Пешвози шоҳдухт Заҳро оқохон дар фурудгоҳи шаҳри Хоруғ

Шоҳдухт Заҳро Оқохон аз Ишкошим, Рӯшон ва Роштқалъа боздид кард

1700
(Таҷдидшуда 12:30 27.04.2017)
Шоҳдухт Заҳро Оқохон дар чорчӯби сафари худ ба вилояти мухтори Кӯҳистони Бадахшон аз ноҳияҳои Ишкошим, Роштқалъа ва Рӯшон боздид кард

ДУШАНБЕ, 26 апр — Sputnik. Шоҳдухт Заҳро Оқохон дирӯз аз ноҳияи Ишкошим дидан карда, бо диданиҳои гардишгарии водии Вахон ва мавзеъҳои торихии он ошно шуд.

Дар ин бора Диловар Буттабеков — консули Шабакаи тавсеъаи Оқохон дар Бадахшон дар суҳбат бо хабарнигори Sputnik Тоҷикистон хабар дод.

Ӯ афзуд, ки Шабакаи тавсеъаи Оқохон барои баҳрабардорӣ аз имконоти гардишгарии ноҳияи Ишкошим, ки аз ҷумла дижҳои торихӣ, осоишгоҳи Гармчашма ва чашмаи Бибӣ Фотимаи Заҳроро дар бар мегирад, тарҳҳои ҷудогонае омода карда, ки ҳамин рӯзҳо барои таъйид пешниҳод хоҳанд шуд.

Шоҳдухт Заҳро Оқохон пас аз боздид аз мавзеъҳои торихии ноҳияи Ишкошим ба ноҳияҳои Роштқалъа ва Рӯшон сафар кард.

Дар деҳаи Хидорҷеви ноҳияи Роштқалъа шоҳдухт бо занони соҳибкор дидор ва мулоқот кард. Дар ин ҷо коргоҳи обмева фаъолият мекунад, ки аз хушкбор ё меваҳои хушккарда обмеваву мураббо ва дигар шириниҳо тавлид мекунад.

Ҳамчунин дар ноҳияи Роштқалъа шоҳдухт Заҳро Оқохон бо тарҳи Маркази рушди кӯдакон ошно шуд, ки бо сармоягузории муштараки Шабакаи тавсеъаи Оқохон ва сокинони деҳа бунёд шудаву фаъолият мекунад.

Дар деҳаи Ғудараи ноҳияи Рӯшон шоҳдухт Заҳро Оқохон дар маросими роҳандозии тарҳҳои барқрасонӣ ва обрасонӣ ширкат кард. Ҳамчунин дар ин русто вай бо хонаводаҳое дидор кард, ки манзилашонро сел хароб карда буд.

Диловар Буттабеков ҳамчунин иттилоъ дод, ки барои хонаводаҳои бесарпаноҳмонда 38 манзили нав сохта шуда, ки Шабакаи тавсеъаи Оқохон дар сохтусозашон ҳамкорӣ доштааст.

Қарор аст, ки дар идомаи сафар шоҳдухт Заҳро Оқохон аз Донишгоҳи Осиёи Марказӣ дар шаҳри Хоруғ, ки ҳамин сол моҳи сентябр ифтитоҳ хоҳад шуд, дидан кунад.

Шоҳдухт Заҳро Оқохон мудири Бахши рифоҳи иҷтимоъӣ дар Дабирхонаи шоҳзода Карим Оқохон ва ҳамчунин масъули ниҳодҳои тавсеъаи иҷтимоъӣ дар Шабакаи тавсеъаи Оқохон аст ки созмонҳои омӯзишӣ, беҳдошту дармон, барномарезӣ ва сохтусозро дар бар мегирад.

1700
Барчаспҳо:
боздид аз ВМКБ, Шоҳдухт Заҳро Оқохон, Роштқалъа, Ишкошим, Рӯшон, ВМКБ
Мавзуҳо:
Боздиди шоҳдухт Заҳро Оқохон аз Тоҷикистон (5)

Дар Русия пӯшидани ниқобу дастпӯш дар ҷойҳои ҷамъиятӣ ҳатмӣ мешавад

111
Дар Русия, ки ҳамарӯза теъдоди зиёди мавориди олудашавии шаҳрвандон ба маризии коронавирус сабт мешавад, пӯшидани ниқобу дастпӯш дар ҷойҳои ҷамъиятӣ ҳатмӣ шуд

ДУШАНБЕ, 27 окт - Sputnik. Роспотребнадзор дар робита ба афзун шудани шумораи дардмандони нави коронавирус ва ҳамзамон зиёд шудани қурбониёни ин дард, аз шаҳрвандон талаб намуд, ки минбаъд дар ҷойҳои ҷамъиятӣ, аз ҷумла, нақлиёт, истгоҳу лифтҳо, дастпӯшу ниқоб пӯшанд.

