Ёдгор Файзов, иҷрокунандаи вазифаи раиси ВМКБ

Паёми Файзов ба Оқохони IV: аз хоҳиши дуо то саҳм дар сулҳи тоҷикону назари Эмомалӣ Раҳмон

1538
Ёдгор Файзов, раиси ВМКБ бо як паём Шоҳзода Карим ал-Ҳусайнӣ Оқохони IV, 49-умин имоми исмоилиёнро бо 82-юмин солгарди мавлудаш, ки 13 декабр таҷлил мешавад, шодбош гуфта, ихлоси худу бадахшониён ва назари раисиҷумҳури Тоҷикистонро баён доштааст

ДУШАНБЕ, 13 дек — Sputnik.  Тибқи паёми шодбошии Ёдгор Файзов, ки дафтари матбуоти ҳукумати маҳаллии ВМКБ нашр кардааст, раиси вилоят дар хитоб ба Оқохони IV гуфтааст, “мехоҳам дар ин лаҳзаҳои сурурафзо ва ҳаяҷонбахш ихлосу эътиқоди худ ва тамоми мардуми Бадахшонро ба Шумо расонам”.

Файзов инро, ки ҷаҳон имрӯз Оқохони IV-ро аз таъсиргузортарин ва обрӯмандтарин шахсиятҳо эътироф кардааст, далели ниятҳои олии созандагӣ ва инсонмеҳвар будани иқдомоти ӯ хондааст.

“Ба ҳайси саршиностарин чеҳра дар олами ислом дар ривоҷу равнақи ислому фарҳанги исломӣ нақши бебадалу поянда доред. Ҳамзамон дар симмати Пешвои исмоилиёни ҷаҳон баҳри камолоти маънавию мазҳабии исмоилиёни ҷаҳон ва рушди иқтисодию иҷтимоии ҷамоати исмоилиёни замон иқдомоти олию наҷиб содир кардаед. Талошҳои пайгиронаи Шумо дар бозгашти сулҳ ба Тоҷикистон ва пешрафти иқтисодию иҷтимоии он аз ҷониби Асосгузори сулҳу ваҳдати миллӣ - Пешвои миллат Эмомалӣ Раҳмон дар сатҳи олӣ арзёбӣ гардидааст. Ин ҳамкориҳо, хушбахтона, марҳилаҳои тозаи пешрафтро касб карда, тавсеаи бештаре пайдо карда истодаанд”, - омадааст дар паёми шодбошии Ёдгор Файзов ба имоми исмоилиёни ҷаҳон.

Раиси ВМКБ таъкид намудааст, ки ҳидоят ва иршодҳои имом ба тарбия ва рушди маънавию мазҳабии исмоилиёни Бадахшон ва дигар нуқтаҳои ҷаҳон нақши бесобиқаю поянда дорад, ки ин мояи хушҳолист.

“Волоҳазрат! Мо ба Шумо изҳори ихлос менамоем ва умед мебандем, ки Шумо дуои хайри худ ва меҳрубониатонро ба фарзандони руҳониатон дар Бадахшон ва тамоми ҷахон нисор хоҳед кард ва аз дуои неки Шумо ҷанбаи руҳониву моддии зиндагиамон пурнур хохад гашт ва баракати тоза хоҳад ёфт”, - таъкид намудааст Файзов.

Раиси ВМКБ, ки бисёри сокинони ин вилоят пайрави исмоилия мебошанд, дар хитоб ба имоми давр гуфтааст, “таманно дорам, ки офтоби осмони умратон ҷовидона рахшон бошаду чаманистони зиндагиатон ҳамеша сарсабз бимонад”.

Шоҳ Карим ал-Ҳусайнӣ Оқохони Чаҳорум, 13 декабри соли 1936 дар шаҳри Женеваи Швейсария дар хонаводаи шоҳзода Алӣ Салмонхон ва бону Тоҷуддавла Алихон ба дунё омадааст.

