Таджикский алюминиевый завод Талко, архивное фото

Президент ба ҷои Шералӣ Кабир як ҷавони 33 соларо таъин кард: ӯ кист?

15730
(Таҷдидшуда 10:16 06.02.2021)
Президенти Тоҷикистон бо як фармон раиси нави Шӯрои директорони "Талко", бузургтарин ширкати саноатии Тоҷикистонро таъин кард

ДУШАНБЕ, 6 фев — Sputnik. Игор Сатторов, мудири Департаменти иттилоот и PR – и ширкати "Талко", ба Sputnik Тоҷикистон гуфт, Наҷибулло Раҷабов, собиқ муовини аввали раиси Шӯрои директорони ширкат, ба ҳамин қарибӣ раёсати ин шӯроро ба зимма гирифт.

"Ин фармон чанд рӯзи пеш ба имзо расид ва раиси нав ба иҷрои вазифаҳои худ шуруъ кардааст", - гуфт Игор Сатторов.

Наҷибулло Раҷабов соли 1987 дар шаҳри Душанбе ба дунё омадааст.

Наҷибулло Раҷабов - раиси Шӯрои директорони Талко
Ширкати "Талко"
Наҷибулло Раҷабов - раиси Шӯрои директорони "Талко"

Соли 1992 дар синни 5 – солагӣ ба мактаби №53, яке аз макотиби беҳтарини шаҳр, ки баъдтар ба литсей – гимназия табдил ёфт, рафт ва соли 2002 онро ба анҷом расонд.

Соли 2007 факултаи иқтисоди Донишгоҳи миллии Тоҷикистонро бо ихтисоси иқтисоди ҷаҳонӣ бо "дипломи сурх" хатм кардааст.

Наҷибулло Раҷабов аз июн то октябри соли 2007 мутахассиси идораи активҳо ва пассивҳои Бонки рушди Тоҷикистон буд. Сипас барои кор ба гуруҳи ширкатҳои "Талко" омада, то январи соли 2019 дар вазифаҳои мутахассис, менеҷер, мудири шуъба ва мудири Департмаенти сармоягузориҳо кор кард.

Моҳи январи соли 2019 муовини аввали мудири кулл ва аз феврали соли 2021 раиси Шӯрои директорони и Ҷамъияти саҳҳомии кушодаи "Талко" таъин шуд.

Таҷрибаи 14 – солаи кор дар соҳаи алюминиумро дорад. Соҳиби се фарзанд аст.

Шералӣ Кабир, раиси қаблии Шӯрои директорони "Талко" 3 ноябри соли гузашта вазири саноат ва технологияҳои нав таъин шуд. Ӯ аз соли 2015 дар ин симмат ифои вазифа кард.

"Талко" – Ширкати алюминиуми тоҷик, як ширкати пешгоми соҳаи алюминиум дар Осиёи Марказӣ ва яке аз бузургтарин ширкати саноатии Тоҷикистон аст, ки дар замони Шӯравӣ бунёд шуда, бо истеҳсоли алюминиум шуҳрат дошт.

Ин ширкат тайи даҳ соли ахир ҳудуди даҳ зерширкат, аз ҷумла "Алюминсохтмон", "Талко кабел", "Талко флюарит", "Талко Кемикал", "Талко Ресурс", "Талко Голд" ва ғайраро рӯи кор оварда, ба як гурӯҳи ширкатҳо табдил ёфт.

"Талко" 100% моликияти давлатии Тоҷикистон маҳсуб мешавад ва таъини раҳбаронаш низ аз салоҳиятҳои президенти Тоҷикистон аст.

15730
Барчаспҳо:
таъин, Эмомалӣ Раҳмон, тағйироти кадрӣ
Река Душанбинка. Архивное фото

Ҷавондухтари 24 - сола дар Душанбе, ки қасди худкушӣ кард, наҷот ёфт

227
(Таҷдидшуда 10:35 26.02.2021)
Ҷавондухтар ҳоло дар беморхона қарор дорад ва табибон вазъи саломатии ӯро мӯътадил арзёбӣ мекунанд

ДУШАНБЕ, 26 фев — Sputnik. Сокини 24 - солаи пойтахт аз худкушӣ наҷот ёфт, хабар медиҳад Вазорати умури дохилаи Тоҷикистон.

Ба иттилои манбаъ, номбурда шоми рӯзи 25 феврал, тахминан соати 21:00 худро ба дарёи Душанбе андохт.

