Даромадгоҳи Маркази ҳимояи аҳолӣ аз бемории сил дар вилояти Суғд

Хатарнок ё камдаромад: аз афзоиши силу коҳиши силшинос то иқдоми Ҳукумат барои ислоҳи вазъ

811
Силшиносони Суғд аз афзоиши бемории сил иттилоъ дода, таъкид мекунанд, ки норасоии мутахассисони соҳа кӯшиши поксозии ҷомеа аз ин бемориро камсамар мегардонад

ДУШАНБЕ, 20 мар - Sputnik, Қамари Аҳрор. Фароғат Шодиева, номи шартан ивазшудаи сокини ноҳияи Зафаробод аст, ки 10 рӯз инҷониб дар Маркази ҳимояи аҳолӣ аз бемории сил и  вилояти Суғд, воқеъ  дар шаҳраки Деҳмойи ноҳияи  ба номи Ҷаббор Расулов табобат мегирад.

Ӯ мегӯяд, хуруҷи беморӣ фишорашро ба ҳадде боло бурд, ки ба дунболи он нафаскашӣ барояш душвор гардид. Вақте маҷоли тоқат кардани ин вазъ барои Фароғат зиёд азиятовар шуд, табибони маҳаллӣ ӯро аз ноҳияи Зафаробод ба беморхонаи воқеъ дар шаҳраки Деҳмойи ноҳияи Ҷаббор Расулов интиқол доданд. Ҳоло бо гузашти беш аз як ҳафта Фароғат ба худ омода, сиҳатияш ҳам беҳбуд ёфтааст.  

“Дар ноҳияи Зафаробод 12 рӯз табобат гирифтам беҳ нашудам. Бо вуҷуди он, ки оби ғуншуда аз шушамро берун кашиданд, ҳарорати баданам ҳеҷ паст нашуд, сарам ҳамеша чарх мезад ва ба мушкили диққи нафас гирифтор шудам. Духтурони маҳаллӣ маро ба беморхонаи вилоятӣ тавсия доданд.Дар ин ҷо воксини муайянкунандаи ташхис (Манту)  заданд ва се рӯз баъд,  иззи он сурх шуд. Маълум шуд, ки микроби бемории сил дар ман хуруҷ кардааст. Тибқи ташхис духтурон бароям дармон таъин карданд. Ҳоло инак 10 рӯз аст, ки ин ҷо табобат мегирам, ҳароратам муътадил ва нафашкашиам хуб шудааст ва худамро ҳоло хуб ҳис мекунам”, - изҳор дошт бемор.

Фароғат дар ҳоле аз ваҳим шудани саломатиаш дар ноҳияи Зафаробод иброз намуд, ки зимнан дар ин ноҳия мизони гирифторони  сил 207 бемор ба 100  000 аҳолӣ рост меояд. Бар пояи омори Маркази ҳимояи аҳолӣ аз бемории сил дар вилояти Суғд, ноҳияи Зафаробод бо доштани чунин нишондод дар қатори шаҳру ноҳияҳои осебпазири гирифторшавии аҳолӣ ба бемории сил дар ҷои аввал қарор дорад.

Бобур Отамуродов, муовини сардухтури маркази ҳимояи аҳолӣ аз бемории сил дар вилояти Суғд
Қамари Аҳрор
Бобур Отамуродов, муовини сардухтури Маркази ҳимояи аҳолӣ аз бемории сил дар вилояти Суғд

Бобур Отамуродов, муовини сардухтури маркази ҳимояи аҳолӣ аз бемории сил дар вилояти Суғд мегӯяд, меъёри муътадил барои вилояти Суғд 113 нафар бемор ба 100 000 аҳолӣ аст. Аммо рақамҳо нишон медиҳанд, ки дар баъзе шаҳру ноҳияҳои Суғд  ҳодисаҳои сироятёбии аҳолӣ аз бемории сил  ба маротиб аз меъёр  зиёд аст.

"Дар ноҳияи Зафаробод ба  100  000 аҳолӣ, 207 нафар, дар ноҳияи Б. Ғафуров 127 нафар бемор, шаҳри Бӯстон  138 бемор, ноҳияи Масчоҳ ба 100 000 аҳолӣ  176 нафар бемор  рост меояд, ки албатта ин вазъ ташвишовар мебошад”, - иброз намуд Бубур Отамуродов.  

