Шухрат Сайнаков, солист группы Равшандилони Рушон, концерт в память барда Лидуша Хабибо в Душанбе

Шуҳрат Сайнаков дар бораи ташкили гурӯҳ, гурезагӣ, танзими тӯйҳо ва овозхонони қалбакӣ

1416
(Таҷдидшуда 14:51 14.12.2019)
Раҳбари гурӯҳи “Равшандилони Рӯшон” – овозхони машҳур Шӯҳрат Сайнаков бавар дорад, ки ҳунарманд танҳо ба воситаи меҳнату кор метавонад муваффақ шавад

ДУШАНБЕ, 14 дек — Sputnik, Нилуфар Некқадам. Овозхони тоҷик Шӯҳрат Сайнаков дар остонаи 20-солагии гурӯҳ бо Sputnik Тоҷикистон дар бораи ташкили гурӯҳи “Равшандилони Рӯшон”, мушкилии санъати имрӯзаи Тоҷикистон, танзими тӯйҳо, гурезагӣ ва мероси худ ба фарзандонаш гуфт.

Пурсупоси ногаҳонӣ ва номгузории гурӯҳи "Равшандилони Рӯшон”

Гурӯҳи “Равшандилони Рӯшон”-ро ҳамагон бо сурудҳои ватандӯстона, қабои сафеду шероздор ва тоқиҳои гирди сабзу сурхи "помирӣ" мешиносанд. Ин гурӯҳ 13 декабри соли 1999 таҳти раҳбарии Шӯҳрат Сайнаков ташкил шудааст. Имрӯз ба муносибати 20-солагии таъсисёбии дастаи ҳунарӣ дар шаҳри Душанбе барномаи бузурги консертӣ барпо мешавад. То имрӯз гурӯҳи “Равшандилони Рӯшон” садҳо сурудҳои ватандӯстию, лирикӣ, фалак ва жанрҳои гуногунро пешкаши мухлисон кардааст.

Номгузории гурӯҳи "Равшандилони Рӯшон" ба ҳодисаи аҷибе пайвандӣ дорад. Шӯҳрат Сайнаков бо интихоби ин ном ҳадаф гузошта буд, то ноҳияи Рӯшон - зодгоҳи овозхонро дар кулии Тоҷикистон шиносанд.

"Соли 1995 буд. Чун ман дар даврони ҷанги шаҳрвандӣ ба Бадахшон гуреза шуда будам, дубора соли 1995 ба Душанбе бозгаштам. Рӯзе дар кӯчаҳои Душанбе гурӯҳе аз ҷавонон аз ман пурсон шуданд, ки "ай куҷо мешай? - чун ман посух додам аз "Рӯшон" - ба онҳо наонқадар ин макон маълум буд. Пас ҳадаф гузоштам, ки бигзор тавассути номгузории гурӯҳамон кулли Тоҷикистон ноҳияи Рӯшонро бишносанд", - ба ёд меорад Шуҳрат Сайнаков.

Ба гуфти Шӯҳрат Сайнаков ташкил кардани гурӯҳ ва нигоҳ доштани он, кори бисёр душвор аст. Вале, бар хилофи ҳамаи мушкилиҳо гурӯҳи “Равшандилони Рӯшон” тавонист, то имрӯз фаъолият кунад ва мухлисони бисёреро пайдо намуда тӯю маъракаҳои мардумро обод гардонад. 

"Аз нахустин рӯз ҳунармандон Худоёр Бозоров, Алим Давлатшоев, ки бештар чун Грини Каримзод машҳур аст, бо ман буданд. Ин ду шахс аз деҳоти мо ҳастанд. Мо ҳамдигарро аз аввал мешинохтем”, - нақл мекунад Сайнаков.

Имрӯз дар гурӯҳ ҳунармандон аз манотиқи мухталифи ВМКБ ва дигар шаҳру навоҳӣ ҷамъ омадаанд. Бо мурури замон бархе аз ҳунармандон гурӯҳро тарк карданд, нафаре ба Русия муҳоҷир шудааст, дигаре ҷои кори нав ёфтааст ва айни замон дар гурӯҳи "Равшандилои Рӯшон" шаш кас фаъолият мекунад: Алим Давлатшоев –овозхон, Ошур Ошуров таблнавоз, Ҳамдин – гиторнавоз - тоза донишгоҳро хатм кардааст, Фарҳод гитори электрикӣ, Эраҷ овозхони асбоби нафасии саксафон ва раҳбари гурӯҳ ва яккасаро Шӯҳрат Сайнаков.

