Ветеран афганских событий, эксперт по Афганистану, представитель Российского союза ветеранов в Афганистане Вячеслав Некрасов

Коршинос гуфт ба ҷангҷӯён дар марзи Тоҷикистону Афғонистон кӣ кумак мерасонад

321
(Таҷдидшуда 18:11 01.10.2019)
Вячеслав Некрасов, собиқадори ҷанги Афғонистон ва раиси Иттиҳодияи собиқадорони Русия дар Афғонистон тавзеҳ дод, ки бо кумаки кӣ ҷангҷӯён дар марзи Тоҷикистону Афғонистон фаъол шуданд

ДУШАНБЕ, 1 окт — Sputnik. Собиқадори ҷанги Афғонистон Вячеслав Некрасов дар мусоҳиба бо Sputnik Тоҷикистон, шарҳ дод, ки дар шимоли Афғонистон ҷангҷӯён аз куҷо пайдо шуданду ба онҳо кӣ кумак мерасонад.

“Ман дар Афғонистон аз соли 81 инҷониб ба фарҳанг, таълиму варзиш машғулам. Вақте, ки чорабинии муҳим ташкил мекунем, кор то ҷое мерасад, ки мардуми Афғонистон метарсанд аз хона бароянд. Онҳо тарс доранд дар кадом як инфиҷоре кушта шаванд”, - гуфт Некрасов.

Вай таъкид дошт, ки дар Афғонистон дар ҳоли ҳозир, 21 гурӯҳҳи террористӣ фаъолият дорад, ки метавоананд бо кумакҳои алоҳида фаъолият хуб дошта бошанд.

Некрасов қайд кард, ки ҳоло нооромии вазъ дар шимоли Афғонистон мушоҳида мешавад ва он ҳам сунъӣ мебоашд.

“Ҷангҷӯёнро аз Сурия тариқи киштиҳои Бритониё ба бандарҳои Покистон мерасонанд. Сухан дар бораи ҳазорҳо нафар меравад”, - гуфт собиқадори ҷанги Афғонистон.

Вай зикр кард, ки ҷанҷӯён аз Сурия мутташакилона интиқол дода мешаванд ва бидуни ягон ҳуҷҷат ва бо номҳои гуногун вориди хоки Афғонистон мегарданд.

“Онҳо бидуни ному насаб, танҳо зери рақамҳои махсус, 20 нафарӣ ба шимоли Афғонистон интиқол дода мешаванд”, - гуфт вай.

Ба боварии коршинос ин як нақшаи кашидашуда аст, ки вазъро дар минтақаҳои марзӣ бо Тоҷикистон ноором созанд.

Собиқадори ҷанги Афғонистон тавзеҳ дод, ки агар вазъи ҷангҷӯён дар маҳалли даргирӣ бад шавад, онҳоро зуд аз маҳали даргирӣ тариқи  чархболҳои бидуни ному нишон ба ҷои амн интиқол медиҳанд.

“Кадом чархболи ношинос бидуни иҷозат метавонад дар ҳудуди Афғонистон парвоз кунад? Танҳои чархболҳои НАТО ва Амрико”, - таъкид кард Некрасов.

Ёдрас мешавем, ки дар моҳи сентябри соли равон ҷангҷӯён борҳо ба манотиқи марзии Афғонистон, ки бо Тоҷикистон ҳамсарҳад аст, ҳамла намуда ва чандин минтақаро тасарруф карданд.

321
Барчаспҳо:
кумак, коршиносон, вазъият, марз, ҷангҷӯён, ҷангҷӯ, Афғонистон, Тоҷикистон
Дмитрий Гусев

Коршинос гуфт, ки мушкилии харидории газ аз Ӯзбекистон барои Тоҷикистон дар чист

254
(Таҷдидшуда 17:51 12.09.2020)
Оё Тоҷикистон ва Ӯзбекистон метавонанд созишномаи нави энергетикӣ ба имзо расонанд? Ба ин суол коршиноси рус, муовини роҳбари Иттиҳоди сӯзишвории мустақил, мудири кулли ICON Trading Дмитрий Гусев посух гуфт.

Ширкати газрасони Тоҷикистон имконияти таъмини аҳолиро бо гази табиӣ тавассути вориди газ аз Ӯзбекистон баррасӣ мекунад. 

Гусев рассказал, что мешает Таджикистану закупать газ у Узбекистана

Саволи асосӣ ин аст, ки арзиши газе ки аз кишвари ҳамсоя ворид мешавад, чигуна хоҳад буд.

