Похороны в Таджикистане, архивное фото

Даргузашти генерал Азимов, собиқ фармондеҳи марзбонӣ ва ноиби сарвазир

8999
(Таҷдидшуда 18:00 17.05.2020)
Генерал Абдураҳмон Азимов, фармондеҳи собиқи нирӯҳои сарҳадии Тоҷикистон, шаби ҷумъа дар синни ҳафтодсолагӣ вафот кардааст

ДУШАНБЕ, 17 май — Sputnik. Яке аз наздикони марҳум дар суҳбат бо Sputnik Тоҷикистон гуфт, генерал на аз коронавирус, балки аз бемории дил даргузашт.

Ба иттилои манбаъ, номбурда шаби ҷумъаи гузашта фавтида, ҷасади ӯро дар зодгоҳаш шаҳри Кӯлоб ба хок супоридаанд.

Абдураҳмон Азимов, 10 январи соли 1950 дар шаҳри Кӯлоб ба дунё омада, арбоби давлатӣ ва низомӣ, генерал-лейтенанти қувваҳои сарҳадӣ буд.

Ӯ ба соҳаи низомӣ пас аз солҳои ҳаштодум ворид гашта, нахуст дар ин самт ҳамчун корманди Комитети бехатарии давлатии Тоҷикистон кор карда, баъдан ёвари сардори идораи Комитети амнияти миллии (КАМ) Ҷумҳурии Тоҷикистон, сардори идораи КАМ Ҷумҳурии Тоҷикистон дар вилояти Хатлон (1993 – 1996), Котиби Шӯрои амнияти Ҷумҳурии Тоҷикистон ва муовини Сарвазири Ҷумҳурии Тоҷикистон (1996 – 1999) буд.

Ҳамчунин ӯ вакили Маҷлиси Намояндагон низ буда, раҳбарии комитети Маҷлиси намояндагони Маҷлиси Олии Ҷумҳурии Тоҷикистон оид ба тартиботи ҳуқуқӣ, мудофиа ва амният, Комитети ҳифзи сарҳади давлатии назди Ҳукумати Ҷумҳурии Тоҷикистонро ба зима дошт.

Ахиран вазифаи сардори Омӯзишгоҳи олии сарҳадии Сарраёсати нирӯҳои марзбониро ба зима дошта, моҳи сентябри соли 2015 бо як фармон аз суи президенти кишвар ба нафақа гусел карда шуд ва тули бознишастагияш дар зодгоҳаш шаҳри Кӯлоб иқомат дошт.

Ин дуввумин генерали бознишастаи тоҷик аст, ки давоми чанд рӯзи ахир мефавтад.

Рӯзи 14 май низ генерал – майор Абдулназар Абдуласанов, собиқ муовини вазири дифоъи Тоҷикистон, фармондеҳи нерӯҳои хушкигарди кишвар ва комменданти низомии Душанбе дар синии 76 – солагӣ тарки олам кард

 

8999
Ветерану ВОВ Мирзошарифу Гафурову исполнилось 100 лет

Даргузашти Мирзошариф Ғафуров дар 101-солагӣ

125
Мирзошариф Ғафуров, куҳансарбози Ҷанги Бузурги Ватанӣ, сокини 101- солаи деҳаи Рӯмони ноҳияи Бобоҷон Ғафуров имрӯз дар манзили зисташ аз олам даргузашт

ДУШАНБЕ, 14 авг – Sputnik. Мирзошариф Ғафуров то лаҳзаи даргузашташ шикояти ҷиддие аз саломатӣ надошт, гуфт Мирзотоҳир Ғафуров, писари марҳум дар суҳбат бо Sputnik Тоҷикистон.

 “Ягон шикояти ҷиддӣ аз вазъи саломаташон надоштанд, бо амри тақдир субҳи имрӯз дар синни 101-солагӣ ҷон ба Ҷонофарин супурданд”, - гуфт Ғафуров.

Маросими ҷанозаи марҳум имрӯз дар қабристони ба номи Балодуркуни ҷамоати деҳоти Ҳайдар Усмонови ноҳияи Бобоҷон Ғафуров доир шудааст.

Мирзошариф Ғафуров 7-уми январи соли 1919 дар деҳаи Рӯмони ноҳияи Бобоҷон Ғафуров таваллуд шудааст. Дар моҳи майи соли 1940, замоне, ки ӯ ҳанӯз 18-сола буд ва дар курси дуюми факултаи физикаю математикаи омӯзишгоҳи педагогии шаҳри Хуҷанд ба номи С.М. Киров (ҳоло ДДХ ба номи ак. Б. Ғафуров) таҳсил мекард,  ба хизмати аскарӣ даъват шуд ва бо ҳамин хизмати ӯ дар сафи аскарӣ 9 сол давом кард.

Ӯ аз оғози ҶБВ  борҳо дар миёни дуду оташи ҷанг қарор гирифт ва бо инояти Худованд саломат ва бо сари баланди пирӯзӣ бар фашизм ба хона баргашт.

“Барои хизмати сарбозӣ маро ба шаҳри Кушкаи Туркманистон фиристоданд. Он вақт ҳама ҷо тинҷу амон ва арзонию фаровонӣ буд. Ҳеҷ кас намедонист, ки ин ҳама осудаҳолӣ баъд аз як сол ба як вазъи беамону нобасомон табдил меёбад ва чи гуна осмони софро дуду оташи ҷанг ғуборолуд мекунад”, - нақл карда буд Ғаффуров қаблан дар суҳбат бо Sputnik Тоҷикистон.

