Вид на город Хорог, ГБАО.

Бе фоида ва ҳатто зарар: дарсҳои бадахшонии “вируси корона”

1105
(Таҷдидшуда 12:24 08.06.2020)
Болоравии арзиши маводи ғизоӣ дар Бадахшон, ки эҳтимолашро қабл аз буҳрони “вируси корона” қавӣ медонистанд, иттифоқ наафтод. Арзишҳо дар вилоят тағйир ё фарқи ҷиддие аз манотиқи дигар накарданду ҳоло ҳам намекунанд

ДУШАНБЕ, 8 июн – Sputnik, Фахриддин Холбек. Ғолиб Ниятбеков, сухангӯи ҳукумати Вилояти мухтори Кӯҳистони Бадахшон ба Sputnik Тоҷикистон гуфт, ин дастоварди тамоми ниҳодҳои масъул шурӯъ аз идораҳои давлатӣ дар Душанбе то як соҳибкори оддӣ дар Хоруғ аст:

“Мо ҳанӯз моҳи феврал даст ба кор шуда будем. Таҳлили мо аз вазъе, ки дар ҷаҳон пеш меомад, ин буд, ки бояд захираҳои худро дошта бошем. Мо ниёзҳои вилоятро ҳам бо мақомоти кишвар ва ҳам ширкатҳое, ки бо тиҷорати маводи ғизоӣ машғуланд, ба миён гузоштем. То оғози моҳи май бо супориши шахсан президенти Тоҷикистон Агентии захираҳои моддии давлатии назди ҳукумат ин навъи маводро дар ихтиёри мо гузошт ва ҳам ширкатҳои анборҳо пур доштанд”, - гуфт Ғолиб Ниятбеков.

Бадахшон вилояти саросар кӯҳистонии Тоҷикистон аст, ки 220 ҳазор аҳолӣ дорад, аммо 47% - и қаламрави кишварро ташкил мекунад. Ин вилоят ба далели кам будани заминҳои кишоварзӣ имкони таъмини худ бо маводи ғизоиро надорад.

Воридоти амвол ба Бадахшон низ ба далели адами роҳи оҳану роҳҳои заминии саъбулубур ба сахтӣ тамом мешавад ва ҳатто дар замони Шӯравӣ қимати ҳама гуна маҳсулот дар вилоят аз қисматҳои дигари Тоҷикистон фарқ мекард. Маҳсулоти хӯрока низ умдатан аз шаҳри Душанбе, навоҳии тобеъи ҷумҳурӣ, вилоятҳои вилоятҳои Хатлон Суғд ва ҳам Қирғизистон ворид мешавад.

Дар оғози пандемия ё ҷаҳонӣ шудани “вируси корона” ин нигарониҳо дар Тоҷикистон ба вуҷуд омад, ки дар ҳоли баста шудани марзи миёни кишварҳо коҳиши воридот ва болоравии арзиши маводи ғизоӣ аз эҳтимол дур нест. Бо ин тахмину гумонҳо сокинони Душанбе ва дигар шаҳрҳои Тоҷикистон 4 марти соли равон ба бозору дӯконҳо рехтанд ва арзиши маводи ғизоӣ якбора боло ҷаҳид. Ҳамчунин вазъ дар бозори Хоруғ, маркази маъмурии Бадахшон низ пеш омад, аммо мақомот зуд даст ба кор шуданд.

Ҳотамбек Алиназаров, як сокини Хоруғ ва шоҳиди он рӯзҳо ба Sputnik Тоҷикистон гуфт, нигаронии мардуми шаҳр ба ин далел, ки вилоят аз марокизи захираҳои маводи ғизоӣ дур асту болоравии нархҳо бесобиқа хоҳад буд, низ сар ба дӯкону бозорҳо заданд.

“Аммо он рӯз мақомот нагузоштанд, ки қиматҳо дар бозорҳо тағйир кунад. Гуфтанд, ки захира вуҷуд дорад ва нархҳо набояд дар пайи воҳима ва ба бозор рехтани афроди сарватманд гарон шаванд. Ҳеҷ касро иҷоза надоданд, ки аз меъёр зиёд маҳсулот харад. Масалан, қимати килои сирпиёз, ки мегуфтанд, барои ҷилавгирӣ аз маризиҳои сироятӣ фоида дорад, чанд соат дар бозори Хоруғ 100 сомонӣ буд. Аммо мақомот ҳозир шуданд ва гуфтанд, ки нарх аз 60 сомонӣ зиёд нашавад. Дар дигар шаҳрҳо, аз ҷумла Душанбеву Хуҷанд ва Бохтор як килои он ба 80 – 90 сомонӣ дастрас мешуд”, - гуфт сокини Хоруғ.

