Прокурори Суғд: 35 кас барои ширкат дар ҷангҳои Сурия гумонбаранд

© Flickr \ Freedom HouseМили мусалсал (автомат)
Мили мусалсал (автомат) - Sputnik Тоҷикистон
Обуна шудан
Додситонии вилояти Суғд дар соли гузашта алайҳи 35 сокини минтақаи шимолии кишвар, ки дар ҷанги Сурия иштирок доранд ё қасди ширкат доштаанд, парванда боз кардааст. 17 тани онҳо боздошт шуда, боқимонда мавриди пайгард қарор доранд.

ДУШАНБЕ, 6 янв — Sputnik. Додситони вилояти Суғд Шариф Қурбонзода дар нишасти хабарии ин ниҳод рӯзи 5-уми январ гуфт, 35 кас аз вилоят барои ширкат дар ҷангҳои Сурия гумонбаранд, иттилоъ дод радиои Озодӣ.

Ба қавли ӯ, 17 нафари эшон боздошт гардида, боқимонда дар ҷустуҷӯи мақомот мебошанд.

"Дар соли 2014 ҳабдаҳ парванда мутобиқи банди 401, нишонаи 1-и Кодекси ҷиноии Тоҷикистон — "ҷалб ва иштироки ғайриқонунии сокинон дар муноқишаҳои мусаллаҳона дар давлатҳои хориҷӣ" нисбат ба 35 нафар боз кардем ва мавриди тафтиш қарор додем. Аз байни инҳо 18 нафар таҳти ҷустуҷӯи ҷиноӣ қарор доранд ва ин айбдоршавандагон, тибқи маълумотҳое, ки дар даст дорем, асосан дар муноқишаҳои мусаллаҳона дар Сурия иштирок доранд",- гуфт Қурбонзода.

Ба иттилои ӯ, додситонӣ дар бораи кушта шудани чанд нафари ин афрод дар ҷанги Сурия низ маълумотҳое дар даст дорад, вале аз он, ки "ҷасади онҳоро надидаанду санади ҳақиқии фавти онҳо" дастрас нест, парванда алайҳи онҳо қатъ карда нашудааст. Ҷаноби Қурбонзода афзуд, ҳамчунин ба сабаби он, ки сокинони Суғд аз роҳи кишварҳои дуюму сеюм ё чорум ба Сурия сафар кардаанд, як омори дақиқе дар бораи шумораи ҷангиёни дар ҷанги ин кишвар аз ҳисоби сокинони Суғд мавҷуд нест.

Ҷанг дар Сурия. Акс аз бойгонӣ - Sputnik Тоҷикистон
КДАМ: 300 шаҳрванди Тоҷикистон дар Сурия меҷанганд

"Аслан ба Сурия, Афғонистон ё Покистон рафтан ин худ ҷиноят нест. Мо дастур додаем, ки нисбат ба ҳар каси ба ин кишварҳо сафаркарда, парванда боз кардан мумкин нест. Дар ҳамон ҳолат парванда боз кардан метавон, ки агар далел ва маълумотҳои кофӣ дар бораи иштироки ғайриқонунии он нафар дар дастаҳои мусаллаҳона дар кишвари хориҷӣ ҷой дошта бошад. Масалан, мо акси як сокини вилояти Суғдро дарёфт кардем, ки дар даст аслиҳа дорад, рафиқонаш дар нишондод гуфтанд, ки вай бо он аслиҳаи худ дар ҷанги Сурия иштирок мекард. Мо нисбат ба ин шахс парванда боз намудем ва ӯро таҳти ҷустуҷӯи байнулмилалӣ қарор додем",- гуфт прокурори вилояти Суғд.

Дар моҳи декабри соли гузашта додгоҳи шаҳри Хуҷанд 11 сокини вилояти Суғдро, ки ба гуфтаи додгоҳ, "нияти анҷоми амалҳои террористӣ дар Тоҷикистон" ва "иштирок дар ҷанги Сурияро доштаанд", барои аз 9 то 19 сол равонаи зиндон кард.Дар пайи боздошти ин 11 сокини Суғд дар моҳи сентябри соли 2014, то кунун дар чаҳорчӯби тафтиши парвандаи ин афрод боз 45 нафари дигар сокини Суғд бо иттиҳоми ҳамдастӣ бо созмон ва ҳаракатҳои террористӣ, ба шумули ҲИУ ва "Ансоруллоҳ" ва қасди иштирок дар ҷанги Сурия дастгир карда шудаанд.

Лентаи хабарҳо
0