Фаъолияти макотиби Маскав

Усулҳои ҷалби ҷавонони тоҷик ба саффи ДИИШ аз нигоҳи стратеги №1

29
(Таҷдидшуда 18:55 11.02.2016)
Чанд усули ҷалби ҷавонони тоҷик ба саффи гуруҳҳои ифротгароӣ вуҷуд дорад. Даъват дар масоҷид, ҷалб кардан ва фиреби мардон бо истифода аз зебоии занон ҳам аз усулҳои болост.

ДУШАНБЕ, 7 окт — Sputnik. Раиси Маркази таҳқиқити стратегии Тоҷикистон Холиқназар Худойбердӣ мегӯяд, пажӯҳиш се усули ҷалби ҷавонони тоҷик ба саффи созмони террористии "Давлати исломӣ" ё худ ДИИШ-ро муайян намудааст.

Ба гуфтаи ӯ, бархе аз ҷавонони тоҷик мустақиман аз Тоҷикистон ҷалб шуда, даъват дар масоҷиди Русия ва зибогии духтарҳо дар фазои маҷозӣ ҳам барои рафтани онҳо ба ҷангҳои Сурияву Ироқ боис мешавад.

"Дар пайи як пажӯҳиши худ мо чанд усули ҷалби ҷавонони тоҷик ба саффи гуруҳҳои ифротиро муайян кардем. Дар аввал бояд гуфт, ки бо ин навъи ҷавонон фиристодаҳои махсуси гуруҳҳо кор карда, аз тактикаҳои гуногун истифода мекунанд. Онҳо ба қаламрави Тоҷикистон ғайриқонунӣ ворид мешаванд ва тавассути каналҳои худ бачаҳоро пайдо карда, хуб ва дурудароз меомӯзонанд",-мегӯяд оқои Худойбердӣ.

Ба қавли ҳамсуҳбати мо, роҳи бузурги дигари ҷалб кардан ба гуруҳҳои террористӣ интернет мебошад, ки тавассути он ҷавононро бо роҳҳои гуногун мағзшӯӣ мекунанд.

"Духтарҳои ҷавону зибо бо бачаҳо шинос шуда, ҳамсуҳбат мешаванд ва худро тавассути Skype нишон ҳам медиҳанд",-илова кард ӯ.

"Биёед шинос шавем, ба Туркия биёед, инҷо ҷойҳои хуб ҳасту  мо метавонем, дар инҷо издивоҷ ҳам кунем", ин ҳама даъватҳое мебошанд, ки ба назари стратеги рақами яки кишвар ҷавононро ҷазб ва ба дом гирифтор мекунад.

Ҳамсуҳбати мо мегӯяд, гуруҳи сеюми ҷавон дар пайи даъватҳо аз масоҷиди Русия ҷалб карда мешаванд.

"Вақте онҳо ба қаламрави Сурия ворид мешаванд, шиносномаҳои онҳо "мусодира" шуда, мустақиман ба саффи ҷангиёни "Давлати исломӣ" дар Сурияву Ироқ фиристода хоҳанд шуд", илова кард, раиси МТС.

Бо ин ҳол, ба қавли коршиноси мо, шумори ҷавононе, ки ба дом афтидаанду қурбони ин гуна ҳилаҳо шудаанд, зиёд мебошад.

Тибқи ҳисоби Маркази таҳқиқоти стратегии кишвар, аз 5 то 7%-и ҷавонон ба ин домҳо меафтанд, ё ба далели содалавҳии худ роҳ сӯи ҷангҳо мегиранд.

Бар асоси иттилои ахир, наздик ба 500 тоҷикистонӣ ҳоло дар саффи ҷангиёни гуруҳҳои террористӣ, аз ҷумла "Давлати исломӣ" ҳузур доранд ва хабари марги беш аз 100 нафари онҳо ба хонаводаҳояшон расидааст.

29
Барчаспҳо:
масоҷид, магзшӯӣ, ҷалб, Давлати исломӣ, даъват, Русия, ҷалби ҷавонон ба ҳаракатҳои ифротӣ, ҷанг дар Сурия, МТС, Давлати исломӣ, Ироқ, Сурия, Тоҷикистон, Русия
Низомиёни ИМА дар ҳавопаймо, акс аз бойгонӣ

Чаро нерӯҳои ИМА дар Шимол мақар гирифта истодаанд?

