Сафари кории Эмомалӣ Раҳмон ба ВМКБ. 28 июли соли 2015

Раҳмон: меҳмоннавозӣ яке аз хислатҳои беҳтарини сокинони Дарвоз аст

28
(Таҷдидшуда 15:20 08.09.2015)
Президент аснои мулоқот бо фаъолони ноҳияи Дарвоз гуфт, минбаъд бо бунёд кардани хатҳои нави интиқоли барқ шабакаҳои барқии ноҳияҳои Ванҷу Рӯшон ба шабакаи марказӣ пайваст мешаванд, ки иқдоми мазкур боиси боз ҳам беҳтар гардидани таъминоти сокинони ноҳияҳои зикршуда бо қувваи барқ хоҳад шуд.

ДУШАНБЕ, 28 июл — Sputnik. Пас аз боздид аз ноҳияи Ванҷ ва ифтитоҳи чанд иншоот райисҷумҳур Эмомалӣ Раҳмон ба ноҳияи Дарвоз омада, бо сокинони он вохӯрӣ анҷом дод, менависад сомонаи президент.

Эмомалӣ Раҳмон, президенти Тоҷикистон. Акс аз бойгонӣ
© Официальная страница пресс-службы президента РТ в Facebook

"Меҳмоннавозӣ яке аз хислатҳои беҳтарини сокинони Дарвоз буда, аз қадимулайём ҳар нафаре агар ба меҳмонии мардуми Дарвоз меомад, ҳатман гармии қалби онҳоро эҳсос мекард",- иброз дошт Раҳмон.

Ба назари президент, Дарвоз ҳамчун як гӯшаи таърихии сарзамини аҷдодии тоҷикон аз замонҳои қадим бо урфу одат ва анъанаҳои нек, хушгуфторӣ ва меҳмондориву меҳмоннавозии сокинони худ шӯҳрати хосаро соҳиб гаштааст.

Ба дурнамои рушди минтақа ишора карда, президент афзуд, ҳукумати мамлакат ба рушди соҳаҳои иқтисодиву иҷтимоии ноҳияи Дарвоз ва баланд бардоштани сатҳу сифати зиндагии сокинони он тавассути таъсис додани ҷойҳои нави корӣ ва ҳалли масъалаҳои иҷтимоии аҳолӣ мунтазам тадбирҳои судманд меандешад.

"Бо ин мақсад дар солҳои 2012 — 2014 ва нимсолаи аввали соли ҷорӣ аз ҳисоби буҷети давлатӣ барои тараққиёти ноҳия ва ҳалли масъалаҳои ҳифзи иҷтимоӣ, сохтмони иншооти нав, бунёду азнавсозии роҳҳои ҳудуди ноҳия ва дастгирии буҷети он 76 миллион сомонӣ харҷ гардидааст",- илова кард ӯ.

Эмомалӣ Раҳмон аснои мулоқот бо зиёиёни кишвар. 19 марти соли 2015
© Официальная страница пресс-службы президента РТ в Facebook

Гуфтанист, аз соли 2012 инҷониб дар қаламрави ноҳия се лоиҳаи давлатии сармоягузорӣ дар ҳаҷми умумии беш аз 130 миллион сомонӣ амалӣ мешавад, ки аз онҳо ду тарҳ аллакай татбиқ гардида, як лоиҳаи дигар дар ҳоли амалишавӣ қарор дорад.

Ҳамчунин, дар ин давра барои дастгирии буҷети ноҳия зиёда аз се миллион сомонӣ субвенсия ҷудо шудааст, ки 88 фоизи хароҷоти мақомоти иҷроияи ҳокимияти давлатии ноҳияро ташкил медиҳад.

Манбаъ менависад, танҳо дар зарфи солҳои 2013-2015 дар ҳудуди ноҳия 30 иншооти таъиноти гуногун сохта, ба истифода дода шудааст. Аз ҷумла, бинои Маркази омӯзиши ҳунарҳои дастӣ бо номи «Кохи бонувон» ба маблағи қариб 2 миллион сомонӣ, бинои истиқоматӣ якҷо бо филиали «Тоҷиксодиротбонк», биноҳои Комиссариати ҳарбӣ ва ҳифзи муҳити зист, коргоҳҳои дӯзандагӣ ва қолинбофию заргарӣ бунёд карда шудаанд, ки мо имрӯз онҳоро ба истифода супоридем ва санги асоси сохтмони бинои шӯъбаи маорифи ноҳияро гузоштем.

Боздиди Эмомалӣ Раҳмон аз шаҳру навоҳии вилояти Мухтори Кӯҳистони Бадахшон идома дорад. Қарор аст райисҷумҳур ба Рӯшону Шуғнон ва маркази маъмури вилоят низ сафар кунад.

