Мубориза мебарам: Дилшод Назаров аз нақшаҳои минбаъдааш гуфт
(Таҷдидшуда 11:48 05.10.2019)
Қаҳрамони олимпии соли 2016, гурзандози тоҷик Дилшод Назаров, ки дар робита ба истифодаи допинг муттаҳам шуд ва аз идомаи минбаъдаи мусобиқаҳо маҳрум гардид, дар бораи нақшаҳои минбаъдаи худ гуфт ДУШАНБЕ, 5 окт — Sputnik. Қаҳрамони тоҷик Дилшод Назаров дар сафҳаи Instagram бобати маҳрумияти худ аз идомаи мусобиқаҳо ибрози назар кард.
"Иттиҳоме, ки алайҳи ман эълон намуданд, дар баробари ман аҳли оилаи маро ва мухлисону ҳамватанонамро дар ҳолати шок андохт. Дар асл ман қурбонии қаллобӣ шудам", - навиштааст варзишгари тоҷик.
Назаров зимнан илова намудаст, ки дар баробари қаҳрамон будан, ҳамчунин тарбиятгари се фарзанд ва Президенти Федератсияи сабуки Тоҷикистон аст. Аз ин рӯ ба ҳеҷ ваҷҳ аз чунин роҳи ифлос соҳиб шудан ба унвони Қаҳрамони ҷаҳон истифода намекард.
"Ман на танҳо худамро, балки пеш аз ҳама ватанамро муаррифӣ мекунам ва пайваста ҷонибдори бозии шаффоф будам, ҳастам ва хоҳам монд", - илова намудаст Назаров.
Дилшод Назаров аз Қатар ба Душанбе баргашт
Гузашта аз ин, Назаров мегӯяд, танҳо фикр дар бораи истифодаи допинг ӯро сахт таҳқир мекунад.
"Варзиш бояд ҳамеша шаффоф бошад ва қаҳрамони олимпӣ муаррифгари бозии соф ва ҳамчун намуна барои дигарон бояд бошад", - мегӯяд ӯ .
Дилшод Назаров иттилоъ дод, ки ҳоло бо AIU ва IAAF ҳамкорӣ дорад ва парвандаи допинг дар Федератсияи варзиши Тоҷикистон баррасӣ мешавад. Зимнан илова кард, ки вай омода аст худро дар назди IAAF ва CAS дифоъ кунад, агар парванда дар он ҷо баррасӣ шавад.
Дилшод Назаров: ба ман як каме фурсат диҳед, то ба худ биёям
"Ман аз зиндагӣ шикоят намекунам, зеро зиндагӣ ҳамин аст, гоҳе паст гоҳе баланд. Аммо муборизаро то охир мерасонам", - таъкид мекунад Қаҳрамони ҷаҳон.
Барчаспҳо:
Ғолибияти духтарони ВМКБ ва "команда" - и Раҳимзода дар сабқати волейбол - аксҳо
(Таҷдидшуда 14:51 06.03.2021)
Дар Душанбе сабқати волейбол миёни бонувони манотиқи гуногуни кишвар барои ба даст овардани "Ҷоми раиси шаҳри Душанбе" ҷамъбаст шуд
ДУШАНБЕ, 6 мар – Sputnik. Духтарони волейболбози Вилояти Мухтори Кӯҳистони Бадахшон дар сабқати касбӣ ва бонувони ВКД дар мусобиқаи ғайрикасбӣ, ки ба муносибати Рӯзи Модар баргузор шуд, мақоми аввалро ба даст оварданд.
Дар ин сабқат 42 дастаи волейболбозони касбӣ ва ғайрикасбӣ ширкат карданд.
Дар мусобиқаи касбӣ - дастаи волейболбозони Вилояти Мухтори Кӯҳистони Бадахшон ҷойи аввал, дастаи Душанбе-1 ҷойи дуюм ва дастаи вилояти Суғд мақоми сеюмро ишғол намуданд.
Аз миёни волейболбозон дар сабқати ғайрикасбӣ, ки байни бонувони вазорату кумитаҳо ва ташкилоту муассисаҳо дастаи волейболбозони "Динамо"-и Вазорати корҳои дохилӣ ғолиб омада, соҳиби Ҷоми мусобиқа гардид.
Онҳо рӯзи 5-уми март дар даври ниҳоии мусобиқа дастаи Кумитаи давлатии амнияти миллиро бо ҳисоби 3:0 мағлуб сохтанд. Дар ин гурӯҳ мақоми сеюмро дастаи Раёсати маорифи шаҳри Душанбе ба даст овард.