Ба иттилои Маркази ҳимояи аҳолӣ аз бемории сил дар вилояти Суғд, то поёни соли 2018 дар шаҳру ноҳияҳои вилояти Суғд, 1158 ҳодисаи  нави гирифтории сокинон ба бемории сил ба қайд гирифта шудааст, ки ин рақам дар муқоиса ба солҳои қаблӣ бештар мебошад. Аз шумори умумии беморон, 1032 нафар навъи бемории ҳассоси сил, 129 нафар шакли мутобиқгашта ва бемории 24 нафари дигар шакли васеъи мутобиқгаштаи сил гуфта мешавад.

Бобур Отамуродов, муовини Маркази ҳимояи аҳолӣ аз бемории сил дар вилояти Суғд мегӯяд, бемории сил табобатшаванда аст ва ҳар кадоми ин беморӣ вақт ва табобати хосро тақозо менамояд, то нафари сироятёфта дубора ба зиндагии бидуни сил баргардад.

Бино ба гуфти ӯ, тибқи меъёр табобати навъи ҳассоси бемории сил  аз  6 то  8 моҳ давом карда ва барои давои он то 250 доллари амрикоӣ масраф карда мешавад. Барои табобати шакли мутобиқгаштаи беморӣ 18 - 24 моҳ вақт лозим буда, ҳудуди  1500 доллар масраф карда мешавад. Инчунин барои шакли мутобиқгаштаи васеи бемории сил 18 - 30 моҳи табобат лозим буда, аз 12 то 18 ҳазор доллари амрикоӣ  тақозо мешавад. Ташхис ва табобати бемории сил дар Ҷумҳурии Тоҷикистон бепул буда,  ин маблағҳо аз ҳисоби ҳукумати Ҷумҳурии Тоҷикистон ва бахши аъзами он аз ҳисоби Лоиҳаи ХОУП ва барномаи ЮСАИД  масраф карда мешавад.

Табибони Маркази ҳимояи аҳолӣ аз бемории сил дар Суғд мегӯянд, муайян кардани ин теъдоди беморон, натиҷаи кори таҷҳизоти ташхисӣ бо номи Ҷен Экперт аст, ки барои дарёфти саривақтии чӯбчамикроби сил аз маҳлули балғам мусоидат мекунад. Зимнан аз ҷониби Лоиҳаи ХОУП  то соли 2018,  12 адад  Ҷен Экспертҳо ба шаҳру ноҳия вилояти Суғд дастрас карда шудааст. Ҷен Эксперт таҷҳизоти ташхискнунадаи маҳлули балғам буда, дар давоми 24 соат микроби силро маълум менамояд.

Табибони силшинос дар Маркази ҳимояи аҳолӣ аз бемории сил, аз як тараф муайян намудани ин шумор беморро муваффақияте медонанд, чун ба қавле вилоят аз сил тоза шуд.

Аммо бархеи коршиносони умури силшиносӣ мегӯянд, бо он, ки мушкили норасоии муттахассисони соҳаи силшинос беш аз пеш ба назар мерасад, саривақт дарёфт кардани нафари бемор ва ба ин васила тоза кардани ҷамоату шаҳраку ноҳияҳои Тоҷикистон аз бемории сил мушкили то ба ҳол рақами як боқӣ мемонад.

Тошназар Усмонов, табиби собиқадори соҳаи силшиносӣ, рентгенологи дараҷаи олӣ дар вилояти Суғд
Қамари Аҳрор
Тошназар Усмонов, табиби собиқадори соҳаи силшиносӣ, рентгенологи дараҷаи олӣ дар вилояти Суғд

Тошназар Усмонов, аз табибони собиқадори соҳаи силшиносӣ, рентгенологи дараҷаи олӣ мегӯяд, дар замони шӯравӣ онҳо барои дарёфти саривақтии беморон мошинҳои сайёри рентгену флюрографӣ такшил карда, то ба сатҳи ҷамоатҳо сафар карда, марудмро, маҷбур аз ташхис мегузарониданд, то ҳарчи бармаҳал зуҳуроти бемории силро пайдо кунанд. Аммо ҳоло ин гуна ташхисҳои сайёр мутаасифона амал намекунанд ва танҳо нафароне, ки баъди хуруҷи беморӣ бо пои худ ба беморхонаҳо меоянд аз онҳо ташхис гузаронида ва бемор будани онҳо маълум мегардад, мегуяд ӯ.    

