Хуҷанд манбаъи бӯи ғализро аз порӯи мурғхонаҳо дар ноҳияи Бобоҷон Ғафуров шарҳ медиҳанд, мақомдорони ин ноҳия бошанд иддаои дигар пеш меоваранд.

Чаро Маъруф Муҳаммадзода раиси шаҳри Хуҷанд ва Зариф Назирӣ раиси ноҳияи Бобоҷон Ғафуров дар бартараф намудани мушкили ба миёномада ночор мондаанд ва кай бӯи ғализ дар Хуҷанд бартараф мешавад, суолест, ки то ҳол бе посух мондааст.

708

Вазорат тасдиқ кард: дар Тоҷикистон шумори ҷонбохтагон бар асари COVID-19 афзоиш ёфт

228
(Таҷдидшуда 22:19 30.09.2020)
Вазорати тандурустии Тоҷикистон омори нави сироят, фавту шифоёбии шаҳрвандон аз маризии вируси коронаро нашр кард

ДУШАНБЕ, 30 сен — Sputnik. Шабонарӯзи гузашта 43 ҳодисаи нави бемории COVID-19 дарёфт гардида,  иттилоъ додааст дафтари матбуоти Вазорати тандурустӣ ва ҳифзи иҷтимоии аҳолии Тоҷикистон.

Бино бар иттилои манбаъ шаббнарӯзи гузашта 74 нафар гумонбарон зери назорати табибон қарор дошта, 41 нафар баъд аз муолиҷа ба хонаҳояшон рухсат дода шуданд

Тавре манбаъ қайд кардааст дар маҷмӯъ шумораи гирифторони ин беморӣ ба  9769 нафар баробар гардидаст.

Инчунин,  таъкид шудааст, ки то санаи  30 сентябр дар мамлакат  8572  (87,7%) нафар аз бемории COVID-19 шифо ёфта,  бар асари он 76  нафар фавтидаанд.

Маврид ба зикр аст, ки Ҳукумати Тоҷикистон ҷиҳати пешгирӣ ва табобати коронавируси нави CОVID-19 тамоми тадбир ва чораҳои заруриро амалӣ намуда истодаанд.

228
Барчаспҳо:
афзоиш, вазорат, сироят, омор, вируси корона, Тоҷикистон
Футбольный мяч на поле, архивное фото

Дар деҳаи Шуҷанди ноҳияи Рӯшон варзишгоҳи муосир бунёд шуд

33
(Таҷдидшуда 21:40 30.09.2020)
Дар рӯзи ифтитоҳи варзишгоҳ Хонаи фарҳанги деҳа низ пас аз таъмиру таҷдид дари худро ба рӯи сокинон боз намуд

ДУШАНБЕ, 30 сен — Sputnik. Дар деҳаи Шуҷанди ноҳияи Рӯшони Вилояти Мухтори Кӯҳистони Бадахшон варзишгоҳи муосир ба истифода дода шуд. 

Дар варзишгоҳ барои машқ ва мусобиқа аз намудҳои баскетбол, волейбол, футболи хурд, давидан ба масофаи кӯтоҳ шароити мусоид фароҳам оварда шудааст, хабар медиҳад АМИТ "Ховар".

Директори мактаби №10-и деҳаи мазкур Акимбек Акимбеков гуфт, ки "ин варзишгоҳ дар наздикии бинои таълимгоҳ  воқеъ аст. Дар мувофиқа бо бахши ҷавонон ва варзиши назди мақомоти ноҳия то нисфирӯзӣ хонандагони таълимгоҳ дар ин варзишгоҳ  дарси тарбияи ҷисмонӣ мегузаронанд ва пас аз анҷоми дарс он дар ихтиёри ҷавонони деҳа гузошта мешавад".

