Абдулло Давлатов

Доктор Абдулло Давлатов: аз Тоҷикистон то Русия, аз аробакашӣ то роҳбарӣ

2435
(Таҷдидшуда 12:05 18.08.2019)
Абдулло Давлатов – пизишки номдор, фаъоли иҷтимоъӣ, роҳбари пешини Иттиҳоди тоҷикистониёни Русия, дар Рӯзи пизишк ва зодрӯзи Абуалӣ ибни Сино суҳбате бо Sputnik Тоҷикистон дошт

Абдулло Давлатов дар суҳбате самимӣ роҳи пурфарозу нишеби зиндагияшро, ки ӯро аз Тоҷикистон ба Русия овардааст, боз гуфт.

— Устод, оё пизишк шудан орзӯи кӯдакии Шумо буд?

— Ман дар ноҳияи Бохтари собиқ вилояти Қӯрғонтеппа таваллуд шудаам. Падарам коргари оддӣ буданд ва модарам дар колхоз кор мекарданд. Пас аз хатми мактаби миёна барои идомаи таҳсил ба Душанбе рафтам. Ростӣ мехостам, ки дар донишгоҳ дар риштаи ҳуқуқ таҳсил кунам. Аммо чун аз русто омада будаму нишонии Донишгоҳи давлатии Ленинро (акнун Донишгоҳи миллии Тоҷикистон) намедонистам, бо як ҳамдеҳаамон, ки дар Донишгоҳи пизишкӣ таҳсил мекард, онҷо рафта, ҳуҷҷатҳоямро супоридам ва дохил шудам.  

— Фаъолияти пизишкии худро кай оғоз кардаед?

— Худоро шукр, мо дар хонаводамон бисёр будем ва чун падару модарам коргари оддӣ буданд, мушкилоти молӣ пеш меомаданд. Аз ин рӯ, ман аз соли севуми донишҷӯӣ дар кафедраи ҷарроҳии бемористони 5-уми Шаҳраки тиббии Душанбе санитарӣ ва аз соли чаҳорум ҳамонҷо парасторӣ мекардам. Мудири кафедраамон Абдурауф  Қаҳҳоров — доктори улуми пизишкӣ, нахустин профессори тоҷике буд, ки ба забони тоҷикӣ ва бо ҳуруфи тоҷикӣ китобҳое дар мавзуъи реши меъда навиштаанд. Вай маро дар соли панҷуми донишҷӯӣ иҷоза доданд, ки дар амалҳои ҷарроҳӣ ширкат кунам. Аз соли шашум худам ҳам бархе беморонро амали ҷарроҳӣ мекардам. Сипас ҳамон кас маро дар кафедраи ҷарроҳӣ монданд.

Абдулло Давлатов
© Sputnik Стас Этвеш
Абдулло Давлатов

—  Лутфан аз бунёди нахустин Маркази дармони ноборварӣ дар Осиёи Миёна ва дар Тоҷикистон бигӯед, ки худ яке аз бунёдгузоронаш будед.

— Олимҷон Ғафуров ном пизишки номии тоҷик аз ман даъват карданд, ки ба Пажӯҳишгоҳи ҳифзи саломатии модару кӯдак гузашта ба корҳои илмӣ машғул шавам. Вай аз ман хоҳиш кард бо мудири вақти Пажӯҳишгоҳ, пизишки бисёр маъруфи тоҷик Саъдиниссо Ҳакимова суҳбат кунам. Муаллима Ҳакимова маро вазифа доданд, ки дар 10 рӯз омода шавам ва имтиҳон супорам. Мавзуъ андрология (пизишкии мардон) буд. Рӯзи пас додани имтиҳон Саъдиниссо Ҳакимова сухане гуфтанд, ки ҳаргиз фаромӯш намекунам: "Агар андролог шавӣ ва хонаводае бо ёрии ту фарзанддор шавад, як умр аз ту миннатдор хоҳад буд". Пасон дар давраҳои омӯзишии гуногун дар Русияву Укроин таҳсил кардам ва ҳамин касбро ихтиёр кардам. Пас аз баргаштан аз давраҳои донишафзоӣ дар Пажӯҳишгоҳи ҳифзи саломатии модару кӯдак нахустин Маркази дармони ноборварӣ дар Осиёи Миёнаро бо роҳбарии Саъдиниссо Ҳакимова созмон додем ва фаъолияти худро давом медодам. Кору борамон хуб буд, агар дар миён рухдодҳои солҳои 1990-ум рӯй намедоданд…

—  Пас роҳи Русияро пеш гирифтед?