Сайнаков аз узвияти ҳар як ҳунарманд шод аст ва мегӯяд зиндагиашонро бо ҳамин овозхонӣ дар гурӯҳ, пеш мебаранд.

"Бисёр шодем, ки тавонистем чунин гурӯҳ ташкил кунем. Мутрибони хуб дар атрофи мо ҳастанд, аз ин рӯ талош доштем, имсол соли 2019, 20-солагии гурӯҳамонро бо як барномаи бузурги консетӣ таҷлил кунем”.

Дар барномаи консертӣ ҳунармандон сурудҳои дӯстдоштаи пешин ва ҷадидро пешкаши мухлисон хоҳанд кард.

Гурӯҳи Равшандилони Рӯшон
Аз бойгонии Шуҳрат Сайнаков
Гурӯҳи "Равшандилони Рӯшон"

Роҳ ба сӯи шӯҳрат: аз сурудҳои Муборакшо то эҷодиёти худӣ

Нахустин консерти гурӯҳи “Равшандилони Рӯшон” рӯзи таъсиси гурӯҳ - 13 декабри соли 1999 баргузор шуд. 30-декабри соли 1999 дуюмин барномаи бузурги консертии ин гурӯҳ дар бинои “Сирки давлатӣ” ва 6 марти соли 2000 дар толори “Кохи Борбад” барпо гардид, ки дар он овозхони машҳур шодравон Муборакшо низ ширкат дошт.

"Дар ёд дорам, Муборакшо се чор сурудамонро гӯш карду гуфт, чӣ гуна шумо ҷуръат кардед дар чунин толори бузург консерт барпо кунед. Мо гуфтем, бояд ҷуръат кард то муваффақ шуд”.

Аслан гурӯҳ соли 2007 пас аз сароидани суруди “Тоҷикистон ҳамаи дунёи манӣ” миёни мардум шуҳратёр гашт.

"Ман аввал дар тӯйҳо сурудҳои Муборакшоро месароидам, вале пасон қарор кардам, ки барои муваффақ шудан бояд эҷодиёт шахсӣ бошад. Аввал бо устод Муборакшо Ҷумъаев ҳамкорӣ мекардам, оҳангҳоямро ба ӯ нишон медодам ва он кас арзёбӣ мекарданду маслиҳат медоданд. Чун ба эҷоди оҳангҳои худӣ оғоз кардам дигар комёбии сурудҳоямро аз кафкӯбиҳои мухлисон мефаҳмидам”.

Шуҳрат Сайнаков бовар дорад, ки барои машҳур шудан бояд нозукиҳои мусиқии тоҷикиро ба пуррагӣ омӯхт ва пайваста меҳнат кард.

“Жанри мусиқии ман яктарафа нест. Ман кӯшиш мекунам, ки нозукиҳои мусиқии тамоми гӯшаю канори ҷумҳуриямонро дар як суруд нишон бидиҳам, то гӯш кардан барои ҳамагон форам бошад”.

Пайравӣ ба дигарон

Аксари овозхонони ҷавони тоҷик имрӯз ба ҳамтоёни худ ба Эрон ва Афғонистон тақлид мекунанд ва мусиқии онҳоро истифода мебаранд. Бархеи дигар аз рӯи пӯлу моли худ ҳар рӯз намоҳангҳои ҷадид сабт менамоянд, вале санъати тоҷик аз ин рушде намекунад.

Шуҳрат Сайнаков ин гурӯҳи овозхононро сарояндагони қалбакӣ медонад ва кори онҳоро маҳкум карда, беҳурматӣ нисбати санъати бойи тоҷикон медонад.

Ӯ ҳамчунин яке аз ноқисии мусиқии тоҷикро дар танбалии ҷавонон ва эҷодкор набудани онҳо мебинад.