 

“Бемории сил гузаранда аст. Як нафари бемор метавонад тавассути суҳбат даҳҳо нафарро сироят кунад. Аз ин хотир назар ба ин, ки ин нафар то ба пои худ омада аз ташхис гузашта, бемориаш маълум шавад, хуб аст, ки саривақт аз ташхис гузарад ва ба табобат фаро гирифта шавад. Дар ин ҳолат чанд нафар аз сироятёби эмин мемонанд ва дараҷаи бемории худи ин нафар хавфнок намегардад”, - изҳор дошт Усмонов.  

Зимнан ба ҳисоби беморхонаи вилоятии зидди сил чаҳор беморхонаи дигари зидди сил дар шаҳру ноҳияҳои Панҷакент, Масчоҳ ва Исфара фаъолият мекунанд. Замони шӯравӣ шумораи  чунин беморхонаҳо ба даҳ адад баробар  буд ва пайваста амал мекарданд.

Ҳукумати Тоҷикистон Барномаи давлатии “Стратегияи миллии солимии аҳолии Ҷумҳурии Тоҷикистон барои солҳои 2010 - 2020” ва  “Нақшаи миллии стратегӣ оид ба ҳимояи аҳолӣ аз бемории сил дар Ҷумҳурии Тоҷикистон барои солҳои 2015 - 2020 ” ро қабул намудааст.

Камбуди беморхонаҳои зидди сил ва норасоии мутахассисони соҳаи силшиносӣ аз мушкилиҳои умдаи ин соҳаи тандурустӣ дар Ҷумҳурии Тоҷикистон маҳсуб мешавад.

Бобур Отамуродов, муовини маркази ҳимояи аҳолӣ аз бемории сил дар вилояти Суғд иброз медорад, ки дар ҳудуди вилояти Суғд беш аз 40 дарсад табибони соҳаи силшиносӣ намерасанд ва аз норасоии онҳо ҳоло 70 % табибоне, бо табобати бемории сил машғуланд, ки аслан нафақахӯр мебошанд.

Бобур Отамуродов аз ноҳияи Кӯҳистони Масчоҳ мисол овард, ки то охири соли 2018, ҳудуди 10 сол ба ин тараф ягон духтури силшинос амалан кор намекард.  Ё шаҳри Гулистон, ки бо вуҷуди доштани нишондоди баланди иқтисодӣ ҳоло мушкили норасии духтури силшинос дорад.

Дар сатҳи вилояти Суғд аз рӯи таърификатсия ҳамагӣ  92 воҳиди корӣ барои табибони силшинос воҳиди корӣ тахсис шудааст. Дар асл ҳоло ба ҷои 92 нафар, 60 нафар табибони силшинос дар марказҳои зидди сил фаъолият мебаранд, ки боз ҳам синни  46 нафари онҳо аз 50-сола боло мебошад. Зимнан дар марказҳои мубориза зидди сил дар шаҳру ноҳияҳои вилояти Суғд бе ҳисоби табибони нафақахӯр, 32 нафар духтурони силшинос  намерасанд. 

“Дар шаҳру  ноҳияи Б. Ғафуров – 1   силшинос, Зафаробод – 2,  Истаравшан – 1, Исфара – 2, Конибодом – 2 нафар,  К. Мастчоҳ – 1, Гулистон – 1  нафар, Мастчоҳ – 2 нафар,  Панҷакент – 2 , Спитамен – 1 нафар,  Хуҷанд – 1 нафар, Ҷ. Расулов – 1  нафар,   Бӯстон – 1  ва дар муассисаи ҳимояи аҳолӣ аз бемории сил дар вилояти Суғд – 14 , ҷамъ 32 нафар табибони силшинос намерасанд”, - қайд намуд Бобур Отамуродов

Ӯ сабаби норасоии духтурони силшинос дар вилоятро аз ҳавасмандии кам арзёбӣ мекунад.

Аммо коршиносони дигар таъкид меварзанд, ки бемории сил, ки бемории қишри камбизоатон рақам зада мешавад ва ташхис ва табобат ройгон аст, духтурон намехоҳанд бо 1000 сомонӣ кору фаъолият намоянд.

