ДУШАНБЕ, 12 май — Sputnik. Раисиҷумҳури Тоҷикистон зимни мулоқот бо кормандони мақомоти молия, андоз, гумрук ва бонкҳо аз парвандаи пурсарусадои дуздии даҳҳо миллион сомонӣ аз беморхонаи “Истиқлол” зикр кард.
Эмомалӣ Раҳмон гуфт, муроҷиатро дарёфт намуд, ки масъули Палатаи ҳисоб 250 ҳазор доллар ҳақашро гирифта, санад тартиб додааст, ки дар беморхонаи “Истиқлол” ҳама дуруст аст.
Раисиҷумҳур афзуд, ин арзро ба Ожонси зидди фасод барои таҳқиқ пешниҳод намуд ва исрофкориҳои зиёде дар ин иншоот ошкор гардиданд. Ба нақли раисиҷумҳур, дастандаркорони ин дуздӣ талош карданд ба корманди Ожонси зидди фасод низ 400-500 ҳазор доллар пора диҳанд, аммо боздошт шуданд.
Раисиҷумҳур зикр кард, ки дар ҷараёни сохтмони маҷмааи “Истиқлол” чанд бор аз майдони сохтмон дидан кард. Ӯ гуфт, гарчанде сохтмончӣ нест, мушоҳида кард, ки маҳсулоти пастсифат истифода шудаанд ва маблағҳои ҳангуфт ба истилоҳ “списат” кардаанд.
Эмомалӣ Раҳмон таъкид кард, ки дар пайи санҷиш дуздии рӯирости беш аз 150 миллион сомонӣ ошкор шуд, ки имкон дошт, бо ин маблағ 10 мактаби муосири ҳар кадомаш 15 миллионӣ бунёд карда шаванд.
Дар доираи ин қазия, ки Эмомалӣ Раҳмон аз он зикр кард, додгоҳи шаҳри Душанбе моҳи апрели соли 2017 Саидшариф Анваров, сардори пешини Раёсати сохтмони асосии шаҳри Душанберо ба 18 соли зиндон ва 9 миллион сомонӣ ҷарима маҳкум кард. Дар маҷмуъ дар доираи парванда 7 нафари дигар, аз ҷумла Фазлиддин Маҳмудов, мудири "Тоҷикколхозсохтмон" ҳам ба 18 соли зиндон ва пардохти 9 миллион сомонӣ маҳкум гардид.
Маҷмааи тиббии “Истиқлол” аз ҷумлаи иншооти бузург дар пойтахти Тоҷикистон мебошад, ки бо харҷи беш аз ним миллиард сомонӣ бунёд гардидааст.
