БАТР: интиқоли пул аз Русия ба Тоҷикистон дар замони пандемия 15% коҳиш ёфт

104
(Таҷдидшуда 08:59 03.10.2020)
Дар гузориши БАТР омадааст, ки ба иқтисоди Тоҷикистон дар давраи пандемияи коронавирус маҳдудияти ҳамлу нақди нақлиётӣ бо шарикони тиҷорӣ ва маҳдудият дастрасӣ ба бозори кори Русия таъсир расонид.

ДУШАНБЕ, 3 окт — Sputnik. Бо назардошти гузориши Бонки Аврупоии Таҷдид ва Рушд, ба далели дер омадани коронавирус ба Тоҷикистон, мақомот чораҳои нисбатан сабуки ҷилавгириро ҷорӣ карданд.

Дар ин гузориш таъкид шудааст, ки маҳдудиятҳо дар Тоҷикистон нисбат ба дигар ҷумҳуриҳои минтақаи Осиёи Марказӣ хеле дертар қабул шуданд.

Таҳлилгарон қайд мекунанд, ки ба иқтисоди Тоҷикистон дар давраи пандемияи коронавирус маҳдудияти ҳамлу нақди нақлиётӣ бо шарикони тиҷорӣ ва маҳдудият дастрасӣ ба бозори кори Русия таъсир расонид.

"Воридоти байналмилалӣ дар нимсолаи аввали соли 2020 ду маротиба кам шуда, интиқоли пул аз Русия бошад тақрибан 15% коҳиш ёфт, ки ин ба истеъмол, ҳаҷми воридот ва даромади андоз таъсири манфӣ расонд", омадааст дар гузориш.

Ҳамзамон, тибқи натиҷаҳои шашмоҳаи соли 2020, иқтисоди Тоҷикистон ба ҳисоби солона 3,5% афзоиш ёфт.

Ба гуфтаи коршиносон, чунин натиҷаҳо ба шарофати нишондиҳандаҳои баланд дар соҳаи саноат ва кишоварзӣ, инчунин 140% афзоиши содироти тилло ба Швейтсария ба даст оварда шудаанд.

БАТР гуфтааст, ки коронавирус ба тиҷорати меҳмонхонаҳо, савдои чакана ва хизматрасонии маишӣ дар Тоҷикистон зарба зад.

Тавозуни манфии савдои Тоҷикистон: фарқияти 2 миллиардии воридот аз содирот

Тибқи пешбинии иқтисоддонҳо, дар соли 2021 ММД-и воқеии Тоҷикистон 3% афзоиш хоҳад ёфт.

"Агар ин идомаи пандемия барқарорсозии иқтисодиёти шарикони асосии тиҷоратии кишвар - Русия ва Чинро коҳиш диҳад, ин рақамҳо метавонанд аз ҳад хушбин бошанд", - хулоса кардааст бонк.

104
Барчаспҳо:
воридот, содирот, Русия, БАТР, Тоҷикистон
Монеты, архивное фото

Суҳбати раиси нахустин бонки исломии Тоҷикистон: аз бартарият то мушкилот

213
Шералӣ Зардов, раиси нахустин бонки исломии Тоҷикистон, “Тавҳидбонк” дар бораи бартарияти бонкдории исломӣ ва мушкилоти роҳандозии ин низом дар кишвар суҳбат кард

ДУШАНБЕ, 21 октябр - Sputnik. Шералӣ Зардов гуфт, ки бартарии бонкдории исломӣ нисбат ба бонкҳои анъанавӣ дар он аст, ки роҳбарият ва кормандони он аз ҳама гуна фаъолияти спекулятивӣ дурӣ меҷӯянд.

Национальный банк Таджикистана
© Фото : Пресс-служба президента Таджикистана

Раиси “Тавҳидбонк” бо истиқбол аз қабули қонун “Дар бораи фаъолияти бонкии исломӣ” инчунин зарур хондааст, ки бархе корҳои дигар низ анҷом дода шаванд.

“Бе ворид намудани тағйирот ба қонунҳои амалкунанда, такмили санадҳои дахлдори Бонки миллии Тоҷикистон ва дигар мақомоти давлатӣ, дар сатҳи зарурӣ татбиқ намудани қонуни мазкур ғайриимкон аст. Алалхусус, мутобиқ намудани Қонуни Ҷумҳурии Тоҷикистон “Дар бораи фаъолияти бонкии исломӣ” ба Кодекси андоз (вобаста ба андоз­бандии маҳсулоти бонкии исломӣ), қонунҳои Ҷумҳурии Тоҷикистон “Дар бораи бозори қоғазҳои қиматнок”, “Дар бораи иҷораи молиявӣ (лизинг)” ва ғайра ҳатмист”, - изҳор дошт Зардов дар суҳбат бо нашрияи парлумонии “Садои мардум”.

Ӯ афзудааст, ки дар раванди табдилдиҳии бонк аз анъанавӣ ба исломӣ бо норасоии мутахассисони ин соҳа, нобоварии аксари кормандони бонк барои ноил шудан ба комёбӣ, ноогоҳии масъулини мақомот аз моҳияти фаъолият, мушкилоти техникӣ ва ғайра мувоҷеҳ шудаанд.

“Бонки анъанавиро ба исломӣ табдил додан осонтар аз он буд, ки тафаккури кормандон, соҳибкорон ва масъулини мақомоти назоратиро мутобиқ намоем”, - изҳор доштаст мусоҳиб.

Шайх Абдулло ба БМТ: бо сармоягузорони Қатар бонки исломӣ бисозед

Зардов тавзеҳ додааст, ки дар адабиёти илмии марбут ба иқтисод ва бонкдории исломӣ зиёда аз 100 фарқи низоми бонкии исломӣ аз низоми бонкии анъанавӣ муайян шудааст.