227
(Таҷдидшуда 18:48 25.01.2021)
Вазифаи нерӯҳои хушкигарду дарёии ИМА омӯхтани тарзи амалиёти ҷангӣ дар шароити вазнини Арктика якҷоя бо низомини Норвегия мебоошад

ДУШАНБЕ, 25 янв — Sputnik. Николай Протопопов. Артиши ИМА ҷойгоҳи худро дар Норвегия, дар наздикии марзи Русия тақвият дода истодааст. Дар моҳи январ тақрибан ҳазор нафар ҷангиёни пиёдагарди баҳрӣ дар ин ҷо мақар гирифтанд. Дар айни замон, сиёсатмадорон ва генералҳои амрикоӣ дар бораи афзоиши шиддат дар Арктика мегӯянд, ки ба гуфтаи коршиносон, худи онҳо эҷод мекунанд.  Пентагон Норвегияро барои чӣ омода мекунад - дар маводи РИА Новости хонед.

Дар меҳмонии викингҳо

Ҷангиёни дарёӣ дар доираи ба истилоҳ ҷойивазкунӣ аз Каролинаи Шимолӣ ба Норвегия кӯчонда шуданд.  Амрикоиҳо чанд сол аст, ки ба ин найранг рӯ меоранд - баъзе қисмҳои низомиро қисмҳои дигар иваз мекунанд ва контингенти низомии ИМА амалан дар кишвар ҳамеша ҳузур дорад.

Вазифаи нерӯҳои дарёӣ омӯхтани тарзи амалиёти ҷангӣ дар шароити вазнини Арктика бо роҳбарии мураббиёни Норвегия ва ҳамкории зич бо ҳамкорон аз НАТО мебошад. Дар моҳи феврал амрикоиҳо, норвегҳо, инчунин ҳолландҳо ва бритониёиҳо – ҳудуди тақрибан даҳ ҳазор ҷанговар - дар размоиши васеъмиқёси муштараки Joint Viking 2021 ширкат меварзанд.

Аъзои НАТО ҳаракати сареъи нерӯҳо ба масофаҳои дарозро тамрин хоҳанд кард, усулҳои мубодилаи иттилоотро дар ҳама сатҳҳо азхуд намуда, якчанд амалиёти муштарак анҷом медиҳанд.

Машқҳои Joint Viking ҳамасола баргузор мешаванд. Қӯшунҳо - мошинҳои зиреҳпӯш, артиллерия, ҳавопаймоҳо, киштиҳо ва киштиҳои зериобӣ - амалиётҳои шадиди ҷангиро дар масоҳати чандсад километри мураббаъ, асосан дар минтақаҳои ҷангал ва кӯҳистон тарҳрезию тамрин мекунанд.

Коршиноси ҳарбӣ, Александр Жилин дар мусоҳиба бо РИА Новости қайд кард, ки мувофиқи доктринаи ҳарбии ИМА, артиши онҳо ҷангро асосан дар хориҷа меомӯзад.

"Аз ин рӯ, сиёсати давлат тавре сохта шудааст, ки низомиёни амрикоӣ ба таври доимӣ дар кишварҳои дигар пайдо мешаванд, то амалиётҳои ҳарбӣ, иктишофӣ, парвозҳои фурудгоҳҳо, убур аз роҳҳои баҳриро тамрин мекунанд. Диққати махсус ба амалиёти муштарак дода мешавад, чун амрикоиҳо одат кардаанд, ки бо дасти бегонаҳо ҷанг кунанд", - шарҳ медиҳад ӯ.

Ба гуфтаи коршинос, Пентагон вазъро ба таври сунъӣ шадидтар мекунад, зеро ИМА ва НАТО якравона аз даъвоҳои худ ба Арктика даст намекашанд.

"Машқҳои нерӯҳои дарёӣ на ҳимоявӣ, балки ҳамлаӣ хоҳанд буд. Онҳо инчунин амалҳои зидди Русияро таҳия хоҳанд кард. Агар ҳаракатҳои НАТО-ро дар Аврупо дар маҷмӯъ таҳлил кунем, маълум аст, ки онҳо талоши эҷоди минтақаҳои ташаннуҷ барои Маскавро доранд. Артиши мо наметавонад, аз ҷумла, он чизеро, ки дар Норвегия рух медиҳад, бе вокуниш гузорад.  Воҳима вуҷуд надорад, аммо қувваҳо ва воситаҳо ба размоишҳо таваҷҷуҳ хоҳанд кард. Мо бояд вазъро комилан назорат кунем, нагузорем, ки иғвоҳо сурат бигиранд", - изҳор дошт Жилин.

Пойгоҳи шимолӣ

Артем Куреев, коршиноси бошгоҳи таҳлилии “Валдай” қайд мекунад, ки амрикоиҳо дар Аляска инфрасохтори низомии худро доранд, то тактикаи ҷанг дар Арктикаро машқ кунанд, аммо онҳо ба ҳар ҳол авло медонанд, ки дар Норвегия тамрин кунанд.