Амрихудо Мамадёрбеков, директори “Ширкати тиҷоратии Помир”, ки бо тиҷорати меваву сабзавот машғул аст, ба Sputnik Тоҷикистон гуфт, рӯзҳое, ки дар шаҳрҳои дигари Тоҷикистон арзиши маҳсулоти хӯрока якбора боло рафт, дар бозори Хоруғ тағйири зиёд ва воҳимае пеш наомад.

“Масалан, ҳамин картошка дар шаҳри Душанбе ба 10 то 15 сомонӣ боло рафт, аммо дар Хоруғ қимати он аз 7 – 8 сомонӣ зиёд нашуд, зеро мо захираҳоро ба бозор ироа кардем ва ҳар килоро бо қимати 5,5 - 6 сомонӣ дар ихтиёри фурӯшандагони бозорнишин гузоштем”, - гуфт Амрихудо Мамадёрбеков.

Ширкати тиҷоратии Помир соли 2017 сабти ном шуда, соли 2018 ба фаъолият шурӯъ кард. Шояд барҷастатарин корнамоиаш то ба ҳол ин буда, ки дар буҳрони “вируси корона” бо захираи ҳудуди 300 тон сабзавоту мева тавонист қимати маҳсулоти ниёзи аввалро дар Хоруғ муътадил нигаҳ дорад, он чӣ аз нигоҳи мардум пӯшида намонд.

Ба қавли Амрихудо Мамадёрбеков, ин ширкат он замон меваву сабзавотро ба нархҳои дастрас вориди бозор кард, аз ҷумла ҳар кило картошка - 5.30, пиёз - 3, сабзӣ - 2, карам - 2.30, гулкарам – 7, лаблабу - 4.50, норанҷӣ (апелсин) – 23, себ – 12, нок – 10, банан – 16, лимӯ – 38 сомонӣ арзиш дошт. Бархе нархҳо дар қиёс бо дигар манотиқи кишвар арзонтар буданд, аз ҷумла лимӯ, ки дар хостгоҳаш водии Вахш то 40 сомонӣ хест.

Амрихудо Мамадёрбеков мегӯяд, он замон ширкат ба ин натиҷа расид, ки бо истифода аз вазъ ҷайб фарбеҳ накунад, балки танҳо бо арзишу роҳкиро маҳсулотро вориди бозор намояд.

Нозирони ҳол дар Бадахшон мегӯянд, ширкатҳо ва соҳибкорони инфиродӣ дар Бадахшон зимни як ҷаласа ба ин натиҷа расиданд, ки дар чунин вазъи буҳронӣ ва дурнамои торик аз ҳосил кардани суд амалан даст кашанд.

Файзи Мирҳасан, коршиноси маҳаллӣ, ба Sputnik Тоҷикистон гуфт, ҳанӯз моҳи апрел як эътилофи соҳибкорон арзи вуҷуд карда, нахуст як миллион сомонӣ дар миён гузоштанд, то ба вилоят орд ворид кунанд.

“Ин орд аз Суғд ба вилоят интиқол ёфт. Соҳибкорон бар иловаи роҳкиро ду сомонӣ фоида сари ҳар халта гузошта, ҳамонро ҳам ба шифохонаҳои вилоят тақдим карданд. Ҳоло як халта орд дар бозори Хоруғ аз 260 то 280 сомонӣ аст. Бақия маводи ғизоӣ, аз қабили равғану биринҷ ва ғайраро низ аз ҳамин роҳ ворид карданд. Бархе ҳам зиён диданд. Аммо се-чор ҳазор сомонӣ зиён барои тоҷир маблағи қобили мулоҳизае нест”, - гуфт Файзи Мирҳасан.

Ҳамсӯҳбатони Sputnik Тоҷикистон дар Бадахшон мегӯянд, марҳалаи ҳассоси буҳрони “вируси корона” бидуни мушкили хос пушти сар шуд, аммо оянда чӣ армуғон дар пай хоҳад дошт, равшан нест. Ба қавли онҳо, ҳамоно аз ҳамин хат – муқовимат ба ҳама гуна чолишҳо пеш хоҳанд рафт, зеро то буҳрон ҷаҳонӣ аст, “Боми ҷаҳон” ҳам буҳронӣ хоҳад монд.

