Юрий Терентевич Лобанов

Нахустин қаҳрамони олимпии Тоҷикистон дар гузашт

68
(Таҷдидшуда 16:26 02.05.2017)
Қаҳрамони қоиқронӣ дар Бозиҳои олимпики тобистонии соли 1972 Юрий Лобанов дар Маскав аз ҷаҳон дар гузашт

ДУШАНБЕ, 2 мая — Sputnik. Юрий Лобанов нахустин қаҳрамони олимпӣ аз Тоҷикистон буд. Вай 1 май дар шаҳри Маскав дар 65-солагӣ аз олам чашм пӯшид.

Юрий Лобанов 29 сентябри соли 1952 дар шаҳри Душанбе зода шуда буд. Вай аз кӯдакӣ қоиқрониро варзиш мекард ва аз ҳамвандони ҷамъияти варзишии "Тоҷикистон" буд.

Юрий Лобанов дастпарвари Донишкадаи давлатии тарбияи бадании Тоҷикистон буд.

Дастовардҳо

Юрий Лобанов нахустин варзишкор аз Тоҷикистон аст, ки қаҳрамони олимпӣ шудааст. Вай дар Бозиҳои олимпики тобистонии соли 1972 дар Олмон ҳамроҳ бо Владас Чеснюкас дар мусобиқоти қоиқронии дукаса бо каное дар 1000 метр медоли тилло ба даст оварда буд. Вай аз Бозиҳои олимпики соли 1980 дар Маскав дар ҳамин варзиш ҳамроҳ бо Василий Юрченко медоли биринҷӣ овард.

Юрий Лобанов дар мусобиқоти қоиқронии дукаса бо каноэ 10 бор қаҳрамони ҷаҳон — 1973 (10 000 м), 1974 (500 м, 1 000 м ва 10 000 м), 1975 (500 м ва 10 000 м), 1977 (1 000 м ва 10 000 м), 1979 (1 000 м ва 10 000 м), ду бор — 1971 (500 м) ва 1973 (1 000 м) — барандаи медоли нуқра ва се бор — 1977 (500 м) ва 1978 (1 000 м) — барандаи медоли биринҷӣ шудааст.

Вай дар солҳои 1972 — 1977 борҳо қаҳрамони Иттиҳоди Шуравӣ дар мусобиқоти гуногун шуда буд. Давлати Шуравӣ ӯро барои дастовардҳояш дар риштаи варзиш бо "Нишони Ифтихор" ва нишони "Барои густариши варзишу тарбияи баданӣ" қадрдонӣ карда буд.

68
Барчаспҳо:
қаҳрамон, Бозиҳои олимпӣ, Тоҷикистон
Ҳунарнамоии тими мунтахаби ҶТ дар марҳалаи selfdefence

Талоши таеквандочиёни тоҷик барои холҳои олимпӣ: санаи сабқат дақиқ шуд

12
(Таҷдидшуда 12:50 27.02.2021)
Иттиҳоди таеквондои Осиё - WT Asia санаи нави баргузории мусобиқаи интихобӣ ба Бозиҳои олимпии Токио-2020-ро эълон кард

ДУШАНБЕ, 27 фев — Sputnik. Тибқи иттилои Кумитаи миллии олимпии Тоҷикистон, мусобиқа дар шаҳри Аммони давлати Урдун рӯзҳои 21-22 май баргузор хоҳад шуд. То ин замон баргузории мусобиқа 14-15 май дар нақша буд.

Ба иттилои Кумитаи миллии олимпӣ ин бори чандум аст, ки мусобиқаи таекванда ба таъхир андохта мешавад. Тибқи нақшаи қаблӣ, мусобиқаи интихобии олимпӣ оид ба таеквондо дар қораи Осиё бояд 26-27 март доир мегашт.

Мусобиқаи таеквондо дар Бозиҳои олимпӣ аз рӯи 8 вазн – 4 вазн миёни мардон ва 4 вазн миёни бонувон сурат мегирад ва аз тамоми ҷаҳон ҳамагӣ 128 варзишгар имкони иштирок дар бозиҳоро доранд.

Кумитаи миллии олимпӣ тавзеҳ дод, ки роҳхат ба Бозиҳои олимпӣ дар намуди таеквондо бо ду роҳ тақсим карда мешавад – мусобиқаҳои интихобӣ ва радабандии ҷаҳонӣ. Тариқи радабандии ҷаҳонӣ 40 роҳхат – 5 роҳхат дар ҳар вазн, тариқи силсилаи Гранд Слам 8 роҳхат ҷудо мегардад. 72 роҳхати дигарро варзишгарон дар мусобиқаҳои интихобии қоравӣ (ҷойҳои якуму дуюми ҳар вазн) ба даст меоранд.

Тими мунтахаби Тоҷикистон оид ба таеквондо барои дарёфти роҳхат талош мекунад. Аз ҷумла, 3 узви дастаи мунтахаб – Ҳалимова Моҳру, Ойматова Муниса, Шомаҳмадов Муҳаммадҳасан аз дастгирии молиявии Кумитаи миллии олимпии Тоҷикистон бархӯрдоранд ва барои ба даст овардани роҳхати олимпӣ талош мекунанд.

