Қурбон Ҳакимзода, раиси Хатлон дар ҳамоиши аъзои ҲХДТ

Ҳамоиши аъзои ҳизби ҳоким дар Хатлон: аз теъдоду таблиғ то посух ба мухолифин

507
(Таҷдидшуда 15:43 30.11.2019)
Абдулло Раҳмонзода, раиси Кумитаи иҷроияи вилоятии Ҳизби халқии демократии Тоҷикистон дар Хатлон имрӯз дар конфронси 12-уми ҲХДТ аз кори кумита тайи 2,5 соли охир гузориш дод

ДУШАНБЕ, 30 ноя — Sputnik. Раҳмонзода зимни гузориш гуфт, шумораи аъзои ҲХДТ дар вилоят имрӯз ба беш аз 184 ҳазор нафар расидааст, ки нисфи онҳоро занону ҷавонон ташкил медиҳанд.

Котиботи ҳукумати Хатлон аз қавли Раҳмонзода афзуд, ки миёни аъзои ҳизб беш аз 54 ҳазор нафар дорои маълумоти олӣ ва тақрибан ҳамин теъдод дорои маълумоти олии нопурра ва миёнаи махсусанд.

“Акнун 17 кумитаи иҷроияи ҳизбӣ дар шаҳру ноҳияҳо соҳиби бинои маъмурии худ мебошанд. То имрӯз 22 кумитаи иҷроияи ҲХДТ бо мошинҳои хизматӣ таъмин шудаанд”, - ҳисобот додаст раиси Кумитаи иҷроияи вилоятӣ.

Қурбон Ҳакимзода, раиси вилояти Хатлон Қурбон дар ҳамоиши вакилони ҲХДТ изҳор доштаст, ки имрӯзҳо дар шароити бениҳоят мураккаби геополитикӣ муҳимтарин иқдоми ҳизбиён дар роҳи ҳифзи дастовардҳои истиқлолият мубориза бо унсурҳое чун терроризму экстремизм ва тафриқаандозиву бегонапарастӣ мебошад.

“Дар ин шароити пурташаннуҷи ҷомеаи ҷаҳонӣ вақти он аст, ки тамоми табақаҳои ҷомеа садоқати баланди худро ба миллату давлат собит созанд ва бо ҷилавгирӣ аз зоҳирпарастиву бегонаманишӣ ояндаи ободу осудаи фарзандони худро таъмин намоянд. Танҳо дар ин сурат мо метавонем дилпурона худро аз доми тазвири идеологияи бегона наҷот бахшида, ҳамчун ҳизби пешбарандаи ҷомеа пояҳои истиқлолияти давлатиро тақвият бахшем”, - таъкид намудаст Ҳакимзода.

Котиботи ҳукумати Хатлон гузориш додаст, ки дар конфронс таъкид гардид, ки дар маркази диққати гурӯҳҳои таблиғотӣ бояд дастовардҳои солҳои охири Тоҷикистон ва пешрафту комёбиҳои ҷумҳурӣ бошад ва бо ин васила ба мухолифони сиёсии ҳукумат, ки мегӯянд дар тӯли солҳои истиқлолият иқтисоду иҷтимоиёти мо равнақе надоштааст, ҷавоби муносиб диҳанд.

507
Барчаспҳо:
ҳамоиш, Ҳизби халқӣ-демократии Тоҷикистон, Хатлон, Тоҷикистон
Мулоқоти Рустами Эмомалӣ, раиси Маҷлиси миллӣ бо Улуғбек Иноятов, муовини раиси Палатаи қонунгузории Олий Маҷлиси Ӯзбекистон

Рустами Эмомалӣ ва Иноятов дурнамои муносиботи Тоҷикистону Ӯзбекистонро баррасӣ карданд