— Не, Русия омадани ман амри тасодуф буд. Соли 1992 наздик буд ҷонамро аз даст диҳам. Бисёр хуб дар ёдам мондааст. 17-уми декабр буд. Бо яке аз ҳамкорони русам — Любов Леонидовна дар троллейбус ба кор мерафтем. Наздики Сирки Душанбе расидем, ки як гурӯҳ ҷангиёни ниқобпӯш вориди тролейбус шуданд. Онҳо гуфтанд, ки русҳову узбакҳо монанд ва тоҷикон пиёда шаванд. Ду кас пиёда шуданд ва онҳоро ҳамонҷо тирборон карда куштанд. Сипас чанде аз онҳо дашномгӯён назди ман омаданд, ки чаро ту ки тоҷик ҳастӣ, пиёда нашудӣ? Онҳо маро кашида аз троллейбус пиёда карданд ва силоҳ ба пешониям монданд. Ҳамин лаҳза Любов Леонидовна шитобон аз ҷояш бархосту давон омада миёни ману ҷангҷӯён истод ва ҷони маро аз дасти онҳо раҳонид. Худи ҳамон рӯз ман роҳи Русияро пеш гирифтам, чун дӯстонам мегуфтанд, агар ин ҷо бимонӣ, туро ҳам мекушанд…

- Оё Шуморо дар Русия зуд ҳамчун пизишк ба кор қабул карданд?

— Дар Русия ман аввал боркашӣ мекардам. Ҳамроҳам ҳама ҳуҷҷатҳо, аз ҷумла шумораҳои телефонҳои ҳамдонишгоҳиёни рус ва дипломҳои русиамро гирифта будам. Аммо анбонамро дар роҳ дуздида буданд ва дар ҷайбам танҳо билети хидмати низомиам монда буд.

—  Яъне зиндагӣ дар ғарибӣ оғоз шуд…

— Дар роҳ бо чаҳор ҷавони тоҷик шинос шудам, ки онҳо ҳам гуреза буданд. Гуфтанд, ки ба шаҳри Ижевск меравем, ман ҳам ҳамроҳашон ба Ижевск рафтам. Дар хонае, ки 4 бар 6 метри мураббаъ масоҳат дошт, 12 кас зиндагӣ мекардем. Дар 36 дараҷа сармо дар яке аз бозорҳои Ижевск аробакашӣ мекардем. Як кулоҳ барои ҳамаамон доштем, ки ба навбат мепӯшидем. Чун қуттиҳои колоҳои савдогаронро ҷобаҷо мекардем, дастонамон ба қутти мечаспид ва хуншор мешуд. То ҳол нишонаҳои он сардиҳо дар дастонам мондааст…

- Сипас "бахтатон омад карду" корманди дармонгоҳ шудед?

- Не, Шумо бисёр шитоб накунед (механдад). Дар зиндагӣ воқеъаҳо ин гуна зуд сурат намегиранд. Хулоса, ки ман дар он сардӣ гирифтори пневмония шудам ва чун илоҷ надоштам, дар бозор кори худро давом медодам. Як рӯз мо чаҳор ҷавони тоҷик дар бозор аробакашӣ мекардем, ки се пирзани рус ба наздамон омаданду ба мо "гап партофтанд". Онҳо миллияти моро ҷӯё шуданд, ки "аз куҷо бошед, ки чунин хушрӯ ҳастед?". Дар замони шуравӣ дар Русия куллан 3 800 тоҷик зиндагӣ мекард ва тоҷикон чунин "машҳур" набуданд. Хулоса онҳо бароямон хона ёфтанд ва бо ёрии шавҳари яке аз пиразанҳо ман дардамро дармон кардам. Пас аз чанде озарбойҷониҳо маро дар дуконашон фурӯшанда гирифтанду ман савдогар шудам. Ҳамон ҷо бо русҳо ошнову дӯст шудам ва сипас дар дармонгоҳ кор ёфтам. Дар он дармонгоҳ мудири шуъба шудам, дертар ёвари вакил  шудам ва сипас ба дигар мақому мартаба расидам. Хуллас, ман дар Русия ба мушкиле ҷиддӣ рӯ ба рӯ нашудам ва дар ҳама ҷо корам омад мекард…

Абдулло Давлатов
© Sputnik Стас Этвеш
Абдулло Давлатов

- Аз аввал мақсад доштед, ки Иттиҳоди тоҷикони Русияро ташкил кунед?

— Не, аслан чунин мақсаде надоштам. Соли 2005-ум вақте, ки раиси Анҷумани китобхонаҳои электронии пизишкӣ будам, дар Пажӯҳишгоҳи шаробу ангури Ялта семинаре ташкил шуд, ки онро ман роҳбарӣ мекардам. Пас аз семинар  ду зани бегонае назди ман омаданду пурсиданд, ки аз куҷоям. Вақте ки дар посух гуфтам аз Маскав омадаам, қонеъ нашуданду миллиятамро пурсон шуданд. Вақте ки фаҳмиданд, ки тоҷикам, як сухане гуфтанд, ки ба мағзи устухонам расид. "Мо тоҷиконро медонем, мардуми хубанд. Дар шаҳри мо кӯчарӯбӣ мекунанд"- гуфтанд онҳо. Ҳамин як сухан маро ангеза дод, ки созмони тоҷикони Русияро ташкил кунам ва мақсад гузоштам, ки дар Маскав образи тоҷиконро ташаккул диҳам. Ҳама фаъолиятҳои иҷтимоъии ман пас аз ҳамон семинар оғоз шуданд…

2435
Барчаспҳо:
мушкилӣ, пизишк, муҳоҷират, Абдулло Давлатов, Русия-Тоҷикистон
Пробирка с тестом на коронавирус

Нури лазерӣ: Ғуломов дар бораи усули нави табобати COVID - 19, ки дар худ санҷидааст

1067
(Таҷдидшуда 16:02 05.06.2020)
Мудири шуъбаи ҷарроҳии МД "Ёрии таъҷилии тиббӣ"-и шаҳри Душанбе Лоиқ Ғуломов мегӯяд, нури лазерӣ ба тезондани табобати бемории "COVID-19" ёрӣ мерасонад

ДУШАНБЕ, 5 июн – Sputnik. Мудири шуъбаи ҷарроҳии МД "Ёрии таъҷилии тиббӣ"-и шаҳри Душанбе Лоиқ Ғуломов дар мусоҳибаи бо сармуҳаррири МД "Маҷаллаи Фирўза" Саодат Ҳайдарзода, ки Вазорати фарҳанг нашр кардааст, дар бораи усули нави табобати коронавирус дар Тоҷикистон нақл мекунад.

Вазъи имрӯзаи каронавирус дар Тоҷикистон

Ба гуфти пизишк, хушбахтона, сустшавии авҷи ин беморӣ ҳам дар Тоҷикистон ва ҳам дар як қатор мамолики хориҷӣ ба назар мерасад. Дар ҳафтаҳои охир муроҷиати одамон ба муассисаҳои тандурустӣ то андозае кам шуда истодааст ва фавт ҳам хеле кам ба назар мерасад.

Ғуломов ҳолати табобати маризони коронавирусро дар МД "Ёрии таъҷилии тиббӣ"-и шаҳри Душанбе шарҳ дод.

Ӯ мегӯяд, бемороне, ки ба "COVID-19" гирифтор шудаанд, ҳамзамон метавонанд ба бемории дигар узвҳои ковокии батн гирифтор шаванд. Дар беморхонаи «Ёрии таъҷилӣ»-и тиббии шаҳри Душанбе барои пешгирӣ ва табобат кардани ин беморон ҳуҷраҳои алоҳида ҷудо карда шуда, табибону ҳамшираҳо бо либосҳои яккарата ва доруворӣ таъмин мебошанд. Ягон фарқияте дар табобати онҳо дида намешаванд ва ягон хусусияти махсус ҳам надорад ба ғайр аз чораҳои пешгирикунанда.

Барои ҳамин тавсия додан мумкин аст, ки ҳам табибон ва ҳам аҳли байти бемор бояд ба таҳлука дода нашаванд. Наҳаросида метавонанд хабар гиранд. Танҳо бо истифода аз либосҳои махсус, ниқоб ва ғайраҳо.