"Афсӯс, ки ҷавонони мо дар оҳангҳои афғонию эронӣ матн мемонанду месароянд. Ман чунин корро қабул надорам. Ҳамаи оҳангҳоро ман худам эҷод мекунам. Шоирони мо матнҳои бебаҳо эҷод кардаанд, яъне нафаре ки китоб мехонад метавонад, матнҳои хуб пайдо кунад ва суруди хубе эҷод кунад то ба дили мардум роҳ ёбад. Он нафароне, ки ба мусиқии эронӣ такя мекунанд, фикр мекунам, санъати миллии Тоҷикистонро қадр намекунанд. Мо инқадар мубориза мебарем, то фарҳанги тоҷикиро дар ҷаҳон муаррифӣ кунем, вале онҳо хато мекунанд. Дер ё зуд моли дигар кас будани оҳанг, маълум мешавад. Албатта эҷод кардани оҳанг кори осон нест. Вале агар эҷод карда наметавонанд, лоақал бо оҳангсозони барҷаста ҳамкорӣ кунанд".

"Мо ду сол пеш ба шаҳри Пекин рафтем ва дар саҳна бо либосҳои миллӣ бо дафу доира ҳунарнамоӣ кардем. Он замон суруди “Мезебад, мезебад” – ро сароида будам. Мардум пас аз чанде бо ман якҷо ҳамовозӣ мекарданд. Пас аз ҳунарнамоӣ омада пурсон шуданд, ки аз куҷоем. Моро бо ҳамин фарҳанги либоспӯшӣ мешиносанд".

Шуҳрат Сайнаков аз миёни овозхонони ҷавон истеъдоди Фотима Машрабова, Мадина Ақназарова ва Орази Олимшоро қайд карда мегӯяд, онҳо бояд бештар меҳнат кунанд, то тавонанд номи худро дар санъати тоҷик боқӣ гузоранд.

"Ҳунармандон бисёр ҳастанд ва нафаре, ки мисли мо аз дилу ҷон кор кунаду меҳнат кунад ба ҷодаи баланд мерасад. Ман ба заҳматҳои худ такя мекунам. Нафаре, ки пул дораду ҳунар не, рӯзе аз интихоби ин роҳ пушаймон мешавад. Чунин ҳофизон барферо мемонанд, ки зуд об мешаванд, вале мисли Зафар Нозим, Давлатманд Холов, Одина Ҳошим – пирях шудан бисёр душвор аст. Мо имрӯз кӯшиш мекунем, барои расидан ба чунин қуллаҳо замина бигузорем”.

"Тӯйҳо набошанд як рӯз ҳам дар санъат намемонем"

Пӯшида нест, ки имрӯз дар Тоҷикистон даромади ягонаи санъаткорон аз ҳисоби тӯю маърака ҳаст. Ин ягона роҳи дарёфти рӯзӣ барои ҳунармандони тоҷик мондааст. Шӯҳрат Сайнаков мегӯяд санъаткорони тоҷик имрӯз саропо аз тӯю маърака вобаста ҳастанд

"Тӯю маърака набошад, мумкин мо як рӯз ҳам дар мусиқӣ намемонем. Мо барои сатби як суруд то 2,5 ҳазор сомонӣ сарф мекунем. Агар ин маблағро аз тӯй пайдо накунӣ дигар аз куҷо метавон ёфт. Дар кори давлатӣ музди кории мо 720 сомонӣ аст, бо ин маблағ бояд чӣ кунем, зиндагӣ пеш барем ё суруд эҷод кунем”, - мегӯяд Шӯҳрат Сайнаков.

Вале, дар баробари ин Сайнаков аз он изҳори хушнудӣ мекунад, ки фармоиш чӣ дар Душанбе ва чӣ дар вилоятҳои Суғду, Хатлону Бадахшон зиёд аст. Ӯ аз қонуни танзими ҷашну маросим, ки муҳлати баргузории тӯю маъракаро то 3 соат кам кард, истиқбол мекунад ва ҳатто пешниҳод дорад, ки тӯйи тоҷикони Русия низ танзим шавад.

"Қонуни танзим ҳам ба фоидаи меҳмонон ва ҳам ба фоидаи ҳофизон аст, ки оромона метавонанд сароянд ва бо лаззат корашонро пеш баранд. Меҳмонон низ хаста намешаванд. Ин тақозои замон ҳам ҳаст. Мардум вақт надорад. Дар Душанбе тӯйҳои мо дар сатҳи бисёр баланд баргузор мешавад”.

Сайнаков бо ҳамтоёни худ, ки дар тӯю маъракаҳои Русия ҳофизӣ мекунанд дар алоқа аст ва аз баргузории тӯйи ҳафтсоата изҳори нигаронӣ мекунад. Ӯ пешниҳод дорад, ки тӯйҳои тоҷикони Русия низ танзим шавад.

