Таджикская девушка закончила школу с золотой медалью

Тоҷикдухтар мактаби Маскавро бо медали тилло хатм кард: ватандӯстии ӯ ва узрхоҳии муаллим

9194
(Таҷдидшуда 12:54 23.06.2020)
Шабнам Музофиршоева мактаби миёнаи рақами 2-и шаҳри Жуковскии Маскавро бо баҳои аъло ва медали тилло хатм кард

ДУШАНБЕ, 22 июн – Sputnik, Нилуфар Некқадам. Шабнам аз хурдӣ дар мактаб бо баҳои аъло мехонд ва соли гузашта мақсад гузошт, ки мактабро бо медали тилло хатм кунад. Ӯ орзу дорад шахси сарватманд шавад ва ба бечорагону бенавоён кумак кунад.

Дар суҳбат бо Sputnik Тоҷикистон хонаводаи Шабнам дар бораи муҳоҷират, тарбияи фарзанд ва кумаки хешовандону медали тилло нақл кард.

Муҳоҷират ба Маскав

Хонаводаи Музофиршоевҳо соли 2012 ба Маскав кӯчид. Онҳо то ин дам дар шаҳри Душанбе зиндагӣ мекарданд. Падари хонавода Нодалеб ва модар Гулсият ҳарду соҳиби маълумоти олӣ дар Пажӯҳишгоҳи давлатии лоиҳакашии заминсозӣ "Тоҷикзаминсоз" кор мекарданд. Нодалеб мегӯяд зиндагиашон дар пойтахти Тоҷикистон хуб буд, вале онҳо манзили шахсӣ надоштанд ва музди меҳнаташон танҳо барои рӯзгузаронӣ басанда буда халос. Хонавода ба хотири харидани манзил ва беҳбуди зиндагӣ ба Маскав кӯчид.

Аввал хонавода хост Шабнамро дар назди хешовандон монанд вале меҳру муҳаббат нисбати фарзанд нагузошт, ки волидон фарзандашонро тарк кунанд.

"Мо дарк мекардем, ки албатта дар Маскав бо касби худ кор нахоҳем кард, вале ин танҳо роҳе буд, ки мо метавонистем соҳиби хонаи худӣ шавем. Мо ҳамин як духтар - Шабнамро дорем, чун дар бораи мушкилҳиои муҳоҷират ва махсусан ба мактаб додани кӯдакон дар Маскав бисёр шунида будем, ҳангоми кӯчидан масъалаи гирифтан ё нагирифтани ӯ бархост. Ростӣ диламон нашуд, ки ӯро ҳамроҳи касе монем", - нақл мекунад падар.

Он замон Шабнам синфи серо хатм кардаву ба синфи 4 қадам мегузошт. Вақте хонавода ба Маскав кӯчид даррав ба чанд мактаб муроҷиат кард, вале бо сабабҳои пур будан духтаракро қабул накарданд. Вале, муҳоҷирон талошро барои соҳиби маълумот кардани фарзандашон идома медоданд ва дар охир муваффақ шуданд. Маъмулан хонандагоне, ки аз Тоҷикистон ба Маскав меоянд, як сол поёнтар қабул мешаванд, вале Шабнамро ҳатто бе имтиҳон ба мактаб гирифтанд. 

"Рӯзи 30 август буд. Мо ба мактабе дар ноҳияи Коломинский рафтем ва он ҷо бе ягон чуну чаро ҳуҷҷатҳои Шабнамро қабул карданд. Ростӣ баҳоҳои духтарам он вақт ҳам аъло буд ва аз ӯ ҳатто имтиҳон ҳам нагирифтанд", - гуфт муҳоҷир.

Некӣ боз мегардад

Замоне, ки ханаводаи Музофиршоевҳо дар Душанбе ба сар мебурданд, чанд насли донишҷӯёнро аз ҳисоби хешу ақрабо, ки аз ноҳияҳои дурдасти ВМКБ барои таҳсил ба пойтахт меомаданд, саробонӣ мекарданд. Ҳамин буд, ки некиашон ба онҳо бозгашту дар Маскав оилаи онҳо ба мушкилие рӯ ба рӯ нашуд.