"Онҳо ба ин ҳамчун пешсафони НАТО ниёз доранд. Норвегия қадимтарин узви паймон аст. Осло Русияро душмани эҳтимолӣ мешуморад. Ҳанӯз дар ҷанги сард норвегҳо инфрасохторро барои муқовимат бо Иттиҳоди Шӯравӣ дар Арктика эҷод карданд ва нигоҳ доштанд. Ин ҳоло ҳам идома дорад. Дар сурати шиддати вазъ, Норвегияи Шимолӣ фавран ба пойгоҳи асосии НАТО дар роҳ ба Мурмански Русия табдил хоҳад ёфт",- таъкид мекунад Куреев.

Хоҳиши Вашингтон барои пайдо кардани мавқеъ дар Арктика ва дигар кишварҳоро аз он ҷо танг кардан, аз стратегияи нави арктикии Флоти баҳрӣ ва Қувваҳои хушкигарди дарёии ин кишвар шаҳодат медиҳад. Аз ҷумла, дар он гуфта мешавад, ки "бидуни ҳузури баҳрии Амрико дар минтақаи Арктика, Русия ва Чин бештар ба сулҳ ва шукуфоӣ таҳдид мекунанд".  Тавре вазири нерӯҳои баҳрии ИМА Кеннет Брайтвайт қайд кард, Пентагон нақша дорад, ки киштиҳои ҷангӣ ва киштиҳои зериобиро доимо дар Арктика нигоҳ дорад, то минтақаи обии наздикии соҳилҳои Русияро посбонӣ кунад ва "ҳамлаи Маскав дар Шимоли Дур" -ро пешгирӣ намояд. Гузашта аз ин, нерӯҳои пуриқтидори заминӣ низ дар Арктика мутамарказ хоҳанд шуд.

Дар ҳама ҷабҳаҳо

Бояд қайд кард, ки Иёлоти Муттаҳида аллакай дар шимол ҷойи пойи ҷиддӣ ёфтааст ва Норвегия дар ин кор тақрибан нақши асоситарин мебозад.

Ҳамин тавр, дар моҳи сентябр хабар дода шуд, ки киштии зериобии ҳастаии гуруҳи Seawolf ба бандари Тромси Норвегия омадааст, ки вазифаи асосии он пайгирии хатсайрҳои киштиҳои зериобии Русия мебошад. Қаблан Иёлоти Муттаҳида "барои боздории Русия дар шимол" Флоти дуюмро барқарор кард, ки масъули Атлантика, як қисми Уқёнуси Ором, Уқёнуси Шимолӣ мебошад. Ин қисми флот барои сарфаи маблағҳои буҷа дар соли 2011 лағв шуда буд.

Акси садои дигари Ҷанги Сард пойгоҳи баҳрии зеризаминии Олавсверн дар Норвегия мебошад, ки ҳамагӣ 350 километр дуртар аз марзи Русия ҷойгир аст.

Дар як бункери азиме, ки дар солҳои 1960-ум сохта шуда, бо қабати 300-метраи сангу хок муҳофизат шудааст, киштиҳои зериобӣ ва киштиҳои НАТО ҷойгир буданд, бандарҳои таъмирӣ фаъолият мекарданд ва лавозимоти ҷангӣ захира мешуданд. Дар ҳар лаҳза, флоти эътилофи ғарбӣ метавонист роҳи дарёии киштиҳои шӯравиро ба баҳри Норвегия ва Атлантикаи Шимолӣ бандад. Дар охири солҳои 2000-ум, пойгоҳ ҳамчун иншооти дигар нолозим баста шуд, аммо ҳоло қасд доранд онро дубора фаъол кунанд.

Пентагон инчунин тақвияти нерӯҳои ҳавоӣ дар Арктикаро ҷиддӣ гирифт. Ҳамин тавр, дар соли гузашта машқҳои бузургмиқёси нерӯҳои ҳавоии Амрико ва Норвегия баргузор шуданд. Якбора шаш ҳавопаймои бомбаандози стратегии B-52 Stratofortress аз болои Қутби Шимол парвоз карданд ва якҷоя бо ҳавопаймоҳои ҷангандаи нерӯҳои ҳавоии Норвегия парвозҳои омӯзишӣ анҷом доданд. Чанде пеш маълум шуд, ки Пентагон дар моҳи феврал аз Техас ба пойгоҳи ҳавоии Эрланд чаҳор ҳавопаймои "стратегӣ"-и  B-1BLancer -и фаросавтиро интиқол медиҳад.