Гуфта мешавад, ӯ пас аз як муноқишаи оилавӣ ба мақсади худкушӣ аз хона баромада, ба назди дарёи Душанбеи кӯчаи Соҳилии пойтахт омад ва худро ғарқи оби дарё намудааст.

Дар ҳамин ҳол, кормандони Хадамоти давлатии "Муҳофиза"- и ВУД, ки дар қисмати қафои даромадгоҳи муассисаи давлатии тандурустии "Истиқлол" хизмат мебурданд бо шунидани сару садо зуд ба ҷойи ҳодиса ҳозир шуданд.

"Кормандони хадамоти мазкур, ҷавондухтарро аз марг наҷот дода, ӯро зуб ба бемористон бурданд", - таъкид мешавад дар хабар.

ВУД Тоҷикистон мегӯяд, ҳоло ин духтар дар бемористон таҳти назорати табибон қарор дорад ва вазъи саломатии ӯ мӯътадил аст.

227
Барчаспҳо:
наҷот, духтар, худкушӣ, Душанбе
Начальник Объединенного штаба Организации Договора о коллективной безопасности генерал-полковник Анатолий Сидоров

“Соли тоҷикии СПАД”: 4 машқи муштарак, ҷаласаҳои низомиву сиёсӣ ва бозсозии марз

65
Сардори Ситоди Созмони паймони амнияти дастаҷамъӣ (ОДКБ) гуфт, соли равон дар Тоҷикистон муҳимтарин чорабиниҳои ин созмон баргузор хоҳанд шуд

ДУШАНБЕ, 26 фев — Sputnik. Анатолий Сидоров, ки дар як видеоконфронс суҳбат мекард, дар посух ба суоли хабарнигори “Sputnik Тоҷикистон” гуфт, соли 2021 таваҷҷӯҳи вежае ба Тоҷикистон мешавад, зеро ин кишвар раёсати созмон СПАД-ро бар ӯҳда гирифтааст ва раисҷумҳури Тоҷикистон раиси Шӯрои амнияти дастаҷамъии созмон аст.

“Эҳтимолан ин нукта низ аҳамияти қобили таваҷҷуҳ низ хоҳад дошт, ки чорабиниҳои аслии органҳои созмони мо дар қаламрави Тоҷикистон баргузор мешавад ва дар поёни сол ҷаласаи Шӯрои амнияти дастаҷамъӣ дар назар аст, ки дабирони Шӯрои амният, вазирони дифоъ, корҳои хориҷӣ ва сарони кишварҳои моро гирдиҳам меоварад ва натоиҷи солро ҷамъбандӣ карда, вазоифи марбут ба сол 2022-ро равшан мекунад”, - гуфт Анатолий Сидоров.

Ятимов бо дабири кулли СААД масъалаи қочоқи силоҳ ва маводи мухаддирро баррасӣ кард

Сардори Ситоди СПАД гуфт, бо дар назар гирифтани раёсати Тоҷикистон ва авлавиятҳое, ки раисҷумҳури Тоҷикистон ба ҳама сарони кишварҳо ироа кард, як барномаи корӣ барои соли 2021 танзиму мушаххас шуда, ҳафтаи гузашта дабири кулли созмон Станислав Зас дар Душанбе ин тарҳро бо раиси Шӯрои амнияти ҷамъӣ тасвиб кард.

“Нуктаи дигар ин аст, ки кор идома дорад ва иқдомот барои иҷрои тарҳи тавсеа ва таҷдиди манотиқи марзии Тоҷикистон бо Афғонистон дар ҳоли анҷом аст, ки дар он каму беш мушорикати ҳама кишварҳои узви созмон барномарезӣ шудааст”, - гуфт Анатолий Сидоров.

Сардори Ситоди СПАД афзуд, бар асоси тарҳи размоиши амалиётӣ - стратегии "Бародарии размӣ - 2021", як размоиши вежа бо неруҳои истихборотӣ - "Ҷустуҷӯ-2021" , тамринот бо неруҳои тадорукотӣ - "Эшелон-2021" ва тамрини неруҳои вокуниши сареъи ҷамъӣ - "Таомул -2021" – и СПАД дар хоки Тоҷикистон баргузор хоҳанд шуд.

“Инҳо се рӯйдоди аслиянд, ки дар хоки Тоҷикистон барномарезӣ шудааст. Ин як ҷузи комилан низомӣ аст. Мо нируҳои вежае дар созмони худ дорем. Ба мизони бештаре Котиботи созмони мо бо онҳо машғул аст, ки ҳамчунин тамриноти муштаракро бо мо ва ба таври мустақил анҷом медиҳад, аз ҷумла барномае низ дар қаламрави Тоҷикистон тарҳрезӣ шудааст”, - гуфт Анатолий Сидоров.

