Гулнигор Тиллоева

Гулнигор Тиллоева: зебосанами забондон ва пуштибони муҳоҷирон

3928
(Таҷдидшуда 17:39 21.08.2017)
Гулнигор — зебодухтари хубсирате, ки ба нӯҳ забони ҷаҳон сухан мегӯяду мехоҳад пуштибони муҳоҷирон бошад

ДУШАНБЕ, 17 авг — Sputnik, Нилуфар Некқадам. Дар нахустин дидор бо Гулнигор Тиллоева чеҳрааш бароям бисёр ошно намуд. Сипас дар гуфтугӯ донистам, ки ӯ яке аз ғолибони барномаи "Зебосанам — 2011" аст, ки аз телевизиюни "Сафина" намоиш дода мешуд.

Гулнигор шаш сол боз дар хориҷ аз Тоҷикистон дониш меҷӯяд ва ҳамакнун низоми муҳоҷиратӣ дар Русия ва созвории муҳоҷирони тоҷикистонӣ дар ин кишварро пажӯҳиш мекунад. Ӯро ҷудо шудани хонаводаҳо дар паи муҳоҷирати шавҳарҳо аз Тоҷикистон нигарон кардааст.

Sputnik Тоҷикистон бо вай дар бораи донишҷӯӣ дар Қирғизистону Туркияву Олмон ва мушкилоти муҳоҷират дар Русияву дигар кишварҳо суҳбат кард.

Манижа Буйдоқова
© Фото : Из личного архива Манижи Будаковой

Гулнигор кист?

Гулнигор 23 октябри соли 1993 дар деҳаи Лангар дар ноҳияи Ишкошим ба дунё омааст. Мактаби миёнаро дар зодгоҳаш ба поён расондаву чаҳор сол дар Донишгоҳи Амрикоии Осиёи Марказӣ дар шаҳри Бишкек улуми иҷтимоъӣ ва сиёсиро фаро гирифтааст. Вай сипас бо бурсияҳои Туркияву Олмон дар Донишгоҳи фаннии Ховари Миёна дар Анқара ва Донишгоҳи Ҳумболт дар Берлин таҳсил мекунад. Ӯ мехоҳад пас аз хатми донишгоҳ дар Олмон дар созмонҳои муҳоҷират барои Тоҷикистон хидмат кунад. 

Гулнигор аз хурдӣ орзӯ дошта рӯзноманигор шавад, вале бовар дошта, ки ҳар касе метавонад бе маълумоти олӣ ҳам рӯзноманигор шавад, аз ин рӯ ҳангоми таҳсил дар синфи нӯҳум тасмим гирифтааст, ки сиёсатшинос мешавад.

Барои сиёсатшинос шудан Гулнигор омӯзишу пажӯҳиши ҷомеъаро пеш гирифтааст, чун, ба гуфти худаш, "сиёсатро намешавад ҷудо аз пажӯҳиши ҷомеъа омӯхт". Дар ин ришта ӯро донистани забонҳои форсии тоҷикӣ, инглисӣ, русӣ, олмонӣ, туркӣ, фаронсавӣ бисёр ба кор меояд. Вай ҳамчунин забонҳои вахӣ, шуғнӣ ва ишкошимиро низ медонад, ки аз забонҳои помирӣ ҳастанд. Гулнигор дар заминаи посдошту пажӯҳиши забонҳои помирӣ низ фаъол аст. 

Гулнигор Тиллоева
© Фото : Аз бойгонии Гулнигор
Гулнигор Тиллоева

Гулнигор пас аз донишомӯзӣ дар мактаб донишҷӯи бахши ҷомеъашиносии Донишгоҳи Амрикоии Осиёи Марказӣ дар Бишкек мешавад ва дар чаҳор сол ҳам улуми сиёсӣ ва ҳам ҷомеъашиносиро фаро мегирад. Бо дарёфти мадраки коршиносӣ аз ин донишгоҳ Гулнигор таҳсилашро дар Донишгоҳи туркӣ-олмонӣ идома дода, ки барномаи дусолае бо таҳсил дар Туркия ва Олмонро дар бар мегирифт.