Муовини аввали раиси ноҳияи Рӯшон Гулмаст Дӯсталиев гуфт, ки "Ҳукумати ҷумҳурӣ ба солимии насли наврас таваҷҷуҳи зиёд равона месозад ва инро мо дар ноҳияи худ низ мушоҳида мекунем. Танҳо дар се соли охир се варзишгоҳи мутобиқ ба меъёрҳои байналмилалӣ мавриди баҳрабардорӣ  қарор дода шуданд".

Ба иттилои Дӯсталиев барои бунёди ин варзишгоҳ дар ҳамкорӣ бо шарикони рушд 650 ҳазор сомонӣ сарф шуд.

Ҳоло сохтмони майдони футбол дар маркази ноҳия барои 6 ҳазор ҷои нишаст идома дошта, дар назар аст, ки  дар остонаи ҷашни 30-солагии Истиқлоли Тоҷикистон ба истифода дода шавад.

33
Барчаспҳо:
Варзишгоҳ, Рӯшон, ВМКБ
В.Путин принимает участие в четвертом Каспийском саммите

Рӯҳонӣ: дахолати хориҷӣ дар муноқишаи Боку ва Ереван авзоъро печидатар мекунад

0
(Таҷдидшуда 21:53 30.09.2020)
Раисҷумҳурии Эрон бо ибрози нигаронӣ аз даргирии ахир байни Арманистон ва Озарбойҷон, ҳаргуна дахолати хориҷӣ дар ин моҷароро мӯҷиби печидатар шудани авзоъ донист

ДУШАНБЕ, 30 сен — Sputnik. Ҳасани Рӯҳонӣ, раисҷумҳури Эрон ахиран дар тамоси телефонӣ бо Никол Пашиниян, нахуствазири Арманистон бо таъкид бар аҳамияти сулҳ, суботу амният дар минтақа афзуд, ки минтақаи Ғарби Осиё тавони бесуботӣ ва ҷанги ҷадидро надорад, иттилоъ додааст хабаргузории "Парстудей".

Тавре манбаъ қайд намудааст, Рӯҳонӣ бо баёни ин ки бояд барои ҳаллу фасли масъалаи Қарабоғ дар чорчӯби муқаррароти байналмиллалӣ ва тамомияти арзӣ роҳи ҳалле ёфт шавад таъкид кард, ки таваққуфи ин даргириҳо барои Эрон муҳим аст ва Теҳрон интизор дорад Арманистон ва Озарбойҷон бо дироят ва хештандорӣ дар ин масир гом бардоранд.

Раисҷумҳури Эрон бо таъкид бар ин ки ҷанг роҳи ҳалли бартараф кардани мушкилоту танишҳо ва ихтилофот нест гуфт, ки ҳаргуна дахолати хориҷӣ дар ин моҷаро на танҳо ба ҳаллу фасли мушкил кумак намекунад балки даргириҳо ва танишҳоро тӯлонитар ва авзоъро печидатар хоҳад кард.

Рӯҳонӣ  ҳамчунин бо ишора ба аҳамият ва собиқаи тӯлонии равобити Эрон бо Ҷумҳурии Озарбойҷон ва Арманистон, омодагии Теҳронро барои ифои ҳаргуна нақши созанда, ки мавриди назари ду кишвари дӯсту ҳамсоя бошад, эълом кард.

Никол Пашиниян низ бо ишора ба таҳаввулоти ахири ношӣ аз даргириҳои низомии Арманистон бо Озарбойҷон, танишу даргириро ба зиёни ҳамаи кишварҳои минтақа донисту аз ҳаргуна ибтикори амале барои таваққуфи хушунатҳо истиқбол кард.

Нахуствазири Арманистон ҳамчунин аз мудохилаи хориҷӣ дар масъалаи ихтилофоти Арманистон бо Озарбойҷон ибрози нигаронӣ кард.

0
Барчаспҳо:
Ереван, Боку, муноқиша, даргирӣ, моҷаро, хориҷӣ, Озарбойҷон, Арманистон, Эрон