Парвиз Асозода

“Донишманду хоксор, қоматбаланду сарбаланд”: марги нобаҳангоми дипломати тоҷик

3900
(Таҷдидшуда 15:22 09.11.2020)
Парвиз Асозода, дипломат, корманди сафорати Тоҷикистон дар Туркманистон ва фарзанди Худоназар Асозода, донишманди шинохтаи тоҷик дар синни 53 – солагӣ вафот кард

ДУШАНБЕ, 9 ноя – Sputnik. Яке аз пайвандони марҳум ба Sputnik Тоҷикистон гуфт, Парвиз Асозода вақтҳои ахир аз маризии сиррози ҷигар ранҷ мебурд ва аввали моҳи равон маризиаш хуруҷ карда, ӯро аз Ишқобод ба Душанбе интиқол доданд.

"Дар Институти гастроэнтерологии Тоҷикистон, маъруф ба “Клиникаи Мансуров” бистарӣ кардем, аммо маризӣ шиддат гирифт ва бегоҳи 8 ноябр аз олам чашм пӯшид", - гуфт ӯ.

Мотам дар "Амонатбонк": Зариф Ҷӯраев даргузашт

Кормандони вазорати корҳои хориҷии Ҷумҳурии Тоҷикистон дар сафҳаи фейсбукии ин ниҳод бо пахши як барқияи таслият ба наздикону пайвандони Парвиз Асозода аз хабари даргузашти нобаҳангоми ин дипломати собиқадор амиқан изҳори андӯҳ кардаанд.

“Дар ин рӯзи фироқи ҷонгудоз ба ҳамаи пайвандон ва наздикони марҳум сабри ҷамил хоҳонем. Ҷои шодравон фирдавси барин бошад”, - навиштаанд ҳамкорон.

Парвиз Асозода соли 1970 дар шаҳри Душанбе таваллуд шуда, хатмкардаи факултаи филологияи тоҷики Донишгоҳи миллии Тоҷикистон мебошад.

 Пас аз хатми таҳсил ба Донишгоҳи шаҳри Санъои Яман барои таҷрибаомӯзӣ рафта, пас аз бозгашт дар кафедраи забони арабии донишгоҳи мазкур омӯзгор ва баъдтар муовини сардори кафедра шуда кор кардааст.

 Аз соли 2007 барои кор ба вазорати корҳои хориҷии Тоҷикистон омада, аввал дар Раёсати иттилоот ва матбуот ва сипас дар сафоратҳои Тоҷикистон дар Ӯзбекистону Қазоқистон, консули генералии Тоҷикистон дар шаҳри Екатеринбурги Русия, муовини сардори Раёсати консулии вазорати корҳои хориҷӣ, сардори Маркази “Иттилоот ва Муошират”, мушовири Раёсати иттилоот ва матбуот фаъолият намудааст.

Як соли қабл барои кор дар сафорати Тоҷикистон дар Туркманистон эъзом шуд. Падари Парвиз Асозода – профессор Худоназар Асозода, доктори улуми филологӣ, як муҳаққиқи маъруфи адабиёти классикии тоҷик буд, ки соли 2014 дар синни 73 аз олам чашм пӯшид.

Нафари дигар аз хонадони маъруфи Асозодаҳо - Мӯсо Асозода, амаки Парвиз Асозода буд, ки дар гузашта раиси Ҳизби ҳокими Халқӣ-Демократӣ дар шаҳри Душанбе ва Анҷумани воситаҳои ахбори электронии Тоҷикистон буд. Мавсуф моҳи майи соли ҷорӣ дар айни гирудор бо “вируси корона” бо зиндагӣ падруд гуфт.

3900
Барчаспҳо:
тоҷик, донишмандон, марг, дипломат, сафорат, Тоҷикистон
Медицинский работник в спецзащите в отделении реанимации и интенсивной терапии

Вазорат марги боз як нафари дигарро бар асари COVID-19 дар Тоҷикистон таъйид кард

17
(Таҷдидшуда 19:48 02.12.2020)
Вазорати тандурустӣ ва ҳифзи иҷтимоии аҳолии Тоҷикистон эълон кард, ки тайи шабонарӯзи гузашта як ҳолати фавт бар асари коронавирус ба қайд гирифта шудааст

ДУШАНБЕ, 2 дек — Sputnik. Тибқи иттилои Вазорати тандурустӣ ва ҳифзи иҷтимоии аҳолӣ, шабонарӯзи гузашта дар ҷумҳурӣ 38 ҳолати нави сироятёбӣ ба COVID-19 ошкор гардид.

Манбаъ афзуд, шумораи умумии гирифторон аз 30 апрел то 2 декабр ба 12 ҳазору 269 нафар расид.

