Президент РТ Эмомали Рахмон вместе с президентом Туркменистана Гурбангулы Бердымухамедовым

Изҳороти муштараки сарони кишварҳои Тоҷикистон ва Туркманистон

55
(Таҷдидшуда 15:27 02.11.2017)
Бо даъвати раиси Ҷумҳурии Тоҷикистон Эмомалӣ Раҳмон рӯзҳои 2 - 3 ноябри соли 2017 сафари расмии раиси Ҷумҳурии Туркманистон Қурбонқулӣ Бердимуҳаммадов ба Ҷумҳурии Тоҷикистон баргузор гардид.

ДУШАНБЕ, 2 ноя — Sputnik. Ба гузориши дафтари иттилоърасонии раиси ҶТ, сарони кишварҳои Тоҷикистон ва Туркманистон дар фазои дӯстона ҳолати кунунӣ ва дурнамои рушди муносибатҳои дуҷониба, инчунин масъалаҳои мубрами байналмилалӣ ва минтақаии мавриди таваҷҷуҳи тарафайнро баррасӣ карданд.

Матни Изҳороти муштараки сарони кишварҳои Тоҷикистон ва Туркманистон дар зер гуфтовард мешавад:

"Сарони давлатҳо аз сатҳи устувору мусбии ҳамкориҳои миёни Тоҷикистону Туркманистон дар бахшҳои сиёсӣ, иқтисодӣ, иҷтимоию гуманитарӣ ва дигар самтҳои робитаҳои дуҷониба изҳори қаноатмандӣ намуданд. Изҳор гардид, ки дӯстӣ, баробарӣ ва эҳтироми якдигар принсипҳои асосии рушди ин муносибатҳо маҳсуб меёбанд. Роҳбарони ду кишвар майлу рағбати худро ҷиҳати таҳкими минбаъдаи ҳамкориҳои шарикии дуҷонибаи ҷавобгӯи манфиатҳои ҳарду давлат, баён доштанд.

Президентҳо зарурати боз ҳам наздиксозии ҳамкориҳои муштаракро дар доираи созмонҳои байналмилалӣ, ки ҷонибҳо аъзои он мебошанд, қайд намуданд. Тарафҳо аҳамияти Созмони Милали Муттаҳид ва институтҳои онро ҳамчун воситаи ҳамаҷонибаи кулл дар ҳалли масъалаҳои глобалӣ, таъмини рушди устувор, таҳкими амният ва субот дар ҷаҳон таъйид намуданд.

Роҷеъ ба масъалаҳои иқтисодӣ, президентҳо зарурати фаъолсозии робитаҳои тиҷоратӣ-иқтисодии байни ду кишварро эътироф намуда, тасмим гирифтанд, ки ҷиҳати минбаъд муайян ва амалӣ намудани самтҳои афзалиятноки онҳо мусоидат хоҳанд кард.

Бо мақсади ба сатҳи нави рушд баровардани ҳамкориҳои тиҷоратию иқтисодии дуҷониба, сарони Тоҷикистон ва Туркманистон зарурати афзун додани самаранокии назоратро ҷиҳати дар ҳаҷми пурра иҷро гардидани қарорҳои дар доираи Комиссияи муштараки байниҳукуматии Тоҷикистону Туркманистон оид ба ҳамкориҳои тиҷоратию иқтисодӣ ва илмию техникӣ қабулгардида қайд намуданд.

Сарони давлатҳо аз мавҷуд будани шароитҳои мусоид барои густариши минбаъдаи ҳамкорӣ дар соҳаҳои нақлиёт, энергетика, саноат, тиҷорат ва кишоварзӣ ёдовар шуданд. Дар робита ба ин, Тарафҳо зарурати таҳкими талошҳоро ҷиҳати ҳавасмандгардонии муносибатҳои соҳибкорӣ, шиносоии намоиши тарафайн бо маҳсулоти истеҳсоли ду кишвар, омӯзиши имкониятҳои содиротӣ-воридотӣ ва ҷустуҷӯи шаклҳои нави ҳамкориҳои иқтисодиро қайд намуданд.