Омили иқтисодие нест, ки тавонад ба нархгузории гази Ӯзбекистон таъсир расонад, ин танҳо қарори сиёсӣ аст, гуфт дар сӯҳбат бо Sputnik Тоҷикистон  коршиноси рус, муовини роҳбари Иттиҳоди сӯзишвории мустақил, мудири кулли ICON Trading Дмитрий Гусев.

Воридоти газро наметавон на бо интиқоли об ва на бо мубодила вобаста кард, мегӯяд коршиноси рус.

Гусев таъкид кард, ки Тоҷикистон ва Ӯзбекистон бояд ба созиши оқилона азм кунанд.

"Беҳтарин тасмиме, ки метавон аз ин ду кишвар интизор шуд, ин ташкили комиссия ва ё идораест, ки ба шартҳои интиқоли газ машғул хоҳад шуд. Ҳамин тавр, арзиши газро низ метавон муайян кард", - гуфт Гусев.

Коршинос афзуд, ки тамоми тобишҳои техникӣ аз маблағ ва набудани мутахассисони кофии техникӣ вобаста аст.

Коршинос таъкид кард, ки дар гуфтушунидҳо вазифаи асосии Тоҷикистон наздик кардани арзиши харидории газ ба фурӯш ба аҳолӣ мебошад, зеро бақия аз ҳисоби буҷаи давлат рӯпӯш хоҳад шуд.

Баъди “гушмол”- и мақомот нархи газ дар Тоҷикистон поён рафтааст

254
Обсуждение хода работы группы «6+2» с Ахмад Шахом Масудом. Северная провинция Тахар, июнь 1998 года

Ёди Давлат Усмон аз вохӯриҳо бо Масъуд: суҳбат аз Тоҷикистон, Ҳикматёр, хости ИМА ва марг

1865
(Таҷдидшуда 17:22 09.09.2020)
19 сол пеш, 9 сентябри соли 2001 Аҳмадшоҳи Масъуд, фармондеҳи Ҷабҳаи муқовимати Афғонистон, аз сӯи ду террористи араб, ки дар либоси рӯзноманигор ба мусоҳиба омада буданд, террор шуд

ДУШАНБЕ, 9 сен — Sputnik. Дар ин миён даҳҳо китобу матлабу филми мустанад аз ин ҳодиса нашр шуда, имрӯзҳо низ мешаванд. Ҳамсуҳбати Sputnik Тоҷикистон нафарест, ки борҳо бо фармондеҳ Масъуд мулоқот карда, то охири умр бо ӯ тамос доштааст.

Давлат Усмон, яке аз раҳбарони собиқ Иттиҳоди неруҳои мухолифин, собиқ муовини сарвазир ва вазири иқтисоди Тоҷикистон аз соли 1992 то 1996 дар сафи мухолифин ва муҳоҷирини тоҷик дар Афғонистон буд. Ӯ нафари робити ИНОТ бо Аҳмадшоҳи Масъуд, он замон вазири дифоъи Афғонистон ба шумор мерафт.

Sputnik Тоҷикистон дар оғоз аз мулоқоти нахусташ бо Масъуд пурсид.

- Моҳи декабри соли 1992 буд. Ман минҳайси муовини сарвазири Тоҷикистон барои ширкат дар ҷаласаи созмони Конфронси кишварҳои исломӣ дар шаҳри Ҷиддаи Арабистони Саудӣ қарор доштам. 2 декабри соли 1992 мо Тоҷикистонро узви ин созмон кардем. Аммо вазъи Тоҷикистон муташанниҷ буд. Дар ҳамон Саудӣ расонаҳои ҷаҳонӣ гузориш медоданд, ки дар ҷануби Тоҷикистон ҷангҳо шиддат ёфта, мардум ба Афғонистон фирор мекунанд. Ин вазъ бозгашти ман ба Душанберо низ ғайримумкин месохт. Ба ин натиҷа расидам, ки тариқи Эрону Покистон ба Афғонистон ва аз он ҷо ба Бадахшони Тоҷикистон биравам. Кобул омадам. Маро раисҷумҳури Афғонистон марҳум Устод Раббонӣ қабул кард. Дар анҷоми мулоқот ба ман гуфт, ки бояд як нафари дигарро ҳам бинам. Номашро нагирифт. Фикр кардам, ягон нафари хос ва масъули равобит бо мост.