"Дар Маскав ҳам бояд тӯй танзим шавад. Мо пешниҳод мекунем, ки ҷавонон дар баробари фикри кайфияти худ, фикри ҳофизон, домоду арӯс ва умуман ҳамаи меҳмононро низ кунанд. Хуб мешуд, агар тӯйҳо дар Русия аққалан то чаҳор соат танзим мешуд".

Мероси падар хоҳӣ илми падар омӯз

Шуҳрат Сайнаков оиладор соҳиби ду фарзанд: як духтар ва як писар мебошад.

Ӯ ифтихор дорад, ки барои ояндаи фарзандонаш заминае гузоштааст ва агар фарзандонаш роҳи ҳунарро интихоб кунанд, падар дастгириашон хоҳад кард.

"Он қадар заминае, ки ман гузоштам, фикр мекунам, ояндаи фарзандонамро дурахшон мекунад. Интихоби касби оянда дар дасти худи фарзандон аст. Шояд рӯзе писарам мисли ман дилбанди мусиқӣ мешавад, ман ҳич гоҳ зид намебароям. Ӯ метавонад оҳанг эҷод накунад ва танҳо оҳангҳои маро сарояд мисле ки писари Зафар Нозим аз ӯ месарояд, писари Одина Ҳошим ва писари Кароматуллоҳ – Муҳаммадрофеъ”, - бовар дорад Шӯҳрат Сайнаков.

Зиндагиномаи Шӯҳрат Сайнаков

Шӯҳрат Сайнаков 17 сентябри соли 1974 дар деҳоти Дерзуди ноҳияи Рӯшони ВМКБ ба дунё омадааст.

Шуҳрат Сайнаков
Аз бойгонии Шуҳрат Сайнаков
Шуҳрат Сайнаков

Дар хурдӣ аввал ба футбол шавқу рағбат дошт. Дар синии 12-солагӣ ба мусиқӣ шавқ пайдо карда дар синфи 7 нахустин бор аккардионро ба даст гирифт.

Аз синфи 9 овозхониро оғоз кардааст. Соли 1991 ба пойтахт шаҳри Душанбе омада, ба Донишгоҳи омӯзгорӣ дар факултаи мусиқӣ ва суруд дохил шуд, вале ба сабаби ҷанги шаҳрвандӣ донишгоҳро танҳо соли 1998 хатм кард.

Даҳ сол дар Донишгоҳи омӯзгорӣ кору фаъолият кардааст.

13 декабри соли 1999 гурӯҳи “Равшандилони Рӯшон” - ро ташкил карда ва роҳбари он интихоб шуд.

Пас аз сароидани “Тоҷикистон ҳамаи дунёи манӣ” соли 2007 миёни мардум шӯҳрат пайдо кард. Имрӯз Шуҳрат Сайнаков аъзои гурӯҳи “Фалак”-и назди ҳукумати Тоҷикистон мебошад.

Аккардион, пианнино ва гиторро хуб менавозад. Оиладор соҳиби ду фарзанд.

1416
Барчаспҳо:
гурӯҳ, овозхон, қалбакӣ, гурезагӣ
Мадина Акназарова

Аз кулчапазӣ то нашри нахустин суруд ба забони шуғнонӣ: Мадина дар замони COVID - 19

911
(Таҷдидшуда 18:24 01.06.2020)
Мадина Ақназарова ахиран суруди ҷадиди худро ба забони шуғнонӣ зери унвони "Рози дил" пешкаши мухлисонаш кард

ДУШАНБЕ, 1 июн — Sputnik, Нилуфар Некқадам. Мадина Ақназарова сарояндаи ҷавон ва машҳури эстрадаи тоҷик, дар суҳбат бо Sputnik Тоҷикистон дар бораи нашри суруди нахустинаш ба забони шуғнонӣ ва ҳамагирии COVID - 19 нақл кард.

Ба гуфти Мадина вақте рӯзҳои аввал дар бораи COVID - 19 сухан мекарданд, дар Душанбе ҳамаро тарсу ваҳм фаро гирифта буд, вале пас аз чанде ҳамаҷо ором шуд.