Дар ин росто, рӯзи 6-уми марти соли 2021 вазири корҳои дохилӣ Рамазон Раҳимзода волейболбозони ғолибро бо ин дастовардашон ва иди бонувон – "Рӯзи Модар" табрику гуфт.
Ҳамчунин ба варзишгарони ғолиб тӯҳфаҳои хотиравӣ тақдим карда шуд.
Ғолибони мусобиқа аз ҷониби ташкилкунандагони чорабинӣ бо Ҷом, диплом, медалу Ифтихорнома ва мукофотпулӣ сарфароз гардонида шуданд.
Мусобиқаи мазкур бахшида ба таҷлили "Рӯзи Модар", ки бо ташаббуси Мақомоти давлатии ҳокимияти иҷроияи шаҳри Душанбе роҳандозӣ гардида буд, аз 10-уми феврал то 5 марти соли 2021 дар толори Муассисаи давлатии Маркази омодакунии олимпии тимҳои мунтахаби шаҳри Душанбе (Манеж) идома ёфт.
Барчаспҳо:
Футболбозони клуби “Хуҷанд” ба Туркия мераванд: мақсад чист?
(Таҷдидшуда 20:34 05.03.2021)
Футболбозони клуби “Хуҷанд” ба Туркия сафар карда 10 рӯз он ҷо мемонанд. Пеша аз сафар раиси вилояти Суғд бо онҳо мулоқот кардДУШАНБЕ, 5 март - Sputnik. Раиси вилояти Суғд Раҷаббой Аҳмадзода бо футболбозони клуби "Хуҷанд" дидору мулоқот кард.
Бино ба гузориши мақомоти вилояти Суғд, раиси вилоят аснои мулоқот бо ҳайати даста гуфтааст, ки роҳбарияти вилоят дар партави дастурҳои Эмомалӣ Раҳмон ба рушди намудҳои варзиш, аз ҷумла футбол таваҷҷуҳи зарурӣ зоҳир намуда, клубҳои футболро мунтазам дастгирӣ менамояд.
Дар ин росто бозингарони дастаи "Хуҷанд" бо мақсади баланд бардоштани маҳорату малака ва омодагӣ ба мавсими нави футбол, инчунин омӯзиши техникаҳои нави бозии футбол ба Ҷумҳурии Туркия сафарбар карда мешаванд.
"Бозингарони "Хуҷанд" давоми 10 рӯз дар Туркия се бозии рафиқона анҷом дода, барои иштирок дар чемпионатҳо омодагӣ мебинанд", - омадааст дар хабарнома.
Таъкид гардида, ки минбаъд дастаҳои футболи "Эсхата" ва "Истаравшан" низ барои такмили маҳорат ва мубодилаи таҷриба ба кишварҳои дуру наздик фиристода мешаванд.
Раиси вилоят дар поёни мулоқот ба шахсони масъул ҷиҳати беҳтар намудани шароити бозингарон, омодагии ҳамаҷонибаи дастаҳои футбол дар лигаи олӣ, рушди варзиш дар шаҳру навоҳӣ супоришҳои мушаххас додааст.
Барчаспҳо:
Дар Бадахшони Афғонистон 15 нафар зери тарма ҷон доданд
ДУШАНБЕ, 6 мар – Sputnik. Дар Афғонистон 15 нафар бар асари фаромадани баҳман ва ё тарма ҷон аз даст доданд.
Ба иттилои мақомоти Афғонистон, тарма рӯзи 4 март дар як гӯшаи дурдасти вилояти Бадахшони Афғонистон фаромад, ки он зери назорати толибон қарор дорад.
Макони фаромадани тарма рустои Зарандоб, ки дар ноҳияи Роғистон ҷойгир аст, гуфта мешавад. Дар ин макон кони тилло ҷойгир аст.
Масъулони Кумитаи ҳолатҳои фавқулодаи он кишвар хабар доданд, ки нахуст ҷасади 12 нафар аз зери тарма берун оварда шуд.
Сипас теъдоди қурбониёни ин офати табиӣ ба 15 нафар расид. Ҳамзамон панҷ нафари дигар бар асари фаромадани баҳман маҷрӯҳ шудаанд.
Дар Бадахшони Тоҷикистон бошад, рӯзи 24 феврал якбора 16 тарма дар масири Хоруғ - Ишкошим фаромад ва хушбахтона талафоти ҷонӣ дар пай надошт. Тарма танҳо барои чанд муддат баста шуд ва сипас бо талоши поксозони роҳ ин мушкилӣ бартарафгардид.
Барчаспҳо: