Врач в клинике

Барканории чанд мақомдори соҳаи тандурустӣ дар Хатлон пас аз ҳалокати 14 зани ҳомила

476
(Таҷдидшуда 18:44 19.12.2019)
Аз авоили соли ҷорӣ дар вилояти Хатлон бар асари таваллуди фарзанд дасти кам 14 зан ҷони худро аз даст доданд

ДУШАНБЕ, 19 дек — Sputnik. Дар вилояти Хатлон аслои таваллуди фарзанд 14 зан ба ҳалокат расиданд, хабар медиҳад сомонаи "Фараж".

Манбаъ аз қавли сардори Раёсати тандурустии ин вилоят Раҷабзода Мирзовалӣ хабар медиҳад, ки маргу мири 14 зан дар 11 моҳи ахири соли равон сабт гардидаст ва аксари фавтидагон ба ноҳияи Қубодиён рост меоянд.

Ба изҳори Мирзовалӣ танҳо дар ноҳияи Қубодиён 6 нафар занон ба ҳангоми таваллуд фавтиданд, ки дар натиҷа масъулини соҳаи тандурустии ин ноҳия аз мақом барканор карда шуданд.

Пешгирӣ аз ҳамли номатлуб - барномаи нави Вазорати тандурустии Тоҷикистон

"Аз ҷумла сардорони беморхонаи марказӣ, Маркази кӯмаки аввалияи тиббию санитарӣ ва сардори Маркази репродуктивии ноҳия аз вазифаҳояшон сабукдӯш шуданд" , - тавзеҳ додаст Мирзовалӣ.

Гузашта аз ин дар ноҳияҳои Данғара, Восеъ, Ҷалолидини Балхӣ дутоӣ фавти занон  ва дар шаҳри Кӯлоб як ҳолати ҳалокати зани ҳомила ба ҳангоми таваллуд сабт гардидааст.

476
Барчаспҳо:
таваллуд, ҳалок, Хатлон
Дедушка в маске в городе Душанбе

Муроҷиати Ситоди ҷумҳуриявӣ ба мардум: ниқоб пӯшед ва фосилаи иҷтимоиро риоя кунед

40
(Таҷдидшуда 12:42 04.06.2020)
Ситоди ҷумҳуриявӣ оиди пешгирӣ аз паҳншавии коронавирус аз бурузи мавҷи дуюми ин беморӣ дар аксар кишварҳо ҳушдор дода, тоҷикистониёнро ба риояи қоидаҳои гигиенӣ ва пӯшидани ниқобу риояи фосилаи иҷтимоӣ даъват намудааст

ДУШАНБЕ, 4  июн — Sputnik. Ситоди ҷумҳуриявӣ оид ба пурзӯр намудани тадбирҳои зиддиэпидемиявӣ  ва  пешгирӣ  аз паҳншавии  сирояти коронавируси COVID-19 ба  аҳолии  кишвар расман муроҷиат намудаст.

Ба маълумоти ситоди мазкур, аксар кишварҳои ҷаҳон бинобар риоя накардани қоидаҳои гигиенӣ ва тадобирҳои пешгирикунанда,  ба мавҷи дуюми бурузи маризии сироятии коронавирус рӯбарӯ шуданд. 

Бо назардошти ин, Ситоди ҷумҳуриявӣ аз тамоми шаҳрвандони мамлакат даъват ба амал овардаст, ки қоидаҳои гигиенаи шахсию ҷаъмиятиро ба таври ҳатмӣ риоя намуда, бе ниқобҳои муҳофизатӣ аз хона набароянд, дар нақлиёт ва дигар  ҷойҳои ҷамъиятӣ ҳатмӣ  аз ниқобҳои муҳофизатии тиббӣ истифода намуда, ба таври қатъӣ   фосилаи  байни  ҳамдигарро ба андозаи аз якуним то ду метр нигоҳ доранд.

Нахустин ҷаласаи Ситоди ҷумҳуриявӣ: 177 хориҷӣ дар карантинанд

Гузашта аз ин, аз  тамоми  сокинони  мамлакат, ки аз минтақаҳо ва  шаҳру  ноҳияҳои дигари ҷумҳурӣ ба шаҳри Душанбе меоянд даъват ба амал меорад, ки  бе зарурат ба пойтахти мамлакат сафар накунанд  ва дар акси ҳол аз ниқобҳои муҳофизатии тиббӣ ҳатмӣ истифода намуда, қоидаҳои  гигиенаи  шахсию  ҷаъмиятӣ  ва  қоидаҳои фосилаи иҷтимоиро  қатъиян  риоя  намоянд.

Ҳамчунин Ситоди ҷумҳуриявӣ аз тамоми тоҷикистониён дархост намудааст, ки аз гузаронидани ҳамагуна чорабиниҳо, ҷашну маросим ва маъракаҳои хурсандиву азодорӣ то ба эътидол омадани вазъияти эпидемиявӣ худдорӣ намоянд.

Ситод ҳушдор медиҳад, ки дар сурати иҷро нагардидани талабот ва қоидаҳои пешгирӣ аз паҳншавии сирояти коронавирус нисбате  нафароне,  ки  ин  қоидаву  тартиботро иҷро намекунанд, чораҳои қонунӣ андешида мешавад.