Роҳбарони давлатҳо тасдиқ карданд, ки таъмиқи ҳамкорӣ дар соҳаи нақлиёт барои рушди савдои байналмилалӣ миёни кишварҳо ва минтақаҳо аҳамияти калидӣ дорад. Қайд гардид, ки иштироки мутақобила дар лоиҳаҳои мухталиф оид ба ташаккули долонҳои нақлиётии байналмилалӣ барои таҳким ва тавсеаи ҳамкории иқтисодӣ, рушди инфрасохтори нақлиётӣ ва оғози боркашонии транзитӣ тавассути роҳҳои нақлиётии ду кишвар мусоидат хоҳад кард.

Тарафҳо аҳамияти амалисозии лоиҳаи сохтмони роҳи оҳани «Тоҷикистон-Афғонистон-Туркманистон»-ро, ки яке аз лоиҳаҳои бузургтарини нақлиётӣ дар минтақа ба шумор меравад, таъкид намуданд.

Президентҳо ба муҳимияти рушди минбаъдаи ҳамкорӣ дар соҳаи истифодаи оқилонаи захираҳои обию барқӣ таваҷҷуҳи хоса зоҳир намуданд.

Сарони давлатҳо изҳор доштанд, ки муколамаи фарҳангӣ ба густариши ҳамкориҳои гуногунҷабҳаи Тоҷикистону Туркманистон ба таври назаррас мусоидат карда, ба таҳкими дӯстӣ ва ҳамдигарфаҳмӣ байни халқҳои ду кишвар тақвият мебахшад. Дар робита ба ин, Тарафҳо ба мувофиқа расиданд, ки ҳамаи имкониятҳоро барои рушди минбаъдаи муносибатҳои дуҷониба дар соҳаи маориф ва илму фарҳанг равона мекунанд.

Бо мақсади таҳкими минбаъдаи дӯстии анъанавии байни халқҳои ду кишвар Президентҳо нияту мароми худро барои идома додани баргузории Рӯзҳои фарҳанг, инчунин пайваста мубодилаи ҳайатҳои намояндагони фарҳанг ва санъатро баён доштанд.

Ҷонибҳо таъкид карданд, ки истиқрори ҳарчӣ тезтари вазъи сиёсӣ ва барқарорсозии иҷтимоию иқтисодии Афғонистон барои таъмини амният ва субот дар минтақа хеле муҳим мебошад. Онҳо аҳамияти татбиқи лоиҳаҳои минтақавӣ ва байналмилалиро, ки ба рушди устувори ин кишвар мусоидат мекунанд, қайд намуданд.

Сарони давлатҳо густариши минбаъдаи ҳамкориҳои муштаракро дар мубориза бо чунин таҳдидҳои фаромиллӣ, ба монанди терроризм, ҷинояткории муташаккил ва гардиши ғайриқонунии маводи нашъаовар зарур шумориданд.

Президентҳо аз сифати баланд ва мӯҳтавои заминаи шартномавӣ-ҳуқуқии муносибатҳои Тоҷикистону Туркманистон қаноатмандӣ зоҳир намуда, идомаи фаъолиятро ҷиҳати густариши минбаъда ва такмили он зарур донистанд.

Ҷонибҳо дар рафти ташрифоти мазкур аҳамияти ба имзо расонидани теъдоди ҳуҷҷатҳоро ҷиҳати тавсеаи самтҳои мушаххаси ҳамкориҳои муштарак дар соҳаҳои тиҷоратию иқтисодӣ, фарҳангию гуманитарӣ ва дигар соҳаҳо, инчунин рушди ҳамкориҳои байни минтақаҳои Тоҷикистон ва Туркманистон таъкид карданд.