12
Барчаспҳо:
Олимпиада, Тоҷикистон
Рустам Эмомали президент ФФТ

Президенти ФФТ ба деҳот рӯй овардааст: ташкили лига ва чемпионати нав

405
(Таҷдидшуда 10:17 27.02.2021)
Кумитаи кор бо ҷавонон ва варзиш ва Федератсияи футболи Тоҷикистон Барномаи махсуси президенти ФФТ дар бораи рушди футбол дар деҳоти ҷумҳурӣ барои солҳои 2021-2024 – ро тасвиб карданд

ДУШАНБЕ, 27 фев — Sputnik. Тибқи иттилои ФФТ, дар доираи барнома ҳар сол мусобиқаи варзишӣ байни дастаҳои футболи деҳаю шаҳракҳои ҷумҳурӣ дар чор марҳила баргузор мегарданд.

“Дар ин мусобиқаҳо бозигарони аз 18 то 35-сола иштирок кардан метавонанд. Хароҷоти се марҳила, аз ҷумла лавозимоти варзишию туҳфаҳо барои ғолибонро мақомоти маҳаллию сарпарастон ва хароҷоти марҳилаи ниҳоиро Кумитаи кор бо ҷавонон ва варзиш пардохт мекунанд”, - омадааст дар иттилоия.

Тибқи нақша дар доираи татбиқи Барнома соли 2023 таъсиси Лигаи футболи деҳот дар назар дошта шудааст.

ФФТ таъкид намудааст, ки ҳадафи барнома пешрафти бозии футбол дар деҳот, баргузории мусобиқаҳои мухталиф байни дастаҳои футболи деҳот, бозсозӣ ва беҳтар гардонидани сифати майдонҳои футбол,  ҷалби шумораи бештари аҳолӣ ба бозии футбол ва тавассути бозии футбол дар рӯҳияи ватанпарварӣ тарбият намудани наврасону ҷавонон дар деҳоти кишвар мебошад.

405
Барчаспҳо:
чемпионат, лигаи аввали футбол, Тоҷикистон
Председатель ГБАО Ёдгор Файзов

Ёдгор Файзов аз баҳси забонҳои помирӣ ва пешниҳодҳо ба Ҳукумат гуфт

0
(Таҷдидшуда 14:29 27.02.2021)
Ёдгор Файзов, раиси Вилояти Мухтори Куҳистони Бадахшон аз баҳсу мунозираҳо атрофи забонҳои помирӣ гуфт, ки ба иттилои ӯ ҳамарӯза сурат мегиранд

ДУШАНБЕ, 27 фев — Sputnik. Файзов зимни ҳамоиш дар мавзӯи забони модарӣ гуфт, ҳамарӯза оид ба забонҳои маҳаллӣ дар вилоят баҳсу мунозираҳо рафта истодаанд. Ӯ таъкид намуд, ки ба мақомоти иҷроияи ҳокимияти давлатии вилоят ва тариқи шабакаҳои иҷтимоӣ муроҷиатномаҳо ва пешниҳодоти зиёд ворид мегарданд.

Тибқи иттилои котиботи ҳукумати ВМКБ, дар ин ҳамоиш масоили таърихӣ, таҳияи алифбоҳои забонҳои помирӣ, ҷанбаҳои қонунии ҳимоя ва инкишофи забонҳои помирӣ ва таълифи осори бадеӣ ба ин забонҳо мавриди баррасӣ қарор дода шуданд.

Муқбилшоҳ Аламшоев: забонҳои помирӣ ба хатт ниёз доранд

Дар мавриди пешниҳодҳое, ки ба ҳукумати вилоят ироа шудаанд, тафсилоти бештар дода нашуд, аммо забоншиносон борҳо таъкид кардаанд, ки забонҳои помирӣ ва яғнобӣ бояд дар дабистонҳои маҳалли корбурдашон ва ҳамчунин бахшҳои забоншиносӣ омӯзонда шаванд. 

Феълан дар ҳудуди ВМКБ ҳафт забон — рошорвӣ, шуғнонӣ, рӯшонӣ, хуфӣ, бартангӣ, язгуломӣ ва ишкошимӣ корбурд доранд, ки асосан шифоҳӣ буда, хат надоранд. Масъалаи таҳияи алифбо ва хат аз иқдоми дигари муҳим барои ҳифз ва рушди забонҳои помирию яғнобӣ арзёбӣ мешавад.

Қаблан Кумитаи забон ва истилоҳот тавсия дода буд, ки таҳқиқу омӯзиши забонҳои бадахшонӣ ва яғнобӣ ва таълими ин забонҳо ба соҳибзабонони ин минтақаҳо роҳандозӣ гардад, аммо то ҳол иқдоми амалие дар ин самт сурат нагирифтааст.

0
Барчаспҳо:
забон, Тоҷикистон