28
Барчаспҳо:
сафари президент ба Бадахшон, пули будҷа барои бунёди роҳҳо сарф шудааст, мардуми меҳмоннавози Дарвоз, боздиди Раҳмон аз Бадахшон, селу обхезӣ дар Ванҷ, сел дар Бадахшон, офати табиӣ, президенти Тоҷикистон, Эмомалӣ Раҳмон, Ванҷ, Дарвоз, Бадахшон, Тоҷикистон
Мавзуҳо:
Сафари кории Эмомалӣ Раҳмон ба Бадахшон (9)
Брифинг, посвященый председательству Республики Таджикистан в Шанхайской организации сотрудничества в 2020-2021 гг.

Санаи ҳамоиши президентҳои давлатҳои узви СҲШ дар Душанбе маълум шуд

518
(Таҷдидшуда 21:01 15.01.2021)
Ҷаласаи сарони кишварҳои узви Созмони ҳамкории Шанхай дар шаҳри Душанбе нимаи моҳи сентябри соли равон дар назар аст

ДУШАНБЕ, 15 янв — Sputnik. Ҷаласаи сарони кишварҳои узви СҲШ рӯзҳои 16 – 17 сентябр дар шаҳри Душанбе ба нақша гирифта шудааст, хабар дод Аҳмад Саидмуродзода, сардори раёсати кишварҳои ИДМ-и Вазорати умури хориҷии Тоҷикистон.

Раёсат дар СҲШ-ро соли равон Тоҷикистон ба уҳда дорад. Имсол инчунин ҳамоиши ҷашнӣ - 20-умин солгарди таъсисёбии созмон мебошад.

Нахустин мулоқоти ҳамоҳангсозони миллии кишварҳои узви СҲШ дар соли ҷорӣ 26-29 январ дар шаҳри Душанбе дар нақша аст.

“Дар Вазорати корҳои хориҷӣ барои баргузории саммити СҲШ, ки 16-17 сентябр дар назар аст, ситоди махсус ташкил шуда, нахустин ҷаласаи ҳамоҳангсозони миллӣ 26-29-уми январ дар Душанбе баргузор мешавад”, - изҳор дошт Аҳмадзода зимни мулоқот бо хабарнигорон.

Ӯ афзуд, ки сомонаи махсус ташкил дода мешавад, ки иттилоъ дар бораи чорабиниҳои асосии Созмони ҳамкории Шанхай дар соли равонро фаро хоҳад гирифт.

Баробари мулоқоти сарони кишварҳои узви СҲШ ва вазирони умури хориҷии давлатҳои созмон, инчунин мулоқотҳои роҳбарони идораҳои соҳавӣ – аз мудофиа то иқтисоду тиҷорат ба нақша гирифта шудаанд.

Ба гуфтаи намояндаи ВУХ Тоҷикистон, имсол барои бори аввал дар Душанбе Анҷумани иқтисодии СҲШ ба нақша гирифта шуда, инчунин ташкили мулоқоти намояндагони бахши сайёҳию расонаҳо дар назар аст.

СҲШ созмони байналмилалие мебошад, ки Тоҷикистон, Русия, Ҳинд, Қазоқистон, Қирғизистон, Чин, Покистон ва Ӯзбекистонро дар бар мегирад.

518
Барчаспҳо:
мулоқот, Созмони ҳамкории Шанхай, Тоҷикистон
«Объявили настоящую травлю»: Алла Березовская о задержаниях русскоязычных журналистов в Латвии - YouTube

Березовская аз боздошту бозҷӯии рӯзноманигорони русзабон дар Латвия гуфт

36
(Таҷдидшуда 17:07 15.01.2021)
Алла Березовская, рӯзноманигори муқими Латвия дар бораи бозҷӯияш аз ҷониби мақомоти ҳифзи ҳуқуқи ин кишвар нақл кард

ДУШАНБЕ, 15 янв — Sputnik. Алла Березовская аз ҷумлаи рӯзноманигороне мебошад, ки мақомоти Латвия онҳоро ба далели ҳамкорӣ бо расонаҳои Русия мавриди бозҷӯӣ қарор доданд. Мақомоти ин кишвар муътақиданд, ки чунин ҳамкорӣ хилофи таҳримоти Иттиҳоди Аврупо мебошад.

“Маро дар вайрон кардани таҳримот айбдор мекунанд, аммо ман қатъиян розӣ нестам. Касе ин расонаҳоро ҷиноӣ эътироф накардааст. Мо дар кишвари озод иқомат дорем ва ҳуқуқ дорем дар расонае нашр кунем, ки лозим мешуморем”, - изҳор дошт Алла Березовская.