Ҳуҷҷатҳои ба имзо расида заминаи ҳуқуқии муносибатҳои дуҷонибаи Тоҷикистону Туркманистонро, ки поягузори боэътимоди густариши ҳамаҷонибаи ҳамкориҳои минбаъдаи ду давлат ва истифодаи босамари иқтидори онҳо ба манфиатҳои мардуми ду кишвар мебошад, таҳким хоҳанд бахшид.

Сарони давлатҳо изҳори боварӣ намуданд, ки сафари ба вуқӯъомада ҷиҳати рушди минбаъдаи ҳамкориҳои дуҷонибаи дар анъанаҳои дӯстӣ, ҳамдигарфаҳмӣ ва эътимоди ду халқи бародар асос ёфта, ба он такони иловагӣ хоҳад бахшид.

Президенти Ҷумҳурии Тоҷикистон Эмомалӣ Раҳмон ва Президенти Туркманистон Қурбонқулӣ Бердимуҳаммадов аз натиҷаҳои мулоқот, ки дар фазои барои муносибатҳои Тоҷикистону Туркманистон анъанавии боэътимод ва ҳамдигарфаҳмӣ сурат гирифтанд, изҳори қаноатмандӣ намуданд.

Ҷонибҳо ба мувофиқа расиданд, ки муколамаи фаъоли сиёсиро дар сатҳи олӣ, инчунин мулоқотҳои мунтазами дуҷонибаро ҷиҳати муҳокимаи ҳолати муносибатҳои дуҷонибаи Тоҷикистону Туркманистон ва муайян намудани дурнамои рушди минбаъдаи он, идома хоҳанд дод.

Президенти Туркманистон Қурбонқулӣ Бердимуҳаммадов ба Президенти Ҷумҳурии Тоҷикистон Эмомалӣ Раҳмон, ба тамоми мардуми тоҷик барои меҳмоннавозии ҳайати Туркманистон, истиқбол ва пазироии гарму дӯстона, миннатдорӣ изҳор намуда, аз Президенти Тоҷикистон даъват ба амал овард, то дар фурсати муносиб ба Туркманистон сафари расмӣ анҷом диҳад. Даъвати мазкур бо арзи сипос қабул гардид. Муҳлати ташрифот бо роҳҳои дипломатӣ мувофиқа хоҳад шуд.

Раиси Ҷумҳурии Тоҷикистон Эмомалӣ РАҲМОН Раиси Ҷумҳурии Туркманистон Қурбонқулӣ Бердимуҳаммадов"

55
Барчаспҳо:
изҳороти муштарак, Қурбонқулӣ Бердимуҳаммадов, Эмомалӣ Раҳмон, Тоҷикистон-Туркманистон
Мавзуъ
Тоҷикистон ва Туркманистон 13 санадаи ҳамкорӣ имзо карданд
Роҳҳои густариши ҳамкориҳои Тоҷикистону Туркманистон баррасӣ шуданд
Эмомалӣ Раҳмон ба Туркманистон сафар кард

"Муҳаббат бояд дуҷониба бошад": Путин дар бораи муносибати Русия бо Аврупо

33
(Таҷдидшуда 18:07 27.01.2021)
Раҳбари Русия инчунин вазъи кунунии ҷаҳонро тавсиф карда, онро бо солҳои сиюми асри гузашта муқоиса кард

ДУШАНБЕ, 27 январ - Sputnik. Президенти Русия Владимир Путин мутмаин аст, ки Русия ва Аврупо бояд ҳаросҳои гузаштаро дур кардаву "якҷоя бошанд".

"Муносибатҳои Федератсияи Русия ва Аврупо ҳоло муқаррарӣ нестанд, мо бояд ба муколама ва рӯзномаи мусбат баргардем. <...> Федератсияи Русия ва Аврупо шарикони комилан табиии иқтисод ва илм мебошанд, аммо муколама бояд ростқавл бошад, мо бояд ҳаросҳои гузаштаро дур кунем",-гуфт Путин.

