ДУШАНБЕ, 17 авг — Sputnik. Тибқи иттилои дафтари матбуоти раисиҷумҳури Узбакистон дар намоишгоҳ маҳсулоти беш аз сад корхона ба намоиш гузошта шудааст.
Манбаъ афзуд, ки Шавкат Мирзиёев бо истеҳсолкунандагон суҳбат карда, ба сифати маҳсулот таваҷҷуҳ кардааст.
Ӯ ба сохторҳои Узбакистон дастур додааст, ки содироту воридоти маҳсулотро бо корхонаҳои Тоҷикистон густариш диҳанд. Мирзиёев махсусан муҳим хондааст, ки миёни корхонаҳои саноатии ду кишвар ҳамкорӣ ба роҳ монда шавад.
Дар ҳамин ҳол дафтари матбуоти раисиҷумҳури Тоҷикистон иттилоъ додааст, ки дар намоишгоҳи "Истеҳсоли Тоҷикистон", зиёда аз 60 корхонаи азими саноатии кишвар, аз қабили Ширкати "Талко гуруҳ", "Ғайюр семент", "Моҳир семент", "Фароз", "Шири Душанбе", "Ангишт", "Намаки Ашт ва Хоҷамуъмин", "Қолинҳои Қайроққум", "Амирӣ", "Маколли", "Оби зулол" ва ғайра маҳсулоташонро ба намоиш гузоштаанд.
Ба иттилои манбаъ корхонаҳои Тоҷикистон маҳсулоти ресандагию бофандагӣ, нӯшокиҳои ташнашикан, қисмҳои эҳтиётии мошин, анвои хӯрокворӣ, маҳсулоти ширӣ ва гуштӣ, консерваи меваю сабзавот, меваи хушк, машрубот, нон ва маҳсулоти нонӣ, маҳсулоти қаннодӣ, маҳсулоти чарм, масолеҳи сохтмон, алюминий, пластикӣ, матоъ, либос, пойафзол, маснуоти заргарӣ, адрасу атлас, дару тиреза, мизу курсиҳо ва рахти хоб барои беморхонаҳо ва ҷевонҳо, профил ва трубаҳои металлӣ, ноқилҳои пастшиддат ва баландшиддат, намунаи ҳунарҳои дастии занону духтарон ва дигар молу ашёро ба намоиш гузоштанд.