"Дар робита бо паҳншавии глобалии сирояти нави коронавирусӣ бо мақсади кам кардани хавфҳои COVID-19 дар Федератсияи Русия ҳангоми афзоиши мавсимии бемориҳои шадиди вирусии респираторӣ ва зуком ... фармон медиҳам: шахсоне, ки дар қаламрави Русия ба сар мебаранд, дар ҷойҳои будубоши оммавии одамон, нақлиёти ҷамъиятӣ, таксиҳо, истгоҳҳо, лифтҳо бояд ҳатман дастпӯш ва ниқоби тиббӣ дошта бошанд", - таъкид мешавад дар хабар.

Гузашта аз ин, Роспотребнадзор ҳамаи минтақаҳои Русияро мувазаф намуд, ки ба 100 ҳазор аҳолӣ бояд на камтар аз 150 ташхиси коронавирус гузаронда шавад.

Таъкид мегардад, ки фармони Роспотребнадзор дар бораи тақвияти чораҳо алайҳи коронавирус аз 28 октябр эътибор пайдо мекунад.

111
Барчаспҳо:
маризӣ, Русия
Мавзуҳо:
Пайомадҳои COVID-19 дар Тоҷикистон ва ҷаҳон

"Душмани ислом ҳастӣ": муфтии Чеченистон кишвардори Фаронсаро террористи рақами як гуфт

4061
(Таҷдидшуда 14:33 27.10.2020)
Салоҳ Ҳоҷӣ Меҷиев муфтии Чеченистон пас аз вокуниши кишвардори Фаронса Эммануэл Макрон дар робита ба қатли профессори таърих, ӯро душмани кулли мусалмонон номид

ДУШАНБЕ, 27 окт - Sputnik. Дар Фаронса чанде пеш барои карикатураи Ҳазрати Муҳаммад (с), сари профессори яке аз коллеҷҳо аз тан ҷудо карда шуд.

Дар робита ба ин қазия, раисҷумҳури Фаронса Эммануэл Макрон ба тамоми фаронсавиҳо супориш дод, ки карикатураи пайғамбарро дар тамоми идораҳои давлатӣ овезон кунанд.

Ин амали Макрон боиси нигаронии ҷомеаи мусалмонон гардид. Аз ҷумла, муфтии Чеченистон Салоҳ Ҳоҷӣ Меҷиев амалкарди кишвардори Фаронсаро ҳамлаи рӯирост ба тамоми мусалмонон номид, ки метавонад талафоти зиёди одамонро ба бор орад.

Раёсати мусалмонҳои Ӯзбакистон «Шарли Эбдо»-ро маҳкум кард

Муфтӣ дар сафҳаи худ дар Инстаграм чунин навиштааст:

"Президенти Фаронса Эммануэл Макрон фармон дод, ки карикатураҳои бузургтарин мард, паёмбар Муҳаммад (с) -ро дар тамоми биноҳои ҳукуматӣ овезанд ... Ин на танҳо як амали бемасъулиятест, ки аз тамоми марзҳои ахлоқӣ берун аст, балки ҳамлаи хуби тарҳрезишуда ба Ислом ва тамоми ҷомеаи мусалмонон аст, ки метавонад талафоти бузурги инсониро ба бор орад".

Ӯ мегӯяд, кишвардори Фаронса ба ҷойи маҳкум намудани амали иғвоангезонаи профессори фавтида, ки дидаву дониста оқибати амалашро медонист, шаъну шарафи бузургтарин марди исломро олуда кард.

Зимнан, муфтии Чеченистон, Макронро террористи рақами як ва душмани ашадии кулли мусалмонон номид. Ӯ гуфт, таҳқир кардани пайғамбар ин таҳқир намудани кулли мусалмонон аст.