40
Барчаспҳо:
ситод, муроҷиат, Тоҷикистон
Мавзуҳо:
Пайомадҳои COVID-19 дар Тоҷикистон ва ҷаҳон
Врач Фазила Файзмамадова

"Иродаи қавӣ": пизишки ҷавони тоҷик худ ва фарзандашро аз коронавирус дар Маскав наҷот дод

124
(Таҷдидшуда 12:51 04.06.2020)
Фазила мегӯяд иродаи қавӣ ва рӯҳан афтода нашудан дар пирӯз шудан бар ин маризӣ бисёр нақши муассир дорад. Некбин будан бисёр зарур аст  ва ба сиҳат шудани худ бояд боварӣ дошт

ДУШАНБЕ, 4  июн — Sputnik. Фазила Файзмамадова худ пизишки гушу бинӣ буда дар яке аз муассисаҳои тиббиӣ ғайридавлатӣ дар Русия аз рӯи ихтисоси худ фаъолият мекунад. Замоне, ки маризии сироятии коронавирус ба ин кишвар расид, Фазила ҳамарӯза ба қабули беморон машғул буд. Фаъолияти муассисаи онҳо пас аз баромади кишвардори Русия Владимир Путин бобати эълони рӯзҳои ғайрикорӣ мутафаққиф шуд.

Ин пизишки тоҷик дар қатори садҳо шаҳрвандони Русия ва ҳамзамон даҳҳо муҳоҷирони корӣ гирифтори вируси COVID – 19 шуд. 

Фазила дар сӯҳбат ба Sputnik Тоҷикистон аз рӯзҳои аввали гирифторшавӣ ба ин маризӣ ва то пирӯз шудан бар беморӣ қисса кард.

Маризӣ

Пизишки тоҷик мегӯяд, ба эҳтимоли зиёд ба ин маризӣ на дар ҷойи кори худ, балки дар манзили иқоматаш  мубтало шуд.

Ӯ ба мисли даҳҳо муҳоҷирон ҳамроҳ бо пайвандони ҳамсари худ дар минтақаи "Булвар Ракосовская"  дар хонаи иҷора мешинад.

Таъсири коронавирус ба ҳамкориҳои  Маскав, Вашингтон ва Пекин

"Яке аз пайвандони ҳамсари ман дар мағозае ба ҳайси фаррош кор мекунад ва ба фикри ман ин маризиро маҳз ӯ ба хонаводаи мо ворид кард. Тасб дошт ва аҳволаш вазнин буд. Ман ҳар бегох ба ӯ чак - чак ва сӯзандору мегузарондам. Як рӯз вақти сӯзандорӯ гузарондан нӯги сӯзан нохост ба дасти ман халид ва вазъи ман аз рӯзи баъдӣ бад шудан гирифт", - ба ёд овард Фазила аз гирифтор шудани худ ба ин маризӣ.

Ӯ мегӯяд, шояд ин вирус тавассути сӯзан ба баданаш  ворид шуд ва ҷараёни паси сар кардани маризӣ дарозу вазнин тӯл кашидаст.

"Се рӯзи аввал тасб мекардам, сулфаи хушк доштам, аммо вазнин набуд".

Фазиларо аз ҳама беш бемадорӣ ва дарди устухонҳои дасту пой азият додааст. Ҳамчунин сӯзиши қафаси сина ва пушти гарданаш низ ҳафтаҳо давом мекард.

Ӯ мегӯяд, аз рӯзи аввали гирифтор шудан ба беморӣ даррав ба табобати худ шурӯъ кард, аммо на духтур рафту на пизишконро назди худ хонд.

"Шояд гузарондани сӯзандору ва истеҳмоли доруҳои зиддӣ вирусӣ то ҳадде роҳи паҳншавии ин маризиро дар бадани ман боз дошт" - мегӯяд ӯ.

Фазила мегӯяд, аҳволи беморонро бештар хабару маълумотҳое, ки бобати ин маризӣ дар шабакаҳои иҷтимоӣ паҳн мекунанд, вазнинтару бадтар мегардонад.

“Ман пас аз тамошои як навор, ки дар он маризи вируси COVID – 19 аломатҳои бемории худ ва то пайваст шудан ба  дастгоҳи нафасдиҳии сунъӣ нақл мекард, якбора бемадор шудам. Зеро ҳамаи аломатҳое, ки ӯ номбар мекард ман ҳам аз онҳо ранҷ мебурдам. Маро даҳшате фаро гирифт”.

Аммо ба хотири кӯдаки 7 – солаи худ, набардашро аз ҳуҷуми вируси COVID – 19 идома медод.

Супоридани ташхис

Нафастангиро Фазила дар ҳафтаи дуюм ҳис кард ва пас аз ин даррав пеши духтур шитофт.

"Аз танг шудани нафасам дар ҳарос мондам. Агар қаблан ба гирифтор будани худ ба маризии сироятии коронавирус шиква медоштам, пас аз мушкил шудани нафаскашиям боварӣ ҳосил кардам, ки дар ҳақиқат ман ҳам ба доми ин вирус афтодам".