Шаш сол таҳсил дар хориҷа

Гулнигор шаш сол боз дар хориҷ аз Тоҷикистон донишҷӯӣ мекунад. Ӯ мегӯяд, аҳволи муҳоҷирон ва паноҳҷӯёни суриву ироқӣ дар Туркия ва таҷрибаи зиндагии худаш дар кишварҳои гуногун водораш кард, ки дар бахши коршиносии аршад (магистратура) мавзуъи муҳоҷират ва раванди созвории муҳоҷирон дар ҷомеъаҳои бегонаро омӯзанд.

"Аввал хостам мавзуъи баробарии ҷинсиятиро таҳлил кунам, вале бо гузашти замон ва дарки аҳамияти мавзуъи муҳоҷирату дидор бо паноҳҷӯёни суриву ироқӣ тасмим гирифтам ҳамин мавзуъро барои пажӯҳиш интихоб кунам", — гуфт Гулнигор дар суҳбат бо Sputnik Тоҷикистон.

"Фикр мекунам, ки бо донишу таҷрибае, ки дар кишварҳои хориҷӣ омӯхтаву андӯхтаам ва ошноие, ки бо зиндагии муҳоҷирон дорам, метавонам дар ин замина корҳоеро анҷои диҳам".

Шароити донишҷӯён дар Туркия, Олмон ва Қирғизистон

Ба гуфти Гулнигор, таҳсил дар Қирғизистон барои донишҷӯёни тоҷик нисбат бо Тукрия ва Олмон арзонтар аст. Вале Қирғизистон худ кишваре муҳоҷирфирист аст, на муҳоҷирпазир. Таҳсил дар Туркия нисбат ба Олмон арзонтар аст, вале дар Олмон сатҳи зиндагӣ болотар аст ва агар ҳам таҳсил ройгон бошад, зисту зиндагӣ гарон аст. Туркия ва Олмон ҳам муҳоҷирпазир ҳастанд ва ҳам барои донишҷӯёни хориҷӣ  бурсияи таҳсилӣ медиҳанд. Бурсияҳое, ки худи Гулнигор ҳам дарёфт кардаву дар Туркия ва Олмон таҳсил мекунад.

Парвина Бандишоева
© Фото : Аз саҳифаи Парвина дар фейсбук

Гулнигор мегӯяд, ки таҳсил дар Олмон бартариҳое дорад.

"Сатҳи зиндагӣ дар Олмон баланд аст. На танҳо барои донишҷӯён, балки барои ҳама шаҳрвандон ва паноҳҷӯён бимаҳои иҷтимоъӣ пурра таъмин мешавад. Дар Олмон ҳеч ниёзманде бе ёрии пизишкӣ намемонад. Ҳарчанд таҳсил дар донишгоҳҳои Туркия ва Қирғизстон барои донишҷӯёни тоҷик аз ҷиҳати ҳазинаи таҳсил ва буду бош каме арзонтар аст, вале Олмон барномаҳои бисёре чун DAAD дорад, ки дарёфткунандаҳои хориҷияшон метавонанд ройгон таҳсил кунанд, вале ба далели гаронии ҳазинаҳои зисту зиндагӣ дар ин кишвар ҳазинаи таҳсил ҳам гарон меуфтад", — мегӯяд Гулнигор.

Гулнигор Тиллоева
Аз бойгонии Гулнигор
Гулнигор Тиллоева

Вай мегӯяд, дар Олмону Туркия низ чун дар аксарияти кишварҳои ҷаҳон барои донишҷӯён имтиёзҳои зиёде дода мешавад. Масалан, дар Олмон барои донишҷӯён рафту омад дар нақлиёти умумӣ арзон аст ва дар ҳама бунгоҳҳои фарҳангӣ хадамот 50 дарсад арзонтар ҳастанд ва дармонгоҳҳо бо доштани бимаи пизишкӣ хадамот арзонтар аст.

Дар бораи созвор шудани тоҷикон бо ҷомеъаҳои бегона ин ҷомеъашиноси оянда мегӯяд, ки дар Қирғизистон ва Туркия, ки муштаракоти фарҳангие бо Тоҷикистон доранд, зиндагӣ ва таҳсил барои донишҷӯёни тоҷик осонтар аст, вале дар кишварҳои Урупо вазъ дигаргун аст.

Вай мегӯяд, ки зиндагии донишҷӯёни тоҷик дар Олмон хуб аст, чун ҳамаашон бо барномаҳое чун DAAD ё ERASMUS ё WoridWide меоянд, ки онҳо зисту таҳсилашонро пӯшиш медиҳанд.

"Ҳама донишҷӯёни тоҷике, ки дар Олмон таҳсил мекунанд, дониши хуб доранд. Онҳо ё забони инглисиро ба дараҷаи аъло медонанад, ё олмониро", — гуфт Гулнигор.

Кӣ метавонад дар Олмон кор пайдо кунад

Ба гуфти вай, дар баробари донишҷӯён дар Олмон корҷӯёни дорои тахассус ҳам роҳи худро бисёр хуб меёбанд, чун ҳангоми ҷустуҷӯи кор доштани шаҳрвандӣ муҳим нест, балки таҷрибаи кору зиндагӣ дар кишварҳои рӯ ба рушде чун Тоҷикистон муҳим аст.

"Ҳангоми ҷустуҷӯи кор дар Олмон дастоварҳои илмӣ ба назар гирифта мешаванд, вале муҳимтар аз он таҷрибаи кору зиндагӣ дар кишварҳои рӯ ба рушд аст. Вале аз ин муҳимтар донистани забони олмонӣ ё инглисӣ аст", — гуфт Гулнигор.

Ӯ афзуд, ки дар солҳои ахир бо афзоиши ҷараёни муҳоҷират ба Олмон ширкатҳои бисёре дар ҷустуҷӯи рӯзноманигорон ё донандагони забонҳои форсӣ, арабӣ ва русӣ ҳастанд.

"Касоне, ки дар Тоҷикистон донишгоҳи олӣ хатм кардаву забони форсӣ, русӣ ва ингилисро хуб медонанад, ба осонӣ дар Олмон кор меёбанд".

Тоҷикони Олмон

Дар Олмон тоҷикони бисёре ба сар мебаранд, бархе кор мекунанду гурӯҳе таҳсил ва бархе дигар ҳам дар созмониҳо гуногун фаъолият доранд.

"Мо камобеш ҳама ҷашнҳои миллиро дар сафорати Тоҷикистон баргузор мекунем. Он ҷоест, ки ҳама тоҷиконро гирди ҳам меорад", — гуфт Гулнигор.

Зиндагии муҳоҷирони тоҷик дар Русия

Муҳоҷироне, ки солҳои 1990-ум ба Русия омадаанд, пурра дар ҷомеъа ҷазб шудаанд ва бо муҳиту шароити буду бош созвор шудаанд.

Аммо аз муҳоҷироне, ки солҳои ахир омадаанд, бисёрашон як фасл ё мавсим кор мекунанд. Вале дар ҳар сурат, онҳо аз хонаводаҳо дуранд ва бузург шудани кӯдакон бе падар пайомадҳои баде барои миллат хоҳад дошт.

"Ногуфта пайдост, ки барои муҳоҷирон дар назди зану фарзандашон будан беҳтар аст. Вале ин пайомади раванди муҳоҷиратро ҳам бояд ҳамеша дар нигар дошт, ки дурӣ аз падар ба равони кӯдак таъсири манфӣ мерасонад".

Кор аз назари Гулнигор дар Русия барои муҳоҷирони тоҷик бисёр душвор аст.

"Ман дар як моҳе, ки дар Маскав ҳастам, бо шароити буду бош ва кору бори муҳоҷирони тоҷик камобеш ошно шудам. Кори онҳо бисёр сахту сангин аст. Аксари муҳоҷирони мо дар ин ҷо дар риштаи сохтусоз кор мекунанд. Ва аксари онҳо аз макони кор дар масофаи чандин килуметр зиндагӣ мекунанд", — гуфт бо таассуф Гулнигор ва афзуд, ки рафту баргашт наздик ба чаҳор соатро дар рӯз мегирад ва барои зиндагии шахсию истироҳат вақте ҳам намемонад.

