Президент РФ Владимир Путин. Архивное фото

СПАД фаъолшавии "Давлати Исломӣ"-ро бе посух нахоҳад гузошт

12
(Таҷдидшуда 12:37 24.12.2014)
Владимир Путин ҳушдор дод, ки гурӯҳи «Давлати Исломӣ» мехоҳад, фаъолияти худро дар Осиёи Марказӣ густариш диҳад, аз ин рӯ ба қавли вай, “ СПАД бояд ба чунин вазъият омода бошад ва аз чораҳои пешгирикунанда кор гирад”.

ДУШАНБЕ, 23 дек — Sputnik. Дар оғози нишасти сарони кишварҳои узви СПАД раисиҷумҳури Русия, Владимир Путин ҳушдор дод, ки гурӯҳи «Давлати Исломӣ» мехоҳад, фаъолияти худро дар Осиёи Марказӣ густариш диҳад, менависад оҷонсии РИА Новости.

"Дар ин ҳолат таъмини амният дар минтақа ба талошҳои муштарак ва ҳамоҳанги ҳамаи кишварҳои узви СПАД  дар мубориза бо терроризм, тиҷорати маводи мухаддир, ҷинояткории фаромарзӣ, пешгирӣ аз фалокатҳои табиӣ ва техникӣ ниёз дорад. Чунин имконият ва тавонмандиҳоро  созмон дорад ва он бояд худро  ҳамчун "як сохтори обрӯманд ва тавоно" нишон диҳад. Дар чунин шароит бояд ба марзи байни Тоҷикистон ва Афғонистон диққати аввалиндараҷа дода шавад ва ба Тоҷикистон бо мақсади тақвияти нерӯҳои мусаллаҳаш ёрии молӣ ва модӣ расонда шавад",-гуфт Путин дар ҷаласаи Шӯрои СПАД.

Раисиҷумҳури Тоҷикистон Эмомалӣ Раҳмон низ дар нишасти сарони кишварҳои узви СПАД изҳори умедворӣ кард, ки ин ниҳод қарори худро дар масъалаи кӯмак ба таҳкими марзи Тоҷикистону Афғонистон ба пуррагӣ иҷро хоҳад кард.   

"Тоҷикистон рӯйи ин ҳисоб мекунад, ки дар соли оянда қарори Шӯрои амнияти дастаҷамъӣ дар бобати кӯмак ба Тоҷикистон дар таҳкими марзи миёни Тоҷикистон ва Афғонистон ба таври комил ба иҷро хоҳад расид. Зарурати ҳаётии ин кор дар пасманзари вазъе, ки дар кишварҳои ҳамсоя ба вуҷуд омадааст, рӯшан аст",-афзуд президенти ҶТ

Дар ҷаласаи навбатии Шӯрои амнияти дастаҷамъии Созмони Аҳдномаи амнияти дастаҷамъӣ дар Маскав пас аз натиҷагирии кори солонаи ин созмон раёсати даврии он ба зиммаи Тоҷикистон гузошта шуд.

Дар чанд маҳфил вазирони умури хориҷӣ, вазирони дифоъ ва котибони Шӯрои амнияти кишварҳои узв роҳҳои тақвияти СПАД, мубориза бо терроризму ифротгароӣ, таъмини амнияти иттилоотӣ,таъмини амният дар сарҳади Тоҷикистону Афғонистон ва кӯмак ба марзбонони тоҷик, ҳамкориҳои дигари ҳарбию техникӣ дар миёни кишварҳои узви ин созмонро баррасӣ карданд. Инчунин дар нишасти вазирон стратегияи мубориза бо қочоқи маводи мухаддир барои солҳои 2015-2020 таҳия шуд. 

Созмони Паймони Амнияти Дастаҷамъӣ — як ташкилоти низомиву сиёсӣ бар асоси Паймони амнияти дастаҷамъӣ дар соли 1999 ташкил шуда, ба узвияти он Русия, Арманистон, Қирғизистон, Тоҷикистон ва Белорус шомил мебошанд. Паймони амнияти дастаҷамъӣ баъди суқути Иттиҳоди Шӯравӣ дар моҳи майи соли 1992 бо узвияти ҳамин ҷумҳуриҳо ва инчунин се ҷумҳурии дигар — -Ӯзбакистон, Гурҷистон ва Озарбойҷон ташкил шудааст. Вале бо анҷоми мӯҳлати амали ин паймон ва таҳрири номи он ба Созмони паймони амнияти дастаҷамъӣ Тошканду Бокуву Тифлис нахостанд ҳузури худро дар ҳайати ин созмон тамдид кунанд.