"Шумо душмани башарият ва тамоми мусулмонон ҳастед, ки принсипҳо ва арзишҳои ахлоқиро надоред...Шумо бо дастҳои худ муноқишаи байни миллатҳо ва динҳоро бармеангезед ", - гуфт муфтӣ.

Вай гуфт, ки Макрон "дидаю дониста мусалмононро ба амалҳои таҳрикомез тела медиҳад ва аз профессори девона "қаҳрамони миллӣ" метарошад.

Муфтӣ таъкид намуд, ки Макрон бо ин амали худ беш аз 2 миллион мусалмонро  душмани худ кард.

Ёдовар мешавем, чанде пеш дар шаҳри Конфлан-Сент-Онорини Фаронса, ки дар 27-километрии Порис ҷойгир аст, сари омӯзгори коллеҷро аз тан ҷудо намуданд. 

Профессор матолибҳои нашркардаи Charlie Hebdo-ро бо донишҷӯён муҳокима кард ва инчунин ба онҳо карикатураҳои пайғамбар Муҳаммад (с) - ро нишон медод.

Қотили ӯ шаҳрванди 48 - солаи Алҷазоир буда, дар коллеҷи мазкур яке аз фарзандони ӯ таҳсил мекард.

4061
Барчаспҳо:
Чеченистон, муфтӣ, Эммануэл Макрон, Фаронса
Ҷамъоварии пахта, акс аз бойгонӣ

Шиносоии раиси Суғд бо ҷамъоварии пахта дар ноҳияи Бобоҷон Ғафуров

0
(Таҷдидшуда 15:27 28.10.2020)
Раҷаббой Аҳмадзода, раиси вилояти Суғд, барои шиносоӣ бо ҷараёни ҷамъоварии пахта аз ноҳияи Бобоҷон Ғафуров боздид намуд

ДУШАНБЕ, 28 окт — Sputnik. Тибқи иттилои котиботи раиси вилоят, Аҳмадзода ба Кооперативи тиҷоратии ба номи Ҷаббор Расулови ҷамоати деҳоти Ёва ташриф оварда, бо рафти ғунучини ҳосил шинос гардид.​

Сбор урожая хлопка в Турсунзаде
© Официальная страница пресс-службы президента РТ в Facebook

“Тавре иттилоъ дода шуд, соли равон дар ноҳияи Бобоҷон Ғафуров истеҳсоли 18200 тонна пахта ба нақша гирифта шуда, то имрӯз 13234 тонна “тиллои сафед” ҷамъоварӣ шудааст. Пахтакорони ноҳия ҳамарӯза бо кӯмаки ҳашарчиён беш аз 320 тонна пахта чида, ба хирман месупоранд”, - омадааст дар иттилоия.

Манбаъ афзуд, Раҷаббой Аҳмадзода дар суҳбат бо масъулини соҳаи кишоварзии вилоят ва ноҳия таъкид кард, ки кишоварзон бояд бо истифода аз рӯзҳои офтобии фасли тирамоҳ ҷамъоварии ҳосилро ҳарчи зудтар ба анҷом расонанд. Изҳори боварӣ карда шуд, ки заркорони ноҳия рӯзҳои наздик нақшаи пешбинишударо иҷро менамоянд.

Сипас Аҳмадзода бо фаъолияти корхонаҳои пахтатозакунии “Зафариён”  ва “Юсуфсаркор” шинос шудааст, ки дар ин корхонаҳо коркарди пахта муташаккилона ба роҳ монда шуда, даҳҳо нафар сокинони маҳаллӣ бо ҷойи корӣ таъмин гардидаанд.

Раиси вилоят ҳамзамон ба манзили сокини ноҳия, собиқадори соҳаи кишоварзӣ ва механизатори номии вилоят Аҳмадҷон Қосимов ташриф оварда, ӯро аёдат намуд.

Ба иттилои котиботи раиси Суғд, механизатори хизматнишондодаи Тоҷикистон Аҳмадҷон Қосимов аз таваҷҷуҳи доимии роҳбарияти мамлакат изҳори хушнудӣ намуда, барои ободиву шукуфоии бештари Ватани азиз дасти дуо бардошт.

0
Барчаспҳо:
пахтачинӣ, раиси Суғд, Тоҷикистон