Мавзолей Ахмада шах Масуда в Панджшерском ущелье
Aleksandr Khrolenko
Мавзолей Ахмада шах Масуда в Панджшерском ущелье

Ҳамон шаб маро ба виллаҳои Вазир Акбархон бурданд. Тақрибан соатҳои 9 то 10 – и шаб марҳум Аҳмадшоҳи Масъуд омад. Ӯ аз ман хост, ки буҳрони Тоҷикистонро қисса кунам. Ду соат шарҳ додам. Бояд бигӯям, ки дар умрам бори аввал чунин инсонеро медидам: бо диққат гӯш кард ва ягон бор гапамро набурид! Соат 3 – и субҳ шуд. Гуфт, суҳбатро фардо идома медиҳем. Рафт...

Ҳикматёр, Усома ибни Лодан ва Мулло Умар дар бораи Масъуд

- Решаи мухолифатҳои Аҳмадшоҳ Масъуду Гулбуддин Ҳикматёр дар чӣ буд?

- Ин мухолифат ҳам ҷанбаи қавмӣ ва ҳам шахсӣ дошт. Ман бо Ҳикматёр чанд маротиба мулоқот доштам. Ӯ касеро болотар аз худ намедид. Мехост дар миёни раҳбарони Афғонистон нафари якум бошад. Масъуд як шахсияти қавӣ буд. Ҳатто дар бархе ҷиҳот аз Ҳикматёр бартарӣ дошт. Аз ин хотир, Ҳикматёр ӯро як монеаи ҷиддӣ дар роҳи расидан ба аҳдофаш медонист.

- Усома ибни Лодан ва Мулло Умар, раҳбарони собиқи “Ал – қоида” – ву “Толибон” (гурӯҳҳои террористии маманӯъ дар қаламрави Русия) дар бораи Масъуд чӣ назар доштанд?

- Афроди “Ал-қоида” дар роҳи Пешовар-Кобул моро нигаҳ доштанд ва назди Усома ибни Лодан бурданд, ки дар Ҷалолобод буд. Ӯ аз мо – ману Муҳаммадшариф Ҳимматзода, яке аз роҳбарони қаблии ИНОТ хост, ки ба ӯ пайвандем, аммо мо гуфтем, ки ба ҳеҷ як нерӯ намепайвандем ва ба ватан бармегардем. Дар бораи Масъуд ҳарфе назадем. Аммо худ шоҳидед, ки Масъуду ибни Лодан дар ду сангари муқобил буданд ва якдигарро аслан қабул накарданд. Ҳоло собит шудааст, ки террори Масъудро маҳз аъзои “Ал-қоида” анҷом доданд.

Портрет Ахмад Шаха Масуда на одной из улиц в Кабуле
© Sputnik / Валерий Мельников
Портрет Ахмад Шаха Масуда на одной из улиц в Кабуле

Бо Мулло Умар як суҳбат доштем. Толибон боре дар фазои Ҳирот тайёраи мо – раҳбарони мухолифини тоҷикро, ки аз Теҳрон ба Толиқон бармегаштем, нигаҳ дошта, маҷбур ба замин нишонданд. Ҳайатро ба Қандаҳор бурданд. Мулло Умар моро дар фурудгоҳ қабул кард. Аммо танҳо ману марҳум устод Нурӣ, раҳбари мухолифини тоҷикро пазируфт. Суҳбат дар дохили мошини ӯ сурат гирифт. Устод Нурӣ аз Мулло Умар хост, ки бо Масъуд сулҳ кунад, чун ӯву Раббонӣ, Сайёф ва дигарон ҳама раҳбари ҷиҳодиянд, кофир нестанд, гузашта аз ин, мавқеияти Толибон ҳам қавӣ аст. Мулло Умар ба “Калашников”- и дасташ ишора кард ва гуфт: “Мулло соҳиб, дар Афғонистон ана ин ҳамаро ҳал мекунад!” Мулло Умар бо Масъуд меҷангид, аммо ба Масъуд ҳамчун шахсият эҳтиром дошт.

- Масъуд дар бораи Ҳикматёр, Мулло Умар ва Усома ибни Лодан чӣ мегуфт?

- Масъуд аҷаб инсоне буд. Агар аз ягон рафиқ, дӯст ё ҳамкораш мепурсидӣ, кӯтоҳ мегуфт, одами хубест. Дигар ягон чӣ намегуфт. Аммо дар бораи ашхосе, ки эҳтиром надошт, ҳеҷ вақт изҳори назар намекард. Намегуфт, ки Ҳикматёр, Усома ё Мулло Умар одами баданд. Ёд надорам, ки Масъуд нафареро паст зада ё бад гуфта бошад.