 

12
Барчаспҳо:
ҷаласаи Шӯрои СПАД, бе ҷавоб, бе посух, пешгирикунанда, амалкард, ДИ, СПАД, Давлати исломӣ, Владимир Путин, Эмомалӣ Раҳмон, Афғонистон, Тоҷикистон, Русия, Маскав
Мавзуъ
Райисҷумҳури Тоҷикистон "ДИ"-ро тоуни асри 21 хонд
Созмони тундгарои “Давлати исломӣ”

Нигаронии Маҳмудзода аз вазъи ноороми Қарабоғи Кӯҳӣ

260
(Таҷдидшуда 21:00 29.09.2020)
Котиби Шӯрои амнияти Ҷумҳурии Тоҷикистон Насрулло Маҳмудзода дар робита ба вазъияти Қарабоғи Кӯҳӣ изҳори нигаронӣ кард

ДУШАНБЕ, 29 сен — Sputnik. Котиби Шӯрои амнияти Ҷумҳурии Тоҷикистон Насрулло Маҳмудзода ва Котиби Шӯрои амнияти Арманистон Армен Григорян телефонӣ суҳбат карданд, хабар медиҳад, хадамоти Шӯрои амнияти кишвар.

Ҳамин тавр, Котиби Шӯрои амнияти Ҷумҳурии Тоҷикистон Насрулло Маҳмудзода дар робита ба вазъияти Қарабоғи Кӯҳӣ изҳори нигаронӣ кард. Маҳмудзода ҳалли мусолиматомези вазъи Қарабоғро таъкид кард.

Дар навбати худ, Григорян таъсири манфии Туркияро ба амнияти минтақавӣ қайд кард.

Вазъияти Қарабоғи Кӯҳӣ

Аз саҳнаи даргириҳои низомӣ дар Қарабоғи Кӯҳӣ, маълумоти зиддунақиз мерасад.

Озарбойҷон ва Арманистон якдигарро дар аввали даргирӣ гунаҳкор мекунанд.

Дар ин росто, рӯзи душанбе дар Озарбойҷон омодагии пурраи ҳарбӣ эъло шуда, Илҳом Алиев президенти ин кишвар дар як қатор шаҳру ноҳияҳои ҷумҳурӣ вазъи ҳарбӣ ҷорӣ кард.

Дар Арманистон як рӯз пеш вазъияти низомӣ эълон карда шуд.

Даргириҳо дар ин манотиқ рӯзи 27 сентябр оғоз шуд.

260
Барчаспҳо:
баррасӣ, даргирӣ, вазъият, Қарабоғи Кӯҳӣ

Миёнаравии Русия барои қатъи мухолифати мусаллаҳонаи Арманистону Озорбойҷон

327
Вазорати умури хориҷии Русия тамоми талошашро равона мекунад, то мухолифати мусаллаҳона миёни Озарбойҷону Арманистон бартараф карда шавад

ДУШАНБЕ, 27 сен — Sputnik. Сергей Лавров, вазири умури хориҷии Русия, гуфтушунидҳо дорад, то Арманистону Озарбойҷон сари мизи музокирот нишинанд, хабар дод намояндаи расмии ВУХ Русия, Мария Захарова.

Лавров аллакай бо ҳамтоёнаш аз Арманистону Туркия гуфтушунид карда, дар назар аст, чунин як суҳбат бо ҷониби Озорбойҷон низ анҷом дода шаавад. Манбаъ афзуд, Русия миёнаравияшро барои ба эътидол овардани вазъ миёни Озорбойҷону Арманистонро идома медиҳад.