Ба гуфтаи ӯ, Маскав омода аст муколама барқарор кунад, мехоҳад ва талош мекунад, аммо "муҳаббат бояд дуҷониба бошад."

Сарвари давлат ин суханонро дар Форуми умумиҷаҳонии иқтисодӣ дар Давос - ва бори аввал пас аз соли 2009 гуфт.

Путин вазъи кунунии ҷаҳонро бо солҳои 30-юм муқоиса кард: ба ақидаи ӯ, табақабандии иҷтимоӣ шиддат гирифта, радикализми рост ва чап афзоиш меёбад ва равандҳои сиёсӣ дар кишварҳои пешрафта шадидтар мешаванд.

Кушиши Аврупо барои ҳифзи муносибат бо Русия ва ояндаи худ

Дар ҳамин ҳол, раҳбари Русия қайд кард, ки "робитаи мутақобилаи кишварҳои гуногун дар ҳалли мушкилоти кунунӣ метавонад ба афзоиши эътимоди тарафайн имкон диҳад".

"Ҳоло муҳим аст, ки аз як изҳороти умумӣ ба тиҷорат гузарем, саъй ва захираҳои воқеиро барои ноил шудан ба ҳам коҳиши нобаробарии иҷтимоӣ дар дохили кишварҳои алоҳида ва ҳам тадриҷан ба ҳам наздик шудани сатҳи иқтисодҳои кишварҳои мухталиф ва минтақаҳои сайёра равона кунем. Пас аз он бӯҳрони муҳоҷират нахоҳад буд ",-илова кард ӯ.

Кишвардори Русия инчунин дар бораи яке аз мушкилоти муҳимтарини сайёра - пандемияи COVID-19 истода гузашт.

Ба гуфтаи Путин, мубориза бо коронавирус дар ҷаҳон бояд муштарак бошад.

"Ҷомеаи ҷаҳонӣ бояд шароит фароҳам оварад, то олимон ва мутахассисон якҷоя кор кунанд, то фаҳманд, ки чаро ва чӣ гуна мутатсия ба амал меояд, масалан, коронавирус чӣ гуна намудҳо дорад ва аз ҳамдигар чигуна фарқ мекунанд", - шарҳ дод президент.

Нахустин гуфтугӯи телефонии Путин бо Байден: сарони кишварҳои қудратманд аз чӣ гуфтанд?

Раҳбари Русия мӯътақид аст, ки "акнун тамаркуз ба рафъи мушкилоти на хаёлӣ, балки воқеӣ дар ҷаҳон муҳим аст".

33
Барчаспҳо:
иқтисод, Аврупо, муносибат, Владимир Путин
Эмомалӣ Раҳмон, раисиҷумҳури Тоҷикистон, акс аз бойгонӣ

Раҳмон гуфт, дар интихобот ба ӯ аксарият занон овоз додаанд

416
(Таҷдидшуда 14:12 27.01.2021)
Эмомалӣ Раҳмон, раисиҷумҳури Тоҷикистон, дар бораи интихоботи гузаштаи парлумонию президентӣ гуфта, таъкид намуд, ки ба ҷонибдорияш аксарият занон овоз додаанд

ДУШАНБЕ, 27 янв — Sputnik. Эмомалӣ Раҳмон гуфт, бо иштироки фаъолонаи халқ соли гузашта ду чорабинии бисёр муҳимми сиёсӣ, якум – интихоботи вакилони Маҷлиси намояндагон, маҷлисҳои маҳаллии вакилони халқ ва дуюм – интихоботи Президенти Тоҷикистон баргузор гардид.

Эмомалӣ Раҳмон дар паёми имсолааш таъкид намуд, ки ин ду маъракаи муҳими сиёсӣ дар фазои сулҳу оромӣ, суботи комили сиёсӣ ва ваҳдати миллӣ баргузор гардиданд.