Бубинед, ҳеч вақт мушкилотеро, ки дар дохили Афғонистон дошт, бо мо матраҳ намекард. Ба муносибатҳои мо бо Ҳикматёру Толибон ва дигар рақибонаш кор надошт, балки истиқбол мекард. Мегуфт, кори оқилона аст, ки ба бадбахтиҳои мо ҳамроҳ нашавед.

 “Миллатгаро”, “Агенти КГБ”, “дастнишондаи Эрон”...

- Масъудро мухолифонаш як миллатгаро мехонанд, ки чун тоҷик буд, мехост тоҷиконро ба қудрат расонад. Оё чунин буд?

- Масъуд бар ақида ва арзишҳои динӣ ё мазҳабиаш арҷ мегузошт. Дар дини ислом қавм матраҳ нест. Масъуд як шахсеро дар раъси Афғонистон дидан мехост, ки тафаккури миллӣ, умумиафғонистонӣ дошта ва ботақво бошад. Фарқ надошт, ки ин нафар аз кадом қавм аст. Ӯ ҳукуматеро мехост, ки мардум онро қабул кунад ва таҳти нуфузи кишварҳои хориҷӣ набошад. Толибонро ҳам ба маҳзи ин, ки як нерӯи покистонӣ буданд, қабул надошт.

- Масъудро “агенти КГБ” ё “дастнишондаи Эрон” мехонданд, чун бо Русияву Эрон кор мекард. Инро чӣ гуна арзёбӣ мекунед?

- Масъуд, содда гӯем, агент ё дастнишондаи Афғонистону мардумаш буд. Аз моҳи январ то апрели соли 1993 дар се-чор ҷаласаи Масъуд, ки ба масъалаҳои сиёсати дохилӣ ихтисос ёфта буд, ҳамчун нозир ширкат доштам. Дидгоҳи ӯро хуб медонистам.

Амрико, Покистон, кишварҳои Халиҷ бо овардани Толибон (гурӯҳи мамнӯъ дар қаламрави Русия) ба саҳнаи Афғонистон амалан ба канор задани Масъуд остин бар заданд. Онҳо ҳукумати Раббонии тоҷикро қабул накарданд. Масъуд маҷбур буд, ки бо Русияву Эрон ва Ҳинд канор ояд. Ахириҳо низ дар ин ҷанги ниёбатӣ ба Масъуд ниёз доштанд.

Русияву Амрико, Саудиву Эрон, Ҳинду Покистон дар ҳар куҷое, ки имкон дорад, дар рақобат буданду ҳастанд. Масъуд мегуфт, бо ҳар қудрате, ки озодиву иззати Афғонистонро эҳтиром мекунад, ҳамкорӣ хоҳад кард.

Дар ёд дорам, соли 1995 вақте ки Кобул дар дасти Масъуд буд, вазири амнияти Арабистони Саудӣ Туркӣ Файсал омад. Масъуд ба ӯ гуфт, ки тамоми ҷараёнҳои сиёсӣ, аз ҷумла Ҳикматёрро қабул хоҳад дошт, ба шарте Арабистони Саудӣ аз дахолати Покистон дар умури Афғонистон ҷилавгирӣ кунад. Возеҳ аст, ки ӯ мехост худи мардуми Афғонистон сарнавишташро таъйин кунад, на як гуруҳи дастнишондаи кишварҳои хориҷӣ.

"Хоҳиши мақомдори ИМА аз Масъуд ва посухи ӯ: муқобилатон меҷангам"

- Назари Масъуд ба сиёсатҳои Амрико дар Афғонистонро чӣ буд?

- Боре дар Қасри Истолиф будем. Масъуд як-ду рӯзи қабл бо Робин Рафаэл, ёрдамчии вазири корҳои хориҷии Амрико дар ҳамин қаср мулоқот карда буд. Хеле эҳсосӣ ба назар мерасид. Пурсидам, ки чӣ иттифоқ афтода? Вай бадоҳатан гуфт: “Амрикоиҳо хуб беҳаё будаанд. Хонум Рафаэл мегӯяд, ки шумо бояд аз қудрат канор равед! Бигзоред, ки мо дар Афғонистон як ҳукумати технократҳоро созем. Гуфтам, аҷаб, магар мо миллат нестем? Ин қадар сол барои чӣ мубориза бурдем? Хуб, мо демократияро, ки мегӯед, қабул дорем. Ҳизбҳои сиёсиро озод гузоред, бигзор, мардуми Афғонистон интихоб кунад. Моро қабул накард, халос! Номзадатонро биёред. Аммо фақат интихобот шавад. Шумо обрӯву иззату шарафи моро паст назанед. Пул партоед, ки номзади шумо пирӯз, раисҷумҳури Афғонистон шавад. Агар мардум интихоб кард, мо ӯро қабул дорем”.