227
Барчаспҳо:
низомӣ, ИМА, Норвегия
Пограничники на Таджикско-афганской границе

Афзоиши тадбирҳои амниятии Чину Тоҷикистон дар марзҳои муштарак бо Афғонистон

333
(Таҷдидшуда 16:23 25.01.2021)
Нерӯҳои марзии Чину Тоҷикистон дар шимолу шарқи Афғонистон дар паи нигаронӣ аз ҳузури ҷангҷуёни хориҷӣ, тадбирҳои амниятиро пурзӯр карданд

ДУШАНБЕ, 25 янв — Sputnik. Посгоҳҳои амниятии Чину Тоҷикистон дар марзи вилояти Бадахшон дар шимолу шарқи Афғонистон афзоиш ёфта аст ва 400 нерӯи марзии афғон низ маъмурияти ҳифзи амнияти ин манотиқро ӯҳдадор ҳастанд, иттилоъ додааст радиои тоҷикии Садои Хуросон ба нақл аз телевизиюни Ориёнои Афғонистон.

Манбаъ қайд кардааст, ки бо ин ҳол нерӯҳои марзии Афғонистон бо камбуди таҷҳизоти ин кишвар дасту панҷа нарм мекунанд.

Усома Вардуҷӣ, яке аз нерӯҳои марзӣ дар вилояти Бадахшон мегӯяд: “Вақте сарбозони чину тоҷикистониро бо таҷҳизоти бисёр мебинем ва муқоиса мекунем комилан маъюс ме‌шавем”.

Манбаъ зикр кардааст, ки пеш аз ин давлати Чин хостори ташкили нерӯи муштарак барои барқарории амният дар марзҳои Афғонистон шуда буд, аммо бо мухолифати Амрико ин иқдом ба саранҷом нарасид.

Гуфта шудааст, ки кишварҳои Чин, Тоҷикистон ва Афғонистон ситоди муштараки муташаккил аз 150 нерӯро бо ҳимояти молии давлати Пекин дар марз доранд, ки вазифааш мудирият ва коҳиши таҳдидҳои марзӣ аст.

Вилояти Бадахшон дар шимолу шарқи Афғонистон даҳҳо километр марзи муштарак бо вилояти мусулмоннишини Уйғуристони Чин дорад, ки гурӯҳи исломгарои  Туркистони шарқӣ дар он фаъол ҳастанд  ва садҳо нафар аз онҷо ба гуруҳи террористии ДИИШ (маманӯъ дар Тоҷикистон) дар Ироқу Сурия пайвастаанд.

333
Барчаспҳо:
марз, пурзур, ҷангҷӯён, амният, Афғонистон, Тоҷикистон
Машина скорой помощи в Таджикистане, архивное фото

Садамаи маргбор дар роҳи "Душанбе-Кӯлоб" як куштаю се захмӣ бар ҷой гузошт

0
(Таҷдидшуда 13:16 26.01.2021)
Вазорати умури дохилаи Тоҷикистон аз садамаи маргборе дар роҳи "Душанбе-Кӯлоб" хабар медиҳад, ки дар паи он як мусофир ҷон бохта се тани дигар бистарӣ гардиданд

ДУШАНБЕ, 26 январ - Sputnik. Бино ба гузориши Вазорати корҳои дохилӣ, ин ҳодисаи нохуш рӯзи 24-уми январ, тахминан соати 16:30, дар ҳудуди ноҳияи Данғара ба вуқӯъ пайвастааст.

Гуфта мешавад, ки ронандаи худрави "Тайота-Кемри", Раҳмонзода Фирдавс, сокини 36 - солаи Душанбе, ҳангоми ҳаракат аз самти шаҳри Кӯлоб ба самти шаҳри Душанбе аз уҳдаи идораи воситаи нақлиёт набаромада, ба автомашинаи тамғаи "Опел-Астра" бархӯрдааст.

ВУД қайд мекунад, ки худрави дуюм таҳти идораи Даминов Убайдулло, сокини 31 -солаи ҷамоати деҳоти Арали ноҳияи Восеъ будааст. 

"Дар натиҷа, мусофири автомашинаи тамғаи "Тайота-Кемри", Бобоёрова Ҷамолбӣ, сокини 61 - солаи шаҳри Душанбе, дар ҷойи ҳодиса ба ҳалокат расидааст", - омадааст дар хабарнома.

Ҳамчунин, ронандаи автомашинаи тамғаи "Опел-Астра", Даминов ва мусофирони ӯ Мирзоев Комилҷон, сокини 51 - солаи ҷамоати деҳоти Меҳнатободи ноҳияи Ҳамадонӣ ва ноболиғ Раҳмонзода Саидбилол, сокини 8 - солаи  Душанбе ҷароҳатҳои гуногуни ҷисмонӣ бардошта, дар беморхона бистарӣ карда шудаанд.

Чаппа шудани мошин дар роҳи Хоруғ - Душанбе: ронанда бо ду мусофир ҷон дод

Манбаъ афзуда, ки аз рӯи ҳодисаи мазкур таҳқиқот идома дорад.

0
Барчаспҳо:
ВУД ҶТ, Данғара, садама