Аълоҳазрат Шоҳ Карим донишомӯхтаи донишкадаи торихи исломи Донишгоҳи Ҳарвард буда, бунёдгузор ва сарвари "Шабакаи тавсеъаи Оқохон" (AKDN) аст. Ӯ пас аз бобояш Султон Муҳаммадшоҳ Оқохони Севум, дар рӯзи 11 июли соли 1957, дар 20-солагӣ пешвои руҳонии исмоилиёни ҷаҳон шудааст. Теъдоди муридони Оқохони IV дар Тоҷикистон ҳудуди 200 ҳазор нафар арзёбӣ мешавад.

1538
Мавзуҳо:
Раисҷумҳури Тоҷикистон Эмомалӣ Раҳмон (222)
Президент Республики Таджикистан Эмомали Рахмон открыл государственный флаг Таджикистана в селе Гозион

Дар ноҳияи Шаҳринав Парчами 55-метрӣ гузошта шуд

166
(Таҷдидшуда 12:50 30.09.2020)
Майдони Парчами давлатӣ дар ноҳияи Шаҳринав дар кӯчаи Исмоили Сомонӣ сохта шудааст. Баландии сутунпояи парчам 55 метрро ташкил медиҳад

ДУШАНБЕ, 30 сен — Sputnik. Президенти Тоҷикистон Эмомалӣ Раҳмон дар кӯчаи Исмоили Сомонии ноҳияи Шаҳринав Майдони Парчами давлатиро ифтитоҳ кард.

Бино ба гузориши котиботи раисҷумҳур, масоҳати умумии майдони Парчами давлатӣ, ки дар маркази ноҳияи Шаҳринав сохта шудааст, 2100 метри мураббаъ буда, баландии сутунпояи ин рамзи давлатдорӣ 55 метр мебошад.

Матои парчам 7 метр паҳноӣ ва 15 метр дарозӣ дорад.

Гуфта мешавад, ки майдони Парчами давлатӣ сафолакпӯш карда шуда, бо гулу буттаҳои ороишӣ зебу зинат ёфтааст.

Ҳамчунин, ба хотири таъмини истироҳату фароғати сокинону меҳмонон дар Майдони Парчами давлатии ноҳияи Шаҳринав нишастгоҳҳои замонавӣ ва чароғпояҳои гуногунҳаҷму гуногуншакл насб гардидаанд.

Дар ин майдон ҳамчунин фаввора сохта шудааст.

Дар майдони парчам барои баргузор намудани чорабиниҳои фарҳангиву фароғатӣ шароит фароҳам буда, он барои сайру гашт ва тамошои сокинон макони муносиб мебошад.

Эмомалӣ Раҳмон аснои ошноӣ, бунёди Майдони Парчами давлатиро дар ноҳияи Шаҳринав дар самти баланд бардоштани ҳисси ватандӯстиву худогоҳии ҷавонону наврасон ва гиромӣ доштани арзишҳои милливу давлатӣ муҳим арзёбӣ кардааст.

166
Барчаспҳо:
парчам, Эмомалӣ Раҳмон, Шаҳринав
Маросими пешвози меҳмонон, акс аз бойгонӣ

Сафари фарҳангиёну адибони Ӯзбекистон ба Тоҷикистон

125
(Таҷдидшуда 14:31 28.09.2020)
Ҳукумати вилояти Суғд аз сафари як ҳайати намояндагони илму адаб ва фарҳанги Ӯзбекистон ба Тоҷикистон хабар дод

ДУШАНБЕ, 28 сен — Sputnik. Гуруҳи намояндагони аҳли илму адаб ва фарҳанги ҷумҳурии Ӯзбекистон тавассути гузаргоҳи сарҳадии “Фотеҳобод” ба вилояти Суғди Тоҷикистон ташриф оварданд, хабар дод котиботи ҳукумати Суғд.