Дар муолиҷахона (поликлиника), пизишки навбатдор аввал тасби ӯро санҷида, фаъолияти шушҳояшро гӯш кард.

Ба дархости Фазила барои гузаштан аз ташхиси компютерӣ табиб ҷавоби рад додаст. Танҳо пешниҳод намудаст, ки метавонад ташхис аз бинӣ ва гулӯи ӯро барои гирифтор будан ва ё набуданаш ба коронавирус бигарад.

Пас аз як ҳафта ба ин табиби тоҷик натиҷаи ташхисашро тариқи занги телефонӣ расонданд ва гуфтанд, ки ӯ гирифтори вируси COVID – 19 мебошад.

Власова дар бораи боз кардани сарҳади Русия: бе муҳоҷирон намешавад

Дар ин асно кӯдаки 7 – солаи ӯ низ тасб кард ва нишонаҳои бемадорӣ дар ӯ зуҳур мекарданд. Пас аз ташхиси табибон маълум гардид, ки духтарчаи ӯ низ гирифтори ин вирус аст.

"Кӯдакам хушбахтона бо сабукӣ ин бемориро паси сар кард", - мегӯяд ӯ.

Бо дақиқ шудани ташхиси ӯ аз Маркази COVID – 19 дар Маскав ҳамарӯза ба телефони Фазила занг зада, аз вазъи саломатии ӯ пурсон мешуданд.

"Ин маризӣ бо гузашти як моҳ маро ба ҳолам гузошт. Дигар хастагӣ ва сӯзиши қафаси сина ва пуштамро эҳсос намекардам. Ба хулоса омадам, ки иродаи қавӣ ва рӯҳан афтода нашудан дар пирӯз шудан бар ин маризӣ бисёр нақши муассир дорад. Некбин будан бисёр зарур аст  ва ба сиҳат шудани худ бояд боварӣ дошт".

Дар Русия ба мисли Фазила даҳҳо шаҳрвандони Тоҷикистон ба ин маризӣ гирифтор шуданд. Хушбахтона қисмати зиёди беморон ин вирусро бо сабукӣ паси сар карданд, аммо сафи тоҷикистониёне, ки бар  асари гирифтор шудан ба ин беморӣ ҷон аз даст додаанд, мутаасифона кам нест.

Бар хабари Вазорати умури хориҷии Тоҷикистон танҳо аз санаи 19 то 30 – юми май аз Федератсияи Русия 58 тобути шаҳрвандони кишвар ба ватан интиқол дода шуд.

Ин ҳам дар ҳолест, ки муддати беш аз 1 моҳ равобити ҳавоӣ миёни Тоҷикистону Русия баста буд. Ҷасади аксар шаҳрвандони Тоҷикистон, ки бар асари ин маризӣ дар Русия ҷон бохтанд, имкони ба ватан мунтақил намудан мавҷуд набуд. Аз ин рӯ, онҳоро дар қаламрави Русия ба хок супурданд.

124
Барчаспҳо:
маризӣ, тоҷик, пизишк, Маскав
Мавзуҳо:
Пайомадҳои COVID-19 дар Тоҷикистон ва ҷаҳон
Милисаҳо, акс аз бойгонӣ

“Занма рӯз намедиҳад”: чаро Холалӣ падарашро кушт-видео

0
Вазорати умури дохилии Тоҷикистон бо нашри гузориши видеоӣ тафсилоти бештари марги падар аз ҷониби писарро дар ноҳияи Вахш ироа кард

ДУШАНБЕ, 4 июн — Sputnik. Тибқи гузориши ВУД, маъмурини милиса Тӯхтаев Холалӣ, сокини 35 - солаи ноҳияи Вахшро барои даст доштан дар марги падараш, Тӯхтаев Холбобои 58 – сола боздошт кардаанд.

Манбаъ афзуд, Холалӣ ба далели он, ки падараш қаблан зани 30-солаашро латукӯб кардааст,  шаби 28-уми майи соли 2020, тахминан соати 23:30-дақиқа, ӯро бо офтоба чанд бор задааст. Дар натиҷа падари маҷруҳ дар беморхона ҷон додааст.

Писари муттаҳам дар гузориши видеоӣ изҳор медорад, ки “занма рӯз намедиҳад. Задай, кӯдаки майдаакима тарсондай. Боз занам ҳаштмоҳа ҳомиладорай. Ғам медиҳад, аз хона буро мегӯяд”. Ӯ илова намуд, ки бо офтоба чанд бор ба сари падараш зад.

Дар натиҷа ҷабрдида ҷароҳатҳои вазнини ҷисмонӣ бардошта, дар беморхона  ба ҳалокат расидааст.

ВУД Тоҷикистон мегӯяд, нисбати гумонбаршаванда парвандаи ҷиноятӣ бо моддаи 110 қисми 3 Кодекси ҷиноятии Ҷумҳурии Тоҷикистон оғоз гардида, тафтишот идома дорад.

0
Барчаспҳо:
писар, падар, ҷиноят, Тоҷикистон