1105
Барчаспҳо:
картошка, сабзавот, арзиш, маводи ғизоӣ, сокинон, Бадахшон, Тоҷикистон
Президент Таджикистана Эмомали Рахмон на открытии новых культурных объектов в Хатлонской области

"Бародарамонро аз даст додем": ҳамдардии Раҳмон бо Навоф ал-Аҳмад

683
(Таҷдидшуда 16:57 30.09.2020)
Президенти Тоҷикистон Эмомалӣ Раҳмон дар робита ба даргузашти Шайх Сабоҳ ал- Аҳмад ал-Ҷобир ас-Сабоҳ, амири Давлати Қувайт, ки дар сини 92-солагӣ  аз олам даргузашт, изҳори таслият кардааст

ДУШАНБЕ, 30 сен — Sputnik. Президенти Тоҷикистон Эмомалӣ Раҳмон ба Амири Давлати Қувайт Шайх Навоф ал-Аҳмад ал-Ҷобир ас-Сабоҳ барқияи изҳори тасаллӣ ирсол намуд.

Бино ба гузорши котиботи раисиҷумҳур, Раҳмон дар номаи таслият аз хабари даргузашти Амири Давлати Кувайт Шайх Сабоҳ ал-Аҳмад ал-Ҷобир ас-Сабоҳ андӯҳгин шудааст.

"Бо реҳлати он ходими шоистаи сиёсиву давлатӣ мо бародари гиромии худро, ки бо хидматҳои бузурги инсондӯстонааш дар минтақа ва ҷаҳон нуфузу эътибори хоссаро соҳиб гашта буд, аз даст додем", - омадааст дар нома.

Раҳмон афзуда, ки марҳум бо саҳми босазояш дар густариш ва таҳкиму тавсеаи муносибатҳои дӯстиву ҳамкориҳои судманди Тоҷикистону Кувайт ҳамеша дар хотироти мо боқӣ мемонад.

"Вобаста ба ин талафоти гарон ба Шумо ва ҳамаи наздикону пайвандони марҳум, ба тамоми мардуми бародари Қувайт таъзияву таслияти сидқии ин ҷонибро иброз намуда, аз даргоҳи Худованди бузург сабри ҷамил масъалат дорам".

Президенти Тоҷикистон дуо карда, ки "Парвардигор марҳуми олиқадрро шоистаи раҳмат намояд ва ҷояшро ҷаннат гардонад. Инна лиллоҳи ва инна илайҳи роҷиъун".

Ёдрас мешавем, ки Шайх Сабоҳ ал- Аҳмад ал-Ҷобир ас-Сабоҳ, амири Давлати Қувайт -куҳансолтарин ҳокими араб дар Иёлоти Муттаҳидаи Амрико дар синни 92-солагӣ даргузашт.

Ба иттилои манбаъ, амир сар аз моҳи июл дар яке аз беморхонаҳои иёлати Миннесота бистарӣ шуда, ҷарроҳӣ шуда буд.

683
Барчаспҳо:
таслият, ҳамдардӣ, даргузашт, Амири Кувайт, Қувайт, Тоҷикистон
Эмомали Рахмон открыл среднюю школу № 96 в Душанбе

Эмомалӣ Раҳмон ба ноҳияи Шаҳринав сафар кард

518
(Таҷдидшуда 11:28 30.09.2020)
Президенти Тоҷикистон сафарашро аз ифтитоҳи Комплекси агросаноатии Хоҷагии деҳқонии "Ҳоҷӣ Аҳмад" оғоз кардааст

ДУШАНБЕ, 30 сен — Sputnik. Президенти Тоҷикистон Эмомалӣ Раҳмон бо сафари корӣ ба ноҳияи Шаҳринав рафт. Кишвардорро фаъолону сокинон истиқбол гирифтанд, хабар медиҳад котиботи раисиҷумҳур.

Гуфта мешавад, ки ин ҷо нахуст президент дар деҳоти Чустии ноҳияи Шаҳринав Комплекси агросаноатии Хоҷагии деҳқонии "Ҳоҷӣ Аҳмад"-ро ба баҳрабардорӣ расонидааст.

Тибқи ититлои манбаъ, комплекси мазкур аз Корхонаи муштараки Тоҷикистону Ӯзбекистон ва Русия — "Марва-мебел", коргоҳи дӯзандагӣ, меҳмонхона, ошхона, гармхона, ҳавзи моҳӣ ва боғу токзор иборат мебошад.

Корхонаи муштараки "Марва-мебел" дар ошёнаи якуми бинои дуошёна ҷойгир мебошад.

Барои мебелсозӣ аз кишварҳои Урупо 16 адад дастгоҳи замонавӣ ворид гардидаанд.

Вобаста ба фармоиш дар корхонаи навбунёд беш аз 300 номгӯй мебел, аз қабили ҷевону рахти хоб, мизу курсӣ барои хона, корхона, ошхона ва муассисаҳои таълимӣ, инчунин дарҳои байниҳуҷрагӣ ва кату нишасткурсиҳои гуногунҳаҷм истеҳсол карда мешаванд.