То ҳол ҷонибҳоро борҳо ба қатъи даргириҳои мусаллаҳона даъват карда буданд. Аз ҷумла бо чунин даъватҳо ба ҷониби Арманистону Озорбойҷон намояндагони Австрия, Фаронса, Олмон, Гурҷистон ва инчунин намояндаҳои Шӯрои Аврупо, СААД ва САҲА муроҷиат карда буданд.

Ба ҷонибҳои даргир инчунин Попи Рум зимни мавъизаи анъанавияш муроҷиат намуда, даъват кард, ки қадамҳои мушаххас сӯи бародарӣ ва ҳалли мушкилоти мавҷуда бидуни истифода нерӯ, гузошта шавад.

Шаби гузашта мухолифати мусаллаҳона миёни Арманистону Озорбойҷон рух дод. Ҳарду ҷониб якдигарро дар шиддат гирифтани мухолифат муттаҳам карданд.Ин даргирӣ миёни аҳолии осоишта низ маҷруҳ ва ҳалокшудаҳо барҷой гузошт.

Роҳбари ҷумҳурии эътирофнашудаи Қарабоғи куҳӣ ҳолати низомӣ эълон кардааст. Ҳукумати Арманистон низ дар кишвар ҳолати низомӣ эълон намудааст.  

327
Барчаспҳо:
Озарбойҷон, Арманистон, Русия
В.Путин принимает участие в четвертом Каспийском саммите

Рӯҳонӣ: дахолати хориҷӣ дар муноқишаи Боку ва Ереван авзоъро печидатар мекунад

0
(Таҷдидшуда 21:53 30.09.2020)
Раисҷумҳурии Эрон бо ибрози нигаронӣ аз даргирии ахир байни Арманистон ва Озарбойҷон, ҳаргуна дахолати хориҷӣ дар ин моҷароро мӯҷиби печидатар шудани авзоъ донист

ДУШАНБЕ, 30 сен — Sputnik. Ҳасани Рӯҳонӣ, раисҷумҳури Эрон ахиран дар тамоси телефонӣ бо Никол Пашиниян, нахуствазири Арманистон бо таъкид бар аҳамияти сулҳ, суботу амният дар минтақа афзуд, ки минтақаи Ғарби Осиё тавони бесуботӣ ва ҷанги ҷадидро надорад, иттилоъ додааст хабаргузории "Парстудей".

Тавре манбаъ қайд намудааст, Рӯҳонӣ бо баёни ин ки бояд барои ҳаллу фасли масъалаи Қарабоғ дар чорчӯби муқаррароти байналмиллалӣ ва тамомияти арзӣ роҳи ҳалле ёфт шавад таъкид кард, ки таваққуфи ин даргириҳо барои Эрон муҳим аст ва Теҳрон интизор дорад Арманистон ва Озарбойҷон бо дироят ва хештандорӣ дар ин масир гом бардоранд.

Раисҷумҳури Эрон бо таъкид бар ин ки ҷанг роҳи ҳалли бартараф кардани мушкилоту танишҳо ва ихтилофот нест гуфт, ки ҳаргуна дахолати хориҷӣ дар ин моҷаро на танҳо ба ҳаллу фасли мушкил кумак намекунад балки даргириҳо ва танишҳоро тӯлонитар ва авзоъро печидатар хоҳад кард.

Рӯҳонӣ  ҳамчунин бо ишора ба аҳамият ва собиқаи тӯлонии равобити Эрон бо Ҷумҳурии Озарбойҷон ва Арманистон, омодагии Теҳронро барои ифои ҳаргуна нақши созанда, ки мавриди назари ду кишвари дӯсту ҳамсоя бошад, эълом кард.

Никол Пашиниян низ бо ишора ба таҳаввулоти ахири ношӣ аз даргириҳои низомии Арманистон бо Озарбойҷон, танишу даргириро ба зиёни ҳамаи кишварҳои минтақа донисту аз ҳаргуна ибтикори амале барои таваққуфи хушунатҳо истиқбол кард.

Нахуствазири Арманистон ҳамчунин аз мудохилаи хориҷӣ дар масъалаи ихтилофоти Арманистон бо Озарбойҷон ибрози нигаронӣ кард.

0
Барчаспҳо:
Ереван, Боку, муноқиша, даргирӣ, моҷаро, хориҷӣ, Озарбойҷон, Арманистон, Эрон