Вале аз ҷиҳати иқтисодӣ муҳоҷирон ҳамоно наздик ба 50 дарсад аз маҷмуъи маҳсулоти дохилии Тоҷикистонро таъмин мекунанд.

Гулнигор мегӯяд, ки дар Олмон шароити буду боши муҳоҷирон нисбат ба Русия ба куллӣ фарқ дорад.

Аммо паноҳҷӯёнро дар Олмон аввал дар иқоматгоҳҳои муваққатӣ ҷой медиҳанд ва пас аз муддате барояшон кумакпулии чандвақта ҳам дода мешавад, ки барояшон бисёр муҳим аст. Вале муҳоҷирон пас аз бастани қарордоди кор ва дарёфти раводид бояд пешопеш ҷои зисту иқомат пайдо кунанд. Корфармо онҳоро бима мекунад ва дар дарёфти раводиди корӣ ёрӣ мерасонад. Агар соати кори муҳоҷир кам бошад, то муддати муайян ва ба даст овардани соати кории кофӣ, ки ҳафтае 40 соат аст, муҳоҷир метавонад аз ниҳоди иҷтимоъии давлат дархости кумакпулӣ кунад. 

"Олмон дар заминаи муҳоҷирпазирӣ ҳам бисёр пешрафт карда аст. Ҳар як қадами муҳоҷир дар ин кишвар дар чорчӯби қонун аст ва ӯ аз давлат дар ҳама заминаҳо ёриву пуштибонӣ мебинад. Ин нукта ҳам бисёр муҳим аст, ки барои муҳоҷирон ё паноҳҷӯёне, ки ба Олмон ворид мешавад, барномаи забономӯзӣ роҳандозӣ шудааст".

Тоҷикистон ояндаи дурахшон дорад

Гулнигор ба ояндаи Тоҷикистон хушбин аст. Ӯ мегӯяд, ки Тоҷикистон, ки ҷанги дохилиро аз сар гузаронда, барои ба по хезондани иқтисоду риштаҳои иҷтимоъӣ ниёз ба замон дорад то вазъаш беҳбуд ёбад ва мардум низ дар кишвари худ кору бор ба даст оварад то муҳоҷир нашавад.

Гулнигор мехоҳад масоили муҳоҷиратро дар аспирантура жарфтар пажӯҳиш кунад. Ин мавзуъ дар Урупо ҳамакнун аз мавзуъҳои доғи рӯз аст ва дар Олмон шароит барои пажӯҳиш бештар аст. Ӯ мехоҳад дар оянда дар мавзуъи ҳуқуқ ва муҳоҷират пажӯҳишу кор кунад.

3928
Барчаспҳо:
Гулнигор Тиллоева, Русия
Курбанова Фарахноз, студент 1 курса бакалавриата

Аз интихобам розиям: чигуна донишҷӯёни тоҷик дар Русия таҳсил мекунанд - акс

250
Донишҷӯёни тоҷик, ки дар Донишгоҳи технологии Русия таҳсил мекунанд, дар бораи ҳаёти донишҷӯӣ ва раванди таҳсил дар Маскав нақл карданд

ДУШАНБЕ, 2 июл — Sputnik. Донишҷӯёни тоҷик, ки дар Донишгоҳи технологии Русия - МИРЭА таҳсил мекунанд, дар бораи таҳсил дар муҳити байналмилалӣ нақл карданд. 

Имрӯзҳо дар донишгоҳи мазкур ҳудуди 200 донишҷӯи тоҷик таҳсил мекунанд, ки дар оянда дар соҳаҳои телекоммуникатсия, автоматика, кибернетика, радиотехника ва электроника мутахассис хоҳанд шуд.

Чунончи, донишҷӯи курси дувуми магистратура дар саҳаи "технологияи кимёвӣ" Солиҷон Собиров мегӯяд, то дохилшавӣ ба МИРЭА дар Донишгоҳи техникии Тоҷикистон ба номи Муҳаммад Осимӣ таҳсил мекард.

Солижон Собиров, студент 2 курса магистратуры,
Солижон Собиров, студент 2 курса магистратуры,

Ӯ ду сол пеш факултаи энергетикаи донишгоҳро хатм карда, мақсад дошт ба кор дарояд, аммо қарор дод, ки дар Маскав ба бахши магистратура дохил мешавад.

