Раисҷумҳури Қирғизистон Сооронбой Жээнбеков, акс аз бойгонӣ

Қирғизистон маблағи мусодирашудаи фасодкоронро ба мактабҳои нав равона мекунад

55
(Таҷдидшуда 18:56 12.09.2018)
Мақомоти Қирғизистон пешниҳод намудаанд, маблағҳое, ки зимни амалиёт аз фасодкорон мусодира мешаванд, ба сохтмони мактабҳои нав равона гарданд

ДУШАНБЕ, 12 сен — Sputnik. Мақомоти Қирғизистон тасмим гирифтаанд, маблағҳоеро, ки зимни амалиёт аз фасодкорон мусодира мешаванд, барои сохтмони макотиби нав равона намоянд, гуфт Сооронбой Жээнбеков, раисҷумҳури кишвар зимни вохурӣ бо вазири маориф ва илм, Гулмира Худойбердиева.

Зимни мулоқот роҳбари кишвар тавзеҳ додааст, дар мактабҳое, ки хонандаи зиёд доранд, бояд биноҳои иловагӣ сохта шавад. Инчунин вай афзуд, дар маҳалҳое, ки муассисаҳои таълимӣ вуҷуд надоранд, бояд аз маблағҳои мусодирашуда мактаб сохта шавад.

"Инҷо бояд мушкилоте ба миён наояд. Маблағ барои сохтмони мактабҳо кофӣ аст. Маблағҳо аз суратҳисоби махсусе, ки барои маблағҳои мусодирашудаи фасодкорон кушода шуда буд, пеш аз ҳама барои сохтмони мактабҳо дар вилоятҳо ва шаҳри Бишкек равона хоҳанд шуд", — таъкид кард раисҷумҳур.

Дар охири моҳи июн Муҳаммадқалий Абилғозиев, нахуствазири Қирғизистон, қарореро дар бораи таъсиси суратҳисоби махсус, барои маблағҳои мусодирашудаи фасодкорон ба имзо расонида буд. Маблағҳое, ки дар суратҳисоби махсус қарор доранд, танҳо бо қарори ҳукумат истифода мешаванд.

Инчунин раисҷумҳури кишвар таъкид кард, ки дар пойтахти кишвар дар баробари мактабҳои пурхонанда, ки бо сифати хуби донишомӯзӣ машҳуранд, мактабҳое низ ҳаст, ки ба камбуди хонанда рӯ ба рӯ мебошанд.

"Вазъ бояд комилан таҳлил шуда, дар низоми таҳсилоти миёна ислоҳот ворид карда шавад. Барои пешниҳоди таҳсилоти босифат бояд талабот ба мудирони мактаб ва омӯзгорон сахттар карда шавад", — гуфт вай.

Бино ба иттилои раисҷумҳури Қирғизистон ҳоло дар кишвар сохтмони 149 мактаб идома дорад ва то охири сол 78 муассисаи таҳсилотӣ ба истифода дода мешаванд.

Тибқи иттилои Вазорати маориф ва илми Қирғизистон дар кишвар 2262 мактаб фаъолият дошта, дар онҳо 1,2 миллион хонанда таҳсил мекунанд. 

55
Барчаспҳо:
вазорати маориф, ришва, коррупсия, Бишкек, мактаб, маблағ, Қирғизистон, Қирғизистон
Американские войска увозят раненых, архивное фото

Деги ҷӯшони Афғонистон: аз ихроҷи нирӯҳои Амрико кӣ бурд мекунад

185
(Таҷдидшуда 16:41 23.11.2020)
Дар ҳошияи ихроҷи нерӯҳои Амрико аз Афғонистон, дар вилоятҳои шимол ва ҷануби Афғонистон задухӯрдҳо миёни нируҳои давлатӣ ва Толибон (мамнуъ дар Русия) идома дорад

ДУШАНБЕ, 23 ноя — Sputnik, Александр Хроленко. Дар ҳамин ҳол, гурӯҳи террористӣ сатҳи технологии силоҳи худро афзоиш додааст. Ин гурӯҳ ҳоло ба  паҳподҳо ва силоҳҳои снайперии муосир дастрасӣ пайдо кардааст ва онро дар амал истифода мекунад.

Амрико тибқи созишномаи ба имзо расонидааш бо ҷунбиши Толибон  (аз 29 феврали соли 2020) нирӯҳояшро оҳиста-оҳиста аз Афғонистон ихроҷ дорад. Иҷрокунандаи вазири дифои Амрико Кристофер Миллер рӯзи 17 ноябри соли равон эълон кард, ки то 15 январ дар ин кишвар танҳо 2500 сарбоз боқӣ мемонаду халос. Имрӯзҳо дар қаламрави Афғонистон 4500 сарбози Амрико ҳузур дорад. Дар ҳамин ҳол, Толибон дар кишвар фаъол шуданд ва ба Амрико ишора мекунанд, ки амалиёти низомӣ ва масрафи зиёди маблағ дар ин кишвар бефоида аст.  