238
(Таҷдидшуда 16:57 21.09.2020)
Рустами Эмомалӣ, раиси Маҷлиси миллии Тоҷикистон, дар мулоқот бо ҳайати Ӯзбекистон таҳти раёсати Улуғбек Иноятов, муовини раиси Палатаи қонунгузории Олий Маҷлиси ин кишвар густариши ҳамкориҳоро баррасӣ кард

ДУШАНБЕ, 21 сен — Sputnik. Тибқи иттилои котиботи Маҷлиси миллӣ, дар мулоқот масъалаҳои марбут ба ҳолати кунунӣ ва дурнамои муносибатҳои ҳамкорӣ миёни ҷумҳуриҳои Тоҷикистону Ӯзбекистон мавриди баррасӣ қарор дода шуд.

Зикр шудааст, ки солҳои охир равобити миёни ҷумҳуриҳои Тоҷикистону Ӯзбекистон ба шарофати иродаи сиёсии роҳбарони ду кишвар - Эмомалӣ Раҳмон ва Шавкат Мирзиёев торафт густаришу таҳким ёфта, уфуқҳои нав ба навро касб менамояд.

Манбаъ афзуд, ки иштирокчиёни вохӯрӣ ба масъалаи рушду инкишофи ҳамкориҳо, дар аксар соҳаҳои мавриди назар, бахусус парламентаризм диққати хос зоҳир намуданд.

“Дар мулоқот таъкид гардид, ки самтҳои афзалиятноки ҳамкориҳо дар бахши парламентаризм бениҳоят фарох буда, аз ҷумла соҳаҳои сиёсӣ, иқтисодӣ, иҷтимоӣ, гуманитарӣ ва ғайраҳоро фаро мегирад”, - омадааст дар иттилоия.

Таъкид шудааст, ки бояд дар мадди аввал механизми фаъолияти амалии гурӯҳҳои дӯстӣ ва ҳамкории байнипарламентӣ роҳандозӣ гардад. Котиботи Маҷлиси миллӣ афзуд, иштирокдорони мулоқот изҳор доштанд, ки ҷиҳати бо мазмуни нав пурра сохтани ҳамкориҳои байнипарламентӣ, ки талаботи замони муосир мебошад, тамоми имконият ва захираҳои мавҷударо сафарбар хоҳанд кард.

238
Барчаспҳо:
Ӯзбекистон, Эмомалӣ Раҳмон, Тоҷикистон
премьер-министр Узбекистана Абдулла Арипов

Санаи сафари сарвазири Ӯзбекистон ба Тоҷикистон маълум шуд

339
(Таҷдидшуда 21:34 19.09.2020)
Палатаи савдо ва саноати Тоҷикистон мегӯяд, сафари Абдулло Арипов, сарвазири Ӯзбекистон ба Душанбе ба рӯзҳои 28-30 сентябр рост меояд

ДУШАНБЕ, 19 сен — Sputnik.  Омодагӣ ба сафари Абдулло Арипов дар Палатаи савдо ва саноати Тоҷикистон баррасӣ шуд. Дар доираи ин сафар анҷумани соҳибкорони Тоҷикистону Ӯзбекистон рӯзҳои 28-30 сентябр ба нақша гирифта шудааст.

Инчунин зимни ин сафар ҷаласаи навбатии Комиссияи байниҳукуматии Тоҷикистон ва Ӯзбекистон баргузор мегардад

Дафтари матбуоти вазорати иқтисод ва савдои Тоҷикистон, мегӯяд, ҳоло омодагиҳо ба ҷаласаи навбатии Комиссияи байниҳукуматии Тоҷикистон ва Ӯзбекистон давом доранд.

Тибқи иттилои манбаъ, ин нукта зимни вохӯрии  Вазири рушди иқтисод ва савдои Тоҷикистон Завқӣ Завқизода ва муовини якуми Вазири сармоягузорӣ ва савдои хориҷии Ӯзбекистон Лазиз Қудратов, муовини Вазири иқтисод ва паст кардани сатҳи камбизоатии Ӯзбекистон Акмалхон Ортиқов, ки 18 сентябр дар шаҳри Душанбе баргузор гардид, мавриди баррасӣ қарор гирифт.