Манбаъ афзуд, ки ҳайати меҳмононро муовини раиси вилояти Суғд, Анвар Яъқубӣ ва намояндагони Вазорати фарҳанги  Тоҷикистон гарму самимӣ истиқбол гирифтанд.

“Ҳадаф аз ташрифи меҳмонон таҳкими муносибатҳои дӯстона миёни миллатҳои тоҷику ӯзбек, тақвияти ҳамкориҳои адабӣ, илмиву фарҳангӣ миёни ду давлати дӯст арзёбӣ мешавад”, - омадааст дар иттилоия.

Таъкид шудааст, ки меҳмонон давоми рӯз аз Маҷмааи фарҳангию “Қалъаи Хуҷанд”, Осорхонаи вилоятӣ, Хона — музейи Камоли Хуҷандӣ боздид намуда, бо таъриху фарҳанги миллати тоҷик шинос гардиданд.

Манбаъ афзуд, ки сипас, меҳмонон тибқи барномаи сафар ба пойтахти мамлакат — шаҳри Душанбе равон шуданд. 

Дар шаҳри Душанбе феълан сафари ҳайати Ӯзбекистон давом дорад.

125
Барчаспҳо:
илм, фарҳанг, Ӯзбекистон, Тоҷикистон
Инветиционный форум между предпринимателями Узбекистана и Таджикистана

Дар Душанбе миёни Тоҷикистону Ӯзбекистон 15 созишномаи нави ҳамкорӣ ба имзо расид

0
(Таҷдидшуда 14:36 30.09.2020)
Дар Душанбе Форуми сармоягузории Тоҷикистону Ӯзбекистон баргузор гардид, ки дар чаҳорчӯби он доираҳои тиҷоратии ду кишвар қарордодҳои нав ба имзо расониданд

ДУШАНБЕ, 30 сен — Sputnik. Бино бар иттилои дафтари матбуоти Кумитаи давлатии сармоягузорӣ ва идораи амволи давлатии Тоҷикистон форуми мазкур дар доираи ҷаласаи 7-уми Комиссияи байниҳукуматии Тоҷикистон ва Ӯзбекистон оид ба ҳамкории тиҷоратию иқтисодӣ баргузор шуд.

Гуфта шудааст, ки дар форуми мазкур беш аз 300 нафар соҳибкорони ӯзбекистону Тоҷикистон, аз ҷумла роҳбарони мақомоти давлатӣ, корхонаву ташкилоти давлатӣ, сармоягузорон ва намояндагони бахши хусусии ду кигшвар ширкат варзиданд.

Ҳамзамон манбаъ зикр намудааст, ки ҷониби Тоҷикистон ба меҳмонон дар бораи фазо ва имкониятҳои  сармоягузорӣ дар соҳаҳои сайёҳӣ, саноат, энергетика, хизматрасонӣ ва дигар соҳаҳо дар Тоҷикистон пурра маълумот дода шуд.

Сипас ҷонибҳо лоиҳаҳои муштараки ҳамкориро баррасӣ намуданд.

Пас аз анҷоми қисмати расмии Форум вохӯриҳои дуҷонибаи соҳибкорон дар шакли “Соҳибкор бо Соҳибкор” (B2B) доир гардида, аз рӯйи натиҷаҳои он санадҳои нави ҳамкорӣ  мувофиқа ва ба имзо расонида шуданд.

Бино ба маълумоти Кумитаи давлатии сармоягузорӣ ва идораи амволи давлатии Тоҷикистон, дар доираи форум аз ҷониби субъектҳои бахши давлатӣ ва хусусии ҳар ду ҷониб 15 созишномаи ҳамкорӣ ба маблағи 50 миллион доллар созишномаҳо ба имзо расиданд, ки қариб ҳамаи соҳаҳои ҳамкории иқтисодиро фаро мегиранд.

0
Барчаспҳо:
ҳамкорӣ, созишнома, доираҳои тиҷорӣ, сармоягузорӣ, Форум, тиҷорат, Ӯзбекистон, Тоҷикистон