"Вақте, мо ба Маскав кӯчидем, яке аз он донишҷӯёне, ки ҳамроҳам дар Душанбе зиндагӣ мекард, ба мо хеле кумак кард. Солҳои аввал духтарамонро ба мактаб мебурду мегирифт. Умуман агар инсон некӣ кунад, бетардид кумакаш ба ӯ бозмегардад", - бовар дорад Нодалеб.

Солҳои аввал падар ва модари хонавода дар соҳаҳои хизматрасонӣ кору фаъолият мекарданд. Ва чанд соли охир бо касбият ва дониши худ Нодалеб дар заводе ба кор даромад ва ба зинаҳои баланди корӣ низ расид, то замоне, ки Маскав низ ба гирдоби ҳамагирии COVID - 19 дучор шуд ва ӯ бекор монд, вале замоне, ки ин мавод омода мешуд, падари хонавода аллакай ҷои кори нав пайдо кард.

Айни замон Шабнам ва падараш ҳуҷҷатҳояшонро барои гирифтани шаҳрвандии Русия супоридаанд ва моҳи август бояд ВНЖ гиранд. Падари Шабнам мегӯяд, ин ҳуҷҷатро на ба хотири худ, балки барои осонтар шудани буду бош барои духтараш дар Маскав супоридааст. Волидони духтар мехоҳанд пас аз хатми донишгоҳи духтарашон ба Ватан - Тоҷикистон бозгашта он ҷо зиндагӣ кунанд. 

Ватандӯстии Шабнам ва узрхоҳии муаллим

Падари хонавода мегӯяд, дар тарбияи фарзанд аз кӯдакӣ талош мекарданд. Шабнам аз се солагӣ дар яке аз боғчаҳои русии шаҳри Душанбе тарбия мегирифт ва ҳамин забондонию муҳити интернатсионалӣ барои унс гирифтан бо ҳамсинфони нав дар Маскав ба ӯ хеле кумак кард.

Шабнам с родителями
из архива Мусофиршоева Нодалеба
Шабнам с родителями

"Модари Шабнам иқтисодчӣ ҳаст ва ӯ ба таълиму тарбияи Шабнам аз кӯдакӣ диққат медод. Ростӣ дар Маскав Шабнам бо ягон мушкилӣ рӯ ба рӯ нашуд. Боре ҳам ӯ шикоят намекард, ки ҳамсинфонаш ӯро таҳқир карда бошанд ё чизеи дигар. Ҳатто пас аз ду моҳи таҳсилаш дар мактаби Маскав роҳбари синфаш ба мо гуфта буд, ки ӯ хеле зуд бо ҳамсинфонаш унс гирифт ва аз онҳо пеш ҳам гузашт. Дар ҳамаи маҷлисҳои волидон омӯзгорони Шабнам ӯро тавсиф мекарданд ва ягон бор шикояте накардаанд", - гуфт падари хонавода.

Шабнам дар баробари духтари доно ва бомаърифат будан, бисёр ватандӯст аст. Ӯ аз ҳодисае ёдоварӣ кард, ки чӣ гуна муаллиме ба иззати нафси ӯ расид ва баъдан узрхоҳӣ кард.

Шабнам в первом классе
из архива Мусофиршоева Нодалеба
Шабнам в первом классе
"Муаллимамон чизе дар бораи ронандагони тоҷик гуфт ва ман ба назди ноиби директор рафта шикоят кардам. Дар охир муаллим аз ман узрхоҳӣ кард", - гуфт дар суҳбат бо Sputnik Тоҷикистон Шабнам.

Медали тилло ва нақшаҳои оянда

Тобистони имсол Шабнам Музофиршоева мактаби рақами 2-и шаҳри Жуковскии Маскавро бо баҳои аъло ва медали тилло хатм кард. Феълан Шабнам барои супоридани имтиҳони умумирусиягӣ барои хатмкунандагон ё ЕГЭ омодагӣ мебинад. Медали тилло барои дохил шудан ба мактаби олӣ ба Шабнам кумак хоҳад кард. Ӯ мехоҳад ҳуҷҷатҳояшро ба ягон донишгоҳи бонуфузи Маскав супорад ва дар риштаи реклама ва равобити иҷтимоӣ соҳибкасб шавад.