"Наздик ба якуним моҳ мешавад, ки мо дар хона нишастаем. Худро эҳтиёт мекунем. Шукри Худо ҳамаи аҳли хонаводаамон дурусту бардаманд", - гуфт Мадина.

Сарояндаи ҷавон дар даврони ҳамагирӣ нахустин суруди худро ба забони шуғнонӣ (пештар ӯ суруде бо номи "Ҷону дилам" нашр карда буд, ки танҳо қисме аз суруд ба забони шуғнонӣ сароида шуд) таҳти унвони "Рози дил" нашр ва пешкаши мухлисонаш кард.

Суҳбати Мадина: аз ишқ дар маршировка то муҳоҷирату пулёбӣ ва ҷарроҳии пластикии ситораҳо

Дар бораи нашри ин суруд Мадина мегӯяд аз дер боз мақсад дошт, суруде ба забони модариаш - шуғнонӣ бисарояд, вале суруди мувофиқи дилашро пайдо накарда буд.

"Вақте ман навори қадимиеро тамошо кардам, ки дар он се духтари ҷавон ҳамин суруди "Рози дил"-ро иҷро мекарданд, ман дарҳол онро писандидам ва ба худ гуфтам, ки ман албатта ин сурудро месароям", - нақл кард Мадина ва афзуд, ки аслан ӯ сурудеро интихоб мекунад, ки ба дилаш наздик бошад.

Ӯ гуфт чун матни суруд  бештар мувофиқи сарояндагон - мардон аст, тасмим гирифт матни онро каме тағйир диҳад.

"Ростӣ иҷро кардани суруди бадахшонӣ кори осоне нест. Бояд баландии овоз нота ва ҳамааш мувофиқ бошад. Вале ин суруд ба ман бо тамоми нозукиҳояш мувофиқ омад. Танҳо матнашро ҷой ҷое барои овози духтар мувофиқ кардем", - гуфт Мадина ва афзуд, ки муаллифи ин сурудро пайдо накард, чун яке аз сурудҳои қадимии мардуми Бадахшон ҳаст ва онро суруди халқӣ унвон кард.

Ба ҷавонон муаррифӣ кардани суруди пешинро Мадина аз далели дигари интихоби сурудаш гуфт.

Суруди нави Мадина рӯзи 30 май дар саҳифааш дар шабакаи Youtube нашр шуд. То имрӯз ин сурудро беш аз 39 ҳазор кас шунида ва зиёда аз якуним ҳазор нафар писандидааст.

Аз ҳамагирии коронавирус ёдоварӣ карда, Мадина мегӯяд вақти мувофиқест барои пухту паз барои аҳли хонавода ва сабти наворҳои шӯхиомез.

Дар саҳифаи Мадина дар инстаграм наворе нашр шудааст, ки ӯ дар он тари омода намудани кулчаро аз аввали кор то охир намоиш додааст. Аз навор бар меояд, ки Мадина кадбонуи хубе ҳаст.

Посмотреть эту публикацию в Instagram

Таёри ба Сухур 🌹 Сараф во бамаза ширчой 😜

Публикация от Madina Aknazarova (@madinaaknazarova_)

Ҳамчунин дар баробари наворҳои пухтупаз Мадина видеоҳои шӯхиомезро низ нашр кардааст, ки писанди ҳаводорони ҳунараш шудааст.

Умуман Мадина Ақназарова аз фаъолтарин ҳунармандони тоҷик дар Instagram ба шумор меравад. Ӯ сирри шӯҳрати худро дар истеъдод ва истифодаи фаъолонаи шабакаҳои иҷтимоӣ медонад.

Бар хилофи аксари сарояндагони тоҷик, ки шӯҳратро бо сарфи маблағи ҳангуфт тавъам медиҳанд, Мадина бовар дорад, ки барои инсони боистеъдод ва меҳнаткаш барои дарёфти мақоми худ дар шоу-бизнеси тоҷик, монеа вуҷуд надорад.

"Дар асри 21 машҳур шудан бисёр осон аст. Агра инсон истеъдод ва ҷаззобият дошта бошад, албатта метавонад дар санъати тоҷик мақоми худро пайдо кунад. Ман ин чизро дар мисоли худам тасдиқ мекунам. Шояд солҳои пеш мушкилтар буд, вале имрӯзҳо бо кумаки интернет ин кор осон шудааст”, - гуфт Мадина дар суҳбат бо Sputnik Тоҷикистон.