"Мехостам донишамро дар ду самт комил кунам. Феълан ман ду маълумот, муҳандис-энергетик ва химик-технолог дорам. Фикр мекунам, ки ин хело хуб аст", - мегӯяд ҷавон.

Ҳоло Солиҷон дар хобгоҳ зиндагӣ мекунад, идрорпулӣ мегирад, муваққатан худро дар Русия ба қайд гузоштааст. Ин донишҷӯи тоҷик кам-кам кор ҳам мекунад.

"Агар донишҷӯ дар ҳақиқат аз нигоҳи молиявӣ ба мушкилӣ дучор шавад, касе аз ин ҷиҳат ба вай кӯмак накунад ё дар хонаводаашон мушкилии иқтисодӣ бошад, пас вай метавонад дар 11 моҳ як маротиба аз донишгоҳ кӯмак хоҳад. Маблағе ки донишгоҳ медиҳад, кам нест", - меафзояд ӯ.

Солиҷон мегӯяд, вақти бештарашро барои таҷрибаомӯзӣ дар донишгоҳ мегузаронад, аммо барои дӯстӣ бо донишҷӯён ва бозии футбол ҳам вақт меёбад.

Дигар донишҷӯи тоҷик Фараҳноз Қурбонова дар курси аввал таҳсил мекунад. Ӯ ҳам мегӯяд аз интихоби касб ва донишгоҳаш розӣ аст.

Ин духтари тоҷик хатмкардаи Литсейи президентӣ барои хонандагони лаёқатманд аст. Ӯ мехостааст пас аз хатми мактаб ба факултаи муҳандисиву барномарезӣ дохил шавад, барои ҳамин донишгоҳи технологии Русияро интихоб кардааст.

"Ман ки аз кишвари хориҷ ба Русия омадаам, дар хобгоҳ зиндагӣ мекунам. Ба донишҷӯёни хориҷӣ дар бахши авали таҳсил стипендия медиҳанд, баъдҳо ҳаҷми он аз худи донишҷӯй вобаста аст", - мегӯяд Фараҳноз.

Духтарак қайд мекунад, ки бартарии дигари таҳсил дар ин донишгоҳ пайдо кардани дӯстон аз кишварҳои хориҷ аст. Фараҳноз дӯстони ӯзбекистонӣ, белорус, украинӣ, қазоқистонӣ, аз Ветнам, Чин ва албатта Русия дорад.

Танҳо дар як Донишкадаи Тоҷикистон наздик ба 500 донишҷӯ аз Узбакистон дохил шуданд

"Ман ин ҷо худамро дар байни дӯстон пайдо кардам. Ман бо онҳо ба ибтидои нардбони муваффақиятҳоям қадам мегузорам. Агар хоҳӣ, ки ояндаи хушбахт дота бошӣ, бояд хонӣ ва меҳнат кунӣ. Боварӣ дорам, ки дар МИРЭА ба тамоми орзуҳоям мерасам", - мегӯяд Фараҳноз хушбинона.

 

250
Музаффар Имомдод

Музаффар Имомдод: аз воҳимаи COVID - 19 дар ВМКБ то ризокории 3000 ҷавон ва сахои мардум

3550
(Таҷдидшуда 15:19 23.06.2020)
Музаффари Имомдод, ризокор, фаъоли ҷамъиятӣ ва яке аз бунёдгузорони гурӯҳи "Цавор куен" (Чор кӯҳ) дар Facebook дар бораи вазъи COVID - 19 дар ВМКБ, кумаки хайрхоҳон ва 11 соли ихтиёрӣ буданаш гуфт

ДУШАНБЕ, 23 июн – Sputnik, Нилуфар Некқадам. Музафари Имомдодро корбарони Facebook чун шахси фаъоли ҷамъиятӣ ва ризокори ҳамеша омодаи кумаку ёрӣ мешиносанд. Ӯ аз рӯзҳои аввали шуюи COVID - 19 дар Тоҷикистон, ба хайрхоҳон муроҷиат карда, бо маблағи ҷамънамуда ба табибони Суғду, Хатлону Вилояти Мухтори Кӯҳистони Бадахшон кумак кард.