Қаблан дар ин видеоконфронс сардори Ситоди СПАД ин таваҷҷуҳи хоса ба Тоҷикистонро ба афзоиши хатари неруҳои созмонҳои террористии ҷамъшуда дар минтақаҳои марзӣ - Толибон ва Доиш (созмонҳои мануъ дар Тоҷикистону Русия) рабт дода буд.

"Дар тӯли тамрин, гурӯҳи неруҳои ҷамъӣ вазифаҳоеро барои ҷилавгирӣ аз талоши вуруди созмонҳои террористии байнулмилалӣ ба хоки кишварҳои узви СПАД анҷом хоҳанд дод. Теъдоди ҷангиёни Толибон дар манотиқи марзӣ бо Тоҷикистон ва Туркманистон ҳудуд 15 ҳазор нафар аст", – гуфт Анатолий Сидоров.

СААД ният дорад, ҳифзи сарҳади Тоҷикистону Афғонистонро таҳким бахшад

Созмони паймони амнияти дастаҷамъӣ соли 1992 поягузорӣ шуда, соли 2002 созишномаи он ба имзо расид. Дар ҳоли ҳозир, Арманистон, Белорус, Қазоқистон, Қирғизистон, Русия ва Тоҷикистон узви ин созмон мебошанд.

Сербистону Афғонистон аз соли 2013 ба ин сӯ нозирони назди ассамблеяи парлумонии СПАД буда, то соли 1999 Озарбойҷон, Гурҷистон ва Ӯзбекистон низ узви созмон буданд.

65
Барчаспҳо:
машқҳои муштараки ҳарбӣ, СААД, Тоҷикистон

Ҳамлаи ҳавоии ИМА ба Сурия бо фармони Байден: талафот ҳаст

0
(Таҷдидшуда 12:00 26.02.2021)
Президенти ИМА Ҷо Байден дар посух ба се ҳамлаи ҷангиён ба иншооти истифодашавандаи ИМА амр дод ба ҳадафҳои гурӯҳҳои тарафдори Эрон дар Сурия зарбаи мушакӣ занад

ДУШАНБЕ, 26 феврал - Sputnik. Амрико ба Сурия ҳамлаи ҳавоӣ ба як бинои марбут ба низомиёни тарафдори эрониро, ки аз Димишқ пуштибонӣ мекунад, оғоз кард, навиштааст Politico бо такя ба сухангӯи вазорати дифоъи ин кишвар.

Маълум шудааст, ки фармони партоби мушакро худи президент Ҷозеф Байден додааст.

Рӯзномаи Washington Post бо такя ба як манбааш дар маъмурияти Амрико хабар медиҳад, ки дар натиҷаи ҳамлаи ҳавоӣ чанд нафар кушта шуданд.

Вазири мудофиаи ИМА Ллойд Остин гуфт, ки низомиёни ИМА ба маълумоти иктишофии ҷониби Ироқ такя мекунанд ва ба дурустии зарба эътимод доранд.

Манбаъ қайд кард, ки ин зарба характери мудофиаӣ дошт ва посух ба се ҳамла ба артиши ИМА аз ҷониби ҷангиён дар моҳи феврали соли 2021 буд.

Гуфта мешавад, амалиёти низомӣ ба пешгирии ҳамлаҳои оянда ба пойгоҳи ИМА равона шуда, он бидуни ширкати шарикони Вашингтон дар эътилофи низомӣ гузашт.

 

"Мо онҳоро нодида гирифтем": Ғарб комёбии низомии Русияро дар Сурия эътироф кард

Дар навбати худ, сухангӯи Пентагон Ҷон Кирби гуфт, ки ҳадафи ҳамлаи амрикоиҳо объектҳои гузаргоҳи марзӣ дар шарқи Сурия буд, ки онро гурӯҳҳои мусаллаҳ истифода кардаанд.

"Ҳамла паёми возеҳе медиҳад, ки президент Байден барои ҳимояи контингенти амрикоӣ ва шарикони эътилофи мо амал хоҳад кард",-гуфт Кирби.

Дар ҷараёни амалиёт ҷангҷӯёни амрикоӣ ба ҳафт ҳадаф ҳафт бомбаи дақиқи 500-фунтӣ партофтаанд.

0
Барчаспҳо:
фармон, Ҷо Байден, ҳамла, ИМА, Сурия