Саидмукаррам Абдулкодирзода

Посухи раиси шуро ба Вазорати маориф: аз ҷузъиёти ислом бехабаранд, ман посухе надорам!

883
(Таҷдидшуда 20:43 01.09.2017)
Вазорати маорифу илми Тоҷикистон 25-уми август қарор кард, ки соли хониши 2017 - 2018 аз 1 сентябр оғоз шавад, ҳарчанд он рӯз дар Тоҷикистон иди Қурбон ҷашн гирифта мешавад

Чанде пеш Шурои уламои Маркази исломии Тоҷикистон эълон карда буд, ки иди Қурбон имсол 1-уми сентябр фаро мерасад. Бино бар Қонуни таътилоти расмии Тоҷикистон, иди Қурбон дар ҳар рӯзе, ки фаро расад, рӯзи расмии таътил эълон мешавад. Вале ба гумони бархе аз коршиносон, Вазорати маорифу илм ин қонунро нодида гирифта, донишомӯзону донишҷӯён, омӯзгорону устодонро аз рӯзи таътилу ид маҳрум кардааст.

Ин қарори Вазорати маорифу илм дар ҷомеа вокуниши густардаеро дар пай овард ва аксар бар онанд, ки ин ниҳод ҳуқуқи конститутсионии шаҳрвандони Тоҷикистонро нақз кардааст.

Ахиран Вазорати маорифу илм ба яке аз ин вокунишгарон — дуктур Ҷовид Муқим, устоди Донишгоҳи миллии Тоҷикистон, посух гуфт ва "исбот" кард, ки фаротар аз чорчӯби қонун нарафта ва эълом шудани 1-уми сентябр чун оғози соли нави хониш дар ин маврид бо қонун созгор аст. Ин ниҳод аз омӯзаҳои исломӣ низ далел оварда то собит кунад, ки ҳаққ ба ҷонибаш аст. Аз ҷумла дар посухи вазорат гуфта шудааст:

"… Шурои уламо бар асари мақоми ваколатдор буданаш метавонист санаи таҷлили Иди Қурбонро ба таври дигар муайян кунад. "Профессор"-и муҳтарам, ҳам акнун бигӯед, ки мақоми кадоме болотар аст: қонун "Дар бораи рӯзҳои ид" ва ё тасмими Шурои уламо"?.

Вазорат ҳамчунин афзудааст:

"Иловатан ба тафсирҳои ҳуқуқӣ, ки дар боло зикр кардем, мехостем аз нигоҳи дини мубини ислом низ ба "профессор"-и муҳтарам як нуқтаро хотирасон намоем. Чунонки ҳамагон медонанд, калимаи нахустини раббонӣ ё ин, ки ваҳйи илоҳӣ, ки ба пайёмбари ислом нозил гардид, "Иқраъ!" буд. Яъне, "Бихон!", на "Ид кун!", "Ибодат кун!", "Ҳаҷ кун!" ва ё амсоли он. Ба ибораи дигар, бо ишораи "Бихон!" бандагонашро ба илм омӯхтан даъват кардааст. Пас, Вазорати маориф ва илм магар хато кардааст, ки ҳазорон насли наврасро, хусусан онҳоеро, ки бори аввал қадам ба мактаб мениҳанд, ба хондан, дониш андӯхтан, таълим гирифтан даъват кардааст? Аз ин рӯ, муҳтарам "профессор", тасмими Вазорати маориф ва илм, ки хонандагону донишҷӯёнро дар рӯзи ид ба хондан сафарбар кардааст, ба руҳияи илмпарваронаи дини ислом низ мутобиқати комил дорад".

Дар пайи ин посухҳои вазорат ва вокунишҳои зиёди мардум Sputnik Тоҷикистон ба раиси Шурои уламои Тоҷикистон Саидмукаррам Абдулқодирзода муроҷиат кард ва аз ҷаноби домулло пурсид, ки оё Шурои уламо метавонист, бо истифода аз ваколатҳояш, чӣ тавре ки вазорат мегӯяд, иди Қурбонро ба дигар рӯз вогузор кунад ва оё дар ҳақиқат сураи "Иқраъ" ва рӯзи иди Қурбону оғози соли хониш аз нигоҳи Ислом рабте бо ҳамдигар дорад ё не?