Хеле бо ҳарорат гап мезад. Гуфт, вақте Рафаэл аз мавқеи зӯриву таҳдид сӯҳбат кард, ғурурам баланд рафт ва гуфтам, ки шумо дар Афғонистон ягон кор карда наметавонед. Ангушти ишоратиро ба сӯяш карда, гуфтам: “Агар тамоми артиши Амрикоро биёред, ман муқобилатон меҷангам!“

Сипас Масъуд ҳамон кулоҳашро аз сар мегираду пешаш партофта мегӯяд, ки агар ба андозаи ҳамин кулоҳ хоки Афғонистон монад, як поямро он ҷо гузошта, ба як пой бо шумо меҷангам. Пас аз ин мулоқот хотири Масъуд аз Амрико ҷамъ шуда буд.

- Амрико аз Масъуд мехост, ки ба Толибон таслим шавад?

Флаг 217 корпуса афганской национальной армии Памир
пресс-центр 217 корпуса афганской национальной армии "Памир"

- На, аз Масъуд мехостанд, ки ҳукуматро на ба Толибон, балки ба худи амрикоиҳо супоранд! Гуфта буданд, мо ҳукумати худро месозем.

- Амрико ҳам ҷиддан Масъудро намехост, аммо имрӯз бо Толибон сулҳ кард. Фикр мекунед, чаро?

- Ман ҳамон лаҳза ба Масъуд гуфта будам, ки Омир Соҳиб, ин амрикоиҳо, он тавр ки кушоду равшан ва бо эҳсос гуфтед, метавонанд ба Шумо зарари физикӣ расонанд, бояд рӯйрост намегуфтед. Хандид.

Амрикоиҳо бо ҳамон артиши Масъуд тавонистанд пой ба хоки Афғонистон ниҳанд. Аммо таври маълум, онҳо як сиёсати масъудзудоиро ба дасти чӣ расад ҳукуматҳои дастнишондаи худ, ҳатто бозмондагони Масъуд ба роҳ андохтанд. Ин ки чаро муваффақ нашуданд, баҳси дигар аст. Аммо сулҳи Амрико бо Толибон (гурӯҳи мамнӯъ дар қаламрави Русия) ба ҷуз ҳифзи ҷанг ва идомаи мудирияти буҳрон чизи дигаре нест. Агар ба Масъуд кӯмак мекарданд, воқеан, дар Афғонистон сулҳу субот барқарор мешуд. 

Як баҳси оддӣ нест...

- Чӣ фикр доред, пушти террори Масъуд киҳо меистанд?

- Террори Масъуд, ки мегӯянд, аз сӯи “Ал-қоида” – ву (гурӯҳи террористии мамнӯъ дар қаламрави Русия) созмони истихборотии Покистон, ҳатто Толибон анҷом шудааст, як баҳси оддӣ нест. Худ ба ҳаводиси баъди марги ӯ бингаред. Ӯро ба шаҳодат расонданду ду рӯз пас ҳаводиси Ню-йорк иттифоқ афтоданд ва як моҳ нагузашта, низомиёни амрикоӣ дар соҳилҳои Уқёнуси Ҳинд буданду ҳайатҳояшон дар кӯчаҳои пойтахтҳои Осиёи Марказӣ. Моҳи ноябри ҳамон сол ҳукумати Толибон суқут кард. Ин ҳама таҳаввулот дар як муддати хеле кӯтоҳ рух дод ва Амрико дар минтақа ҷойи пой пайдо кард. Агар Масъуд мебуд, ин ҳама иттифоқ намеафтид. Пушти тарҳи террори ӯ созмонҳои истихборотии даҳҳо кишвар қарор доранд, ки рӯзе таърих ҳамаро рӯи об хоҳад баровард.

- Масъуд чӣ инсоне буд?

- Як шахси қотеъ, дар қавл устувору дар аҳд вафодор. Намунаи барҷастаи як мусулмони батақво, тоҷики фарҳангпарвару афғони ватандӯст.

- Пас аз бозгашт ба Тоҷикистон бо Масъуд боз мулоқот доштед?