Нури лазерӣ

Ба гуфти пизишк, тибби муосир якчан усулҳои пешгирӣ ва табобати ин бемориро исбот кардааст ва ба роҳ мондааст. Аммо новобаста аз ин дар тиб усулҳое ҳаст, гарчанде, ки кашф шуда бошанд ҳам айни ҳол маъмул истифода бурда намешаванд. Яке аз онҳо ин табобати лазерӣ мебошад.

Табобати лазерӣ ба тамоми табибон маълум аст, ки он хусусиятҳои зеринро дорост:

  • Ҳуҷайраҳое, ки доим бар зидди вирусҳою бактерияҳо муқовимат нишон медиҳанд. Ин ситокинҳо ва интерферонҳо мебошанд ва гузаронидани табобати лазерӣ ин усулро метезонад.
  • Дар хун ҳуҷайраҳое ҳаст, ки бо номи фагоситҳо машҳуранд. Ин фагоситҳо дилхоҳ ҷисми бегонаро дар хун несту нобуд месозад ва барои фаъол сохтани он табобати лазерӣ лозим аст.
  • Барои пешгирӣ ва табобати бемории «COVID-19» пурқувватии организм нақши муҳим мебозад. Бо ин мақсад мо бояд гардиши хунро хуб кунем. Ба тамоми табибон маълум аст, ки гузаронидани табобати лазерӣ макро ва микросиркулятсия дорад ва он гардиши хунро дар бофтаҳо хуб мегардонад. Агар мо лазератерапияро истифода барем, гардиши хуни ин беморон ва ё шахсоне, ки ба бемории музмин гирифторанд ва гардиши хунашон суст аст, онро фаъол гардонем, ин гуна шахсон ба ин беморӣ мубтало намегарданд.
  • Сабаби фавти чунин беморон ин бештар лахташавии хун мебошад. Барои он, ки хун лахта нашавад, мо бояд дору истифода кунем ва ё метавонем дар шароити имрўза табобати лазерӣ гирем. Зеро вақте, ки гардиши хун хуб мешавад лахташавии хун муътадил мегардад. Дар ин ҳолат одам намефавтад.

Лазератерапияро чӣ тавр мегузаронанд?

Ғуломов мегӯяд, табобати лазератерапия бениҳоят осон аст ва гуфтан мумкин аст, ки нисбати дигар усулҳое, ки истифода бурда шудааст ин натиҷабахш аст. Дастгоҳи махсус ҳаст, ки дар он нурҳои лазерӣ ҷой карда мешавад ва ба воситаи ҳамин дастгоҳ ин нур ба воситаи сўзандору вориди ҷисми бемор гардонда мешавад ва дар муддати аз 2 то 5 дақиқа бемор табобатро қабул мекунад ва нурҳои лазерӣ ба воситаи ҷараёни хун ба тамоми организм таъсири худро мерасонад.

Хуб аст, ки ин усулро 5 маротиба, яъне 1 рўз пас, давоми 10 рўз табобат кунанд. Мо медонем, ки ҳамин дастгоҳ қариб дар тамоми муассисаҳо, алалхусус, дар муассисаҳои тандурустии шаҳри азизамон Душанбе мавҷуд аст. Лекин ҳамчун усули пешгирикунанда нисбати бемории «COVID-19» ва ин усули табобат дар марҳилаҳои аввал гуфта метавонам, ки айни замон танҳо дар Беморхонаи «Ёрии таъҷилӣ»-и шаҳри Душанбе ба таври васеъ истифода бурда шуда истодааст. Ва натиҷабахш ҳам ҳаст.

Шахсан худам ва якчанд нафар хамкасбон бо мақсади пешгирӣ ҳамин усулро дар худ истифода бурдем. Баъди пурра боварӣ ҳосил кардан дар бадани якчанд бемор низ истифода намудем. Хушбахтона, ягон нафар аз онҳое, ки ҳамин табобатро гирифтаанд, дучори бемории COVID-19 нашудаанд. Айни ҳол тақрибан ду ё се моҳ гузаштааст аз ин таҷриба ва барои хулоса баровардан каме бармаҳал аст.

Табобати лазерӣ ба бемороне, ки аллакай дучори ин беморианд, ёрӣ мерасонад?

Ғуломов мегӯяд, дар марҳилаҳои аввали табобати гирифторони коронавирус, истифода бурдани табобати лазерӣ имкон дорад. Чунки норасогии узвҳо ба таври ҷиддӣ ба назар намерасад. Хуб мешавад, ки истифода кунанд. Табобати лазерӣ ҳамчун усули пешгирикунанда ва ҳамчун усули табобаткунанда дар ҳамин беморон бениҳоят қулай аст.