Волии вилояти Фарёб дар шимоли Афғонистон Нақибулло Файк ахиран эълон кард, ки ҷангҷӯёни Толибон ба камонҳои снайперии муосир ва дурбини дидор дар шаб дастрасӣ пайдо кардаанд. Барои ҷосусӣ Толибон (маманӯъ дар Русия) аз паҳподҳои хориҷӣ истифода мекунанд. Ин гуна пешравиҳои Толибон нирӯҳои давлатиро нигарон кардааст. Ин раванд ҳамчунин кишварҳои ҳамсояро низ нигарон кардааст.

Ҷанги шаҳрвандӣ

Дар Афғонистон ҳамарӯза даҳҳо сарбоз ва кормандони пулис дар даргириҳо бо Толибон кушта мешаванд. Ин раванд барои Афғонистон чунон як одат шудааст, ки ҳоло ҷомеъаи ин кишвар танҳо ба ҳамлаҳои террористӣ бо талафоти садҳо нафар аҳамият медиҳад. Аммо раванди имрӯза ба мустақари сулҳ дар ин кишвар умед намебахшад.

Толибон 18 ноябри соли равон дар вилояти Бағлон ба нирӯҳои давлатӣ ҳамла карданд. Ду сарбози Афғонистон кушта шуд. Дар ҳамин рӯз дар вилояти Фарёб боз дар як инфиҷор панҷ нафар корманди мақомоти амниятии Афғонистон кушта шуд. Миёни кушташудагон раҳбари пулиси вилоят Сафар Муҳаммад Бедор буд. Дар минтақаи Қайса (дар ҳамон вилоят) нирӯҳои амниятии Афғонистон тавасути бомборон аз ҳавопайми ҷангӣ 39 Толибро ба қатл расонданд.

Қаблан Толибон ба нуқтаи назоратӣ дар шимол шарқи вилояти Бадахшон ҳамла карда буданд. Дар ин задухӯрд 12 афсари пулис кушта ва даҳҳо нафари дигар захмӣ шуданд. Ҷанг дар тақрибан дар тамоми вилоятҳо идома дорад. Вазорати дифои Афғонистон хабар дод, ки 37 толиб дар минтақаи Дашти-Арча дар вилояти Қундуз нобуд карда шуд. Боз шаш толиби дигар дар вилояти Ҳирот ва даҳ нафари дигар дар Зобул нобуд карда шуд.

Бояд қайд кард, ки мақомоти амниятии Афғонистон 96 дарсади амалиётро худаш бидуни кумаки нирӯҳои хориҷӣ анҷом медиҳад. Ҳузури нирӯҳои хориҷӣ дар Афғонистон як шакли рамзӣ гирифтааст ва ҳузури онҳо дар ин кишвар бефоида шудааст.

Ахиран маълум шуд, ки нирӯҳои Австралия 39 шаҳрванди Афғонистнро, ки асир гирифта буданд дар солҳои 2009-2013 ба қатл расонданд. Роҳбари артиши Австралия генерал Ангус Кэмпбелл аз мақомоти Афғонистон пузиш хост ва гуфт 25 нафаре, ки дар ин ҷиноят гумонбар дониста мешаванд, ҷазо мегиранд.

Австралия дар амалиёти НАТО дар Афғонистон дар соли 2001  иштирок дошт. Имрӯз нирӯҳои  амниятии Афғонистонро беш аз 300 сарбози австралягӣ омӯзиш медиҳад.  Тибқи иттилои СММ дар даҳсолаи гузашта дар Афғонистон беш аз 100 ҳазор сокинони осоишта  кушта шуданд.

Столтенберг бар зидди Вошингтон

Йенс Столтенберг дабири кулли НАТО мухолифи хуруҷи нирӯҳои Амрико ва шариконаш аз Афғонистон шудааст.

Ин иқдом аз он шаҳодат медиҳад, ки Аврупо намехоҳад танҳо ба ҷанги бузурги Афғонистон баргардад. Аҷиб он аст, ки Столтенберг ахиран мавзуъи ҳузури нирӯҳои НАТО дар Афғонистонро бо раисҷумҳури ин кишвар Ашраф Ғанӣ Баррасӣ кард. Зимни мулоқот ӯ ваъда дод, ки бар мубориза бо терроризми байналмилалӣ ба ин кишвар кумак хоҳад кард ва омӯзиши нирӯҳои амниятӣ идома меёбанд.