Толиб Ашӯров, собиқадори соҳаи силшиносӣ, мегӯяд, норасии муттахассисон аз он хотир аст, ки то ҳол маоши силшиносон  1000 сомонӣ аст ва барои табибон дигар даромади иловагӣ вуҷуд надорад, аз ин хотир 1000 сомонӣ ниёзи силшиносони ҷавонро қонеъ намекунад ва онҳо шавқи кор карданро надоранд.

Маркази силшиносии Суғд дар ҳоле аз омори 1158 ҳодисаи нави бемории сил дар соли сипаришудаи 2018 иттилоъ медиҳад, ки омори дақиқ аммо ғайрирасмӣ шумори гирифторони бемории силро бештар аз он рақам мезанад.

Бар пояи иттилои Маркази ҳимояи аҳолӣ аз бемории сил дар вилояти Суғд дар соли 2018,  64 нафар беморон бо сабаби дер муайян кардани беморӣ, таъхири табобат ва ё хуруҷи якҷояи сил ва ВНМО фавтидаанд.

Ҳукумати Ҷумҳурии Тоҷикистон тасмим гирифтааст, ки сар аз моҳи июли соли 2019 маоши табибони соҳаи силшиносии кишварро 100 % зиёд намояд. Ин тағйирот имкон фароҳам хоҳад овард, то оянда баъзе духтурони ҷавон аз рӯи тахассуси худ ба табобати беморони сил машғул шаванд.

811
Главный корпус больницы Истиклол

Поёнравӣ ё оромии қабл аз тӯфон: дар шифохонаҳои Тоҷикистон чӣ хабар аст?

66
(Таҷдидшуда 02:25 25.05.2020)
Маҷмӯаи иттилооти дасти аввал аз шифохонаҳо нишон медиҳад, ки шуюъи “вируси корона” дар Тоҷикистон сайри нузулӣ дорад. Аммо мутахассисин мегӯянд, барои кафкӯбӣ кардан ҳанӯз вақт ҳаст

ДУШАНБЕ, 24 май — Sputnik. Масъулини дасти кам 10 шифохонаи шаҳру навоҳӣ ва вилоят ба Sputnik Тоҷикистон таъйид карданд, ки теъдоди маризон рӯ ба коҳиш оварда, утоқҳои табобатӣ холӣ мешаванд.

Эмомалии Мирзо, сухангӯи вазорати тандурустӣ ва ҳифзи иҷтимоии Тоҷикистон гуфт, 23 май, вазири тандурустӣ ба вилояти Хатлон сафар дошт, то бо вазъ дар маҳалҳо ошно шавад.

Вай афзуд, бино ба иттилое, ки сардухтурон дар ихтиёри вазир гузоштанд, тайи рӯзҳои ахир теъдоди назарраси маризон шифо ёфта, ба хонаҳои худ рухсат шудаанд.

“Масалан, дар шифохонаи марказии ноҳияи Ёвон ҳамагӣ чор мариз бистарӣ буданд. Ҳамин гуна вазъ дар Шифохонаи марказии шаҳри Бохтар, маркази вилоят низ мушоҳида шуд. Дар умум аз садҳо нафаре, ки тайи 20 рӯзи ахир дар шифохонаҳои ин вилоят таҳти тадовии табибон буданд, ҳудуди 200 нафар боқӣ мондаанд. Инҳо ҳам ба зудӣ рухсат хоҳанд шуд”, - гуфт Эмомалии Мирзо.

Бистарӣ шудани собиқ ноиби раиси парлумон дар шуъбаи эҳёи бемористони сироятӣ-акс

Ба гуфтаи сухангӯи вазорати тандурустӣ, дирӯз аз шифохонаҳои шаҳри Душанбе дар умум 500 нафар, ки бо маризиҳои мухталиф, аз ҷумла “вируси корона” ва “пневмония” бистарӣ буданд, ба хонаҳои худ рухсат шудаанд.