Пизишк мегӯяд муттассифона чунин усул дар дигар муассисаҳои табобатӣ истифода намешавад.

"Гарчанде, ки ин усул дар тиб кашф шуда бошад, ҳам истифодаи васеи худро дар тиббӣ муосир наёфтааст. Тавсияи мо ҳам ҳамин аст, ки ин усул маъмултар истифода бурда шавад. Табобати лазерӣ як қисмати рисолаи номзадии илмии ман мебошад, ки ҳоло рафта истодааст. Табобати лазерӣ дар одамоне, ки мубталои санги талхадон ҳастанду бинобар сабаби бисёр бемориҳои ҳамрадиф доштан, беҳисгардонӣ (наркоз) карда намешаванд".

Дар марҳилаи аввал дар зери назорати ташхиси ултрасадоӣ талхадони онҳо сабуктар мегардад ва барои пурқувват шудани системаҳои организм табобати лазерӣ мегузаронем ва онҳо қувват пайдо мекунанд, ки барои беҳисгардонидан бардошт кунанд.

Дар марҳилаи дуюм ҷарроҳӣ мегузаронем. Агар дар марҳилаҳои ниҳоӣ норасогии нафас ба назар нарасад зери дастгоҳи сунъӣ будан дигар муҳим нест. Чунки норасогии дил дар он вақт ба назар мерасад. Дар марҳилаи декампитсионӣ, норасогии ҷигар ба назар мерасад, ки дар ин маврид ҳам мумкин нест", - шарҳ медиҳад Ғуломов.

Табиби тоҷик мегӯяд, одамоне, ки бемории пеллагра, бемориҳои музмин дар марҳилаҳои ниҳонӣ, одамони гирифтори васкулити геморригӣ дар марҳилаи ниҳоӣ, гирифторони серози ҷигар дар марҳилаи ниҳоӣ, норасогии кори гурдаҳо дар марҳилаи ниҳоӣ доранд, наметавонанд бо усули нури лазерӣ табобат шаванд.

Табиб мегӯяд, дар Тоҷикистон хушбахтона тамоми чораҳои бартарафкунанда гузаронида шуд ва айни замон барои пешгирии шахсоне, ки ба ин беморӣ дучор шудаанд, имкон аст, ки ба табобати пурраву мукаммал фаро гирифта шудааст.

Чунин беморон аслан дорувории зиддивирусӣ, зиддимикробӣ ва табобати индивидуалии худро қабул мекунанд ва аз рӯи тақсимот бемороне, ки сабук ҳастанд, метавонанд дар хона табобат гиранд ва бемороне, ки норасогиҳои узвҳо доранд, ҳатман табобати статсионарӣ, (беморхона) табобат мегиранд.

1067
Мавзуҳо:
Пайомадҳои COVID-19 дар Тоҷикистон ва ҷаҳон
Мадина Акназарова

Аз кулчапазӣ то нашри нахустин суруд ба забони шуғнонӣ: Мадина дар замони COVID - 19

2217
(Таҷдидшуда 18:24 01.06.2020)
Мадина Ақназарова ахиран суруди ҷадиди худро ба забони шуғнонӣ зери унвони "Рози дил" пешкаши мухлисонаш кард

ДУШАНБЕ, 1 июн — Sputnik, Нилуфар Некқадам. Мадина Ақназарова сарояндаи ҷавон ва машҳури эстрадаи тоҷик, дар суҳбат бо Sputnik Тоҷикистон дар бораи нашри суруди нахустинаш ба забони шуғнонӣ ва ҳамагирии COVID - 19 нақл кард.

Ба гуфти Мадина вақте рӯзҳои аввал дар бораи COVID - 19 сухан мекарданд, дар Душанбе ҳамаро тарсу ваҳм фаро гирифта буд, вале пас аз чанде ҳамаҷо ором шуд.

"Наздик ба якуним моҳ мешавад, ки мо дар хона нишастаем. Худро эҳтиёт мекунем. Шукри Худо ҳамаи аҳли хонаводаамон дурусту бардаманд", - гуфт Мадина.