— Домуллои муҳтарам, дар Тоҷикистон, ки имсол иди Қурбон ва Рӯзи хониш ҳамзамон шудаанд, баҳсҳои зиёде ба миён омадаст. Вазорати маориф дар посух ба вокуниши Ҷовид Муқим, гуфтааст, ки Шурои уламо метавонсит бо истифода аз ваколаташ иди Қурбонро ба дигар рӯз вогузор кунад. Оё Шурои уламо ба ин гуфтаҳои вазоарт посухе дорад?

— Ба номи Худованди бениҳоят меҳрубон ва бениҳоят бахшанда. Масъалаи ид ба аъзои Шурои уламо,  ба Шурои уламо ва  ба раиси Шурои уламо  вобастагӣ надорад. Ин вобаста ба ҳамон моҳ аст, ки кай пур мешавад ва кай шуруъ мешавад. Вақте ки моҳи нав шуруъ мешавад — ҳисоби қамарӣ ва ибодатҳо дар ислом, хусусан рӯза ва иди Қурбон вобаста ба ҳамин моҳ аст, ки аз рӯзи шуруъи моҳ ин рӯзҳо муайян мешавад ва ба касе ҳам вобаста нестанд.

Масъалаи дигар ин ки дар Тоҷикистон ҳеч маҳдудияте нест ва намедонам кӣ гуфта ки Шуро бояд рӯзи иди Қурбонро тағйир диҳад. Якуми сентябр бо рӯзи даҳуми зулҳиҷҷа баробар аст, ки иди Қурбон аст. Дар баробари ин донишомӯзон мераванд дарсҳои худро шуруъ мекунанд, пас аз мактаб меоянд ва рӯзи шанбе ба онҳо истироҳат дода шудааст, ба пурраггӣ иди худро мегузаронанд. Лекин ид аслан, аз назари нуқтаи дини Ислом, хондани намоз аст, ки дар саросари Тоҷикистон соати 06:30 намози ид хонда мешавад ва қурбонӣ кардан аст, ки дар саросари Тоҷикистоон бе ҳеч мамнуъият анҷом меёбад. Ҳоло идгардаки кӯдакон ё ки вобаста ба кӯдакон ё кормандои маориф, рузи 1-уми сентябр, ки Рузи дониш аст, пас аз қарори Вазорати маорифи Тоҷикистон бигзор ба мактаб раванд ва рӯзи шанбе ид кунанд, ба зиёрати ҳамдигар раванд ва ба сари оромгоҳҳо раванд. Ҳеч тағийрот, ё ин ки гуноҳ ё ин ки ягон чизе масъалаи муҳиме нест. Хулоса, бо Рӯзи дониш эълон шудани 1-уми сентябр, ки ҳамзамон Иди Қурбон аст, ягон мушкилие пеш намеояд.

- Вазорат дар ҳамин вокуниш нуктаи дигареро ҳам ёдоварӣ кардааст, ки аввалин сураи Қуръон "Иқраъ" аст ва гуфта, ки "маънои он хондан аст, на Ид кун!", "Ибодат кун!", "Ҳаҷ кун!". Шумо гуфтаашонро чигуна арзёбӣ мекунед?

Хоҳари азиз, ҳар касе ки аз хаёли худ ҳар чизе мегӯяд, ман масъул нестам, ки ба фикри кадом як инсони ғайримутахассис ҷавоб гӯям. Касе гуфтааст, ғайримутахассис аст ва аз ҷузъиёт ва куллиёти дин ва улуми динӣ ва маърифати исломӣ ба пуррагӣ огоҳ нест ва ман масъул нестам, ки ҷавоби онро диҳам. Бояд ба он кас муроҷиат кард, ки дар кадом асос ин суханҳоро таъкид кардаанд…

— Бисёр сипосгузорем аз посухҳоятон, домуллои гиромӣ. Иди Қурбон муборакатон бод!

— Саломат бошед, муваффақ бошед!

883
Барчаспҳо:
Иди қурбон, Саидмукаррам Абдулқодирзода, Тоҷикистон
Тахмина Бахронова

Баҳронова: ба сабаби вируси корона дар шаҳри Душанбе дархост ба такси 60 дарсад коҳиш ёфт

591
(Таҷдидшуда 14:17 26.05.2020)
Таҳмина Баҳронова, роҳбари ширкати Atlas Taxi гуфт, чӣ тавр вируси корона ба кори таксиҳои шаҳри Душанбе хисорот ворид кардааст

Ба гуфтаи Баҳронова пас аз 20 март ба далели баста шудани роҳҳо, шумори дархостҳо ба такси коҳиш ёфтааст. Ниёз ба такси пас аз эълони Ситоди ҷумҳуриявӣ дар бораи вуҷуди коронавирус дар Тоҷикистон якбора ба маротиб коҳиш ёфт.   