Мадина Ақназарова соли 2018 дар санъати эстрадии тоҷик зуҳур кард. Ӯ бо сабки сурудхонӣ, интихоби матни суруд, овози боқувват ва ҷасорату фаъолнокӣ дар Instagram зуд дар дилу дидаи мақомдорони умури фарҳанг ва мардум ҷой ёфт.

Посмотреть эту публикацию в Instagram

Dustoni aziz, surudi halqii ” ”Rozi dil”bo zaboni Badakhshoni ( Shugnoni) alakai dar Youtube dar kanali man sado medihad 🙏🏻 Marhamat, gush kuned . 🎉 #girlfrombadakhshan🌹

Публикация от Madina Aknazarova (@madinaaknazarova_)

Нахустин намоҳангашро таҳти унвони "Ай ёр, ёр" соли 2017 сабт ва пешкаши мухлисон карда буд, ки аз ҷониби тамошобинон бисёр хуш пазируфта шуд. Мадина дар чандин консертҳои хайриявӣ низ ҳунарнамоӣ карду ӯро дигар дар чорабиниҳои сатҳи давлатӣ низ даъват мекарданд. 

Мадина мусиқии тоҷикро дар Ӯзбекистон ва Ҷопон ва дигар кишварҳо муаррифӣ кардааст.

Мадина Ақназарова 15 феврали соли 1998 дар шаҳри Хуҷанд ба дунё омадааст. Пас аз чанде хонаводаи Мадина ба пойтахти шимолии Русия шаҳри Санкт-Петербург мекӯчад.

Мадина то синфи 9-ум дар мактаби рақами 596 ин шаҳр таҳсил кардааст. Пас аз хатми синфи 9 хонаводаи Мадина ба шаҳри Душанбе бозгашт.

Мадина ҳуҷҷатҳояшро ба мактаби мусиқии ба номи Аҳмад Бобоқулов бо маслиҳати бобояш ба шуъбаи академӣ (опера) супорид ва онро бо хубӣ хатм кард. Пасон Мадина таҳсилашро дар Донишкадаи санъати Тоҷикистон ба номи Мирзо Турсунзода идома дод.

Феълан Мадина Ақназарова донишҷӯи соли сеюми Донишкадаи ҳунарҳои зебо мебошад.

То имрӯз Мадина Ақназарова консертҳояшро дар шаҳрҳои Душанбе, Хуҷанд, Маскав ва Санкт-Пебербург баргузор кардааст.

911
Барчаспҳо:
Забони модарӣ, Мадина Ақназарова, Тоҷикистон
Мавзуҳо:
Пайомадҳои COVID-19 дар Тоҷикистон ва ҷаҳон
Мадина Акназарова - Бо ту / Madina Aknazarova - Bo Tu (2020) - YouTube

Мадина Ақназарова чеҳраи Tcell интихоб шуд

1923
(Таҷдидшуда 17:57 24.05.2020)
Сарояндаи ҷавон ва машҳури тоҷик Мадина Ақназарова чеҳраи яке аз брэндҳои алоқаи Тоҷикистон Tcell интихоб шуд

ДУШАНБЕ, 24 май — Sputnik. Мадина Ақназарова сарояндаи ҷавони эстрадаи тоҷик чеҳраи ширкати номдори Tcell интихоб шуда ҳамроҳи ин ширкат бар зидди паҳншавии коронавируси навъи COVID - 19 дар Тоҷикистон мубориза хоҳанд бурд.

Дар ин бора ширкати Tcell ва ҳам Мадина Ақназарова дар саҳифааш дар инстаграм хабар додааст.

Посмотреть эту публикацию в Instagram

@tcell.tj 🎉🙏🏻 Интихоби ман Tcell 😏

Публикация от Madina Aknazarova (@madinaaknazarova_)

Бино ба гузориши манбаъ, Мадина аз ҷумла дар видеоролике барои пешбурди барномаи "Эко" - барномае барои муштариён, ки маблағи он барои мубориза бар зидди паҳншавии коронавируси навъи COVID - 19 дар Тоҷикистон ҳазина мешавад.

Мадина мардуми Тоҷикистонро барои мубориза бо ин вабои аср даъват мекунад, то ба барномаи "Эко" - и Tcell пайваст шаванд ва дар мубориза бо вируси корона саҳмгузор бошанд, чун қисме аз маблағи ин тарофа ба бунёди мубориза бо коронавирус гузошта мешавад.