Сарояндаи ҷавон дар даврони ҳамагирӣ нахустин суруди худро ба забони шуғнонӣ (пештар ӯ суруде бо номи "Ҷону дилам" нашр карда буд, ки танҳо қисме аз суруд ба забони шуғнонӣ сароида шуд) таҳти унвони "Рози дил" нашр ва пешкаши мухлисонаш кард.

Суҳбати Мадина: аз ишқ дар маршировка то муҳоҷирату пулёбӣ ва ҷарроҳии пластикии ситораҳо

Дар бораи нашри ин суруд Мадина мегӯяд аз дер боз мақсад дошт, суруде ба забони модариаш - шуғнонӣ бисарояд, вале суруди мувофиқи дилашро пайдо накарда буд.

"Вақте ман навори қадимиеро тамошо кардам, ки дар он се духтари ҷавон ҳамин суруди "Рози дил"-ро иҷро мекарданд, ман дарҳол онро писандидам ва ба худ гуфтам, ки ман албатта ин сурудро месароям", - нақл кард Мадина ва афзуд, ки аслан ӯ сурудеро интихоб мекунад, ки ба дилаш наздик бошад.

Ӯ гуфт чун матни суруд  бештар мувофиқи сарояндагон - мардон аст, тасмим гирифт матни онро каме тағйир диҳад.

"Ростӣ иҷро кардани суруди бадахшонӣ кори осоне нест. Бояд баландии овоз нота ва ҳамааш мувофиқ бошад. Вале ин суруд ба ман бо тамоми нозукиҳояш мувофиқ омад. Танҳо матнашро ҷой ҷое барои овози духтар мувофиқ кардем", - гуфт Мадина ва афзуд, ки муаллифи ин сурудро пайдо накард, чун яке аз сурудҳои қадимии мардуми Бадахшон ҳаст ва онро суруди халқӣ унвон кард.

Ба ҷавонон муаррифӣ кардани суруди пешинро Мадина аз далели дигари интихоби сурудаш гуфт.

Суруди нави Мадина рӯзи 30 май дар саҳифааш дар шабакаи Youtube нашр шуд. То имрӯз ин сурудро беш аз 39 ҳазор кас шунида ва зиёда аз якуним ҳазор нафар писандидааст.

Аз ҳамагирии коронавирус ёдоварӣ карда, Мадина мегӯяд вақти мувофиқест барои пухту паз барои аҳли хонавода ва сабти наворҳои шӯхиомез.

Дар саҳифаи Мадина дар инстаграм наворе нашр шудааст, ки ӯ дар он тари омода намудани кулчаро аз аввали кор то охир намоиш додааст. Аз навор бар меояд, ки Мадина кадбонуи хубе ҳаст.

Посмотреть эту публикацию в Instagram

Таёри ба Сухур 🌹 Сараф во бамаза ширчой 😜

Публикация от Madina Aknazarova (@madinaaknazarova_)

Ҳамчунин дар баробари наворҳои пухтупаз Мадина видеоҳои шӯхиомезро низ нашр кардааст, ки писанди ҳаводорони ҳунараш шудааст.

Умуман Мадина Ақназарова аз фаъолтарин ҳунармандони тоҷик дар Instagram ба шумор меравад. Ӯ сирри шӯҳрати худро дар истеъдод ва истифодаи фаъолонаи шабакаҳои иҷтимоӣ медонад.

Бар хилофи аксари сарояндагони тоҷик, ки шӯҳратро бо сарфи маблағи ҳангуфт тавъам медиҳанд, Мадина бовар дорад, ки барои инсони боистеъдод ва меҳнаткаш барои дарёфти мақоми худ дар шоу-бизнеси тоҷик, монеа вуҷуд надорад.

"Дар асри 21 машҳур шудан бисёр осон аст. Агра инсон истеъдод ва ҷаззобият дошта бошад, албатта метавонад дар санъати тоҷик мақоми худро пайдо кунад. Ман ин чизро дар мисоли худам тасдиқ мекунам. Шояд солҳои пеш мушкилтар буд, вале имрӯзҳо бо кумаки интернет ин кор осон шудааст”, - гуфт Мадина дар суҳбат бо Sputnik Тоҷикистон.

Мадина Ақназарова соли 2018 дар санъати эстрадии тоҷик зуҳур кард. Ӯ бо сабки сурудхонӣ, интихоби матни суруд, овози боқувват ва ҷасорату фаъолнокӣ дар Instagram зуд дар дилу дидаи мақомдорони умури фарҳанг ва мардум ҷой ёфт.