Дар ҳамин ҳол, кишварҳои Осиёи Марказӣ ва Иттиҳодияи Аврупо аз Афғонистон талаб доранд, ки зуд оташбас эълон кунад, чунки ин ягона роҳ барои пайвасти Афғонистонро ба ҷараёнҳои иқтисодӣ дар минтақа аст. Русия талоши Афғонистнро барои узви СҲШ шуданаш комилан дастгирӣ дорад. Кобул фаъолона ҳамкориҳои дуҷонибаи худро бо Душанбе, Минск, Тошканд ва дигар кишварҳо пеш бурда истодааст.

Ахиран дар пойтахти Афғонистон нахуствазири Покистон Умрон Хон бо Ашраф Ғанӣ, раисҷумҳури Афғонистон ҳамкориҳои дуҷониба ва музокироти сулҳ бо Толибонро (мамнӯъ дар Русия) баррасӣ кард. Ню-Деҳлӣ низ мақомоти Афғонистонро ҳаматарафа дастгирӣ дорад.

Афғонистону Покистон, ки ба як дигар рақиби шадид ҳастанд, кушиш доранд ҷойгоҳи Амрикоро баъд аз хуруҷи нирӯҳо ба даст бигиранд. Қаблан намояндаи артиши Покистон генерал Бабар Ифтихор эълон кард, ки дипломатҳои Ҳинд дар Афғонистон ҳамеша амалиёти террористие, ки дар ин кишвар сурат мегиранд мунтазам идора мекунанд ва ҷангҷӯёнро  барои  амалиёти террористӣ дар ин кишвар маблағгузорӣ мекунанд.

Вале Вазорати умури хориҷаи Афғонистон ин хаббаро рад кард.  

Бояд гуфт, ки деги ҷӯшони Афғонистон даҳсолаҳост, ки ба сиёсат, иқтисод, амният ва зиндагии миллиардҳо нафар дар кишварҳои ҳамсоя таъсир мерасонад.

185
Билл Гейтс, архивное фото

Пешгӯии Билл Гейтс: ҷаҳонро пандемияи нав фаро мегирад

2204
(Таҷдидшуда 13:34 23.11.2020)
Миллиардери машҳур Билл Гейтс аз эҳтимоли ҳамагирии нави сартосарӣ дар ҷаҳон ҳушдор дод. Ӯ гуфт аз ҳамагирии кунунӣ бояд сабақ гирифт

ДУШАНБЕ, 23 ноя – Sputnik. Асосгузори Microsoft, Билл Гейтс аз пайдоиши пандемияи нав дар ҷаҳон пас аз 20 сол огоҳӣ дод.

Ин фарзияро миллиардер дар подкасте, ки бо ҳунарпеша Рашида Ҷонс ва сармутахассиси бемориҳои сироятии ИМА, Энтони Фаучи сабт кардааст, гуфт.

Дар ин барнома онҳо ҳамагирии коронавирус ва тағйироте, ки COVID-19 ба амал овард, муҳокима карданд.

Ҳангоми сӯҳбат, Ҷонс аз ӯ пурсид, ки оё пандемияи нав ҳатман инсониятро фаро мегирад.

"Бале. Ва мо хушбахт хоҳем буд, агар ин кор дар тӯли бист сол рӯй диҳад", - гуфт Гейтс ва шарҳ дод, ки эҳтимоли сенарияи дигар аст, ки пандемия метавонад хеле пештар - пас аз се сол ба амал ояд, менависад РИА Новости.

Муҳамадиев аз хатари асосии мавҷи дуввуми коронавирус барои Тоҷикистон гуфт

Чуноне бунёдгузори Microsoft қайд кард, инсоният барои пандемияи оянда бештар омода хоҳад буд. Ба гуфти ӯ, то он замон алгоритми муайян коркард хоҳад шуд ва зимни оғози ҳамагирӣ карантин ҷорӣ мешавад ва низоми тестгузаронии сироятшудагон хубтар ба роҳ монда мешавад.

СҶБ: Аврупоро мавҷи сеюми коронавирус дар аввали соли 2021 таҳдид мекунад

"Бори дуввум мо чунин беақл нахоҳем буд", - хулоса кард ӯ.

Ӯ таъкид кард, ки ҳамагирии оянда бо талафоти камтар дар пай хоҳад дошт, агар инсоният аз ин пандемия дарс бигирад.

Пештар Созмони ҷаҳонии беҳдошт инсониятро барои омодагӣ ба пандемияи нав даъват карда буд. Дар баробари ин созмон қайд кард, ки бархе аз кишварҳо бо инфрасохтори омода барои ҳолатҳои фавқуллода тавонистанд дарҳол барои пешгирии коронавирус чораандешӣ кунанд.

