ДУШАНБЕ, 29 янв — Sputnik. Рӯзи 27-уми январи соли 2020, тахминан соатҳои 21:30-дақиқа, дар беморхонаи марказии ноҳияи Ҷалолиддини Балхӣ марди 32-сола бистарӣ шудаст, хабар дод Вазорати умури дохилӣ.
Ба иттилои манбаъ, ҷабрдида, ки дар ҳолати вазнин ба бемористон оварда шуд, сокини ҷамоати деҳоти Ҳалеварди ноҳияи Ҷалолиддини Балхӣ мебошад.
"Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия муайян карда шуд, ки ӯро дар саҳни ҳавлии манзили истиқоматиаш, писари аммааш марди 22-солаи сокини ҷамоати деҳоти Ҳалевард, аз сабаби муноқишаи ба миён омада, лату кӯб намуда, бо корд 11-маротиба ба баданаш задааст", - омадааст дар иттилоия.
Манбаъ афзуд, аз рӯи ҳодисаи мазкур тафтишот идома дорад. Қаблан ВУД Тоҷикистон таъкид карда буд, ки бисёри ҷиноятҳои куштор дар заминаи муноқишаҳои оилавӣ рух додаанд.