Ҳамзамон манбаъ таъкид доштааст, ки зимни вохӯрӣ ҷонибҳо инчунин вазъ ва дурнамои ҳамкории дуҷонибаро дар соҳаи тиҷоратию иқтисодӣ, аз ҷумла зиёд намудани нишондиҳандаҳои ҳаҷми гардиши савдои дуҷониба, таъсиси корхонаҳои муштарак дар минтақаҳои озоди иқтисодии Тоҷикистон баррасӣ намуданд.

339
Барчаспҳо:
ҷаласа, ҳамкорӣ, Ӯзбекистон, Тоҷикистон
Жена народного поэта РТ Лоика Шерали - Зебунисси Кутбиддинова

Ду-се моҳи беморӣ ва инсулт: ҳамсари Лоиқ ба "дидор"-и Лоиқ рафт

84
(Таҷдидшуда 10:16 22.09.2020)
Зебуннисо Қутбиддинова, ҳамсари Лоиқ Шералӣ, субҳи имрӯз, 22 сентябр, дар синни 74-солагӣ олами фониро падруд гуфт

 ДУШАНБЕ, 22 сен — Sputnik. Ромиш Шералӣ, писари Лоиқ Шералӣ, дар таъйиди ин хабар ба Sputnik Тоҷикистон гуфт, модараш ду – се моҳи ахир аз маризӣ азият кашида, ҳатто як бор инсултро низ паси сар карданд ва шифо ёфтанд.

“Аммо ин хурсандии мо дер давом накард. Тақрибан 15 рӯзи пеш фишорашон баланд рафт ва он касро ба Шифохонаи Ибни Синои шаҳри Душанбе овардем. Ин субҳ даргузаштанд”, - гуфт Ромиш Шералӣ.

Зебуннисо Қутбиддинова соли 1946 дар шаҳри Панҷакент ба дунё омада, соли 1966 пас аз хатми мактаби миёна ба Донишгоҳи омӯзгории Тоҷикистон дохил шудааст. Соли 1967 риштаи умри худро бо Лоиқ Шералӣ, Шоири халқии Тоҷикистон пайвастааст.

Ҳосили ин издивоҷ се писару ду духтар мебошад. Марҳум то охири умр дар мактаби рақами 54 – и ба номи Лоиқ Шералии шаҳри Душанбе омӯзгор буд.

Ҳамзамон осорхонаи Лоиқ Шералӣ дар ин мактаб бунёд шуд, ки масъулияташро ӯ бар дӯш дошт.

Сӯҳбати ҳамсари Лоиқ: аз ошиқиву гиряҳову нафаси охирини шоир то мисрае, ки чоп нашуд

Лоиқ Шералӣ, Шоири халқии Тоҷикистон 30 июни соли 2000 дар синни 59-солагӣ аз сактаи мағзӣ оламро тарк кард. Ӯ аз камтарин шоирони муосири тоҷик аст, ки на фақат дар Тоҷикистон, балки форсизабонони ҷаҳон ҳаводорони зиёд дорад ва ашъораш ба даҳҳо забони хориҷӣ тарҷума шудаанд.

Яке аз охирин ғазалҳои ӯ ба номи “Рафтам ман аз бари ту, дидор дар қиёмат” унвон дошт, ки ба ҳамсараш бахшида шуда буд.

Як дӯсти хонавода дар таъзияномааш ба марги Зебуннисо Қутбиддинова чунин навишт: “Ин марг нест... Ӯ ба дидори ёри қиёматии худ рафт!”

Ҷанозаи Зебуннисо Қутбиддинова дар қабристони Сарманзили шаҳри Панҷакент пас аз намози пешин баргузор мешавад.

84