Аз Шабнам то Нигинаю Мадина: аксияи хайриявии ситораҳои шоу-бизнес - видео

Ёдрас мешавем, ки пештар Мадина Ақназарова дар аксияи хайриявии ситораҳои шоу-бизнеси тоҷик ширкат карда ба 50 оилаи ниёзманд кумак расонид.

Мадина Ақназарова 15 феврали соли 1998 дар шаҳри Хуҷанд ба дунё омадааст. Пас аз чанде хонаводаи Мадина ба пойтахти шимолии Русия шаҳри Санкт-Петербург мекӯчад.

Мадина то синфи 9-ум дар мактаби рақами 596 ин шаҳр таҳсил кардааст. Пас аз хатми синфи 9 хонаводаи Мадина ба шаҳри Душанбе бозгашт.

Мадина ҳуҷҷатҳояшро ба мактаби мусиқии ба номи Аҳмад Бобоқулов бо маслиҳати бобояш ба шуъбаи академӣ (опера) супорид ва онро бо хубӣ хатм кард. Пасон Мадина таҳсилашро дар Донишкадаи санъати Тоҷикистон ба номи Мирзо Турсунзода идома дод.

Феълан Мадина Ақназарова донишҷӯи соли сеюми Донишкадаи ҳунарҳои зебо мебошад.

То имрӯз Мадина Ақназарова консертҳояшро дар шаҳрҳои Душанбе, Хуҷанд, Маскав ва Санкт-Пебербург баргузор кардааст.

1923
Барчаспҳо:
"TCELL", Тоҷикистон, Мадина Ақназарова
Мавзуҳо:
Пайомадҳои COVID-19 дар Тоҷикистон ва ҷаҳон
Кобилчон Гиёев

Вазифаи баланд ё шикояти раис? Сабабҳои барканории Қобилҷон Гиёев

279
Мақомот барканории Қобилҷон Гиёев, акнун собиқ сардухтури ноҳияи Раштро шарҳи яксон намедиҳанд. Ба қавли яке, бар асоси шикояти раиси ноҳия барканор шудааст, дуввумӣ мегӯяд, ӯ вазифаи баландтар хоҳад гирифт

ДУШАНБЕ, 2 июн – Sputnik. Маркази матбуоти вазорати тандурустӣ ва ҳифзи иҷтимоии аҳолии Тоҷикистон дар як шарҳи кӯтоҳ ба Sputnik Тоҷикистон гуфт, ки барканории сардухтури ноҳияи Рашт ибтикори вазорат нест.

“Ӯ бар пояи шикояти раиси ноҳияи Рашт аз вазифа барканор шудааст. Шикоят ҳам ин аст, ки Қобилҷон Гиёев ба ҷуз сардухтур буданаш, муовини раиси Ситоди ноҳияи Рашт барои ҷилавгирӣ аз густариши “вируси корона” низ будааст ва дар ҷои кор ҳам ҳузур надоштаасту дар ҷаласаҳои ситод низ ширкат накардааст”, - гуфтанд дар Маркази матбуоти вазорати тандурустӣ ва ҳифзи иҷтимоии аҳолӣ.

Зимнан, рӯзи гузашта, 1 июн, Қобилҷон Гиёев ба Sputnik Тоҷикистон низ далели барканориашро шикояти Раҳимҷон Муқимӣ, раиси ноҳияи Рашт ба вазорати тандурустӣ ва ҳифзи иҷтимоии аҳолӣ гуфта буд.

Дар ҳамин ҳол, бегоҳи ҳамон рӯз дар як тамоси телефонӣ бо Sputnik Тоҷикистон Раҳимҷон Муқимӣ, раиси ноҳияи Рашт, ин иддаоро рад карда, гуфт, Қобилҷон Гиёев бо ариза, хоҳиш ва ихтиёри худ аз вазифа рафтааст.

“Он қадар ки мо хабар дорем, чанде пас ӯ бояд дар Душанбе ба вазифаи баландтар таъин шавад. Имрӯз ӯ назди ман омада буд. Суҳбат доштем. Ба хурсандӣ хайрухуш кардем. Ҳамаи гап ҳамин”, - гуфт Раҳимҷон Муқимӣ.