“Аксари ширкатҳо комилан ба фаъолияти фосилавӣ гузаштанд. Кори макотибу донишгоҳҳо дар шаҳри Душанбе низ қатъ шуд. Ин ҳама ба кори таксиҳо таъсир гузошт. Дархостҳо тақрибан 60 дарсад коҳиш ёфт. Ин раванд миёни тамоми ширкатҳои пойтахт мушоҳида мешавад. Ронандаҳое, ки аз бонкҳо қарздор буданд, зарари ҷиддӣ диданд. Аксари онҳо мошинҳои харидаи худро ба фурӯш гузоштанд, то аз ин вазъи мушкил роҳи наҷот пайдо кунанд”, - гуфт роҳбари ширкати Atlas Taxi Таҳмина Баҳронова ба Sputnik Тоҷикистон.

 

Бахронова: из-за коронавируса заказы такси упали на 60% по всему Душанбе

Вай таъкид дошт, ки дар шароити пандемия таксиҳо ба расонидани маводи ғизоӣ даст заданд, ки қаблан ин хизматрасонии иловагӣ ба шумор мерафт ва пардохти ҳаққи хизмати он алоҳида ҳисоб мешуд.

“Ҳоло ба ҳама чизе лозим аст ва сокинон ба якдигар ҳар лавозимоте мефиристанд. Аз доруворӣ то либоса интиқол медиҳем. Ҳоло мо танҳо пули хатсайро ҳисобу китоб мекунем”, -  илова кард Баҳронова.

Роҳбари Atlas Taxi зикр кард, ки ширкат ронандаҳои худро бо ниқоб ва маводҳои антисептикӣ пурра таъмин менамояд. Ҳамчунин ширкат таксиҳои худро ҳамарӯза дезинфексия ё безарар мекунад.    

Баҳронова қайд кардааст, ки пандемия дар Тоҷикистон чанд моҳи дигар тӯл мекашад ва ба ҳамин хотир ширкат бо маркетологҳо барои ҷори намудани хизматрасониҳои нав гуфтушунид дорад.

591
Барчаспҳо:
дархост, такси, роҳбар, ширкат, хисорот, Душанбе, вирус
Посол Таджикистана в Москве Имомуддин Сатторов

Сатторов гуфт чӣ тавр дар Русия ба шаҳрвандони Тоҷикистон кумак мерасонанд

778
(Таҷдидшуда 13:10 24.05.2020)
Сафири Тоҷикистон дар Русия дар суҳбат бо Sputnik Тоҷикистон тавзеҳ дод, ки чигуна ба шаҳрвандони ҷумҳурӣ, ки дар Русия кору зиндагӣ мекунанд кумак расонида мешавад

Ба гуфтаи Имомуддин Сатторов, сафири Тоҷикистон дар Русия таъкид кард, ки сафорат тариқи аъзои шурои ҷамъиятӣ дар бораи ниёзмандон ба кумак иттилоъ гирифта, ба онҳо ёрӣ мерасонад.  

Сатторов илова кард, ки мубодилаи маълумот бо беш аз 90 созмони ҷамъиятиву диаспора ба роҳ монда шудааст.

“Сухан дар бораи ҳазорҳо нафар меравад, ки ба онҳо дар Маскав ва дигар минтақаҳои Русия кумак росонида шудааст. Соҳибкороне ҳастанд, ки аз ифшои номашон худдорӣ мекунанд. Кумаки онҳо ба даҳҳо ҳазор нафар дастрас шудааст”, - гуфт сафир.

 

Сатторов рассказал, как помогают гражданам Таджикистана в России

 

Инчунин Сатторов қайд кард, ки дар Русия ва Тоҷикистон ташкилотҳое ҳастанд, ки барои расонидани кумак аз сафорат рӯйхати шахсони ниёзмандро талаб мекунанд. Онҳо худашон ба ниёзмандон кумаки молӣ мерасонанд.

“Бо ёрии сафорат Тоҷикистон дар Русия давоми ду моҳ, маводи ғизоиро тақсим кардем. Сухан дар бораи беш аз се ҳазор нафар меравад, ки бевосита тариқи сафорат ба ин кумакҳо дастрасӣ пайдо карданд”, - гуфт сафир.