Ҳар рӯз дар саҳифааш дар Facebook наворе дар бораи расонидани кумак ба табибони ин ё он минтақаи кишвар пайдо мешавад. Чун худи ӯ мегӯяд, "бояд хайрхоҳон бидонанд ва бубинанд, ки маблағи онҳо дар куҷо ва чӣ гуна ҳазина мешавад".

Аз Русия то Африқо

Дар Тоҷикистон рӯзи 30 апрели соли 2020 расман 15 ҳолати гирифторӣ ба вируси корона сабт гардид. Пас аз як рӯз Музаффар бо наворе барои ҷамъ овардани маблағ барои кумак ба пизишкон ба мардум муроҷиат кард. Ба гуфти ӯ бародарони саховатпеша аз Русия то Африқо занг мезаданду маблағ равон мекарданд.

"Аввал бародарон аз Русия ва аз худи Тоҷикистон кумак карданд. Баъдтар аз Олмон, Африқо, Амрико ва дигар кишварҳо низ маблағ равон карданд. Пас аз се рӯзи муроҷиат мо маблағи ирсолкардаро гирифта, 70-дона либоси вижаи муҳофизатӣ харидем ва ба пизишкони навоҳии гуногун аз Ҷилликул то шаҳри Хуҷанду Ёвон расонидем. Пули равоннамудаи хайрхоҳон дар умум наздики 50 ҳазор сомонӣ шуд. Аз ин маблағ аз номи ризокорони ВМКБ ба зарадидагони фоҷиаи Хуросон 10 ҳазор сомонӣ равон карда шуд", - гуфт Музаффар.

Музаффар аз он изҳори хушнудӣ мекунад, ки мардуми тоҷик ҳиммати баланд доранд ва саховатпешаанд.

"Ростӣ ман бо мардуми хайрхоҳамон ифтихор мекунам", - мегӯяд ӯ ва ба ҳамаи ашхоси саховатпеша ва ихтиёриён, барои хизматашон изҳори сипос мекунад.

Вазъи COVID - 19 дар ВМКБ: аз воҳима то оромии рӯҳӣ

Музаффар рӯзи 9 май барои кумак ба пизишкон ба ВМКБ сафар кард ва инак беш аз ду моҳ мешавад, ки ӯ дар хизмати халқ аст. Ба фикри ӯ? маризии коронавирус худ онқадар вазнин нест, вале ваҳму воҳимааш барои фаҳмиш душвор аст.

"Рӯзҳои аввал мардумро ваҳму воҳима пахш карда буд. Онҳо дар бораи маргу мир аз ин маризӣ, ки бахусус дар кишварҳои Урупо зиёд буд, шунида буданд ва ба таҳлука афтода буданд",-изҳор дошт ӯ.

Музаффар ҳамроҳи дигар ризокорон барои кумак ба пизишкон қариб ба ҳамаи ноҳияҳои ВМКБ ва қишлоқҳои дурдаст сафар карданд. 

"Мо аз қишлоқҳои ноҳияи Ванҷ, Рӯшону Бартанг, Шуғнону Ишкошим ва то Мурғоб сафар карда, либосҳои муҳофизатӣ, ниқобҳо, маҳлулҳои зиддиуфунӣ бурдем. Фақат Язгулом ва қишлоқҳои болоии ноҳияи Шоҳдара мондааст, ки насиб бошад пас аз се рӯз бо кумаки вижа барои хонаводаҳои ниёзманд, сафар хоҳем кард", - гуфт Музаффар.

Мусоҳиб мегӯяд вазъияти беморӣ дар ВМКБ дар ягон ҷо вазнин набуд, чун аз рӯзҳои аввал ҳам духтурон ва ҳам ризокорон барои пешгирии он кори зиёде анҷом доданд. Созмонҳои гуногун аз қабили Бунёди Оқохон оид ба тандурустӣ, ширкати Памир энерҷӣ ва Ҳукумат барои пешгирии беморӣ кумак карданд.