Таджикская девушка закончила школу с золотой медалью
из архива Мусофиршоева Нодалеба
Таджикская девушка закончила школу с золотой медалью
"Ман аз хурдӣ бо баҳои аъло мехондам. Вақте дар синфи 10 будам мақсад гузоштам, ки мактабро бо медали тилло хатм кунам ва чунин ҳам кардам. Медал барои дохилшавӣ ба мактаби олӣ кумак мекунад - чанд бали иловагӣ ба ЕГЭ зам мешавад. Медалро бароямон дар маросими вижае, ки ба хотири хатмкунандагони аълочӣ баргузор мешавад, хоҳанд супорид. То ҳол рӯзи маросим дар бастагӣ ба ҳамагирии коронавирус дақиқ нашудааст. Ман мехоҳам ихтисоси реклама ва равобити иҷтимоиро пеша кунам", - гуфт Шабнам.

Музофиршоева Шабнам Нодалебовна 25 сентябри соли 2002 дар шаҳри Душанбе ба дунё омадааст. Аз соли 2004 то соли 2009 дар боғча тарбия гирифтааст. Аз соли 2009 то соли 2012 дар бахши русии мактаби рақами 78 шаҳри Душанбе таҳсил кардааст.

Соли 2012 ҳамроҳи хонаводааш ба Маскав кӯчида, соли 2020 мактаби рақами 2-и шаҳри Жуковскии Маскавро бо баҳои аъло ва медали тилло хатм кардааст.

Шабнам гӯш кардани мусиқӣ, тамошои филмҳо ва бозӣ дар КВН-ро дӯст медорад. Ӯ орзу дорад дар оянда шахси сарватманд шавад ва ба бечорагону бенавоён кумак кунад.

9194
Барчаспҳо:
синфи 11, медали тилло, мактаб, муҳоҷирон, Маскав
Курбанова Фарахноз, студент 1 курса бакалавриата

Аз интихобам розиям: чигуна донишҷӯёни тоҷик дар Русия таҳсил мекунанд - акс

250
Донишҷӯёни тоҷик, ки дар Донишгоҳи технологии Русия таҳсил мекунанд, дар бораи ҳаёти донишҷӯӣ ва раванди таҳсил дар Маскав нақл карданд

ДУШАНБЕ, 2 июл — Sputnik. Донишҷӯёни тоҷик, ки дар Донишгоҳи технологии Русия - МИРЭА таҳсил мекунанд, дар бораи таҳсил дар муҳити байналмилалӣ нақл карданд. 

Имрӯзҳо дар донишгоҳи мазкур ҳудуди 200 донишҷӯи тоҷик таҳсил мекунанд, ки дар оянда дар соҳаҳои телекоммуникатсия, автоматика, кибернетика, радиотехника ва электроника мутахассис хоҳанд шуд.

Чунончи, донишҷӯи курси дувуми магистратура дар саҳаи "технологияи кимёвӣ" Солиҷон Собиров мегӯяд, то дохилшавӣ ба МИРЭА дар Донишгоҳи техникии Тоҷикистон ба номи Муҳаммад Осимӣ таҳсил мекард.

Солижон Собиров, студент 2 курса магистратуры,
Солижон Собиров, студент 2 курса магистратуры,

Ӯ ду сол пеш факултаи энергетикаи донишгоҳро хатм карда, мақсад дошт ба кор дарояд, аммо қарор дод, ки дар Маскав ба бахши магистратура дохил мешавад.

"Мехостам донишамро дар ду самт комил кунам. Феълан ман ду маълумот, муҳандис-энергетик ва химик-технолог дорам. Фикр мекунам, ки ин хело хуб аст", - мегӯяд ҷавон.

Ҳоло Солиҷон дар хобгоҳ зиндагӣ мекунад, идрорпулӣ мегирад, муваққатан худро дар Русия ба қайд гузоштааст. Ин донишҷӯи тоҷик кам-кам кор ҳам мекунад.

"Агар донишҷӯ дар ҳақиқат аз нигоҳи молиявӣ ба мушкилӣ дучор шавад, касе аз ин ҷиҳат ба вай кӯмак накунад ё дар хонаводаашон мушкилии иқтисодӣ бошад, пас вай метавонад дар 11 моҳ як маротиба аз донишгоҳ кӯмак хоҳад. Маблағе ки донишгоҳ медиҳад, кам нест", - меафзояд ӯ.

Солиҷон мегӯяд, вақти бештарашро барои таҷрибаомӯзӣ дар донишгоҳ мегузаронад, аммо барои дӯстӣ бо донишҷӯён ва бозии футбол ҳам вақт меёбад.

Дигар донишҷӯи тоҷик Фараҳноз Қурбонова дар курси аввал таҳсил мекунад. Ӯ ҳам мегӯяд аз интихоби касб ва донишгоҳаш розӣ аст.

Ин духтари тоҷик хатмкардаи Литсейи президентӣ барои хонандагони лаёқатманд аст. Ӯ мехостааст пас аз хатми мактаб ба факултаи муҳандисиву барномарезӣ дохил шавад, барои ҳамин донишгоҳи технологии Русияро интихоб кардааст.

"Ман ки аз кишвари хориҷ ба Русия омадаам, дар хобгоҳ зиндагӣ мекунам. Ба донишҷӯёни хориҷӣ дар бахши авали таҳсил стипендия медиҳанд, баъдҳо ҳаҷми он аз худи донишҷӯй вобаста аст", - мегӯяд Фараҳноз.

Духтарак қайд мекунад, ки бартарии дигари таҳсил дар ин донишгоҳ пайдо кардани дӯстон аз кишварҳои хориҷ аст. Фараҳноз дӯстони ӯзбекистонӣ, белорус, украинӣ, қазоқистонӣ, аз Ветнам, Чин ва албатта Русия дорад.

Танҳо дар як Донишкадаи Тоҷикистон наздик ба 500 донишҷӯ аз Узбакистон дохил шуданд

"Ман ин ҷо худамро дар байни дӯстон пайдо кардам. Ман бо онҳо ба ибтидои нардбони муваффақиятҳоям қадам мегузорам. Агар хоҳӣ, ки ояндаи хушбахт дота бошӣ, бояд хонӣ ва меҳнат кунӣ. Боварӣ дорам, ки дар МИРЭА ба тамоми орзуҳоям мерасам", - мегӯяд Фараҳноз хушбинона.

 

250
Музаффар Имомдод

Музаффар Имомдод: аз воҳимаи COVID - 19 дар ВМКБ то ризокории 3000 ҷавон ва сахои мардум

3550
(Таҷдидшуда 15:19 23.06.2020)
Музаффари Имомдод, ризокор, фаъоли ҷамъиятӣ ва яке аз бунёдгузорони гурӯҳи "Цавор куен" (Чор кӯҳ) дар Facebook дар бораи вазъи COVID - 19 дар ВМКБ, кумаки хайрхоҳон ва 11 соли ихтиёрӣ буданаш гуфт

ДУШАНБЕ, 23 июн – Sputnik, Нилуфар Некқадам. Музафари Имомдодро корбарони Facebook чун шахси фаъоли ҷамъиятӣ ва ризокори ҳамеша омодаи кумаку ёрӣ мешиносанд. Ӯ аз рӯзҳои аввали шуюи COVID - 19 дар Тоҷикистон, ба хайрхоҳон муроҷиат карда, бо маблағи ҷамънамуда ба табибони Суғду, Хатлону Вилояти Мухтори Кӯҳистони Бадахшон кумак кард.