Раҳмон илова намуд, ки дар интихоботи президенти Тоҷикистон, аксарияти занону бонувони тоҷик, онҳое, ки ҳаққи овоздиҳӣ доранд, ба ҷонибдории раисиҷумҳури феълии Тоҷикистон овоз доданд.

Ӯ  бо изҳори миннатдорӣ афзуд, ки то вақте ҳастам, ҳамин сиёсати худро дар мавриди дастгирии занону бонувон идома медиҳам ва шумо содиқона хизмат кунед.

Эмомалӣ Раҳмон ба Кумитаи кор бо занон ва оила супориш дод, ки лоиҳаи қарори Ҳукумати мамлакатро дар бораи “Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021 – 2030” ва нақшаи амалисозии онро барои солҳои 2021 – 2025 таҳия ва пешниҳод намояд.

416
Барчаспҳо:
президент, интихобот, Эмомалӣ Раҳмон, Тоҷикистон

Мясников: Тоҷикистон аз сироятёбии сартосарӣ аз коронавирус канор намемонад

0
(Таҷдидшуда 18:36 27.01.2021)
Пизишки маъруфи Русия ва ровии телевизион Александр Мясников назари худро дар бораи пирӯзии Тоҷикистон бар вируси корона шарҳ дод

ДУШАНБЕ, 27 янв — Sputnik. Пизишки аршади бемористони №71-и ба номи М.Е.Жадкевич, пизишки хизматнишондодаи шаҳри Маскав, ровии телевизион ва нависанда Александр Мясников дар гуфтугӯ бо Sputnik Тоҷикистон гуфт, ки мутаассифона Тоҷикистон аввалин кишвар нест, ки бар вируси корона пирӯзӣ эълон кардааст.

“Барои мисол вазъи Гурҷистон бисёр рушан аст, Ожонсиҳои Ғарб онро ҳамчун як тарзи дурусти мубориза бо коронавирус мисол меоранд, ки дар он ҷо умуман ин беморӣ авҷ наёфта буд", таъкид дошт коршинос.

Ба Тоҷикистон ваксинаи зидди коронавирус расид: барои низомиёни Русия

Дар ҳамин ҳол, Мясников нагуфт, ки кадом омилҳо сабабгори омори пасти сироятёбӣ ба коронавирус будааст.

"Агар дар Тоҷикистон 1 дарсади аҳолӣ воқеан бемор бошад, ин маънои онро дорад, ки коронавирус ба онҷо акнун мерасад – ва онҳо дигар роҳи гурез надоранд. Ҷое набуд, дар онҷо эълон шавад ки “ниқоб пӯшед”, ба қарантина равон кунанду сипас аз пирӯзӣ эълон кунанд", - гуфт бо шубҳа табиб.

Пизишк Мясников гумон мекунад, ки мавҷи воқеии коронавирус то ҳол ба Тоҷикистон нарасидааст.

"То он даме, ки фоизи муайяни аҳолӣ ба COVID-19 гирифтор нашавад, ин вирус нобуд нахоҳад шуд. Сирояёбии як дарсади аҳолӣ, инро ҳатто авҷи беморӣ гуфтан намешавад",- гуфт мутахассис.

Вай қайд кард, ки чунин вазъ, яъне коҳиши назарраси сироятёбӣ ба вирус аллакай дар бархе кишварҳо ва минтақаҳои гуногуни Русия мушоҳида шуда буд. Ин одатан пас аз афзоиши беморӣ ба амал меояд.

"Мо наметавонем бо тӯри моҳигирӣ хомӯшакро нигоҳ дорем. Чиқадар вақт мегузарад маълум нест. Ягона роҳи наҷот ин эмгузаронӣ аст", -  гуфт пизишки машҳури Русия Александр Мясников.

0
Барчаспҳо:
пизишк, пирӯзӣ, вируси корона, Тоҷикистон, Русия