- Бале. Чанд бори дигар бо ӯ дар Душанбе мулоқот доштам. Як бор меҳмони хонаам шуда буд. Як бор ба хонааш, ки дар кӯчаи Карамови шаҳри Душанбе буд ва фарзандонаш он ҷо истиқомат мекарданд, рафта будам. Бори охир се – чор моҳ пеш аз шаҳодаташ ӯро дида будам...

- Марги ӯро чӣ гуна пазируфтед?

- Ростӣ, сахт мутаассир шудам. Ҳамон рӯз гӯё осмон ба сарам чаппа шуд. Як дӯсту бародари ҳамаи мо буд. Дилам сиёҳ шуд. Афғонистон тағйир кард, аммо он сиёҳӣ аз дилам нарафт. Набуди Масъудро Афғонистону минтақа солҳои зиёд эҳсос хоҳанд кард.

1865
Барчаспҳо:
мусоҳиба, муқовимат, террор, террорист, рӯзноманигор, Аҳмадшоҳи Масъуд, Афғонистон
Президент Таджикистана Эмомали Рахмон на красной дорожке

Номзад ба президентӣ Эмомалӣ Раҳмон: шарҳи ҳол ва барномаи пешазинтихоботӣ

0
(Таҷдидшуда 15:12 24.09.2020)
Кишвардори кунунии Тоҷикистон Эмомалӣ Раҳмон боз барои курсии президентӣ дар интихоботи рӯзи 11 октябр, қувва меозмояд

26 сол мешавад, ки Эмомалӣ Раҳмон Тоҷикистонро раҳбарӣ мекунад. Эмомалӣ Раҳмон қарор кард бори панҷум дар фаъолияти сиёсиаш, дар интихоботи президентӣ ширкат кунад.

Шарҳи ҳоли Эмомалӣ Раҳмон 

Ҷаноби Раҳмон, ки аз соли 1992 ба ин сӯ, зимоми қудрат дар Тоҷикистонро дар даст дорад, 5 октябри соли 1952 дар ноҳияи Данғараи вилояти собиқи Кӯлоб (алъон вилояти Хатлон) дар оилаи деҳқон ба дунё омадааст.

Ӯ фаъолияти кории худро соли 1969, баъд аз хатми Омӯзишгоҳи касбию техникии № 40-и шаҳри Калининобод (ҳоло Сарбанд), ба ҳайси устои барқ дар Корхонаи равғанкашии шаҳри Қӯрғонтеппа оғоз кардааст.

Солҳои 1971-1974 дар Флоти уқёнуси Ором адои хидмат карда, пас аз хидмати ҳарбӣ ба зодгоҳи худ бар мегардад ва дар совхози ба номи Ленини ноҳияи Данғара корро шуруъ мекунад.

Ба иттилоъи Хадамоти матбуотии президент, оқои Раҳмон соли 1982 факултети иқтисоди Донишгоҳи миллии Тоҷикистонро хатм карда, солҳои 1976-1987 дар вазифаҳои котиби раёсат ва раиси Кумитаи иттифоқҳои касабаи совхози ба номи Ленини ноҳияи Данғара кор кардааст.

Аз соли 1987 то соли 1992 директори совхози ба номи Ленини ноҳияи Данғара буд.

Оиладор ва падари нӯҳ фарзанд — ду писар ва ҳафт духтар мебошад.

Фаъолияти сиёсии Эмомалӣ Раҳмон

Соли 1990 Эмомалӣ Раҳмон вакили мардумӣ дар Шӯрои Олии Тоҷикистон даъвати ХII интихоб шуда, тирамоҳи соли 1992 раиси Кумитаи иҷроияи Шӯрои намояндагони халқи вилояти Кӯлоб баргузида мешавад.

19 ноябри соли 1992 дар иҷлосияи XVI Шӯрои Олии Тоҷикистон Эмомалӣ Раҳмон раиси ин шӯро интихоб гардида, 6 ноябри соли 1994 дар интихоботи президентии кишвар иштирок ва барандаи он эълон мешавад.

Инчунин ӯ барандаи интихоботи президентии 1999-и Тоҷикистон эълон шуда, бори дигар ба муҳлати 7 сол ба курсии раҳбарии Тоҷикистон такя мезанад.

Ҳамин тариқ дар интихоботҳои президентии солҳои  2006 ва 2013 ҳам ин курсиро ҳифз кард.