Ҳар рӯз дар саҳифааш дар Facebook наворе дар бораи расонидани кумак ба табибони ин ё он минтақаи кишвар пайдо мешавад. Чун худи ӯ мегӯяд, "бояд хайрхоҳон бидонанд ва бубинанд, ки маблағи онҳо дар куҷо ва чӣ гуна ҳазина мешавад".

Аз Русия то Африқо

Дар Тоҷикистон рӯзи 30 апрели соли 2020 расман 15 ҳолати гирифторӣ ба вируси корона сабт гардид. Пас аз як рӯз Музаффар бо наворе барои ҷамъ овардани маблағ барои кумак ба пизишкон ба мардум муроҷиат кард. Ба гуфти ӯ бародарони саховатпеша аз Русия то Африқо занг мезаданду маблағ равон мекарданд.

"Аввал бародарон аз Русия ва аз худи Тоҷикистон кумак карданд. Баъдтар аз Олмон, Африқо, Амрико ва дигар кишварҳо низ маблағ равон карданд. Пас аз се рӯзи муроҷиат мо маблағи ирсолкардаро гирифта, 70-дона либоси вижаи муҳофизатӣ харидем ва ба пизишкони навоҳии гуногун аз Ҷилликул то шаҳри Хуҷанду Ёвон расонидем. Пули равоннамудаи хайрхоҳон дар умум наздики 50 ҳазор сомонӣ шуд. Аз ин маблағ аз номи ризокорони ВМКБ ба зарадидагони фоҷиаи Хуросон 10 ҳазор сомонӣ равон карда шуд", - гуфт Музаффар.

Музаффар аз он изҳори хушнудӣ мекунад, ки мардуми тоҷик ҳиммати баланд доранд ва саховатпешаанд.

"Ростӣ ман бо мардуми хайрхоҳамон ифтихор мекунам", - мегӯяд ӯ ва ба ҳамаи ашхоси саховатпеша ва ихтиёриён, барои хизматашон изҳори сипос мекунад.

Вазъи COVID - 19 дар ВМКБ: аз воҳима то оромии рӯҳӣ

Музаффар рӯзи 9 май барои кумак ба пизишкон ба ВМКБ сафар кард ва инак беш аз ду моҳ мешавад, ки ӯ дар хизмати халқ аст. Ба фикри ӯ? маризии коронавирус худ онқадар вазнин нест, вале ваҳму воҳимааш барои фаҳмиш душвор аст.

"Рӯзҳои аввал мардумро ваҳму воҳима пахш карда буд. Онҳо дар бораи маргу мир аз ин маризӣ, ки бахусус дар кишварҳои Урупо зиёд буд, шунида буданд ва ба таҳлука афтода буданд",-изҳор дошт ӯ.

Музаффар ҳамроҳи дигар ризокорон барои кумак ба пизишкон қариб ба ҳамаи ноҳияҳои ВМКБ ва қишлоқҳои дурдаст сафар карданд. 

"Мо аз қишлоқҳои ноҳияи Ванҷ, Рӯшону Бартанг, Шуғнону Ишкошим ва то Мурғоб сафар карда, либосҳои муҳофизатӣ, ниқобҳо, маҳлулҳои зиддиуфунӣ бурдем. Фақат Язгулом ва қишлоқҳои болоии ноҳияи Шоҳдара мондааст, ки насиб бошад пас аз се рӯз бо кумаки вижа барои хонаводаҳои ниёзманд, сафар хоҳем кард", - гуфт Музаффар.

Мусоҳиб мегӯяд вазъияти беморӣ дар ВМКБ дар ягон ҷо вазнин набуд, чун аз рӯзҳои аввал ҳам духтурон ва ҳам ризокорон барои пешгирии он кори зиёде анҷом доданд. Созмонҳои гуногун аз қабили Бунёди Оқохон оид ба тандурустӣ, ширкати Памир энерҷӣ ва Ҳукумат барои пешгирии беморӣ кумак карданд.

"Чун зичии аҳолӣ дар шаҳри Хоруғ бештар аст, ин ҷо маризон бештар буданд. Дар водии Бартанг дар кишлоки якум - Шуджанд танҳо як бемор буд. Шукри Худо дар дигар деҳаҳои Бартанг нафаре бемор набуд. Мо ба қишлоқҳои дурдасти Бартанг аз номи Ҳукумат се либоси муҳофизатӣ, маҳлулҳои зиддиуфунӣ ва аз номи ризокорон ниқобҳоро бурдем", - нақл кард Музаффар .

Дар ВМКБ то 20 июни соли равон барои пешгирӣ аз паҳншавии густурдаи коронавирус аз ҷониби мақомоти ҳокимияти давлатии вилоят маҳдудиятҳо - равуо миёни навоҳӣ ва шаҳри Хоруғ, ҷорӣ шуда буданд. Имрӯзҳо бошад мардуми ин вилоят ба зиндагии муқаррарии худ бозгаштааст.

"Феълан мардум бе ҳарос ба корҳои саҳроӣ ва хоҷагидорӣ машғул ҳаст. На бузургсолон ва на ҷавонон дигар аз ин беморӣ ҳарос надоранд, чун дарк карданд, ки он ҳам мисоли зуком гузаранда аст, албатта на барои ҳама", - гуфт Музаффар ва афзуд, ки мардум рӯҳан ором шудаанд.

 Чаро ВМКБ барои роҳ надодани COVID - 19 омода набуд?

Коронавируси навъи COVID - 19 моҳи декабри соли 2019 дар Вуҳани Чин зуҳур кард ва бар пояи гузориши расмӣ ба Тоҷикистон пас аз 4 моҳ, 30 апрели соли 2020  расид. Мебоист Тоҷикистон барои пешгирии ин вабои аср ҳаматарафа омода мешуд. Музаффар мегӯяд "қаҳрамонони рӯз" - пизишкон барои мубориза бо ин маризӣ омода буданд, вале имконияти пешгирии онро надоштанд.

"Фикр мекунам пизишкон барои табобати маризони коронавирус омода буданд, аммо лавозимоти муҳофизатӣ ва доруву даво надоштанд. Чун ба ҳар қишлоқе, ки мо сафар мекардем ва ба ҳар марказҳои табобатӣ, ки мерасидем, бо чашмони худ медидем, ки пизишкон либоси муҳофизатӣ надоранд", - шарҳ дод Музаффар. 

Сабаби аслии роҳ ёфтани коронавирус ба ВМКБ-ро Музаффар дар камаҳамиятӣ ва бедиққатӣ мебинад. Ба гуфти ӯ танҳо бо кумаки ризокорон ва шахсони саховатпеша мешуд паҳншавии COVID - 19 - ро дар ВМКБ пешгирӣ кард.

11 соли ризокории Музаффар ва кумаки 3000 ихтиёрӣ дар замони ҳамагирии COVID - 19 дар Бадахшон

Ризокор ё ихтиёрӣ - шахсест, ки бемузд ба нафари дигаре хизмат мекунад. Аз давраҳои қадим чун дар дигар манотиқи Тоҷикистон, мардуми Бадахшон бештари кори худро тариқи ҳашар - кори дастаҷамъонаи бемузд анҷом медоданд. Қариб ҳамаи хонаҳои помирӣ, ки имрӯз дар Бадахшон ҳастанд тариқи ҳашар - ё бо қувваи ихтиёриён сохта шудаанд.

Музаффар ризокориро аз арзишҳои волои мазҳаби худ медонад. Ӯ мегӯяд аз кумак кардан ба дигарон ҳаловат мебарад ва бо ин роҳ мехоҳад дилеро шод кунад.

"Ризокорӣ аз арзишҳои мазҳаби ман аст. Бо ин арзишҳо ман метавонам диле ба даст оварам. Дар навбати аввал ман аз коре, ки барои шахсе анҷом медиҳаму ӯ шод мешавад, ҳаловат мебарам, махсусан кумак ба бузургсолон, кӯдакон ва ниёзмандонро дар назар дорам", - гуфт Музаффар ва афзуд ки беш аз 11 сол ӯ дар хизмати халқ аст.