Рухсатӣ ё...?

Дар суҳбат бо Sputnik Тоҷикистон Қобилҷон Гиёев дар шарҳи гуфтаҳои вазорати тандурустӣ ва раиси ноҳияи Рашт гуфт, ӯ 27 май ба вазорат даъват шуда, аризаи аз кор рафтанашро навишт.

Вай афзуд, рӯзи дигар, 28 май, ӯро дигарбора ба вазорат даъват карда, гуфтанд, ки аризаи аз кор рафтан на, балки рухсатӣ рафтанро бинависам ва дар ҷои худ муовинамро иҷрокунандаи вазифа таъин кунам.

“Ҳоло ман дар ҳайрат уфтодаам. Ман 12 май ба Душанбе рафтам. 12 май дигарбора ба Рашт баргаштам. Ҳамон рӯз ҷаласаи ситодро баргузор кардам. Бегоҳ мустақим бо вазири тандурустӣ мулоқоти видеоӣ баргузор шуд. Субҳ боз ҷаласаи ситод буд. Пас аз он рафтам ба шифохонаҳои минтақаӣ - Ҳоит, Қалъаи Сурх, Навобод. Аз 13 то 15 пурра дар Рашт будам. Азбаски вазъи сиҳӣ дар ноҳия ба эътидол омада буд, дигарбора ба Душанбе омада, ин ҷо ба табобат машғул шудам”, - гуфт Қобилҷон Гиёев.

Бино ба иттилои ӯ, дар ноҳияи Рашт 174 нафареро, ки ҳарорат доштаанд, дар хонаҳо ва 60 нафарро бо ташхиси пневмония дар шифохонаҳо табобат кардаанду даҳҳо нафари дигар пас аз муроҷиату табобати кӯтоҳ зуд рухсат шудаанд. Вай афзуд, дар ин миён ду нафар мутаваллидони яке, соли 1940 ва дигаре, 1942 аз маризиҳои дил фавтидаанд, на пневмония ё “вируси корона”.

“Вақте вазъи сиҳӣ Рашт муътадил шуд, ман ба Душанбе рафтам. Дуюм ин, ки ман на бо хоҳиши худ, балки бо даъвати мақомот омада будам, ки дар вазорати тандурустӣ огаҳӣ доранд”, - гуфт Қобилҷон Гиёев.

Пизишки ҳайрат

Қобилҷон Гиёев пас аз он дар забони расонаҳо уфтод, ки дар оғози мубориза алайҳи “вируси корона” бо як доруи ғайримаъмулии зидди пневмонияи бузҳо дар ноҳияи Рашт, ба қавли худаш, ҳудуди 300 нафарро табобат кард.

Ин дору аз пенитсилин ва стрептамитсин иборат буда, кӯтоҳ “пенстреп” номида ва барои “вируси корона” – и ҳайвонот истифода мешавад. Баъдтар ӯ ба Душанбе омад ва дар пойтахту навоҳии атроф ва вилояти Хатлон бо табобати маризон машғул шуд.

Ӯ қаблан (23 май) дар як суҳбати ихтисосӣ ба Sputnik Тоҷикистон гуфта буд, ки дар умум беш аз 1000 нафарро табобат кардааст. Аммо ҳоло мегӯяд, теъдоди маризоне, ки ӯ табобат кардааст, аз ин ҳам бештар шудааст.

“Ҳоло бисёриҳо ба табобати ман шак доранд. Ҳақ ҳам доранд. Аммо шоҳидони ман ҳамон маризоне ҳастанд, ки шифо ёфтанд. Мегӯянд, ки ман барои рекламаи худ ва пулкоркунӣ Душанбе рафтам. Инҳоро ҳам ба Худо месупорам. Аммо ҳоло бо забони дароз мегӯям, ки ду моҳи ахир ман дар хизмати мардуму давлати худ будам ва ин корамро давом хоҳад дод”, - гуфт Қобилҷон Гиёев.

Ҳоло танҳо гуфтугузоре, ки сардухтури инак собиқи ноҳияи Раштро дар ҳайрат гузоштааст, вазифаи наваш аст. Вай мегӯяд, аз ин боб аслан хабаре ҳам надораду бо касе ҳам машварате нашудааст.

279
Барчаспҳо:
вазифа, табобат, бемор, табиб, Ғарм, Тоҷикистон