"Чун зичии аҳолӣ дар шаҳри Хоруғ бештар аст, ин ҷо маризон бештар буданд. Дар водии Бартанг дар кишлоки якум - Шуджанд танҳо як бемор буд. Шукри Худо дар дигар деҳаҳои Бартанг нафаре бемор набуд. Мо ба қишлоқҳои дурдасти Бартанг аз номи Ҳукумат се либоси муҳофизатӣ, маҳлулҳои зиддиуфунӣ ва аз номи ризокорон ниқобҳоро бурдем", - нақл кард Музаффар .

Дар ВМКБ то 20 июни соли равон барои пешгирӣ аз паҳншавии густурдаи коронавирус аз ҷониби мақомоти ҳокимияти давлатии вилоят маҳдудиятҳо - равуо миёни навоҳӣ ва шаҳри Хоруғ, ҷорӣ шуда буданд. Имрӯзҳо бошад мардуми ин вилоят ба зиндагии муқаррарии худ бозгаштааст.

"Феълан мардум бе ҳарос ба корҳои саҳроӣ ва хоҷагидорӣ машғул ҳаст. На бузургсолон ва на ҷавонон дигар аз ин беморӣ ҳарос надоранд, чун дарк карданд, ки он ҳам мисоли зуком гузаранда аст, албатта на барои ҳама", - гуфт Музаффар ва афзуд, ки мардум рӯҳан ором шудаанд.

 Чаро ВМКБ барои роҳ надодани COVID - 19 омода набуд?

Коронавируси навъи COVID - 19 моҳи декабри соли 2019 дар Вуҳани Чин зуҳур кард ва бар пояи гузориши расмӣ ба Тоҷикистон пас аз 4 моҳ, 30 апрели соли 2020  расид. Мебоист Тоҷикистон барои пешгирии ин вабои аср ҳаматарафа омода мешуд. Музаффар мегӯяд "қаҳрамонони рӯз" - пизишкон барои мубориза бо ин маризӣ омода буданд, вале имконияти пешгирии онро надоштанд.

"Фикр мекунам пизишкон барои табобати маризони коронавирус омода буданд, аммо лавозимоти муҳофизатӣ ва доруву даво надоштанд. Чун ба ҳар қишлоқе, ки мо сафар мекардем ва ба ҳар марказҳои табобатӣ, ки мерасидем, бо чашмони худ медидем, ки пизишкон либоси муҳофизатӣ надоранд", - шарҳ дод Музаффар. 

Сабаби аслии роҳ ёфтани коронавирус ба ВМКБ-ро Музаффар дар камаҳамиятӣ ва бедиққатӣ мебинад. Ба гуфти ӯ танҳо бо кумаки ризокорон ва шахсони саховатпеша мешуд паҳншавии COVID - 19 - ро дар ВМКБ пешгирӣ кард.

11 соли ризокории Музаффар ва кумаки 3000 ихтиёрӣ дар замони ҳамагирии COVID - 19 дар Бадахшон

Ризокор ё ихтиёрӣ - шахсест, ки бемузд ба нафари дигаре хизмат мекунад. Аз давраҳои қадим чун дар дигар манотиқи Тоҷикистон, мардуми Бадахшон бештари кори худро тариқи ҳашар - кори дастаҷамъонаи бемузд анҷом медоданд. Қариб ҳамаи хонаҳои помирӣ, ки имрӯз дар Бадахшон ҳастанд тариқи ҳашар - ё бо қувваи ихтиёриён сохта шудаанд.

Музаффар ризокориро аз арзишҳои волои мазҳаби худ медонад. Ӯ мегӯяд аз кумак кардан ба дигарон ҳаловат мебарад ва бо ин роҳ мехоҳад дилеро шод кунад.

"Ризокорӣ аз арзишҳои мазҳаби ман аст. Бо ин арзишҳо ман метавонам диле ба даст оварам. Дар навбати аввал ман аз коре, ки барои шахсе анҷом медиҳаму ӯ шод мешавад, ҳаловат мебарам, махсусан кумак ба бузургсолон, кӯдакон ва ниёзмандонро дар назар дорам", - гуфт Музаффар ва афзуд ки беш аз 11 сол ӯ дар хизмати халқ аст.

"Ҷое мешавад, ки нафареро бепул бо хадравам ба манзилаш мерасонам, ҷое мешавад, ки бо кумаки дӯстонам мушкили касеро ҳал мекунам".

