Вазорати маориф: дар мактабҳо оро додани арчаи солинавӣ мамнуъ аст
ДУШАНБЕ, 21 дек — Sputnik. Вазорати маориф ва илми Тоҷикистон ороиши арчаи солинавиро дар мактабҳои Тоҷикистон мамнуъ кард.
Бино бар иттилои сухангӯи ниҳод Эҳсон Хушвақт қарори мазкурро имрӯз аз ҷониби мушовараи вазорат қабул шуд.
Бино бар иттилои манбаъ, ин қарор бо хоҳиши волидон қабул карда шуд, то аз ҷамъоварии маблағ дар маткабҳо дар остонаи Соли нав пешгирӣ шавад.
Гуфта мешавад, ин қарор дар умум бо мақсади пешгирӣ аз исрофкорӣ мебошад.
"Бештари волидон ба телефонҳои боварии Вазорати маориф тамос гирифта, хоҳиш карданд, ки бо мақсади пешгирӣ кардани ҷамъоварии маблағ ороиши арча дар мактабҳо мамнуъ шавад",- гуфт вай.
Вазорат афзудааст, ҷавонон метавонанд дар маросимҳои солинавие, ки дар ҳудуди ҷумҳурӣ баргузор мешавад, ширкат кунанд.
Ёдрас мешавем, пештар хабар дода шуд, ки имсол тибқи ҷадвали таътил донишомӯзони тоҷик имсол 30 рӯз, аз 1 то 31 январ ба таътил мебароянд.
Рӯзҳои таътили зимистонаи донишомӯзони тоҷик оғоз аз соли 2010-2011 бештар карда шуданд. Яъне муҳассилини тоҷик аз 1 то 31 январ ба таътил мебароянд. Вале дар ин росто таътилҳои тирамоҳӣ ва баҳорӣ аз ҷадвал бардошта шуданд.
Ҳукумат чунин қарорро дарёфти замони мувофиқ барои олимпиадаҳо ва давраҳои бозомӯзӣ барои омӯзгорон гуфт.
Барчаспҳо:
Русия дар Хуҷанд мактаб месозад: қабули талабаҳо тариқи озмун мешавад
(Таҷдидшуда 12:22 24.02.2021)
Осим Каримзода, сардори Идораи маорифи вилояти Суғд, мегӯяд, сохтмони мактаби муосир аз ҷониби Русия дар шаҳри Хуҷанд ба наздикӣ оғоз мешавадДУШАНБЕ, 24 фев – Sputnik. Каримзода зимни нишасти матбуотӣ гуфт, барои бунёди мактаби муосири русӣ дар маҳаллаи 8-уми шаҳри Хуҷанд қитъаи замин ҷудо шудааст.
Ӯ афзуд, рӯзҳои наздик корҳои сохтмонӣ шурӯъ мешавад.
“Ҳоло ҳамаи корҳои ободонӣ ва ҷудо намудани қитъаи замин ва ҳуҷҷатгузориҳо омода шудааст ва рӯзҳои наздик корҳои сохтмонӣ оғоз меёбанд”, - гуфт Каримзода.
Вазир: дар кишвар норасоии омӯзгорони забони русиву англисӣ вуҷуд дорад
Cохтмони мактабҳои русӣ дар панҷ шаҳр - Душанбе, Кӯлоб, Хуҷанд, Бохтар ва Турсунзода дар назар аст.
Осим Каримзода мегӯяд, мактабҳое, ки аз ҷониби Федератсияи Русия бунёд мешаванд, дорои шароити комили таълимӣ буда, барои хонандагону омӯзгорон сохтмони хобгоҳ ҳам дар назар аст.
Манбаъ афзуд, интизор меравад, ки дар ин макотиб омӯзгорон аз Тоҷикистон ва Федератсияи Русия ба кор гирифта мешаванд. Хонандагон аз тамоми шаҳру навоҳии кишвар тибқи озмун қабул карда мешаванд.
Барчаспҳо:
“Шаҳри ҳушманд” дар 50 мактаб барномаи “eDonish”-ро фаъол месозад
ДУШАНБЕ, 22 фев — Sputnik. Раёсати маорифи шаҳри Душанбе хабар дод, ки феълан барномаи электронии “eDonish” дар 5 муассиса фаъол буда, дар 20 муассисаи дигар муаррифӣ гардид. Дар назар аст, ки ояндаи наздик дар 50 мактаби шаҳри Душанбе роҳандозӣ гардад, хабар дод “Ховар” аз қавли раёсати маорифи пойтахт.
Манбаъ тавзеҳ дод, ки барномаи “eDonish” хизматрасонии электронӣ мебошад, ки тавассути он волидони хонандагони муассисаҳои таълимӣ аз ахлоқу рафтор ва пешрафти донишомӯзии фарзандони худ бо истифода аз воситаҳои иттилоотиву коммуникатсионии муосир ва гирифтани паёмакҳо ба телефонҳои ҳамроҳ ба таври доимӣ бохабар мешаванд.
“Ин барнома ҳамчунин шомили унсурҳои мухталифи иттилоотӣ, аз ҷумла журнал ва рӯзномаи электронӣ, ҷадвали дарсҳои асосӣ ва иловагӣ, назорати давомоти хонандагон ва мониторинги сатҳи дониши онҳо мебошад”, - омадааст дар иттилоия.
Зикр гардидааст, ки тавассути ин барнома волидон метавонанд вазифаҳои хонагии фарзандонашонро аз фанҳои таълимӣ, супоришҳои омӯзгорон ва дигар маълумоти заруриро, ки аз маъмурияти муассисаи таълимӣ мерасанд, бо паёмак ба телефон дастрас намоянд.
Таъкид шудааст, ки барномаи “eDonish” ба муассисаҳои таълимӣ имкон медиҳад, ки бо волидайни хонандагон робитаи боз ҳам зичтар ва доимӣ барқарор намоянду роҷеъ ба раванди таҳсили ҳар хонанда ва сатҳи пешрафти онҳо дар робита бошанд.
Барчаспҳо:
Хурӯс соҳиби худро ҳангоми хурӯсҷанг дар Ҳиндустон кушт: суд мешавад
(Таҷдидшуда 01:33 01.03.2021)
Пас аз марги соҳибаш паррандаи ҷангиро ба идораи полис бурданд, сарнавишти минбаъдаи онро додгоҳ ҳал мекунадДУШАНБЕ, 1 мар - Sputnik. Хурӯс тасодуфан дар хурӯсҷанге дар минтақаи Ҷагитали Ҳиндустон соҳиби худро куштааст, менависад Times of India.
Қабл аз оғози хурӯсҷанг парранда гурехтанӣ шуд ва соҳиби худ Танугул Сатишро бо корди дар панҷааш басташуда ба поёни шикамаш зад.
Мардро ба беморхона интиқол доданӣ мешаванд, аммо аз сабаби зиёд рафтани хун дар роҳ мефавтад.
Полис ҳолати мазкурро нохост хонда, парванда боз кардааст ва хурӯсро ба қисми навбатдорӣ овардааст.
Баъзе шабакаҳои хабарӣ аз боздошти хурӯс хабар доданд, аммо полис инро рад кардааст.
Онҳо илова карданд, ки хурӯс дар додгоҳ ҳамчун сабаби марги соҳиби он муаррифӣ хоҳад шуд ва тақдири минбаъдаи онро дар он ҷо ҳал хоҳанд кард.
Баъзе иштирокчиёни дигари хурӯсҷанг низ ба суд оварда мешаванд.
Хурӯсҷанг дар Ҳиндустон аз соли 1960 манъ карда шудааст, аммо он дар бисёр иёлатҳо пинҳонӣ сурат мегирад ва иштирокчиён ба он шарт мегузоранд.
Барчаспҳо: