Яке аз роҳҳои Тоҷикистон. Акс аз бойгонӣ

Қирғизистон сохтмони роҳи наздимарзиро қатъ кардааст

15
(Таҷдидшуда 10:36 01.04.2015)
Вазири нақлиёти Тоҷикистон мегӯяд ҷониби Тоҷикистон роҳҳои мошингарди ҷамоати Ворух Хоҷааъло то Оқсойро бозсозӣ ва мумфарш кард, аммо ҷониби Қирғизистон феълан сохтмони роҳро қатъ кардааст.

ДУШАНБЕ, 31 мар — Sputnik. Шералӣ Ганҷалзода, вазири нақлиёти Тоҷикистон мегӯяд, ҷониби Қирғизистон бинобар набуди маблағ сохтмони роҳи Тамдиқ Оқсойро, ки ҷазирақаламрави тоҷикнишини Ворухро ба ноҳияи Исфара мепайвандад, мувақатан қатъ кардааст, хабар медиҳад "Радиои Озодӣ".

Вазир гуфтааст, ҷониби Тоҷикистон уҳдадории худро дар бозсозӣ ва мумфарш кардани роҳи Ворух — Хоҷаи аъло то Оқсойро барои истифодаи ҳарду тараф ба поён расонид.

Вай афзудааст, ин роҳи мошингардро ҳокимияти вилояти Суғд сохта, ба истифода додааст. Аммо ҷониби Қирғизистон се моҳ мешавад, ки сохтмони роҳи Оқсой то Холҷаи аълоро ба итмом нарасонидааст ва ҳанӯз маълум нест, ки кай онро ба поён хоҳанд расонид.

Барои ҳалли масъала Шералӣ Ганҷалзода, вазири нақлиёти Тоҷикистон, дар миёнаҳои моҳи март бо вазири нақлиёти Қирғизистон мулоқот дошт. Дар он масъалаи зудтар анҷом додани сохтмони роҳҳои мошингарди минтақаҳои ҳамсояи Исфара Ботканд баррасӣ шудаанд. Ба қавли Ганҷалзода агар роҳҳои нав ба истифода дода шаванд, вале "Созишномаи байнидавлатии назорати роҳҳои байнисарҳадӣ" ба имзо нарасад, эҳтимол дорад боз ҳамон муноқишаву норозигиҳое, ки дар солҳои гузашта миёни деҳоти марзӣ рух дода буд, такрор шавад.

"Феълан мо тағйиру иловаҳои ба ин созишномаро таҳия намуда, ба ҷониби Қирғизистон ирсол доштем ва акнун мақомоти кишвари ҳамсоя бояд пешниҳодҳои худро ба он илова кунанд. Сипас ин санад миёни ду давлат ба имзо хоҳад расид ва мақомоти давлатӣ вазифадор мешаванд, ҳаракати нақлиёт ва равуои мардумро назорат баранд ва дар сурати пеш омадани масъалае посух диҳанд", — мегӯяд вазир.

Ин дар ҳолест, ки дар моҳи гузашта вазорати корҳои хориҷии Қирғизистон иддао кард, ки Тоҷикистон ба ифтитоҳи консулгариаш дар Хуҷанд иҷозат надод. Абдулфайз Атоӣ, сардори раёсати иттилооти Вазорати хориҷаи Тоҷикистон ба расонаҳо гуфта буд, ҷониби Тоҷикистон бо анҷоми пурраи масъалаи марзӣ ризояти худро дар мавриди ифтитоҳи консулгарӣ хоҳад дод.

Бори охир мушкили марзӣ дар дар маҳаллаи "Баҳор"-и Овчӣ-Қалъачаи ноҳияи Бобоҷон Ғафуров зимни гаштугузори марзбонҳои мусаллаҳи Қирғизистон дар ин қаламрав рӯй дода буд. Пеш аз он дар марзи байни Исфара ва Бодканд чандин ҳодисае сар зад, ки ба ҳалокати шаҳрвандони Тоҷикистон оид шуд.

То ҳоло аз 976 километри марзи байни Тоҷикистону Қирғизистон 519 километраш муайян шуда, тарафҳо қарор аст, 351 километри боқимондаро мушаххас намоянд. Қирғизистон тарафдори суръат бахшидан ба ҳалли масъала аст, аммо тарафи Тоҷикистон мегӯяд, масъалаи марзи давлатӣ бояд бо ҷиддияти тамом ва қадам ба қадам ҳал шавад. Ҳарду тараф эълом медоранд, ки набояд дар ин масъала сиёсатбозӣ ё манфиатҷӯӣ кард, аммо эътироф мекунанд, ки ҳарду ҷониб омода нестанд, аз манфиатҳои миллии худ қатъи назар кунанд.

15
Барчаспҳо:
аломатгузорӣ, нишонагузорӣ, демаркатсия, ҳаммарз, 976 км, камбуди маблағ, роҳ, марз, қатъ, сохтмон, Вазорати нақлиёт, Шералӣ Ганҷалзода, Хоҷаи аъло, Ворух, Оқсой, Исфара, Қирғизистон, Тоҷикистон
Ҳавопаймо, акс аз бойгонӣ

Коҳиши парвозҳо: ширкатҳои ҳавоию фурудгоҳҳо чанд миллиард зарар диданд?

134
(Таҷдидшуда 17:06 19.01.2021)
Соли 2020 дар пасманзари пандемияи коронавирус ҳамлу нақли мусофирон тавассути нақлиёти ҳавоӣ ҳудуди 60% коҳиш ёфт

ДУШАНБЕ, 19 янв — Sputnik. Созмони байналмилалии авиатсияи гражданӣ хабар дод, ки шумораи мусофирони ҳавоӣ дар дохили кишварҳо соли 2020 ҳудуди 50%  ва дар масирҳои байналмилалӣ - 74% коҳиш ёфтааст.