Бино ба иттилои дарёфтӣ, то лаҳзае, ки ин гузориш омода мешуд, дар корпуси 2 – и Маркази миллии тиббии Тоҷикистон - "Шифобахш", маъруф ба Шифохонаи Қарияи Боло, ҳамагӣ 4 мариз бистарӣ буданд ва дар корпусҳои 4, 6, 8 ва кардиологияи ин марказ, ки тақрибан 500 нафар табобат мегирифтанд, се рӯз ба ин сӯ касе бистарӣ нашуда, теъдоди онҳое, ки таҳти назоратанд, аз 100 поён шудааст.

Бино ба манобеъи мо, бештари маризон ба Маҷмааи тандурустии “Истиқлол” муроҷиат мекунанд ва он ҷо низ теъдоди муроҷеин аз садҳо нафари даҳаҳои аввалу дуюми моҳи равон ба 20 – 30 нафар коҳиш ёфта, рӯзщои ахир то 30 - 40 нафар аз шифохона рухсат мешаванд.

Омори мудҳиш: шумори гирифторини COVID-19 дар ҷаҳон аз 5 миллион нафар гузашт

Вазъи ҳамсон дар Шифохонаи маризиҳои сироятӣ ва ҳам Маркази гастроэнтрологияи Душанбе низ мушоҳида мешавад. Сухангӯи вазорати тандурустӣ ва ҳифзи иҷтимоии Тоҷикистон вазъи Вилояти Мухтори Кӯҳистони Бадахшон ва Навоҳии тобеъи ҷумҳуриро низ рӯ ба беҳбудӣ арзёбӣ кард.

“Хушбахтона, Вилояти Мухтори Кӯҳистони Бадахшон дар қиёс бо дигар вилоёт садамаи камтар расида, ҳоло теъдоди маризон бамаротиб коҳиш ёфтааст. Иттилое, ки аз Навоҳии тобеъи ҷумҳурӣ дар ихтиёри мо гузошта мешавад, низ аз поёни омадани мавориди сироят ва фавт ривоят мекунад”, - гуфт Эмомалии Мирзо.

Ду – се рӯз пас

Вилояти Суғд, ки дар баробари пойтахт – Душанбе дуввумин нуқтаи доғи шуюъи “вируси корона” ба ҳисоб мерафт, низ ҳоло шоҳиди беҳбуди вазъ аст.

Ҳанӯз 20 май хабаргузории “Ховар” аз коҳиши муроҷиати маризон ва тадриҷан холӣ шудани шифохонаҳо дар ин вилоят хабар дода буд. Яке аз минтақаҳои доғ ноҳияи Бобоҷон Ғафуров буд, ки бино ба иттилои дарёфтӣ, дирӯз 24 май, охирин гирифторонро рухсат намудааст.

Вазъ дар Хуҷанду Истаравшан, шаҳрҳое, ки мавориди бештари гирифторӣ ба “вируси корона” ва “пневмония” – ро таҷриба кардаанд, низ аз ҳамин қарор аст.

Як манбаъ дар Шифохонаи маризиҳои сироятии шаҳри Хуҷанд, ки бори аслии табобати маризони вазнинро мекашид, ба Sputnik Тоҷикистон гуфт, агар вазъ ба ҳамин минвол идома пайдо кунад, то чанд рӯзи дигар ин шифохона холӣ хоҳад шуд.

Нишонаҳои коронавирус мушоҳида намешуд: сабаби марги раиси Тоҷикобод муйаян шуд

Нигора Наимҷонова, муовини раиси Истаравшан як рӯзи қабл, 24 май, ба Sputnik Тоҷикистон гуфт, ҳоло дар Шифохонаи марказии шаҳр ҳудуди 30 нафар табобат мегиранд.

“Муроҷеъин кам шудаанд ва умедворем, ки то ду – се рӯзи дигар тамоми маризон рухсат шаванд. Аз сӯи дигар, онҳоеро, ки ҳолати сабуку миёна доранд, тариқи гаштҳои хонагӣ ошкор намуда, духтуронро масъули нигоҳубини онҳо кардаем”, - гуфт Нигора Наимҷонова.

Иттилоъе аз ин қабилро дар Шифохонаи марказӣ ва Маркази физиотерпевтии воқеъ дар ноҳияи Ҷаббор Расулов, ки шоҳиди аввалин мавориди расонаишудаи маргумирҳо аз “пневмония” буданд, низ дар ихтиёри мо гузоштанд. Маъруф Ҳоҷибоев, муовини сардори Раёсати тандурустии вилояти Суғд, гуфт, дар ҳоли ҳозир дар 18 ноҳияи вилоят ҳудуди 400 нафар таҳти муроқибати табибон қарор доранд.