Вазорат таъкид намудааст, ки давоми шабонарӯзи гузашта 37 нафар пас аз табобат ба хонаҳояшон рухсат дода шуда, дар маҷмӯъ шумораи шифоёфтагон аз ин беморӣ дар Тоҷикистон ба  11 ҳазору 677 баробар гардид.

Таносуби шифоёфтагон аз теъдоди умумии гирифторон 95,2% арзёбӣ шудааст.

Дар ҳамин ҳол, вазорати тандурустӣ қайд кардааст, ки мутаасифона шабонарӯзи гузашта боз як марги дигар ба қайд гирифта шуд.

Ҳамин тавр ба иттилои вазорат, аз 30 апрел то 2 декабри соли равон бар асари ин беморӣ 87 нафар фавтидаанд.

Мавриди зикр аст, ки Ҳукумати Тоҷикистон ҷиҳати пешгирӣ ва табобати коронавируси нави CОVID-19 тамоми тадбир ва чораҳои заруриро амалӣ менамояд.

17
Барчаспҳо:
марг, вируси корона, фавт, шабонарӯзӣ, Вазорати тандурустӣ, Тоҷикистон
Президент Республики Таджикистан Эмомали Рахмон

Раҳмон аз таъсири COVID-19 ба иқтисод гуфту болоравии хатари терроризмро таъкид кард

196
(Таҷдидшуда 19:12 02.12.2020)
Эмомалӣ Раҳмон, раисҷумҳури Тоҷикистон, зимни суханрониаш дар ифтитоҳи ҷаласаи Шӯрои амнияти дастаҷамъии СААД таъкид доштааст, ки ҳамагирии COVID-19 боиси таназзул ва мушкилоти дорои хусусияти иҷитимоиву иқтисодӣ гардид

ДУШАНБЕ, 2 дек — Sputnik. Ба гуфтаи Эмомалӣ Раҳмон, раисҷумҳури Тоҷикистон, COVID-19  ба зиндагии муқаррарӣ ба таври муассир таъсир расонида, тамоми кишварҳоро водор кард, ки нақшаҳову ниятҳои қаблан муайяннамудаашонро ҷиддан бознигарӣ намоянд.

“Буҳрони иҷтимоӣ ва молиявию иқтисодие, ки бар асари ҳамагирӣ ба вуқӯъ пайваст, ба нишондодҳои пешбинигардидаи афзоиши иқтисоди ҷаҳонӣ таъсири манфӣ расонида, болоравии сатҳи бекорӣ ва таҳдиди амнияти ғизоиро ба миён овард”, - таъкид доштааст Эмомалӣ Раҳмон.

Ҳамзамон, кишвардори Тоҷикистон зикр кард, ки дар баробари ин, таҳдидҳои ҷаҳонии терроризм, ифротгароӣ, инчунин, шаклҳои гуногуни тундгароӣ ва ҷинояткории муташаккили фаромиллӣ бо шумули гардиши ғайриқонунии маводи мухаддир, тамоюли болоравиро доранд.

“Нерӯҳои мухталифи террористиву ифротгаро аз ниятҳои харобиовари худ даст накашидаанд ва дар минтақаҳои гуногуни ҷаҳон, аз ҷумла бевосита дар наздикии мавзеи масъулияти СААД, фаъолона амалҳои худро идома медиҳанд”, - қайд кард Эмомалӣ Раҳмон.

Вай афзуд, ки Тоҷикистон бо нигаронӣ раванди ташвишовари вазъият дар Афғонистонро, аз ҷумла дар минтақаҳои шимоливу шарқии он, пайгирӣ менамояд.

Роҳбари давлат гуфт, чунин вазъият аз мо аксуламалҳои саривақтии ҳамаҷонибаро, аз ҷумла тавассути андешидани чораҳои зарурӣ ҷиҳати таҳкими ҳифзи сарҳадоти ҷанубии СААД, тақозо менамояд.

Ҳамзамон вай таъкид дошт, ки дар пасманзари вазъияти муташанниҷи имрӯза дар ҷаҳон аҳамияти тақвият бахшидан ба иқтидори СААД барои муқовимати самарабахш ба хатару таҳдидҳои амниятӣ дучанд меафзояд.

Инчунин Эмомалӣ Раҳмон қайд кард, ки пас аз ҷаласаи имрӯза вазифаҳои раёсат дар СААД ба Тоҷикистон мегузаранд.

Дар ҳамин ҳол, Эмомалӣ Раҳмон қайд кард, ки Тоҷикистон равандеро, ки ба таҳкими ҳамкорӣ дар арсаи таъмини амният ва оромии ҳаёти мардумонамон нигаронда шудааст, идома хоҳад дод.

196
Барчаспҳо:
иҷтимоӣ, иқтисодӣ, СААД, вируси корона, Эмомалӣ Раҳмон, Раисҷумҳур, Тоҷикистон