ДУШАНБЕ, 24 мар — Sputnik. Дар сафорати Ҷумҳурии Тоҷикистон дар Федератсияи Русия бо ҷавононе, ки дар ин ҷо кор ва таҳсил мекунанд, вохӯрӣ баргузор гардид, иттилоъ медиҳад дафтари матбуотии ин ниҳоди дипломатӣ дар Маскав.
Ҳангоми сӯҳбат сафири Тоҷикистон Имомуддин Сатторов қайд кард, ки нақши ҷавонон дар обод гардонидани Ватан ва бунёди ҷомеаи ҳуқуқбунёд бузург аст.
"Барои ҳамин ҷавонон бояд ҳам дар таҳсил ва ҳам дар корҳои ҷамъиятӣ фаъол бошанд ", —қайд кард Сатторов.
Муовини раиси Кумитаи кор бо ҷавонон, варзиш ва сайёҳии ҶТ Ризо Назарзода дар навбати худ ба ҷавонон пешниҳод намуд, то барои рушди сайёҳати донишҷӯён, ки яке аз самтҳои беҳтарини ин соҳа ба шумор меравад, ҳамкории фаъол дошта бошанд.
Бояд қайд кард, ки ҷавонон дар рафти вохӯрӣ оиди доираи васеи масъалаҳои дахлдор ва мушкилоти худ саволҳо доданд ва ҳамчунин дар бораи фаъолгардонии нақши ҷавонон дар корҳои давлатӣ ва ҷамъиятӣ пешниҳодҳо намуданд.