Дар замони ҳамагирии COVID - 19 дар ҳар қишлоқи ВМКБ гурӯҳи ризокорон аз ҳисоби ҷавонон ва фаъолони ҷомеа ташкил шуд, ки тартибу интизом ва риояи қоидаҳои қарантиниро назорат мекард. Онҳо намегузоштанд, ки меҳмонони аз шаҳри Душанбе расида бе гузашти 14 рӯз бо дигарон ҳамсуҳбат шаванд, ё нафаре бидуни ниқоб аз хона берун равад, ё дар кӯча масофаи иҷтимоиро риоя накунад.

Ба ҳамаи ин корҳо беш аз 3000 ризокор банд буд. Шояд ҳамин якдиливу омодаи кумак будани халқ, буд, ки мардуми Бадахшон авҷи аввали  COVID - 19 - ро бидуни талафоти зиёд паси сар карданд.

Вале, набояд фаромӯш кард, ки бино ба пешбинии ҳамагиршиносон мавҷи дуюми COVID - 19 дар Тоҷикистон аз эҳтимол дур нест ва ҳамоно бояд риояи қоидаҳои беҳдошт ва масофаи иҷтиоию пӯшидани ниқоб фаромӯш нашавад.

То 22 июн дар Тоҷикистон 5513 нафар бо ташхиси сирояти коронавируси нави COVID-19   ошкор гардида, аз ин беморӣ то кунун дар кишвар 4039 (73,2%) нафар шифо ёфтаанд. Ҳамзамон, то санаи зикргардида дар мамлакат аз ин беморӣ 52 нафар фавтидаанд.

3550
Барчаспҳо:
сукунати ихтиёрӣ, ихтиёрӣ, вазъ, вируси нав, Музаффари Имомдод, Тоҷикистон
Нурекское водохранилище

Қадрдонии прапоршик Сафаров барои наҷоти духтари ноболиғ

0
(Таҷдидшуда 13:14 11.07.2020)
Вазорати умури дохилии Тоҷикистон хабар дод, ки прапоршик Сафаров Анваршо, корманди идораи милиса дар шаҳри Норак, ҳангоми адои хизмат як духтарчаро аз марг наҷот дод

ДУШАНБЕ, 11 июл — Sputnik. Тибқи иттилои ВУД, рӯзи 8 июли соли равон Сафаров, духтари ноболиғро, ки дар дарёи Вахш дар ҳолати ғарқшавӣ қарор дошт, наҷот дод. Ин ниҳод аз амали Сафаров тавсиф кард, ки аз худ далериву ҷасурӣ нишон додаст.

Манбаъ афзуд, ки барои қадрдонии корманди милиса дар маҷлисгоҳи шуъбаи Вазорати корҳои дохилӣ дар шаҳри Норак ҷамъомади ҳайати шахсӣ доир гардид.

"Раиси шаҳр Неъматзода Маликшо Маҳмадшо рафтори шуҷоатмандонаи корманди милитсия Анвар Сафаровро намунаи баланди хизматӣ, садоқат ба касб ва эҳтироми баланд ба мардум арзёбӣ намуда, ӯро бо ифтихорномаи мақомоти иҷроияи ҳокимияти давлатии шаҳр ва туҳфаи хотиравӣ сарфароз гардонид", - омадааст дар иттилоия.

Сипас аз номи Роҳбарияти РВКД дар вилояти Хатлон, сардори ШВКД дар шаҳри Норак подполковники милитсия Саидаҳрор Мирзоев барои нишон додани мардонагиву шуҷоат ва содиқ будан ба савганди хеш ба корманд изҳори сипос намуда, дар фазои тантанавӣ ӯро бо тӯҳфаҳои пулию хотиравӣ қадрдонӣ кард. 

ВУД илова намуд, ки инчунин дар назди ҳозирин фармон дар бораи додани рутбаи ғайринавбатӣ ба прапоршики милитсия Сафаров Анваршо Маҳмадсобирович эълон карда шуд.

0
Барчаспҳо:
наҷотдиҳанда, милиса, размикор, Тоҷикистон