2204
Барчаспҳо:
вируси корона, огоҳӣ, Билл Гейтс
Мавзуҳо:
Пайомадҳои COVID-19 дар Тоҷикистон ва ҷаҳон
День 24 ноября

Ҷашнҳои рӯзи 24 ноябр дар Тоҷикистон ва ҷаҳон

0
(Таҷдидшуда 17:10 23.11.2020)
Рӯзи бисту чоруми ноябр, дар Тоҷикистон Рӯзи Парчами давлатӣ, дар Русия Рӯзи модарон ва дар Амрико Рӯзи дӯстон таҷлил мешавад

Рӯзи 24 ноябр дар ҷаҳон чӣ рух дод

Соли 1996 дар раъйпурсии умумихалқӣ дар Беларус беш аз 70 фоизи аҳолӣ Конститутсияи пешниҳоднамудаи президент Александр Лукашенкоро ҷонибдорӣ карданд.

БелТА
Президент Беларуси Александр Лукашенко

Соли 1961 изҳороти СММ дар бораи манъи истифодаи яроқи ядроӣ қабул гардид.

День 23 ноября
© Sputnik/ Стас Этвеш/ Мария Вишнякова

Соли 1969 киштии кайҳонии "Аполлон-12" ба самти Моҳтоб парвоз кард.

Соли 2005 дар шаҳри Алмато Анҷумани 5-уми мутахассисони корҳои молияи Қазоқистон доир гардид.

Рӯзи 24 ноябр дар Тоҷикистон чӣ рух дод

Соли 1986 дар фурудгоҳи шаҳри Душанбе аввалин маротиба ҳавопаймои ТУ-154 М фуруд омад.

Соли 2010 бо ширкати раисҷумҳури Тоҷикистон Эмомалӣ Раҳмон дар маркази шаҳри Душанбе бунёди парчами давлатии Ҷумҳурии Тоҷикистон расман оғоз ёфта, он 30 августи соли 2011 дар пояи 165 — метра, ки дар ҷаҳон баландтарин маҳсуб меёфт, парафшон гардид.

Соли 2017 дар шаҳри Душанбе ба муносибати 25 — солагии барқарорсозии муносиботи дипломатии Ҷумҳурии Тоҷикистон ва Корея конфронси илмӣ — амалии байналмилалӣ доир шуд.

Соли 2016 дар Маркази исмоилияи шаҳри Душанбе конфронси байналмилалии "Таҳсилоти пайваста барои рушди устувор" доир шуд.

Исмаилитский центр в Душанбе, архивное фото
© Sputnik / Амир Исаев
Исмаилитский центр в Душанбе, архивное фото

Соли 2017 дар шаҳри Душанбе шарҳи муштараки ҳарсолаи  амалигардии барномаи "Стратегияи миллии саломатии аҳолии Ҷумҳурии Тоҷикистон барои солҳои 2010-2020" гузаронида шуд.

Соли 2014 доираи васеи ҳамкории дуҷонибаи Тоҷикистону Кувайт баррасӣ шуд.

Ҷашнҳои рӯзи 24 ноябр

  • Дар Ҷумҳурии Тоҷикистон - Рӯзи Парчами давлатӣ.
  • Дар Русия - Рӯзи модарон.
  • Дар Амрико - Рӯзи дӯстон.

Рӯзи 24 ноябр дар Тоҷикистон кӣ ба дунё омадааст

Солҳои (1939-1984) – адабиётшинос Назира Қаҳарова.

Соли 1942 – Ҳунарманди халқии Сайрам Исоева.

Председатель согда Раджаббой Ахмадзода, мэр Худжанда Маъруф Мухамадзода посетили актрису Сайрам Исоеву
Пресс-служба мэра Худжанда
Председатель согда Раджаббой Ахмадзода, мэр Худжанда Маъруф Мухамадзода посетили актрису Сайрам Исоеву

Соли 1947 – рӯзноманигор ва нависанда, сармуҳаррири "Курер Таджикистана" Муҳаммадҷон Тоштемиров.

Соли 1950 – хабарнигори Шаҳбозхон Саркориев.

0
Барчаспҳо:
Ҷаҳон, Тоҷикистон, ҷашн
Мавзуъ
Ҷашнҳои рӯзи 17 ноябр дар Тоҷикистон ва ҷаҳон
Ҷашнҳои рӯзи 19 ноябр дар Тоҷикистон ва ҷаҳон
Зодрӯзи Бозор Собир ва инқилоб дар Мексика: ҷашнҳои рӯзи 20 ноябр
Ҷашнҳои рӯзи 21 ноябр дар Тоҷикистон ва ҷаҳон
Пирӯзии Парвиз Собиров ва унвонгирии Майк Тайсон: ҷашнҳои 22 ноябр
Ҷашнҳои рӯзи 23 ноябр дар Тоҷикистон ва ҷаҳон