Мирзошариф Ғафуров барои шуҷоатмандӣ дар замони ҶБВ бо даҳҳо медалу мукофот қадршиносӣ гардидааст.

Соли ҷорӣ дар арафаи 75 – солагии Иди Ғалаба? Ғафуров дар қатори дигар иштирокчиёну собиқадорони ҷанг бо медали “75 -солагии Ғалаба дар ҶБВ,  1941-1945 сол”-и Федератсияи Русия сарфароз сарфароз гардонида шуд.

125
Барчаспҳо:
Ҷанги Бузурги Ватанӣ, аз дунё даргузашт, ҷанг, Тоҷикистон
Похороны в Таджикистане, архивное фото

Маросими видоъ бо устод Гулназар Келдӣ - навори муфассал

331
Шоири маъруфи Тоҷикистон, муаллифи Суриди миллӣ Гулназар Келдӣ рӯзи 13 - уми август дунёи фониро падруд гуфт

ДУШАНБЕ, 14 авг — Sputnik. Ҷанозаи шоири шаҳир ва маҳбуби Тоҷикистон бегоҳи ҳамон рӯз баргузор шуд ва Келдӣ дар оромгоҳи Лучоб манзили охираташро дарёб кард.

Навори маросими видоъ бо шоири зиндаёд Гулназар Келдиро сомонаи "Фараж" дар сафҳаи худ нашр намудааст.

Аз навор бармеояд, ки дар маросими хайрибод бо шоири маҳбуб даҳҳо нафар ходимону олимон,намояндагони ҳукумат, пайвандон ва ҳаводорони ӯ ҳузур доштанд.

Аксари иштирокчиёни маросими видоъ, ниқоби муҳофизатӣ доштанд ва ҳамзамон фосилаи иҷтимоӣ низ аснои дуо хондан ва вориди хок намудани шоир риоя мешуд.

Ёдовар мешавем, ҳамагӣ чанд рӯз пеш Гулназар Келдӣ бо нишони маризии коронавирус бистарии беморхона гардида шуд ва ахиран рӯзи 13 - уми август ҷон ба Ҷонофарин супорид.

Низом Қосим гуфт, ки Гулназар Келдӣ дар куҷо ба хок супурда хоҳад шуд

Марҳум чанд рӯз қабл дар сӯҳбат бо  Sputnik Тоҷикистон ба мардум насиҳат карда буд, ки "худатонро эҳтиёт кунед".

Он сӯҳбати шоир ба 11 август,  баъд аз хабари ба бемористон интиқол ёфтани шоир анҷом дода шуд. Гулназар Келдӣ, аз ҳамватанонаш хоҳиш карда буд, ки аз бемории ӯ  ташвиш накашанд.

"Каме хастагиро эҳсос мекунам. Дар умум, вазъи сиҳатиам хуб аст. Ҳоло табобати профилактикӣ мегирам. Аз дӯстон хоҳиш мекунам, ки ташвиш накашанд, аммо худро сахт эҳтиёт кунанд”, - гуфта буд шоири халқии Тоҷикистон.
331
Барчаспҳо:
навор, маросими видоъ, Гулназар Келдӣ
Школьники в масках

Ноиби сарвазири Тоҷикистон гуфт, чӣ бояд кард, то талабаҳо мубталои COVID-19 нашаванд

0
(Таҷдидшуда 20:59 14.08.2020)
Гуруҳи корӣ таҳти раёсати Ширин Исматуллозода, ноиби сарвазири Тоҷикистон, ҳангоми санҷиш дар шаҳри Роғун ва навоҳии Рашт камбудиҳои зиёд дар бахши мубориза бо COVID-19 ошкор кардаст

ДУШАНБЕ, 14 авг — Sputnik. Гуруҳи корӣ таҳти раёсати Ширин Исматуллозода аз шаҳри Роғун ва ноҳияҳои Сангвор, Нуробод, Рашт, Тоҷикобод ва Лахш боздида карда, вазъи соҳаи тандурустӣ ва омодабошии муассисаҳои таълимӣ ба соли нави хонишро санҷидаанд, хабар дод “Ховар”.

“Зимни боздид маълум гардид, ки аҳолӣ, соҳаи маориф ва табибон нисбат ба бемории сироятии COVID-19 ва гирифторшавӣ ба он фориғболӣ нишон медиҳанд.”, - омадааст дар иттилоия.

Манбаъ афзуд, дар кӯчаву бозорҳо сокинон бениқоб гашту гузор мекунанд, дар  муассисаҳои таълимӣ  захираи маводи антисептикӣ, ниқоб, варақаҳои тарғиботиву ташвиқотӣ барои пешгирии беморӣ кам ба назар мерасанд.

Муовини сарвазири Тоҷикистон таъкид кардааст, ки “агар ҳар як омӯзгор бо табибон ва волидон ҳамкорӣ кунанд, боварӣ дорам, ки мактаббачагон ҳеҷ гоҳ интиқолдиҳандаи беморӣ намегарданд”.

Исматуллозода дастур дод, ки омӯзгорону муҳассилин бе ниқоб ба дарс надароянд ва дар даромадгоҳи мактабҳо ҳатман маводи антисептикӣ ва ҳароратсанҷ гузошта шавад.

Инчунин дастур дода шудаст, ки аз ҳисоби кормандони миёнаи тиб дар мактабҳо навбатдориҳо ташкил карда шаваду ҳар як омӯзгор 2-3 дақиқаи дарсро ба фаҳмондадиҳӣ барои риояи қоидаҳои беҳдоштӣ ҷудо кунад.

0
Барчаспҳо:
пешгирӣ, беморӣ, талабагон, Тоҷикистон