Дар пайи имзои Созишномаи сулҳ моҳи декабри соли 1999 ба ӯ ба хотири хидматҳояш дар рванди барқарории сулҳу субот дар кишвар унвони Қаҳрамони Тоҷикистон дода мешавад.

Мувофиқи Қонуни конститутсионии Ҷумҳурии Тоҷикистон "Дар бораи Асосгузори сулҳу ваҳдати миллӣ – Пешвои миллат ба тасвиб расидааст, Президенти Ҷумҳурии Тоҷикистон Эмомалӣ Раҳмон ба сифати Асосгузори сулҳу ваҳдати миллӣ – Пешвои миллат эътироф карда шудааст.

Барномаи пешазинтихоботии Эмомалӣ Раҳмон

Шиор: Барои рушди устувори иқтисодӣ ва зиндагии шоистаи мардум.

Се вазифаи асосӣ:

1. Таъмин намудани рушди устувор бо роҳи баланд бардоштани гуногунсамтӣ ва рақобатнокии иқтисоди миллӣ;

2. Афзоиш додани ҳиссаи табақаи миёнаи аҳолии мамлакат;

3. Расидан ба сатҳи рушди иҷтимоиву иқтисодии кишварҳои даромадашон миёна.

Мувофиқи нақшаҳои пешбинишуда ҳаҷми маҷмӯи маҳсулоти дохилии кишвар ва таносуби он ба ҳар сари аҳолӣ дар 7 соли оянда 2 баробар афзоиш меёбад.

Ҳиссаи табақаи миёнаи аҳолӣ то 45 фоиз афзуда, сатҳи камбизоатӣ то 18 фоиз коҳиш дода мешавад.

Дар назар аст:

сатҳи дастрасии аҳолии кишвар ба маҳсулоти озуқа, бахусус, ғизои хушсифати мутобиқ ба меъёрҳои тавсияшуда афзоиш дода шавад;

вобастагии иқтисоди кишвар аз воридот кам карда мешавад;

сифати хизматрасониҳо дар соҳаҳои маорифу тандурустӣ ва ҳифзи иҷтимоии аҳолӣ тадриҷан баланд бардошта, аз ҳисоби ҳамаи сарчашмаҳои маблағгузорӣ ба ин бахш бо дарназардошти нафақа ва суғуртаи иҷтимоӣ зиёда аз 123 миллиард сомонӣ равона шавад;

ҳамкории давлат бо бахши хусусӣ ва ҷомеаи шаҳрвандӣ густариш ёбад.

Нақшаҳо:

  • мунтазам зиёд намудани ҳаҷми даромадҳои пулии аҳолӣ ва музди меҳнати кормандон;
  • тавсеа бахшидан ба сиёсати «иқтисоди сабз», вусъатдиҳӣ ва дастгирии давлатии низоми соҳибкории экологӣ;
  • идома додани сохтмони НБО-и «Роғун», НБО-и «Себзор», хатти интиқоли барқи байналмилалии Осиёи Марказӣ-Осиёи Ҷанубӣ – «CASA — 1000», таҷдиди НБО-ҳои «Норак», «Қайроққум» ва «Сарбанд»;
  • идома додани сохтмон ва таҷдиди инфрасохтори нақлиётиву коммуникатсионӣ ва бунёди долонҳои транзитии нақлиётӣ, аз ҷумла дар роҳҳои автомобилгарди Душанбе-Бохтар, Бохтар-Данғара, Данғара-Гулистон, Кӯлоб-Муъминобод, Хуҷанд-Конибодом, Восеъ – Темурмалик -Кангурт, Гулистон-Кӯлоб, Кӯлоб-Шамсиддини Шоҳин, Балҷувон-Сари Хосор, Шкев-Қалъаихумб, Қалъаихумб-Ванҷ, қитъаи Обигарм-Нурободи шоҳроҳи Ваҳдат-Қарамиқ, Гулистон – Фархор – Панҷ — Дӯстӣ, Хуҷанд-Ашт ва дигар роҳҳои дохилӣ;
  • амалӣ намудани лоиҳаҳои бунёди шабакаи нуриву нахии байналмилалӣ, таъмин намудани дастрасӣ ба хизматрасониҳои телекоммуникатсионӣ;
  • густариш бахшидан ба раванди ташаккули низоми шаҳрҳои миёна ва хурд ҳамчун «марказҳои устувори рушд» дар деҳоти кишвар;
  • ташкил кардани инфрасохтори муосир дар деҳоти кишвар ҷиҳати таъмин намудани рушди устувори иҷтимоиву иқтисодӣ ва баланд бардоштани сатҳи некуаҳволии мардум;
  • таваҷҷуҳи авваландараҷа зоҳир намудан ба соҳаҳоиилмумаориф, идома бахшидани ислоҳот дар ин самт, даврабадавразиёд намудани маоши кормандон ва таҳкими пояҳои моддивутехникиионҳо, аз ҷумла таъминот бо технологияҳои иттилоотиву коммуникатсионӣ;
  • тақвият бахшидан ба фаъолнокии иқтисодии аҳолӣ, таъсис додани бозори меҳнати қобили рақобат ва ташкил кардани ҷойҳои нави корӣ;
  • тадриҷан зиёд намудани маблағгузории соҳаҳои тандурустӣ ва хизматрасонии иҷтимоӣ;
  • ҳифз кардани мероси фарҳанги миллӣ, васеъ тарғибу ташвиқ  намудани дастовардҳои даврони соҳибистиқлолии мамлакат;
  • тавсеа бахшидан ба фарҳанги сиёсии шаҳрвандон, таъмин намудани иштироки шаҳрвандон ва ниҳодҳои ҷомеаи шаҳрвандӣ дар идоракунии корҳои давлатӣ, эҳтироми Конститутсия ва садоқат ба давлат;
  • тавсеа додани фарҳанги сулҳ ва тақвият бахшидан ба ваҳдати миллӣ ҳамчун дастоварди нодири мардуми Тоҷикистон;
  • ҳифз намудани суботу оромии ҷомеа, таҳким бахшидан ба қонунияту тартиботи ҳуқуқӣ, яъне таъмин кардани волоияти қонун, ҳимоя кардани ҳуқуқу озодиҳои инсон ва шаҳрванд ва дар ин самт таҳия ва қабул намудани «Стратегияи рушди низоми ҳуқуқии кишвар барои давраи то соли 2030»;
  • таъмин кардани амнияти миллӣ барои ҳифзи суботу оромӣ, дастовардҳои истиқлол ва мустаҳкам намудани пояҳои давлатдории миллӣ;
  • таким бахшидани ҳифзи сарҳади давлатӣ, муҳайё сохтани шароити беҳтар барои сарҳадбонон ва риояи талаботи санадҳои меъёрии ҳуқуқии танзимкунандаи фаъолияти соҳа;
  • пурзӯр намудани мубориза бар зидди ҷинояткорӣ, хусусан, ҷиноятҳои муташаккили фаромиллӣ — терроризм, ифротгароӣ, муомилоти ғайриқонунии маводи мухаддир, силоҳ ва кибертерроризм, инчунин, ба роҳ мондани шаклу усулҳои муосири муқовимат ба дигар хатару таҳдидҳои нави ҷаҳонӣ;
  • тақвият бахшидани муқовимат бар зидди коррупсия ва андешидани чораҳои муассир барои аз байн бурдани сабабу омилҳои ба содиршавии он мусоидаткунанда, амалӣ намудани тадбирҳои иловагӣ ҷиҳати ба вуҷуд овардани рӯҳияи зиддикоррупсионӣ дар ҷомеа;
  • таҳким бахшидани ҳамкориҳои сиёсӣ,  иқтисодиву тиҷоратӣ ва сармоягузорӣ бо кишварҳои Осиёи Ҷанубӣ, Осиёи Ҷануби Шарқӣ,  Ховари Миёна, Амрико, Иттиҳоди Аврупо ва Африқо;
  • устувор намудани мақом ва нуфузи сиёсии Ҷумҳурии Тоҷикистон  дар арсаи  байналмилалӣ ва татбиқи ташаббусҳои глобалии кишвар дар ҳалли масъалаҳои марбут ба захираҳои об;
  • идома ва такмил додани сиёсати "дарҳои кушода";
  • ба таври шоиста муаррифӣ кардани Ҷумҳурии Тоҷикистон,  роҳандозӣ намудани дипломатияи фарҳангӣ ва инсонӣ бо  дарназардошти ҷанбаҳои мусбат ва манфии раванди ҷаҳонишавӣ;
  • ҳимоя намудани ҳуқуқу манфиатҳо, шаъну шараф ва эътибори шаҳрвандони Ҷумҳурии Тоҷикистон дар хориҷи кишвар.
0
Барчаспҳо:
ироъаи барномаи пешазинтихоботӣ, интихобот, сиёсат, Эмомалӣ Раҳмон, Тоҷикистон