"Ҷое мешавад, ки нафареро бепул бо хадравам ба манзилаш мерасонам, ҷое мешавад, ки бо кумаки дӯстонам мушкили касеро ҳал мекунам".

Дар замони ҳамагирии COVID - 19 дар ҳар қишлоқи ВМКБ гурӯҳи ризокорон аз ҳисоби ҷавонон ва фаъолони ҷомеа ташкил шуд, ки тартибу интизом ва риояи қоидаҳои қарантиниро назорат мекард. Онҳо намегузоштанд, ки меҳмонони аз шаҳри Душанбе расида бе гузашти 14 рӯз бо дигарон ҳамсуҳбат шаванд, ё нафаре бидуни ниқоб аз хона берун равад, ё дар кӯча масофаи иҷтимоиро риоя накунад.

Ба ҳамаи ин корҳо беш аз 3000 ризокор банд буд. Шояд ҳамин якдиливу омодаи кумак будани халқ, буд, ки мардуми Бадахшон авҷи аввали  COVID - 19 - ро бидуни талафоти зиёд паси сар карданд.

Вале, набояд фаромӯш кард, ки бино ба пешбинии ҳамагиршиносон мавҷи дуюми COVID - 19 дар Тоҷикистон аз эҳтимол дур нест ва ҳамоно бояд риояи қоидаҳои беҳдошт ва масофаи иҷтиоию пӯшидани ниқоб фаромӯш нашавад.

То 22 июн дар Тоҷикистон 5513 нафар бо ташхиси сирояти коронавируси нави COVID-19   ошкор гардида, аз ин беморӣ то кунун дар кишвар 4039 (73,2%) нафар шифо ёфтаанд. Ҳамзамон, то санаи зикргардида дар мамлакат аз ин беморӣ 52 нафар фавтидаанд.

3550
Барчаспҳо:
сукунати ихтиёрӣ, ихтиёрӣ, вазъ, вируси нав, Музаффари Имомдод, Тоҷикистон

Дар Тоҷикистон шумораи ширкатҳои сохтмонӣ 14% кам шудааст

0
(Таҷдидшуда 16:36 11.07.2020)
Бо вуҷуди кам шудани шумораи ширкатҳои сохтмонӣ, дар Тоҷикистон ҳаҷми манзилҳои сохта ба истифода додашуда 24 фоиз зиёд шудааст

 

ДУШАНБЕ, 11 июл – Sputnik. Дар Тоҷикистон шумораи ширкатҳои сохтмонӣ аз аввали сол кам шудааст, мегӯяд  Агентии омори назди Президенти ҷумҳурӣ.

Тибқи маълумоти расмӣ, дар панҷ моҳи соли 2020 шумораи ширкатҳои сохтмонӣ дар Тоҷикистон 14,2% кам шудааст. Ҳамин тариқ, дар аввали моҳи июн дар кишвар 638 корхона фаъол мондааст.

Ҳамзамон, аз моҳи январ то моҳи майи соли 2020, ташкилотҳои пудратӣ ба маблағи зиёда аз 214 миллион доллар корро ба сомон расонидаанд, ки ин нишондиҳанда дар муқоиса бо давраи давраи соли 2019 555 ҳазор доллар бештар мебошад.

Тибқи маълумотҳои оморӣ, корҳои асосии пудратӣ аз ҳисоби ширкатҳо ба маблағи 136,4 ҳазор доллар иҷро карда шуданд (62,2% аз ҳаҷми умумии). Ғайр аз ин, пули саҳмияҳо - 81,7 ҳазор доллар ва фондҳои давлатӣ - 2,7 ҳазор доллар ҷалб карда шуданд.

Аз андоз сарпечӣ кард: Ожонси зидди фасод намояндаи "Озод сохтмон"-ро дастгир кард

Аз аввали сол, ширкатҳои сохтмонӣ зиёда аз 20 муассисаи таълимӣ ва тиббӣ, инчунин 365,2 ҳазор метри мураббаъ манзилро ба истифода доданд, ки ин нисбат ба соли 2019 24,6% зиёд аст.

0