ДУШАНБЕ, 29 апр - Sputnik. Тибқи гузориши ВУД, 26-уми апрели соли 2019, тахминан соати 17:00, мошини “Опел-Астра”, таҳти идораи Назаров Шамшод, сокини 30-солаи ноҳияи Лахш, ҳангоми ҳаракат дар шоҳроҳи “Ваҳдат-Рашт-Лахш” ба чуқурии 460-метрӣ чаппа шудааст.
Манбаъ мегӯяд, ҳодиса дар ҳудуди ноҳияи Нуробод дар пайи аз ӯҳдаи идораи воситаи нақлиёт набаромадани Назаров рух додааст.
“Дар натиҷа, мусофири автомашинаи мазкур Муҳиддинова Махфират Аҳлиддиновна, соли таваллудаш 1960, сокини шаҳри Ваҳдат, ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидааст”, - омадааст дар иттилоия.
ВУД инчунин аз садамаи дигари маргбор хабар дод, ки шоми 27-уми апрели соли 2019, дар шаҳри Душанбе рух дод.
Ин ниҳод иттилоъ дод, ки Ҳусейн Бедилов, ронандаи 50-солаи “Опел-Сатурн”, ҳангоми ҳаракат дар кӯчаи Испечаки пойтахт аз ӯҳдаи идораи воситаи нақлиёт набаромада, хурдсол Раҷабов Бобораҷаб Маъруфович, соли таваллудаш 2010, сокини кӯчаи мазкурро пахш намудааст.
“Дар натиҷаи рух додани чунин ҳодисаи нохуш, хурдсол Раҷабов Бобораҷаб ҷароҳатҳои вазнини ҷисмонӣ бардошта, ҳангоми ба беморхона дастрас намудан дар роҳ ба ҳалокат расидааст”, - омадааст дар иттилоия.
ВУД таъкид кард, ки феълан таҳқиқи ин ҳодисаҳо идома дорад.