Ба гуфтаи рӯзноманигор, бозҷӯӣ дар хонааш сурат гирифта, ҳамаи техникаи компютерӣ, аз ҷумла планшети набераашро гирифтаанд.

Ӯ афзуд, ки алайҳи рӯзноманигорони расонаҳои расмии Русия мақомоти Латвия таҳқиботи густурдае роҳандозӣ кардаанд.

“Мехоҳанд ба тамоми ҷаҳон гӯянд, нафароне, ки бо расонаҳои давлатии Русия ҳамкорӣ мекунад, рӯзноманигор нест, пропагандист – тарғибгар мебошанд. Ин ба он маъност, ки ба чунин пропагандистҳо на демократия, на озодии баён ва на ҳуқуқи инсон дахл надоранд”, - тавзеҳ дод ӯ.

Фишор ба Sputnik ва Baltnews

Sputnik қаблан хабар дода буд, ки рӯзноманигорони русзабон, аз ҷумла онҳое, ки бо Baltnews ва Sputnik Латвия ҳамкорӣ мекунанд, дар нақзи таҳримоти Иттиҳоди Аврупо муттаҳам мешаванд ва онҳо мавриди бозҷӯӣ қарор гирифтанд. Манбаъ афзуд, иттиҳомот бар асоси моддаи 84-и қонуни ҷиноии Латвия – нақзи таҳримоти Иттиҳоди Аврупо эълон шудаанд, ки ҷазо дар намуди ҷарима ва ё маҳрумият аз озодиро пешбинӣ мекунад.

Sputnik Латвия ва Baltnews марбути Ожони байналмилалии хабарии "Россия сегодня" мебошанд. Аммо рӯзноманигороне, ки барои ин расонаҳо матлаб таҳия мекунанд, кормандашон набуда, муаллифони ғайриштатӣ мебошанд.

Вазорати умури хориҷии Русия амали мақомоти Латвияро маҳкум карда, онҳоро хилофи демократияю озодии баён хонд. Ин ниҳод таъкид кард, ки таҳримоти Иттиҳоди Аврупо хусусияти инфиродӣ дошта, шахсан ба мудири кулли "Россия сегодня" Дмитрий Киселёв дахл доранд ва наметавонанд ҳамаи кормандони ин идораро фаро гиранд.

Сармуҳаррири хабаргузории байналмилалии  "Россия сегодня" ва RT,  Маргарита Симонян изҳори умед кард, ки Русия ба ифтитоҳи парвандаҳои ҷиноӣ алайҳи рӯзноманигорони русзабон вокуниш хоҳад дод.

36
Барчаспҳо:
рӯзноманигор, Латвия, русзабон
В московском Музее Востока открылась выставка В тени вершин

Ифтитоҳи намоишгоҳи саноати дастӣ ва маҳсулоти кишоварзии Афғонистон дар Душанбе

0
(Таҷдидшуда 20:10 16.01.2021)
Намоишгоҳи саноати дастӣ ва маҳсулоти кишоварзии Афғонистон дар шаҳри Душанбе баргузор шуд

ДУШАНБЕ, 16 янв — Sputnik. Маҳсулоти 27 ширкати афғонистонӣ ва корҳои дастии афғонҳои муқими Тоҷикистон дар 40 ғурфаи ин намоишгоҳ арза шудааст, иттилоъ додааст АМИТ  “Ховар”.

Бино бар иттилои манбаъ, ширкатҳои афғонистонӣ дар ин намоишгоҳ колоҳое монанди саноати дастӣ, фарши дастбоф, зарфҳои суфолӣ ва мисӣ, либосҳои суннатӣ ва маҳсулоти кишоварзиро дар маърази диди умум қарор додаанд.

Муҳаммадзоҳир Ағбар, сафири Афғонистон дар Душанбе дар маросими ифтитоҳи ин намоишгоҳ гуфт, ки дар ояндаи наздик низ намоишгоҳи сангҳои қимматӣ ва нимақиматии кишвараш дар пойтахти Тоҷикистон баргузор мешавад.

Вай таъкид кард, ки баргузории чунин намоишгоҳҳо мӯҷиби тақвияти ҳамкориҳои иқтисодӣ ва тиҷории Афғонистону Тоҷикистон хоҳад шуд.

Сафирон ва масъулони теъдоде аз кишварҳои хориҷии муқими Душанбе, намояндагони утоқи саноат ва бозаргонии Тоҷикистон ва фаъолони бахши хусусии ин кишвар аз намоишгоҳи саноати дастӣ ва маҳсулоти кишоварзии Афғонистон боздид карданд.

0
Барчаспҳо:
баргузор, саноат, Душанбе, намоишгоҳ, Афғонистон