Дар ҳамин ҳол, Сатторов зикр кард, сафорат ҳеҷ гоҳ ва дар ягон ҷой кори хайрашро эълон намекунад, дар ҳоле, ки ин кор ҳамарӯза идома дорад. 

778
Барчаспҳо:
зиндагӣ, шаҳрвандон, кумак, Русия, сафири Тоҷикистон
Мавзуҳо:
Пайомадҳои COVID-19 дар Тоҷикистон ва ҷаҳон
Похороны в Таджикистане, архивное фото

Тӯраҷонзода дар бораи фавтидагон ва маризони “вируси корона”

0
(Таҷдидшуда 01:46 27.05.2020)
Ҳоҷӣ Маҳмудҷон Тӯраҷонзода, руҳонии саршиноси тоҷик, мегӯяд, ҳадисҳои саҳеҳ аз Паёмбари ислом (с) мавҷуданд, ки фавтидагони замони эпидемияро шаҳид хондааст

ДУШАНБЕ, 27 май — Sputnik. Ҳоҷӣ Маҳмудҷон Тӯраҷонзода гуфт, дини ислом дар боби қурбониён, гирифторон ва қонуни қавоиди беҳдоштии замони густариши маризиҳои вогир ё эпидемия ҳанӯз 1400 сол пеш бар асоси ҳадисҳои Паёмбар Муҳаммад (с) ҳукмҳои худро ҷорӣ кардааст.

Тураҷонзода дар суҳбат бо Sputnik Тоҷикистон изҳор дошт, ки “вируси корона” ҳам ба қатори вабову тоун маризии фарогир ё вогир буда, дар замонаҳои Паёмбар (с) шуюъ мекарданд.

Вай дар боби фавтидагон ду ҳадисеро мисол овард, ки саҳеҳ буда, аз сӯи Имом Бухориву Имом Муслим ривоят шудаанд: яке, “Шаҳодату уммати фи тоун” – “Шаҳодати уммати ман дар тоун аст” ва дигарӣ, “Дуъия ал-матъуну шаҳидан” - “Касе ки ба маризии тоун мемирад, ӯ дараҷаи шаҳодат мебарад”.

Азоби Худост ё раҳмат? шарҳи Тӯраҷонзода

“Паёмбар (с) мегуфтанд, ин як навъ азоби Худост, барои ҳар уммате, ки Худо хоҳад, мефиристад, аммо барои бандагони муъмин раҳмат аст. Манзур ин буд, ки худро қарантина карда, амали савоб анҷом диҳед, агар Худованд ба мо тақдир карда бошад, ба ҳамин беморӣ ҳалок мешавем, аммо агар тақдир накарда бошад, қазояш нарафта бошад, сад “вируси корона” – ву тоуну ҳар вабои дигар бошад, дар комаш ҳам ки бошем, ҳалок намешавем. Бояд ба ҳамин чӣ эътиқод дошта бошем. Ҳамин эътиқодро дошта бошеду мариз шаведу намиреду зинда ҳам монед, шумо савобу аҷри шаҳидро мегиред. Дар сурати фавтидан аз ин беморӣ, он гоҳ бандаи Худо шаҳид мешавад, фармудаанд Паёмбари ислом (с)”, - гуфт Ҳоҷӣ Маҳмудҷон Тӯраҷонзода.

Дар боби қарантина руҳонии саршиноси тоҷик мегӯяд, дар асри Паёмбари Ислом (с) дар Мадинаи мунаввара вабо ё табларза, ки ҳуммо мегуфтанд, иттифоқ афтода буд ва аз он айём ин ҳадис аз эшон дар “Саҳеҳайн” – и Имом Бухорӣ ва Имом Муслим нақл шудааст:

“Чун аз маризии вабо дар як сарзамин хабар ёфтед, агар дохил бошед, хориҷ ва агар хориҷ бошед, дохил нашавед”.

Ҳоҷӣ Маҳмудҷон Тӯраҷонзода дар такя ба манобеъи таърихӣ ин қиссаро меорад, ки як маризии вогир ё эпидемияи тоун низ дар замони хилофати Умар ибни Хаттоб (634 — 644) дар Шом (Сурияи имрӯз) иттифоқ афтода, мӯҷиби фавти 17 ҳазор нафар, ба шумули саҳобагони Паёмбар (с) шудааст.