Хабаргузории “Ховар” аз қавли ин ниҳод афзудааст, ки соли 2020 ҳудуди 1,8 миллиард одамон парвоз кардаанд ва соли 2019 теъдоди онҳо 4,5 миллиардро ташкил дода буд.

Зикр шудааст, ки аз моҳи январи соли 2020 тадриҷан рӯйхати давлатҳое, ки барои вуруд маҳдудият ҷорӣ мекарданд васеъ шуд ва моҳи март ҳаракати мусофирони ҳавоӣ тақрибан қатъ гардид. То моҳи апрел шумораи умумии мусофирони ҳавоӣ дар муқоиса бо сатҳи 2019 то 92% коҳиш ёфт.

Созмони ҷаҳонии авиатсияи гражданӣ таъкид кардааст, ки соли 2020 ширкатҳои ҳавопаймоӣ 370 миллиард доллар фоидаро аз даст доданд.

“Фурудгоҳҳои байналмилалӣ тақрибан ба маблағи 115 миллиард доллар ва хадамоти аэронавигатсия -13 миллиард доллар зарар диданд”, - омадааст дар иттилоия.

Қаблан дабири кулли Созмони Милали Муттаҳид Антонио Гутерриш аз кишварҳо даъват кардааст, ки барои дастгирии ҳавопаймоии шаҳрвандӣ дар шароити пандемия тадбирҳои фаврӣ андешанд ва дар айни ҳол масъалаҳои тағйирёбии иқлимро низ фаромӯш накунанд.

134
Барчаспҳо:
зарар, парвоз, Ҷаҳон
Автобусы AKIA AVESTO производимые в Таджикистане

Шаҳрдории Душанбе аз ҳисоби худ барои нақлиёти ҷамъиятӣ ронанда омода мекунад

124
(Таҷдидшуда 14:03 19.01.2021)
Шаҳрдории Душанбе эълон кардааст, ки аз ҳисоби худ барои нақлиёти ҷамъиятӣ ронанда таёр мекунад ва онҳо баъд аз хатми курсҳо дар автобусҳои тамғаи “АКИА” дар хатсайрҳои пойтахт ба фаъолият оғоз хоҳанд кард

ДУШАНБЕ, 19 янв – Sputnik. Бино бар иттилои дафтари матбуоти раиси шаҳри Душанбе, корхонаҳои коммуналии воҳиди давлатии "Автобус-1", "Автобус-2" ва "Автобус-3"-и шаҳри Душанбе хоҳишмандон, сокинони  пойтахтро барои омӯзиш ба курсҳои омода намудани ронандагони дараҷаи "Д" даъват менамоянд.

"Ронандагон баъд аз хатми курсҳо дар автобусҳои тамғаи "АКИА" дар хатсайрҳои пойтахт ба фаъолият оғоз хоҳанд кард", -  таъкид доштааст манбаъ.    

Қайд карда шудааст, ки  маблағи омӯзиш аз ҳисоби Корхонаҳои коммуналии воҳиди давлатии "Автобус-1", "Автобус-2" ва "Автобус-3"-и шаҳри Душанбе пардохт карда мешавад.

Ёдрас мешавем, ки ахиран корхонаҳои нақлиётии  Корхонаҳои коммуналии воҳиди давлатии "Автобус-1", "Автобус-2", "Автобус-3" ва "Троллейбус"-и шаҳри Душанбе шахсонеро, ки дорои шаҳодатномаи ронандагии дараҷаи "Д" ва собиқаи кории на камтар аз се сол дар автобусу троллейбусҳо мебошанд, ба кор даъват кард.

Таъкид шудааст, ки ронандагон бояд сокинони шаҳри Душанбе бошанд.

124
Барчаспҳо:
ронанда, пойтахт, автобус, Душанбе, Тоҷикистон
Даст ба дуо, акс аз бойгонӣ

Афзоиши фавти эрониён аз COVID-19

0
(Таҷдидшуда 20:57 19.01.2021)
Вазорати беҳдошт ва дармони Эрон мегӯяд, дар 24 соати гузашта бар асари коронавирус дар ҷумҳурӣ 83 нафар ҷон доданд

ДУШАНБЕ, 17 янв — Sputnik. Шумори қурбониёни коронавирус дар Эрон, ки 83 миллион нафар аҳолӣ дорад, то имрӯз ба 56 ҳазору 973 тан расид. Дар шабонарӯзи гузашта 83 ҳолати фавт аз ин маризӣ сабт шудаанд.

Ба гузориши Вазорати беҳдошт ва дармони Эрон, дар 24 соати гузашта 5 ҳазору 917 бемори ҷадиди мубтало ба COVID-19 дар Эрон шиносоӣ ва аз ин теъдод 518 нафар бистарӣ шуданд, навиштааст сомонаи Парстудей.

Боз 300 ҳазор ваксина "Спутник V" дастраси мардуми Аргентина шуд - видео

Манбаъ афзуд,  маҷмӯи беморони мубтало ба вируси корона дар Эрон ба як миллиону 342 ҳазору 134 нафар расидааст, ки ҳудуди як миллиону 132 ҳазор нафар аз мубталоён ба ин вирус беҳбуд ёфта ва аз бемористонҳо мурраххас шудаанд.

Теъдоди афроди мубтало ба вируси корона дар ҷаҳон низ ба беш аз 96 миллион нафар расидааст, ки аз ин теъдод беш аз ду миллион нафари ҷони худро аз даст дода ва ҳудуди 69 миллион нафар ҳам беҳбуд ёфтаанд.

0
Барчаспҳо:
беморӣ, вируси корона, Эрон