То охири сол дар Тоҷикистон 6 корхонаи бузург ба кор медарояд

ДУШАНБЕ, 16 апр — Sputnik. Дар Тоҷикистон то охири соли равон бо харҷи 1 млрд. 560 млн. доллари ИМА воситаҳои буҷетӣ ва сармоягузорӣ 6 корхонаи саноатии бузург мавриди истифода қарор мегиранд.

Аснои суханронӣ дар палатаи поёнии парлумони кившвар раиси Кумитаи давлатии сармоягузорӣ ва идораи авмоли давлатии ҷумҳурӣ Қодири Қосим гуфт, ки дар корхонаҳои нави саноатӣ ҳудуди 20 ҳазор нафар шаҳрвандони Тоҷикистон бо ҷойҳои кори доимӣ таъмин карда мешаванд.

Зимнан зикр гардид, ки воситаҳои тариқи сармоягузориҳо ҷалбшуда бахшҳои гуногуни иқтисоду хоҷагидорӣ, аз ҷумла истихроҷи канданиҳои фоиданок, коркарди сабзавоту мева, соҳаи сохтмон ва ҳамчунин маорифро дар бар мегиранд.

Раиси Маҷлиси намояндагон Шукурҷон Зуҳуров аз раиси Кумита даъват кард, ки дар ҳоли ҳозир аз ироаи номи корхонаҳо худдорӣ шавад, зеро ба наздикӣ аз рӯи ин масъала музокироти парлумонӣ баргузор мешавад.

Бино ба қавли Қодири Қосим, соли гузашта ба иқтисоди кишвар беш аз 977,8 млн. доллари ИМА (нисбат ба соли 2014 — 93,5 млн. доллари ИМА ё худ 24,8% зиёдтар) сармоягузориҳо ҷалб шудаанд, ки 470 млн. доллари онро сармоягузориҳои мустақим ва боқимондаро воситаҳои аз ҷониби корхонаву идораҳои давлатӣ ҷалбшуда барои амалисозии тарҳҳо дар бар мегирад.