Шумо аз қазои Худо мегурезед? Суол аз Умар, ки вориди минтақаи эпидемия нашуд

Бино ба ин манобеъ, он замон нерӯҳои хилофат барои забти Сурия, ки таҳти султаи Императории Византия буд, меҷангиданд ва халифа Умар соли 635 барои ошноӣ бо ҷабҳаи ҷанг аз Мадина озими Шом мешавад, аммо дар марз ба ӯ маслиҳат медиҳанд, ки аз роҳаш баргардад.

“Амирони лашкар ба истиқболи он кас баромаданд ва дар марзи Шом ба он кас хабар доданд, ки дар ин мулк тоун омадаву ҷони хеле аз мардумро рабудааст. Ҳазрат саҳобаҳоро ҷамъ карда, ба маслиҳат нишастанд, ки ворид шаванд, ё на. Ихтилофи назар шуд, чун ҳадиси Паёмбар (с)-ро бархе саҳобаҳо нашунида будаанд. Мегуфтанд, ки чун аз ҳамин қадар роҳ омадед, вориди Шом нашавед, кори хубе намешавад. Бархе гуфтанд, на, ҳаёти Шумо барои ҳифзи хилофат муҳим аст, агар гирифтор ва шаҳид шавед, хилофат нуқсон мебинад. Ба як хулоса намерасанд. Фардои он рӯз яке аз саҳобаҳо Абдураҳмон ибни Авф, ки дар он машварат набуд, ҳозир шуд ва гуфт, ки шахсан аз Расули Акрам (с) ин ҳадисро шунидааст. Ҳазрат гуфтанд, чун Паёмбар (с) гуфта бошанд, мо ҳам аз роҳ гаштем. Яке аз саҳобаҳо гуфт, ё амиралмуъминин, Шумо аз қазои Худо мегурезед? Ҳазрат гуфтанд, ки бале, мо аз қазои Худо ба сӯи қазои Худо мегурезем. Он тараф ҳам қазои Худост. Ҳар чӣ муқаддар карда бошад, ҳамон ба сарамон меояд”, - қисса мекунад руҳонии тоҷик.

Тӯраҷонзода дар бораи қарантина ва фосилаи иҷтимоӣ

Ҳоҷӣ Маҳмудҷон Тӯраҷонзода мегӯяд, азбаски эпидемия ё маризиҳои вогир дар таърихи башар зиёд иттифоқ меуфтоданд ва рушди илми тиб ба дараҷае, ки дар замони муосир аст, набуд, воқеиятҳо собит месозанд, ки асли ҳама гуна тадобири беҳдоштӣ дар он замонҳо вуҷуд дошт.

“Қарантинае, ки ҳоло дар дунё ҳаст, 1400 сол пеш олами ислом ҷорӣ карда буд. Агар мардум аз кишваре, ки “вируси корона” сар зада буд, хориҷ ва ё он ҷо дохил намешуданд, ҳоло мо шоҳиди чунин фоҷиаҳо набудем. Паёмбари ислом (с) як ҳадиси дигар ҳам доранд: “Фирр мин ал-ҷузом, фирорака мин ал – асад” – “Аз касе, ки бемории ҷузом (бодхӯра, ки гӯшти баданро мехӯрад) дорад, мисле ки аз шер бошад, гурезед!” Ин ҳам далели фосилаи иҷтимоӣ! Ҳоло он чӣ дар бораи фосилаи иҷтимоиву қарантинаи хонагӣ аст ё кишварӣ, назофату беҳдоштиву гигиена, дасту биниро шӯеду тозагиро риоят кунед, мегӯянд, ҳама асли исломӣ доранд”, - гуфт руҳонии саршиноси тоҷик.

Ҳоҷӣ Маҳмудҷон Тӯраҷонзода аз хонаводаи маъруфи Тӯраҷонзодаҳо, руҳониёни маъруфи тоҷик ва устоди улуми динӣ аст. Эшони Нуриддинҷон ва Ҳоҷӣ Акбари Тӯраҷонзода, собиқ қозии мусалмонони Тоҷикистон, намояндагони дигари маъруфи ин хонавода ҳастанд

0
Барчаспҳо:
Муҳаммад, ҳадис, беморӣ, Ҳоҷӣ Акбар Тураҷонзода, вируси нав, Тоҷикистон