Гуфта мешавад, дар корхонаи мазкур имкон аст дар як шабонарӯз беш аз 8 метри мукааб тахта коркард карда шавад.

Манбаъ таъкид карда, ки дар корхона маҳсулот аслан вобаста ба фармоиш истеҳсол карда шуда, аз лиҳози тарҳ ва сифат ба стандарти байналмилалӣ ҷавобгӯ мебошад.

Чӯбу тахта, фурнитура ва дигар ашёи хом аз Русия ва Ӯзбекистон ворид карда мешаванд.

Ҳамчунин гуфта мешавад, ки кандакорӣ дар чӯб, ки барои миллати тоҷик меросист, дар корхона васеъ ба роҳ монда шудааст.

Ба ин кор нафарони соҳибкасб ва дорои таҷрибаи зиёди корӣ ҷалб шудаанд.

Дар корхонаи мебелсозӣ 30 кас бо ҷойи кори доимӣ ва маоши хуб таъмин шудаанд.

Президент ба масъулин барои васеъ намудани доираи фаъолияти корхона ва ба роҳ мондани содироти маҳсулот ба хориҷи мамлакат дастур дода, мутахассисонро ба омӯзонидани нозукиҳои кори мебелсозӣ, аз ҷумла кандакорӣ дар чӯб ба насли наврасу ҷавон ҳидоят кардааст.

518
Барчаспҳо:
сафари корӣ, Эмомалӣ Раҳмон, Шаҳринав
В.Путин принимает участие в четвертом Каспийском саммите

Рӯҳонӣ: дахолати хориҷӣ дар муноқишаи Боку ва Ереван авзоъро печидатар мекунад

0
(Таҷдидшуда 21:53 30.09.2020)
Раисҷумҳурии Эрон бо ибрози нигаронӣ аз даргирии ахир байни Арманистон ва Озарбойҷон, ҳаргуна дахолати хориҷӣ дар ин моҷароро мӯҷиби печидатар шудани авзоъ донист

ДУШАНБЕ, 30 сен — Sputnik. Ҳасани Рӯҳонӣ, раисҷумҳури Эрон ахиран дар тамоси телефонӣ бо Никол Пашиниян, нахуствазири Арманистон бо таъкид бар аҳамияти сулҳ, суботу амният дар минтақа афзуд, ки минтақаи Ғарби Осиё тавони бесуботӣ ва ҷанги ҷадидро надорад, иттилоъ додааст хабаргузории "Парстудей".

Тавре манбаъ қайд намудааст, Рӯҳонӣ бо баёни ин ки бояд барои ҳаллу фасли масъалаи Қарабоғ дар чорчӯби муқаррароти байналмиллалӣ ва тамомияти арзӣ роҳи ҳалле ёфт шавад таъкид кард, ки таваққуфи ин даргириҳо барои Эрон муҳим аст ва Теҳрон интизор дорад Арманистон ва Озарбойҷон бо дироят ва хештандорӣ дар ин масир гом бардоранд.

Раисҷумҳури Эрон бо таъкид бар ин ки ҷанг роҳи ҳалли бартараф кардани мушкилоту танишҳо ва ихтилофот нест гуфт, ки ҳаргуна дахолати хориҷӣ дар ин моҷаро на танҳо ба ҳаллу фасли мушкил кумак намекунад балки даргириҳо ва танишҳоро тӯлонитар ва авзоъро печидатар хоҳад кард.

Рӯҳонӣ  ҳамчунин бо ишора ба аҳамият ва собиқаи тӯлонии равобити Эрон бо Ҷумҳурии Озарбойҷон ва Арманистон, омодагии Теҳронро барои ифои ҳаргуна нақши созанда, ки мавриди назари ду кишвари дӯсту ҳамсоя бошад, эълом кард.

Никол Пашиниян низ бо ишора ба таҳаввулоти ахири ношӣ аз даргириҳои низомии Арманистон бо Озарбойҷон, танишу даргириро ба зиёни ҳамаи кишварҳои минтақа донисту аз ҳаргуна ибтикори амале барои таваққуфи хушунатҳо истиқбол кард.

Нахуствазири Арманистон ҳамчунин аз мудохилаи хориҷӣ дар масъалаи ихтилофоти Арманистон бо Озарбойҷон ибрози нигаронӣ кард.

0
Барчаспҳо:
Ереван, Боку, муноқиша, даргирӣ, моҷаро, хориҷӣ, Озарбойҷон, Арманистон, Эрон