ДУШАНБЕ, 20 авг — Sputnik. Эмомалӣ Раҳмон дар доираи сафари корияш ба Вилояти Мухтори Кӯҳистони Бадахшон пас аз Дарвоз ба ноҳияи Ванҷ ташриф овардааст, хабар медиҳад, котиботи раисиҷумҳур.
Президент зимни сафар ба ин ноҳия, дар намоишгоҳи маҳсулоти кишоварзӣ ширкат кард, ки дар он деҳқонони маҳаллӣ ҳосили ин мавсимро ба ӯ нишон доданд.
Қайд карда шуд, ки масоҳати умумии заминҳои корами ноҳияи Ванҷ 2 ҳазору 601 гектарро ташкил намуда, аз он масоҳати боғу себзор 1013, ғалладона 520, картошка 472, сабзавот 188 гектар ва боқимонда майдонҳои чарогоҳ ва алафзорро дар бар мегиранд.
Ғайр аз он, дар намоишгоҳ ҳунармандони маҳаллӣ маҳсули дастони худро намоиш доданд, ки ҳадафи он ҷалби сайёҳон ба минтақа мебошад.
Зимни боздид Эмомалӣ Раҳмон дар маросими ифтитоҳи маркази сеошёнаи савдои “Ванҷ Сити”, ки на танҳо мағозаҳо, балки меҳмонхонаи хурд хоҳад дошт, ширкат варзид.
Суҳбати Раҳмон дар соҳили дарёи Панҷ бо мардуми Афғонистон: мушкилиҳо ҳал мешаванд - акс
Сарвари давлат инчунин аз бинои боҳашамати Раёсати Вазорати корҳои дохилии вилоятро, ки барои кормандони мақомоти ҳифзи ҳуқуқ пешбинӣ шудааст, дидан кард.
