ДУШАНБЕ, 25 апр — Sputnik. Вазорати маориф ва илми Ҷумҳурии Тоҷикистон барои Ҷоизаи президенти дар соҳаи маориф дар соли 2016 озмун эълон намуд.
Ба иттилоъи расида, ба Ҷоизаи президент дар бахши маориф мудирон ва мураббиёни кӯдакистонҳо, роҳбарону омӯзгорони муассисаҳои таҳсилоти умумӣ, ибтидоӣ, миёна ва олии касбӣ, мақомоти роҳбарикунандаи маориф, кормандони идора ва шуъбаҳои маорифи вилоят, шаҳру ноҳияҳо, муассисаҳои таҳсилоти иловагӣ, кормандони Академияи илмҳои педагогӣ, ки дар раванди таълиму тарбия комёбиҳои барҷаста ба даст овардаанд, пешниҳод карда мешаванд.
Ҷоиза аз 5 мукофот иборат буда, маблағи ҳар яки он 2 ҳазор доллари амрикоиро ташкил медиҳад.
Озмун барои гирифтани Ҷоиза дар ду сол як маротиба баргузор шуда, он аз ҷониби раисҷумҳур дар арафаи ҷашни Рўзи Истиқлолияти давлатӣ супорида мешавад.