Аммо фарқи асосӣ дар нагирифтани фоиз зоҳир мегардад. Ба гуфтаи ӯ, ташкилоти қарзии исломӣ дар қиёс ба ташкилоти қарзии анъанавӣ ба ҷои гирифтани фоиз аз амалиёти қарзӣ дар татбиқи лоиҳаҳо иштирок намуда, фоидаю зарарро бо мизоҷон тақсим менамояд.

Инчунин ин қабил ташкилоти молиявӣ наметавонанд маблағгузории фаъолиятеро, ки ба истеҳсол ва савдои тамоку, маҳсулоти спиртӣ, силоҳ ва лавозимоти ҷангӣ, қиморбозӣ, муомилоти ғайриқонунии маводи нашъадор ва прекурсорҳо вобаста мебошад, анҷом диҳанд.

“Эътироф бояд кард, ки доир ба бонкдории исломӣ аксарият бардошти ғайримантиқӣ ва то андозае ғалат доранд. Бояд дарк намуд, ки бонкдории исломӣ падидаи иқтисодӣ аст, на динӣ”, - изҳор доштааст Шералӣ Зардов дар фарҷоми суҳбат.

213
Барчаспҳо:
низоми бонкдории исломӣ, Тоҷикистон
Денежные купюры.

Бонки миллӣ арзиши рубл, доллар ва евроро барои имрӯз эълон кард

271
(Таҷдидшуда 13:26 21.10.2020)
Бонки миллии Тоҷикистон арзиши сомониро нисбат ба асъори хориҷӣ барои имрӯз, 21 октябр эълон кардааст

ДУШАНБЕ, 21 окт — Sputnik. Тибқи нишондодҳои Бонки миллии Тоҷикистон арзиши 1 рубли русӣ барои имрӯз 0.1324 сомонӣ  ва дар бозори нақд бошад 0.1350 сомонӣ нишон дода шудааст.

Ин ниҳод қурби миёнаи фурӯши 1 доллари ИМА дар муассисаҳои қарзии Тоҷикистонро аз 10.3385 то 10.3400 сомонӣ арзёбӣ кардааст. 

Бонки миллӣ қурби миёнаи фурӯши 1 евроро аз 12.2077 то 12.4000 сомонӣ арзёбӣ кардааст.

Дар бонкҳои дигари кишвар, аз ҷумла "Бонки Эсхата" нишондоди асъор нисбат ба дигарон каме болотар нишон дода шудааст.

Ин бонк хариду фурӯши 1 рублро имрӯз аз 0,1370 то 0,1395 сомонӣ муқаррар кардааст.

Дар “Спитаменбонк” бошад арзиши 1 рубл аз 0.132 то 0.141 ва дар “Алифбонк” бошад 1 рубл аз 0,1325 то 0,1415 сомонӣ нишон дода шудааст.

Раиси Бонки миллӣ аз мардуми Тоҷикистон хостааст долларҳоро дар хона нигаҳ надоранд

БМТ огоҳ менамояд, ки “берун аз сарбонк, филиал, марказҳои хизматрасонии бонкӣ, нуқтаи интиқоли пул ва банкомату терминалҳо анҷом додани амалиёти мубодилавӣ қатъиян манъ аст ва риоя накардани талаботи мазкур аз ҷониби шахсони воқеӣ қонуншиканӣ ба ҳисоб рафта, сабаби ба ҷавобгарии маъмурӣ ва ҷиноятӣ кашидан мегардад”.

271
Барчаспҳо:
қурби асъор, Бонки миллӣ, Тоҷикистон
Суванқулов Содиқҷон маҳкумшуда барои қатли маъшуқи ҳамсараш

Ҷазои Суванқулов барои куштор ҳангоми ҳамхобагии собиқ занаш бо ҳамсоя-видео

0
(Таҷдидшуда 15:37 21.10.2020)
Додгоҳи вилояти Хатлон Суванқулов Содиқҷони 51-соларо барои куштор ҳангоми дидани ҳамхобагии собиқ ҳамсараш бо ҳамсояи 52-сола ба 26 соли зиндон маҳкум кард

ДУШАНБЕ, 21 окт - Sputnik. Тибқи иттилои ВУД, Суванқулов, сокини ноҳияи Шаҳритуз, 19-уми августи соли равон, тахминан соати 23:30 дар холати мастӣ ба хонаи собиқ ҳамсараш, Бердиева Фарзонаи 26-сола омада, дидааст, ки ӯ бо ҳамсояаш, Раҷабов Рустам, марди 52-сола муносибати маҳрамона дорад.

Манбаъ афзуд, гумонбаршаванда бо корди дар дасташ буда якчанд маротиба ба узвҳои бадани мархум Раҷабов зада, ӯро ба ҳалокат расонидааст.

"Бо ин конеъ нагашта, аз ҳиссиёти рашк собиқ ҳамсарашро бо корд 4 маротиба ба узвҳои баданаш мезанад. Ба ғайр аз ин, гумонбаршаванда зани 30-солаи сокини шаҳри Норак, Камолова Нилуфар, ки дар меҳмонии онҳо қарор доштааст, 3 маротиба ба қисмати сар ва дасташ задааст, ки дар натиҷа ҷабрдидахо ҷароҳати ҷисмонӣ бардошта, дар беморхона бистарӣ гардидаанд", - омадааст дар иттилоияи ВУД.

Додгоҳи вилояти Хатлон дар пайи баррасии қазия Суванқулов Содиқҷонро  ба 26 соли зиндони низомаш сахт маҳкум кардааст. 

0