Посмотреть эту публикацию в Instagram

Dustoni aziz, surudi halqii ” ”Rozi dil”bo zaboni Badakhshoni ( Shugnoni) alakai dar Youtube dar kanali man sado medihad 🙏🏻 Marhamat, gush kuned . 🎉 #girlfrombadakhshan🌹

Публикация от Madina Aknazarova (@madinaaknazarova_)

Нахустин намоҳангашро таҳти унвони "Ай ёр, ёр" соли 2017 сабт ва пешкаши мухлисон карда буд, ки аз ҷониби тамошобинон бисёр хуш пазируфта шуд. Мадина дар чандин консертҳои хайриявӣ низ ҳунарнамоӣ карду ӯро дигар дар чорабиниҳои сатҳи давлатӣ низ даъват мекарданд. 

Мадина мусиқии тоҷикро дар Ӯзбекистон ва Ҷопон ва дигар кишварҳо муаррифӣ кардааст.

Мадина Ақназарова 15 феврали соли 1998 дар шаҳри Хуҷанд ба дунё омадааст. Пас аз чанде хонаводаи Мадина ба пойтахти шимолии Русия шаҳри Санкт-Петербург мекӯчад.

Мадина то синфи 9-ум дар мактаби рақами 596 ин шаҳр таҳсил кардааст. Пас аз хатми синфи 9 хонаводаи Мадина ба шаҳри Душанбе бозгашт.

Мадина ҳуҷҷатҳояшро ба мактаби мусиқии ба номи Аҳмад Бобоқулов бо маслиҳати бобояш ба шуъбаи академӣ (опера) супорид ва онро бо хубӣ хатм кард. Пасон Мадина таҳсилашро дар Донишкадаи санъати Тоҷикистон ба номи Мирзо Турсунзода идома дод.

Феълан Мадина Ақназарова донишҷӯи соли сеюми Донишкадаи ҳунарҳои зебо мебошад.

То имрӯз Мадина Ақназарова консертҳояшро дар шаҳрҳои Душанбе, Хуҷанд, Маскав ва Санкт-Пебербург баргузор кардааст.

2217
Барчаспҳо:
Забони модарӣ, Мадина Ақназарова, Тоҷикистон
Мавзуҳо:
Пайомадҳои COVID-19 дар Тоҷикистон ва ҷаҳон
Свеча

Мусибат дар хонаводаи Мӯъмин Қаноат: набераи 42 - солааш ҷаҳони фониро падруд гуфт

136
(Таҷдидшуда 23:48 06.06.2020)
Баҳрин нахустнабераи шоири зиндаёд Мӯъмин Қаноат дар синни 42 - солагӣ аз олам ҷашм пӯшид. Иллати марги ӯ маризии гурда арзёбӣ мешавад

ДУШАНБЕ, 6 июн – Sputnik. Хабари фавти бармаҳали Баҳрин - нахустнабераи Мӯъмин Қаноат шоири зиндаёдро адиби тоҷик Аҳмадшоҳи Комилзода дар сафҳаи Фейсбукии худ коридаст.

акс аз сафҳаи фейсбукии Комилзода Аҳмадшоҳ
Баҳрин нахустнабераи Мӯъмин Қаноат

Ба навишати Комилзода, набераи устоди зиндаёд Мӯъмин Қаноат ҳамагӣ 42 - сол умр дошта, бар асари бемории шадиди гурда, рӯзи 6 - уми июн аз олам чашм пӯшид. 

"Баҳрин ҷавони донишманд, донанда ва тарҷумони хуби се забон – порсии тоҷикӣ, русӣ ва англисӣ буд, ки бо ин се забон кору тарҷума мекард", - навиштааст Комилзода.

Хезед бобо Дарвоз мерем: арӯси хонаводаи Мӯъмин Қаноат аз вопасин суханҳои шоир нақл кард

Аз марҳум ду фарзанд Суруш ва Мумтоз, ки яке 15 - сола ва дувумӣ 13 - солаанд, ятим монданд.

Дӯстони Баҳрин, даргузашти ӯро ҳамчун шахсияти соҳибхираду соҳибғурур ва нафари ботамкин, як мусибати бузурги ҷуброннопазир арзёбӣ мекунанд.

136