“Ҳолати аксарияти кул рӯ ба беҳбудӣ оварда, мавориди вазнин хеле кам шудаанд. Теъдоди фавт низ сахт коҳиш ёфта, ин умедворӣ ба вуҷуд омадааст, ки ба ҳамин қарибӣ вилоят аз ин вабо озод шавад”, - гуфт Маъруф Ҳоҷибоев.

“Мавҷи дуюм”

Дар ҳамин ҳол, ҳамсӯҳбатони мо коҳиши муроҷиати маризон ба шифохонаҳои Тоҷикистонро ҳанӯз анҷоми ин набарди пур аз талафот бо “вируси корона” намебинанд.

Ба қавли онҳо, таҷрибаи кишварҳои дигар нишон медиҳад, ки сайри нузулӣ ё коҳиши мавориди гирифторӣ ҳанӯз комилан аз миён рафтани “вируси корона” буда наметавонад. “Эҳтимол дорад, ки ба истилоҳ, “мавҷи дуюм” моро дар пеш бошад.

Аз ин хотир, мардум набояд фирефтаи ахбори хуш шаванд, балки ҳамоно аз эҳтиёт кор гиранд, пойбанди қавонини беҳдоштиву гигиенаи шахсӣ ва дар хона бимонанд.

Агар вазъ ба ҳамин минвол идома пайдо кунад, тақрибан 20 рӯзи дигар зарур аст, то бигӯем, ки кор тамом шуд ва итминони хотир пайдо кунем”, - гуфт яке аз онҳо.

Дар ҳамин ҳол, оморе, ки вазорати тандурустии Тоҷикистон рӯзи 24 май нашр кард, ҳикоят аз коҳиши ками мавориди гирифторӣ ба “вируси корона” мекунад.

Роҳандозии озмоишгоҳи вирусологӣ дар Хуҷанд барои муайян кардани коронавирус

Бино ба ин манбаъ, аз соати 17 – и рӯзи 22 ба ҳамин соати 23 май дар кишвар 191 (рӯзи қабл 187) ҳолати нави гирифторӣ ба ин маризӣ сабт шуда, теъдоди умумии ибтило ба 2929 маврид расидааст. Масъулин мегӯянд, ин натиҷаи санҷиш ё тестҳоест, ки як ҳафтаи қабл гирифта, ҳоло таъйид шудаанд ва ин бозгӯи вазъи рӯзҳои ахир нест.

66
Жители города Душанбе в защитных масках на улице

Афзоиши шумораи гирифторони коронавирус дар Тоҷикистон

2736
(Таҷдидшуда 17:30 24.05.2020)
Дар Тоҷикистон гирифторони коронавирус дар ҳоли афзоиш аст. Вазорати тандурустии Тоҷикистон омори нави сироятшудагонро нашр кард

ДУШАНБЕ, 24 май — Sputnik. Тибқи иттилои Вазорати тандурустии Тоҷикистон, то имрӯз дар кишвар 2929 кас гирифтори ин вабои аср шудааст.

Бино ба гузориши Вазорати тандурустӣ дар давоми шабонарӯзи гузашта дар Тоҷикистон 191 ҳолати нави гирифторӣ ба коронавируси навъи COVID - 19 ба қайд гирифта шудааст.

Ҳамин тавр, то 24 майи соли равон теъдоди умумии гирифторони коронавирус дар Тоҷикистон 2929 кас бемор шудааст. Дар баробари ин 3 ҳазор кас таҳти назорати пизишкон боқӣ мемонад.

Ёдрас мешавем, ки пештар дар кишвар 187 ҳолати сироятёбӣ ба қайд гирифта шуда буд, ки давоми ҳафтаи охир камтарин нишондод буд.

Вазорати тандурустӣ мегӯяд, то имрӯз 46 кас дар Тоҷикистон аз коронавирус вафот кардааст.

2736
Барчаспҳо:
афзоиш, вируси нав, гирифторони беморӣ, Тоҷикистон
Мавзуҳо:
Пайомадҳои COVID-19 дар Тоҷикистон ва ҷаҳон